“Alema 45–46: Ua Sisi A’e e Moronae le Tagavai o le Saolotoga,” Tusi Lesona a le Faiaoga o le Tusi a Mamona (2024)
“Alema 45–46,” Tusi Lesona a le Faiaoga o le Tusi a Mamona
Alema 45–46
Ua Sisi A’e e Moronae le Tagavai o le Saolotoga
Ina ua faalogo Moronae i fevaevaeaiga i lona nuu na afua mai ia Amalekia, sa ita o ia. Sa ia fatuina le tagavai o le saolotoga, ma o luga sa ia lisiina ai mea taua mo lona nuu ina ia manatua pea. O upu a Moronae na musuia ai tagata e faamalolosia a latou tautinoga i le Atua. O lenei lesona e mafai ona fesoasoani ia te oe e malamalama ai i auala e mafai ona e faaalia ai lou tuuto atu i le Atua.
Fesoasoani i tagata aoao ia manatua le Alii. O le manatuaina o le Alii ma Lona agalelei o se autu tumau i le Tusi a Mamona atoa (tagai 2 Nifae 10:2; Iakopo 6:4; Moronae 10:3). Valaaulia tagata aoga e auai i gaoioiga mo le aoaoina ia o le a fesoasoani ai ia i latou e manatua ai Iesu Keriso ma tomanatu ai pe na faapefea ona Ia faamanuiaina ma faamalosia i latou.
Sauniuniga a le tagata aoga: Valaaulia tagata aoga e fai se lisi o mea e musuia pe faamanatu atu ai ia i latou e tausi poloaiga a le Atua.
Gaoioiga e Ono Mafai Ona Aoao Ai
Aua nei galo
Faaali atu fesili nei. E mafai e tagata aoga ona tali atu i ai faatasi ai ma se paga pe i se vaega toalaiti. E mafai foi ona e faasoa atu se faataitaiga patino mai lou olaga.
-
O anafea na galo ai ia te oe se mea taua? O le a le mea na tupu o se taunuuga?
-
O a nisi o mea e te lē manao lava e faagalo? Aisea?
O le asō o le a e aoao ai e uiga i se taimi na lē manatua ai e sa Nifaē le Alii, e ui lava ina ua uma ona latou maua se laveaiga faavavega e ala mai ia te Ia. Atonu e te manatua mai le suesueina o le Alema 43–44 e faapea, na fesoasoani le Alii ia sa Nifaē e faatoilalo sa Lamanā i se taua, e ui ina sa matuā toalaiti sa Nifaē (tagai Alema 43:51–54).
Faitau le Alema 45:1, ma vaai pe na faapefea ona tali atu sa Nifaē ina ua mavae lenei manumalo faavavega.
-
O le a se mea sa e mauaina?
I faagasologa o le taimi lea o le filemu, sa tofia ai e Helamana le atalii o Alema ia faitaulaga ma aoao i le Ekalesia i le laueleele atoa, ma sa ia talai atu le afioga a le Atua faatasi ma ona uso.
Faitau le Alema 45:23–24; 46:1–5, 7–8, ma vaai pe na faapefea ona tali atu tagata i nei aoaoga.
-
O le a se mea e tūmātila ia te oe i uiga faaalia ma amioga a sa Nifaē i nei fuaiupu?
-
O le a se upumoni e mafai ona tatou aoao mai le fuaiupu 8 e uiga i le mea e mafai ona tupu pe a galo ia i tatou le Alii?
O se upumoni e tasi e mafai ona tatou aoao mai le Alema 46:8 e faapea, a galo ia i tatou le Alii, o le a faigofie ona taitaiina i tatou e fai le amioletonu.
Mafaufau pe na faapefea ona e vaaia le faamaoniga o lenei upumoni i lou lava olaga. A o faaauau pea ona e suesue i le asō, vaavaai mo aoaoga ia e mafai ona fesoasoani ia te oe e manatua atili ai le Alii ma faaalia ai lou tuuto atu ia te Ia.
Ua fatuina e Moronae le tagavai o le saolotoga
Sa ita Moronae ia Amalekia mo le faatupuina o nei feeseeseaiga i totonu o sa Nifaē.
Faitau le Alema 46:12–14, 19–20, ma vaavaai mo mea na faia e Moronae e musuia ai sa Nifaē ina ia faamaoni i le Atua.
A o le’’i fai atu fesili nei, mafaufau e lisi mea nei mai le fuaiupu 12 i luga o le laupapa: Atua, tapuaiga, saolotoga, filemu, aiga (avā ma fanau).
-
Aisea e te manatu ai na filifili Moronae e faaali atu upu nei mo isi e vaai i ai i lenei taimi faigata?
-
E faapefea ona e vaaia se tasi pe sili atu o nei mea ua faagaloina pe ua lē faamamafaina i le lalolagi i aso nei?
E pei o Moronae, ua valaaulia i tatou e taitai o le Ekalesia i o tatou aso ia manatua ma puipuia nei lava tulaga faatauaina e tasi. Faitau faamatalaga nei, ma vaavaai mo aoaoga o aso nei e faatatau i mea o loo lisiina atu i luga o le tagavai o le saolotoga.
Tufatufa atu pepa e tufa o loo i lalo ma tuu atu i tagata aoga se taimi e suesue taitoatasi ai pe faatasi foi ma se paga faamatalaga o loo i ai.
Pe e mafai foi ona e lolomiina taitasitasi ia faamatalaga ma faaali atu i luga o puipui i le potu atoa. O faamatalaga taitasi e mafai ona lolomiina pe faapipii i luga o se ata o se fu’a ia foliga o se tagavai o le saolotoga. E mafai ona tuu atu i tagata aoga se taimi e savalivali solo ai ma faitau ia faamatalaga taitasi.
O Aoaoga o Aso Nei e Fesootai i le Tagavai o le Saolotoga
Tusi Lesona a le Faiaoga o le Tusi a Mamona (2024)—“Alema 45–46: Ua Sii Ae e Moronae le Tagavai o le Saolotoga”
“Mo le manatuaina o lo tatou Atua”
Ua aoao mai Elder Neil L. Andersen o le Korama a Aposetolo e Toasefululua:
E toatele o i le lalolagi e itiiti so latou iloa e uiga ia Iesu Keriso, ma i nisi vaega o le lalolagi lea sa folafolaina ai Lona suafa mo le tele o seneturi, ua faaitiitia le faatuatua ia Iesu Keriso. …
A o faaitiitia le tautatala o le lalolagi e uiga ia Iesu Keriso, e ao ina faateleina lo tatou tautatala e uiga ia te Ia. A o faaali atu o tatou lanu (uiga) moni o ni Ona soo, o le toatele o loo siomia i tatou o le a saunia e faalogo. (Neil L. Andersen, “Ua Matou Tautalatala e uiga ia Keriso,” Ensign po o le Liahona, Nov. 2020, 88, 90)
“Mo le manatuaina o … la tatou tapuaiga”
Sa aoao mai Peresitene Dallin H. Oaks o le Au Peresitene Sili:
Afai tatou te taofia le faatauaina o a tatou lotu mo soo se mafuaaga, ua tatou faamata’uina lo tatou olaga patino faaleagaga, ma o aofaiga iloga o tagata ua vavaeeseina i latou lava mai le Atua ua faaitiitia ai Ana faamanuiaga i o tatou malo.
O le auai ma le toaaga i se lotu e fesoasoani lea ia i tatou ia avea ma ni tagata lelei atu ma ni tosinaga lelei atu i olaga o isi. I le lotu ua a’oa’oina ai i tatou i le auala e faaaogaina ai mataupu faavae faalelotu. Tatou te a’oa’o mai le tasi mai le isi. …
… Ou te tatalo ia tatou tumau mausali i nei aafiaga faaleEkalesia a o tatou sailia le ola e faavavau, o le meaalofa silisili o meaalofa uma a le Atua. (Dallin H. Oaks, “O Le Manaomia o se Ekalesia,” Liahona, Nov. 2021, 24, 26)
“Mo le manatuaina o lo tatou … saolotoga”
Na aoao mai Elder Ronald A. Rasband o le Korama a Aposetolo e Toasefululua:
O le a le saolotoga faaletapuaiga?
O le saolotoga e tapuai ai i ona ituaiga eseese uma: saolotoga e faapotopoto ai, saolotoga e tautala ai, saolotoga e faatino ai talitonuga faaletagata lava ia, ma le saolotoga mo isi e faia ai foi nā mea uma. O le saolotoga faaletapuaiga e mafai ai e i tatou taitoatasi ona filifili mo i tatou lava le mea tatou te talitonu i ai, pe faapefea ona tatou ola ma faatino e tusa ai ma lo tatou faatuatuaga, ma le mea o faamoemoeina mai e le Atua ia i tatou. …
Ou te valaaulia outou ia taulamua i le faamoemoe o le saolotoga o tapuaiga. O se faailoaga o le mataupu faavae o le faitalia na tuuina mai e le Atua.
O le saolotoga faaletapuaiga e aumaia ai le fuataga tatau i filosofia faatautavā. O le lelei o tapuaiga, o lona aafiaga lelei lautele, ma faatinoga o le alofa i aso taitasi lea e na o tapuaiga e faaosofia ai, e na o le faateleina pe a tatou puipuia le saolotoga e faaali atu ai ma faatino i luga o talitonuga autu. (Ronald A. Rasband, “Ia Faamaloloina le Lalolagi,” Liahona, Me 2022, 91, 93)
“Mo le manatuaina o … lo tatou filemu”
Na aoao mai Elder Jeffrey R. Holland o le Korama a Aposetolo e Toasefululua:
O le Foma’i o manu’a uma, o Lē e faasa’oina mea sesē uma, ua augani mai ia i tatou ia galulue faatasi ma Ia i le galuega faigata o le faatupuina o le filemu i se lalolagi e na te lē mauaina i se isi lava ala. …
… Ou te talosagaina ai outou ia avea ma ē e faatupu le filemu—ia fiafia i le filemu, ia saili le filemu, ia fatuina le filemu, ma ia opogi le filemu. Ou te faia lena talosaga i le suafa o le Aloalii o le Filemu. (Jeffrey R. Holland, “O le Galuega o le Faaleleiga,” Ensign po o le Liahona, Nov. 2018, 79)
“Mo le manatuaina o … ō tatou [aiga]”
Na aoao mai e Sister Bonnie L. Oscarson, o lē sa avea ma Peresitene Aoao o Tamaitai Talavou:
O tagata uma, e tusa lava po o a o latou tulaga faaleulugalii poo le aofai o le fanau, e mafai ona avea ma ē e puipuia le fuafuaga a le Alii o loo faamatala mai i le folafolaga o le aiga. Afai o le fuafuaga lea a le Alii, e tatau foi ona avea ma a tatou fuafuaga! …
… Ia tatou fesoasoani e fausia le malo o le Atua i le tulai lea i luga ma le lototoa ma le avea ai ma tagata e puipuia le faaipoipoga, tulaga faamatua, ma le aiga. E manaomia i tatou e le Alii ia avea ma autau lotototoa, tumau, ma lē mafaagaeetia o ē o le a puipuia Lana fuafuaga ma aoao atu Ana upumoni i augatupulaga o i le lumanai. (Bonnie L. Oscarson, “O Tagata e Puipuia le Folafolaga,” Ensign po o le Liahona, Me 2015, 15, 17)
Valaaulia tagata aoga e faasoa mai se mea na tūmātila ia i latou mai nei faamatalaga. Talanoaina ni auala patino e mafai ona latou manatua ma puipuia ai i se auala faa-Keriso ia mea o loo lisiina i luga o le tagavai o le saolotoga.
-
O a nisi o auala e mafai ona e manatua ai tulaga faatauaina o loo lisiina i le tagavai o le saolotoga?
-
O a nisi o auala e mafai ona e puipuia ai i latou i se auala faa-Keriso?
O le aafiaga o le tagavai o le saolotoga
Ina ua uma ona faamanatu atu e Moronae nei upumoni taua, o le toatele o sa Nifaē na osia se feagaiga e faapea o le a latou lē lafoa’ia lava le Atua ma o le a taumafai mo le filemu (tagai Alema 46:21–22, 28–31).
Faitau le Alema 46:36–38, ma vaai mo mea na faia e Moronae e fesoasoani ai i lona nuu ia manatua le Atua ma isi mea taua o loo lisiina i luga o le tagavai o le saolotoga.
-
O lē fea o mea o loo lisiina i luga o le tagavai o le saolotoga e te lagona e te manao e manatua pe puipuia atoatoa atili i lou olaga?
-
O le a se mea e mafai ona e faia e manatua atili ai lenei autu pe puipuia ai ou talitonuga e uiga i ai?
Molimau atu e uiga i upumoni na talanoaina i le asō. Uunaia tagata aoga e faia ni taumafaiga e faamamalu ma manatua ai le Atua ma isi mea o loo lisiina i le tagavai o le saolotoga.