Seminare
Alema 42, Vaega 2: “Ua Fai Mo le Alofa Mutimutivale le Tagata ua Salamo”

“Alema 42, Vaega 2: ‘Ua Fai Mo le Alofa Mutimutivale le Tagata ua Salamo’” Tusi Lesona a le Faiaoga o le Tusi a Mamona (2024)

“Alema 42, Vaega 2,” Tusi Lesona a le Faiaoga o le Tusi a Mamona

Alema 42, Vaega 2

“Ua Fai Mo le Alofa Mutimutivale le Tagata ua Salamo”

Ata
ata vali o Iesu Keriso o loo faaloaloa mai se aao alofa mutimutivale

Ina ia fesoasoani i lona atalii o Korianetona ia salamo, sa aoaoina o ia e Alema e uiga i le faamasinogatonu ma le alofa mutimutivale o le Atua ma le ala e “leai se tasi ae ua nao e lava ua salamo moni e faaolaina” (Alema 42:24). Pe a tatou malamalama i le fuafuaga o le alofa mutimutivale a le Tama Faalelagi, ua tatou naunau atu ina ia salamo. O lenei lesona e mafai ona fesoasoani ia te oe e malamalama ai pe faapefea e le Togiola a Iesu Keriso ona faatagaina oe ia maua le alofa mutimutivale ua folafola mai i le fuafuaga a le Tama Faalelagi.

Valaaulia tagata aoao e molimau ia Iesu Keriso. O le a suia loto o tagata aoao a o latou agai atu mai le na o le talanoa e uiga ia Iesu Keriso i le molimau atu ia te Ia o lo latou Togiola patino ua latou iloa, alofa, ma faatuatuaina. Vaavaai mo ni auala aoga e valaaulia ai tagata aoga e faasoa atu a latou molimau ia Iesu Keriso i le tasi ma le isi.

Sauniuniga a le tagata aoga: Valaaulia tagata aoga e sue se faataitaiga i tusitusiga paia o se tagata po o se vaega o tagata o ē na faaalia le salamo faamaoni.

Gaoioiga e Mafai Ona Aoao Ai

O le tulafono na te faaooina le faasalaga

O mea nei ua faamoemoe e fesoasoani ia te oe e iloilo ai le malamalama o tagata aoga i le faamasinogatonu ma le alofa mutimutivale o le Atua. Pe a manaomia, toe iloilo faauigaga o le faamasinogatonu ma le alofa mutimutivale mai le lesona o le “Alema 42, Vaega 1.”

  • O a nisi o tulaga e manaomia ai le faamasinogatonu? Ae a le alofa mutimutivale?

Ua faamanuiaina i tatou uma ona o le Tama Faalelagi e faamasinotonu ma alofa mutimutivale. Ona o le fuafuaga a le Tama Faalelagi, o le a toe avatu ai i tatou uma i le afioaga o le Atua ina ia faamasinoina (tagai Alema 42:23). I lona tulaga agasala, sa le’i saunia ai Korianetona mo le faamasinoga. Na faamoemoe Alema o le aoaoina o ia e uiga i le fuafuaga a le Tama Faalelagi o le a taitai atu ai Korianetona e salamo ma auauna atu i le Atua. A o e suesueina le Alema 42, vaavaai mo mea na aoao atu e Alema ia Korianetona e mafai ona ia faia e maua ai le alofa mutimutivale o le Atua.

Atonu e aoga i tagata aoga le talanoaina o tulafono eseese i sosaiete, pe faapefea ona manuia sosaiete pe a tausia le tulafono, ma pe aisea e taua ai le i ai o taunuuga mo le solia o le tulafono. E mafai e lenei mea ona saunia ai tagata aoga e faitau le Alema 42:17–21.

E pei lava ona i ai i le tulafono se matafaioi taua i sosaiete, o tulafono o se vaega taua o le fuafuaga a le Tama Faalelagi.

Faitau le Alema 42:17–21, ma vaavaai mo nisi o faamoemoega o le tulafono i le fuafuaga a le Tama Faalelagi (tagai foi 2 Nifae 2:13).

  • O le a se mea na e aoaoina e uiga i le tulafono i le fuafuaga a le Tama Faalelagi?

Tusi se fua [faatautau] e faapei o lenei i luga o le laupapa. Mafaufau e faaaoga le atatusi e fesoasoani ai i tagata aoga ia malamalama i le sootaga i le va o le faamasinogatonu, tulafono, ma le alofa mutimutivale. Uunaia tagata aoga e fai atu ni fesili i le āluga o le lesona.

A o i ai ni fesili a tagata aoga, atonu e fesoasoani le faasoa atu o se tasi pe sili atu foi o faamatalaga mai le vaega o “Manatu ma Talaaga o Faamatalaga”.

Ata
atatusi o fua o le mamafa

Faaigoa ia fua “Faamasinogatonu.”

E tusa ai ma le tulafono o le faamasinogatonu tatou te maua taunuuga mo a tatou faatinoga. Tatou te maua faamanuiaga pe a tatou usita’ia le tulafono ma le faasalaga pe a tatou solia le tulafono.

Faaigoa le tasi itu o le fua “solia o le tulafono” ma le isi itu “faasalaga e tauave e le tagata agasala.”

Afai tatou te solia se tulafono, o le a lē paleni ia fua [faatautau]. E manaomia e le faamasinogatonu fua ina ia paleni. O se totogi (po o se faasalaga) e manaomia e faapaleni ai fua (tagai Alema 42:22).

  • O le a le mea o le a tupu ia i tatou pe afai e na o le faasalaga e mafai ona faapaleni ai fua o le faamasinogatonu?

O le faasalaga mo le agasala o le oti faaleagaga, le “vavae ese mai luma o le Alii” (Alema 42:11).

E maua e le alofa mutimutivale i latou o ē e salamo

Ona o le Atua o “se [Atua] ua atoatoa, faamasinotonu, ma se Atua alofa mutimutivale foi” (Alema 42:15), na Ia saunia ai se fuafuaga ina ia mafai ai ona tatou maua le alofa mutimutivale pe a tatou agasala.

Faitau le Alema 42:15, 22–25, ma vaavaai mo mea na saunia e le fuafuaga a le Tama Faalelagi e faapaleni ai fuafaatautau o le faamasinogatonu.

Fetuuna’i le faaigoaina o fua i luga o le laupapa e tusa ai ma faatonuga nei.

Kolosi ese pe tapē upu tagata agasala mai fua o le faamasinogatonu ma sui i le Faaola.

Ina ia fesoasoani i tagata aoga e taulai atu ia Iesu Keriso ma faia se talanoaga anoa, mafaufau e faitau nisi po o mau uma nei o loo lisi atu i faapuipui. Talanoaina pe faapefea ona fesoasoani fuaitau fautuaina e tali ai fesili.

  • E faapefea ona e faamatalaina le siata o fua o le faamasinogatonu i au lava upu?

  • O le a le mea na faia e Iesu Keriso ina ia mafai ai ona faasafua atu le alofa mutimutivale? (tagai Mataupu Faavae ma Feagaiga 19:16–19).

  • O le a se mea e manaomia mai ia i tatou e maua ai le alofa mutimutivale o le Faaola? (tagai Alema 12:32–34; 34:15–16).

O se tasi o mataupu faavae tatou te aoaoina e faapea, afai tatou te salamo moni, o le a tatou maua le alofa mutimutivale e ala i le Togiola a le Faaola.

Ina ia malamalama i le uiga o le “salamo moni,” e mafai e tagata aoga ona faitau nisi o mau o loo fautuaina atu i lalo. E mafai foi ona latou toe mafaufau i le sauniuniga a le tagata aoga ma faasoa mai ni faataitaiga mai tusitusiga paia o tagata taitoatasi o ē na salamo moni.

O le salamo o lona uiga ia lotomaualalo ma faailoa atu le faanoanoa ona o le agasala (tagai 2 Korinito 7:10; 2 Nifae 2:7; Mosaea 4:10)

  • Aisea e te manatu ai ua na o ē ua salamo moni e faaolaina?

Vaai faalemafaufau e faapea o oe o Korianetona ma e te le’i salamo lava i au agasala uma. Faitau le Alema 42:26–30, ma vaavaai mo upu po o fasifuaitau o le a faaosofia ai oe ia e salamo.

  • O a upu po o fasifuaitau e ono faaosofia ai oe ia e salamo? Aisea?

Ina ua uma ona aoao atu Korianetona e uiga i le fuafuaga a le Tama Faalelagi (tagai Alema 40–42), sa faamanatu atu e Alema ia Korianetona e faapea na “valaauina o ia e le Atua e talai atu le afioga” e “aumai agaga i le salamo” (Alema 42:31). Na salamo Korianetona i ana agasala ma faataunuuina lona valaauga (tagai Alema 49:30).

Manatunatu i lou manaomia ona salamo, ma mafaufau pe mafai faapefea ona e salamo moni. Manatua o le a faamagalo oe e le Tama Faalelagi pe a e salamo (tagai Mosaea 26:30; Isaia 1:18).

Tusi ni fuaiupu se tolu pe fa e faamalamalama ai le matafaioi o le Togiola a Iesu Keriso i le fuafuaga a le Tama Faalelagi. Ia aofia ai matafaioi o le faamasinogatonu ma le alofa mutimutivale ma mea e tatau ona tatou faia e maua ai le alofa mutimutivale. Tusifaamaumau soo se lagona e te manao e faailoa atu e uiga i le Faaola.

Mafaufau e valaaulia tagata aoga e savalivali solo i le potu ma faamatala atu i tagata eseese o le vasega le matafaioi o le Togiola a Iesu Keriso i le fuafuaga a le Tama Faalelagi. Uunaia i latou e talanoaina le faamasinogatonu ma le alofa mutimutivale, le taua o le salamo moni, ma le auala ua mafai ai e Iesu Keriso ona faia ina ia i ai le alofa mutimutivale.

O se isi filifiliga o le toe faasino lea i tulaga faataitai na faaaoga i le amataga o le lesona “Alema 42, Vaega 1.” Valaaulia tagata aoga e tali atu i na tulaga faataitai e faaaoga ai mea na latou aoaoina i a latou suesuega o le Alema 42.

Faasoa atu lau molimau i le alofa mutimutivale ma le togiola o loo maua e ala mai ia Iesu Keriso ma Lana Togiola.