“Atamai i Aoaoga Faavae Iloiloga 15: Malamalama ma Faamatala,” Tusi Lesona a le Faiaoga o le Tusi a Mamona (2024)
“Atamai i Aoaoga Faavae Iloiloga 15,” Tusi Lesona a le Faiaoga o le Tusi a Mamona
Atamai i Aoaoga Faavae Iloiloga 15
Malamalama ma Faamatala
Ona e matuā taua tele le talalelei a Iesu Keriso, o lea e finagalo ai le Tama Faalelagi i Ana fanau uma ia iloa ona upumoni. O le aoao e faamatala upumoni o le talalelei i au lava upu e mafai ona fesoasoani e faamanino ai lou malamalama. O lenei lesona e mafai ona fesoasoani e faateleina ai lou malamalama ma lou gafatia e faamatala ai upumoni o loo maua i fuaitau o le atamai i aoaoga faavae mai le Tusi a Mamona.
Faataitai le faamalamalamaina atu o upumoni o le talalelei. Tuu atu ni avanoa mo tagata aoga e faamalamalama, faasoa, ma molimau atu ai i upumoni o le talalelei. A o latou faasoa mai, e mafai e tagata aoga ona maua se molimau loloto atu i mea o loo latou faailoaina mai. E ala i le mana o le Agaga Paia, e mafai foi e upu a tagata aoga ona i ai se aafiaga maoa’e i loto ma mafaufau o i latou o loo faalogologo i ai.
Sauniuniga a le tagata aoga: Valaaulia tagata aoga e mafaufau e uiga i se mea ua latou malamalama lelei i ai, e pei o se mea e fiafia i ai, taaloga, po o se mataupu i le aoga. Tuu atu ia i latou e mafaufau i mea na fesoasoani ia i latou e maua ai se malamalama loloto, ma valaaulia i latou e faasoa mai o latou manatu.
Gaoioiga e Mafai Ona Aoao Ai
Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina ua saunia e le faatonu po o le taitai faamaopoopo o le eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.
Malamalama sesē
Mafaufau e tusi le upu malamalama sesē i luga o le laupapa ma valaaulia tagata aoga e faasoa mai mea e oo mai i le mafaufau pe a latou mafaufau i lenei upu. Ona faasoa atu lea o faamatalaga o loo i lalo. O se isi auala, mafaufau e faasoa atu se aafiaga na e oo i ai i se malamalama sesē.
O tala nei mai ia Elder Joseph B. Wirthlin (1917–2008) o le Korama a Aposetolo e Toasefululua ma Uso Bradley R. Wilcox, Fesoasoani Lua i le Au Peresitene Aoao o Alii Talavou, o loo faapupula mai ai nisi o malamalama sesē malie. A o e suesue i ai, mafaufau loloto i ou aafiaga i ni malamalama sesē.
Ou te manatua le taimi na alu ai se tasi o o’u afafine i se tafaoga faamasani [tauaso] (ma se paaga na te le’i iloaina muamua). Na uma ona fai ana teuga ma faatalitali mo le taunuu mai o lana paaga, ae tatagi loa ma le logo o le faitotoa. Sa savali mai i totonu se alii na fai si matua teisi, ae sa taumafai lava lo’u afafine e faaaloalo i ai. Sa ia faailoa mai le alii ia te a’u ma lo’u toalua ma isi o le fanau, ona fai loa lea o lona ofutele ma savavali ese atu i fafo. Sa matou matamata atu a o oso o ia i totonu o le taavale, ae sa le’i minoi le taavale. Mulimuli ane, na toe oso i fafo lo’u afafine mai le taavale, ma toe tamoe mai i totonu o le fale, ma le maasiasi. O le tamaloa sa faapea a ia o lana paaga tafao lea e le’i vaai i ai, sa sau e piki le isi o ma afafine na malie e tausitama mo i la’ua ma lona toalua. (Joseph B. Wirthlin, “Ia Tuu Po o le A Lava se Mea e Tupu, Ia Fiafia Pea,” Ensign po o le Liahona, Nov. 2008, 27)
Sa ou auina atu se feau i lo’u afafine ma lo’u atalii-faaletulafono e faaaoga ai le vaega o le leo-i le-tesi i la’u telefoni. Sa ou fai atu, “Ei (Hey), oulua na. Ioe (Sure) alofa atu ia oulua.” Na la maua le, “Inoino (Hate) ia oulua. Tatau (Should) na alofa ia oulua.” Pe le ofoofogia ea le faigofie ona malamalama sesē i se feau lelei ma i ai se faamoemoega lelei? (Bradley R. Wilcox, “O Le Agavaa E Le o le Atoatoa,” Liahona, Nov. 2021, 61)
E ui o nisi o le malamalama ses e mafai ona mālie, ae o le malamalama sesē i upumoni e uiga ia Iesu Keriso, Lana talalelei, ma lo tatou faaolataga e faavavau e mafai ona taitai atu ai i taunuuga ogaoga.
Afai e manaomia e tagata aoga se fesoasoani i le taliina o fesili e sosoo ai, mafaufau e faaali atu se lisi o upumoni o loo aoaoina i fuaitau o le atamai i aoaoga faavae o loo faaaogaina i lenei lesona, e pei o fesili nā e uiga i le Togiola a Iesu Keriso po o poloaiga.
-
O a nisi o aoaoga po o upumoni a le Faaola ia e mafai ona faigofie ona malamalama sesē i ai i aso nei?
-
E ono mafai faapefea e le malamalama sesē i upumoni e uiga ia Iesu Keriso, Lana fuafuaga, po o Lana talalelei ona aafia ai o tatou olaga i le taimi nei ma i le lumanai?
Fuaitau o le atamai i aoaoga faavae
O se tasi o faamoemoega o le atamai i aoaoga faavae o le fesoasoani lea ia te oe ia iloa aoaoga faavae a le Faaola ma mafai ai ona e faamatala atu i isi . O lenei ituaiga o malamalama e sili atu nai lo na o ni faamatalaga papa’u. O se malamalamaaga loloto ma se gafatia le faaaogaina ai o le aoaoga faavae i lou olaga ma tulaga. O lenei malamalamaaga o le a fesoasoani ia te oe ia lava le faamatalaina manino o le aoaoga faavae a le Faaola ma o i latou e te faamatalaina atu i ai o le a ono lē malamalama sesē ai.
Faitau i fasifuaitau autu o mau o le atamai i aoaoga faavae i le siata lenei. Mafaufau e maitau po o a upumoni e te lagona ua e malamalama lelei i ai ma po o lē fea atonu e te manao e malamalama lelei atili i ai.
Faaali atu le siata lenei, pe tuuina atu ni ona kopi i tagata aoga.
Atamai i Aoaoga Faavae o le Tusi a Mamona: Alema–Moronae
Tusi Lesona a le Faiaoga o le Tusi a Mamona (2024)
|
Mau Faasino |
Fasifuaitau Autu o le Mau |
|---|---|
Mau Faasino | Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.” |
Mau Faasino | Fasifuaitau Autu o le Mau “E ao ona faia o se togiola, … o se taulaga e ao ina le gata ma faavavau.” |
Mau Faasino | Fasifuaitau Autu o le Mau “Aua e te toe alu e tusa ma tuinanau o ou mata.” |
Mau Faasino | Fasifuaitau Autu o le Mau “E lei avea lava le amioleaga ma fiafia.” |
Mau Faasino | Fasifuaitau Autu o le Mau “O luga lava o le papa o lo tatou Togiola … e ao ina oulua atinae ai lo oulua faavae.” |
Mau Faasino | Fasifuaitau Autu o le Mau “Na ou tuu atu ai i le finagalo o le Tamā i mea uma mai le amataga.” |
Mau Faasino | Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.” |
Mau Faasino | Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.” |
Mau Faasino | Fasifuaitau Autu o le Mau “Aua tou te le maua se molimau seia uma ona tofotofoina o lo outou faatuatua.” |
Mau Faasino | Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.” |
Mau Faasino | Fasifuaitau Autu o le Mau “O le alofa mama o le alofa le pona lea o Keriso.” |
Mau Faasino | Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.” |
© 2023 by Intellectual Reserve, Inc. Ua taofia aiā tatau uma.
Faateleina o le malamalama
Filifili se tasi o fuaitau o le atamai i aoaoga faavae lea e te manao e malamalama atili i ai, ma faaaoga e faamae’a ai le gaoioiga lenei. Afai e lava le taimi, mafaufau e toe fai le gaoioiga lenei e faaaoga ai se fuaitau e ese ai o le atamai i aoaoga faavae.
Faaali atu pe tuu atu i tagata aoga ia faatonuga nei. Mafaufau e valaaulia tagata aoga e galulue i ni paga po o ni vaega toalaiti.
Manatu faapea ua talosagaina oe e aoao atu se tagata fou liliu mai po o se vaega o tamaiti i le vaitausaga a le Peraimeri e uiga i lenei fuaitau. Saunia se tautalaga po o se lesona e tolu i le lima minute e fesoasoani e faalolotoina ai le malamalama i upumoni na aoaoina i lenei fuaitau. Atonu e aoga le taliina o fesili nei mo oe lava ae e te le’i mafaufau pe faapefea ona e aoao atu upumoni i isi.
-
Faailoa upu ma fasifuaitau autu, aemaise lava upu ma fasifuaitau ia e ono malamalama sesē i ai. Mafaufau e sue faauigaga po o le sailia o mau fefaasinoa’i i tusitusiga paia ia e mafai ona fesoasoani e faamanino ai le fuaitau. Aisea e taua tele ai nei upu po o fasifuaitau autu?
-
E mafai faapefea ona fesootai lenei fuaitau faatusi paia i le Faaola? O le a se mea ua e aoaoina mai, pe e uiga foi ia te Ia? O a ni auala ua avea ai o Ia ma se faataitaiga o upumoni i lenei fuaitau?
-
O a ni mea faitino e te ono faaaogaina pe faaali atu e fesoasoani e faamalamalama ai le sāvali o lenei mau?
Mafaufau e tuu atu i tagata aoga e aoao atu a latou lesona i le tasi ma le isi i ni paga po o ni vaega toalaiti. E mafai foi ona e valaaulia se tagata aoga se toatasi pe toalua e faasoa mai i le vasega atoa. Tuu atu i tagata aoga e talanoaina mea na latou aoaoina ma lagonaina mai lenei faatinoga. Molimau atu i le taua o le malamalama i upumoni i fuaitau o le atamai i aoaoga faavae.