Seminare
Alema 43–52: Vaaiga Aoao

“Alema 43–52: Vaaiga Aoao,” Tusi Lesona a le Faiaoga o le Tusi a Mamona (2024)

“Alema 43–52,” Tusi Lesona a le Faiaoga o le Tusi a Mamona

Alema 43–52

Vaaiga Aoao

O le vaega mulimuli o le tusi a Alema o loo faamatala ai se taimi o finauga ma taua. Ina ua vaai atu Moronae i le toatele o sa Nifaē ua amata ona galo le Alii, sa oo ina popole o ia mo le manuia faaleagaga ma le faaletino o lona nuu. Sa ia fatuina le tagavai o le saolotoga, ma i ona luga sa ia lisiina ai mea taua mo lona nuu ina ia manatua pea. O ana upu na musuia ai i latou e faamalosia ai la latou tautinoga i le Atua. O fuafuaga faatino na latou faaaogaina i a latou taua e faasaga ia sa Lamanā e mafai ona fesoasoani ia i tatou e atiina a’e ai fuafuaga faatino e mafai ona tatou faaaogaina i a tatou taua i aso taitasi e faasaga ia Satani.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona mua’i saunia mo lesona taitasi.

Alema 43, 48–50

Faamoemoega o le lesona: O lenei lesona e mafai ona fesoasoani i tagata aoga e faatatau tusitusiga paia ia i latou lava e maua ai le puipuiga a le Alii mai osofaiga faifai pea ma le faateleina a le fili.

  • Sauniuniga a le tagata aoga: Valaaulia tagata aoga e suesue le Alema 43:18–21, 37–38, ma vaavaai mo lesona ia e mafai ona fesoasoani ia i latou i le latou taua e faasaga ia Satani.

  • Anotusi e faaali atu: O laasaga e fa mo le faatatauina o tusitusiga paia ia i tatou lava

  • Fautuaga faafaiaoga faavitiō: Faaali atu laasaga e fa mo le faatatauina o tusitusiga paia. Ia muai faailoa atu i tagata aoga e faapea o le a latou faaaogaina nei laasaga e i latou lava pe a uma ona galulue e ala i se faataitaiga o se vasega. E ono uunaia ai i latou e lenei mea e faaola pea a latou meapueata ma gauai atu i le vaega muamua o le lesona ina ia latou saunia e galulue na o i latou ma le mataalia sili atu.

Alema 45–46

Faamoemoega o le lesona: O lenei lesona e mafai ona fesoasoani ai i tagata aoga ia malamalama i auala e mafai ona latou faaalia ai lo latou tuuto atu i le Atua.

  • Sauniuniga a le tagata aoga: Valaaulia tagata aoga e fai se lisi o mea e musuia pe faamanatu atu ai ia i latou e tausi poloaiga a le Atua.

  • Pepa e tufa atu: “O Aoaoga o Aso Nei e Fesootai i le Tagavai o le Saolotoga”

  • Fautuaga faafaiaoga faavitiō: Mafaufau e faaali atu faamatalaga taitasi mai taitai aoao o le Ekalesia ina ia mafai ai e tagata aoga ona mulimuli atu a o e faitauina leotele.

Alema 47–48

Faamoemoega o le lesona: O lenei lesona e mafai ona fesoasoani ai i tagata aoga e tetee atu ai i taumafaiga a Satani ia maua le mana e pulea ai i latou.

  • Sauniuniga a le tagata aoga: Valaaulia tagata aoga e faitau le 2 Nifae 28:7–8, 21–22 ma mafaufau i faataitaiga o le auala e faaaoga ai e Satani nei togafiti i o tatou aso.

  • Ata: O se ‘ofe fagota ma se māunu

  • Vitiō: “E, o Le Togafiti Poto a lē Ua Leaga” (16:56; matamata mai le faailo taimi 0:43 i le 2:30)

  • Ata: O Leoneti ma Amalekia i le Mauga o Anetipa

  • Fautuaga faafaiaoga faavitiō: Mafaufau e faaaoga le vaega o le laupapa paepae e faaali ai le atatusi o Leoneti i le tumutumu o le mauga. Valaaulia tagata aoga e fai faatasi le gaoioiga o le atatusi i luga o le laupapa paepae. Uunaia i latou taitoatasi e auai.

Iloilo Lou Aoaoina 6

Faamoemoega o le lesona: O lenei lesona ua faamoemoe e fesoasoani ai i tagata aoga e iloilo ni sini sa latou faatutūina ma le tuputupu a’e ua latou oo i ai i le taimi o a latou suesuega lata mai nei o le Tusi a Mamona.

  • Sauniuniga a le tagata aoga: Valaaulia tagata aoga e o mai saunia e faasoa mai mea na latou aoaoina po o ni auala na latou tuputupu a’e ai faaleagaga i nai vaiaso ua tuanai. E ono fesoasoani le tuu atu i tagata aoga e toeiloilo a latou api talaaga mo suesuega po o faamatalaga i a latou tusitusiga paia.

  • O Ata: Meafaigaluega e faaaoga e fua ai le soifua maloloina faaletino po o le tuputupu a’e

  • Fautuaga faafaiaoga faavitiō: Mo le vaega “Faamatala upumoni taua e uiga i le ata o le faaolataga po o le matafaioi a Iesu Keriso,” e mafai ona e vaevaeina tagata aoga i ni vaega se lua ma tuu vaega taitasi i se potu vaevae. E mafai ona tofia se tasi vaega e talanoaina le gaoioiga 1, ma le isi e mafai ona talanoaina le gaoioiga 2. A uma le talanoaga, e mafai e se volenitia mai vaega taitasi ona aotele le tali a le latou vaega ma le vasega atoa.

Atamai i Aoaoga Faavae Iloiloga 15

Faamoemoega o le lesona: O lenei lesona e mafai ona fesoasoani e faateleina ai le malamalama o tagata aoga ma lo latou gafatia e faamalamalama ai upumoni o loo maua i fuaitau o le atamai i aoaoga faavae mai le Tusi a Mamona.

  • Sauniuniga a le tagata aoga: Valaaulia tagata aoga e mafaufau e uiga i se mea ua latou matuā malamalama lelei i ai, e pei o se mea e fiafia i ai, taaloga, po o se mataupu o le aoga. Tuu atu ia i latou e mafaufau i mea na fesoasoani ia i latou e maua ai se malamalama loloto ma valaaulia i latou e faasoa mai o latou manatu.

  • Vitiō: “Ia Tuu Po o le A Lava se Mea e Tupu, Ia Fiafia Pea” (13:29; matamata mai le faailo taimi 4:50 i le 5:44); “O Le Agavaa E Le o le Atoatoa” (10:52; matamata mai le faailo taimi 0:00 i le 0:27)

  • Anotusi e faaali atu: “Atamai i Aoaoga Faavae o le Tusi a Mamona: Alema–Moronae”

  • Fautuaga faafaiaoga faavitiō: A o le’i amataina le lesona, mafaufau e faaaoga le vaega o le laupapa paepae e tusi ai le upu malamalama sesē ma valaaulia tagata aoga e faasoa mai mea e oo mai i le mafaufau pe a latou manatunatu i lenei upu. Ona faasoa atu lea o faamatalaga o loo tuuina atu i le lesona. O se isi auala, mafaufau e faasoa atu se aafiaga patino o se malamalama sesē.