ʻAlamā 32–35

Vakai Fakalūkufuá

ʻI hono akoʻi ʻe ʻAlamā ʻa e kakai Sōlamí, naʻá ne fakafehoanaki e folofola ʻa e ʻOtuá ki ha tengaʻi ʻakau te tau lava ʻo tō ʻi hotau lotó ʻa ia ʻe iku ʻo hoko “ko ha fuʻu ʻakau ʻoku tupu hake ki he moʻui taʻengatá” (ʻAlamā 32:41). Naʻe fehuʻi ange ʻe he kakai masiva ʻi he kakai Sōlamí “pe ko e founga fē ʻoku totonu ke nau kamata ke ngāue ʻaki ai ʻenau tuí” (ʻAlamā 33:1), pea naʻá ne akoʻi kinautolu te nau lava ʻo lotu mo moihū ʻi he feituʻu kotoa pē. Naʻá ne fakamoʻoni mo ʻAmuleki kia Sīsū Kalaisi, pea naʻe akoʻi ʻe ʻAmuleki ʻoku fakafefeka, hinga, pea hē ʻa e kakai kotoa pē ka ne taʻeʻoua ʻa e feilaulau taʻe-fakangatangata mo taʻengata ʻa Kalaisí. Naʻe kole ʻe ʻAmuleki ki he kakai Sōlamí ke ʻoua te nau fakatoloi ʻa e ʻaho ʻo ʻenau fakatomalá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 32

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke tō ʻa e folofola ʻa e ʻOtuá ʻi honau lotó pea tanumaki ʻenau fakamoʻoni ki aí.

• Teuteu ʻa e tokotaha akó: Fakaafeʻi e kau akó ke kole ki ha taha ʻoku nau ʻofa ai ʻoku ʻi ai haʻane fakamoʻoni ki he ongoongolelei ʻo Sīsū Kalaisí, ʻa e meʻa kuó ne tokoniʻi ia ke ne maʻu pe fakamālohia iá.

• Meʻa ke fakaʻaliʻalí: Ko e fakamatala ʻe tolu ke fakafonu ʻi he kamataʻanga ʻo e lēsoní

• Laʻipepa Tufa: “Ko Hono Tō mo Tauhi e Folofola ʻa e ʻOtuá ʻi Hotau Lotó”

• Laʻiʻatá: Ko e tuʻunga tupulaki ʻo ha fuʻu ʻakau

• Fokotuʻu ki hono akoʻi ʻi he konifelenisi vitioó: Hili hono lau ʻe he kau akó ʻa e ʻAlamā 32:28, tuku ke nau sio ʻokú ke tō ha ngaahi tengaʻi ʻakau ʻi ha poulu kelekele mōmoa. ʻI hono lau ʻe he kau akó ʻa e veesi 37–43, fakaafeʻi ke nau lisi ʻa e ngaahi meʻa ʻe tokoni ke tupu ʻa e ngaahi tengaʻi ʻakau ko iá. Ke kamata ʻa e lēsoni vitiō takitaha ʻi he ngaahi uike siʻi ka hokó, fakaafeʻi ha kau ako ʻe toko ua pe tolu ke vahevahe nounou ha meʻa ne nau toki fai ke tanumaki ai ʻenau fakamoʻoni ki he folofola ʻa e ʻOtuá. ʻI he taimi ʻoku vahevahe ai ʻa e tokotaha ako takitaha, fakahoko ha meʻa ʻe tokoni ke tupu ai e ngaahi tengaʻi ʻakau naʻá ke toó, hangē ko hono fuʻifuʻi pe ʻunuakiʻi e poulú ki ha feituʻu ʻoku ʻasi ki he laʻaá.

ʻAlamā 33

Taumuʻa ʻo e lēsoní: ʻE lava ke fakaloloto ʻe he lēsoni ko ʻení ʻa e mahino ʻa e kau akó ki he ngaahi sitepu te nau lava ʻo fakahoko ke ngāue ʻaki ai ha tui lahi ange kia Sīsū Kalaisí.

• Teuteu ʻa e tokotaha akó: Fakaafeʻi e kau akó ke lau ʻa e ʻAlamā 33 ʻi ʻapi pea fili ha veesi pe ngaahi veesi te nau fiemaʻu ke mahino lelei ange.

• Meʻa ke fakaʻaliʻalí: Ko e meʻa ʻe tolu ke fili mei ai ki he teuteu ki he lēsoní, ʻe lava ke fakaʻaliʻali pe hiki tatau ki he palakipoé

• Laʻipepa Tufa: “Ngaahi Fakakaukau ki Hono Teuteu ʻo e Lēsoní”

• Fokotuʻu ki hono akoʻi ʻi he konifelenisi vitioó: Fakaafeʻi e kau akó ke tamateʻi ʻenau ongó mo e vitioó ʻi heʻenau teuteu ʻenau lēsoní. Hili e taimi kuo vahe angé, kole ange ke toe fakamoʻui ʻenau vitioó mo e ongó pea vahe kinautolu ki ha ngaahi loki fakataha. Fakaafeʻi ha toko taha pe toko ua ʻi he loki fakataha takitaha ke akoʻi ʻena lēsoní.

ʻAlamā 34:1–17

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e founga ʻe lava ke tāpuekina ai kinautolu ʻe Sīsū Kalaisi ʻi Heʻene feilaulau fakalelei taʻe-fakangatangata mo taʻengatá.

• Teuteu ʻa e tokotaha akó: Fakaafeʻi e kau akó ke kumi mo ako e ngaahi potufolofola ʻoku tokoni ke mahino lelei ange kiate kinautolu ʻa e Fakalelei ʻa Sīsū Kalaisí. ʻE lava ke hoko ʻa e Fakahinohino ki he Ngaahi Folofolá ko ha maʻuʻanga tokoni ʻaonga.

• Laʻiʻatá: Sīsū Kalaisi ʻi Ketisemani

• Meʻa ke fakaʻaliʻalí: Fakatātā fekauʻaki mo e Fakalelei ʻa Sīsū Kalaisí

• Ngaahi Vitioó: “Ko e Fakalelei ʻa Sīsū Kalaisí” (11:46; sio mei he taimi 3:59 ki he 4:27)

• Fokotuʻu ki hono akoʻi ʻi he konifelenisi vitioó: Fakakaukau ke liliu ʻa e ʻekitivitī ako ʻi he fakaʻosinga ʻo e lēsoní ke fakakau ai ha ngaahi potufolofola kehekehe pe ngaahi lea kimuí ni mai mei he kau taki ʻo e Siasí.

Fakataukei Fakatokāteliné: ʻAlamā 34:9–10

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteline mo e kupuʻi lea folofola mahuʻinga ʻo e ʻAlamā 34:9–10, fakamatalaʻi ʻa e tokāteline ʻoku akoʻi ʻi he ongo veesi ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí ʻaki hono fakaʻaongaʻi e potufolofolá ni.

• Teuteu ʻa e tokotaha akó: ʻE lava ke ke fakaafeʻi e kau akó ke nau fakakaukau ki he founga ʻe lava ke tokoni ai e ngaahi moʻoni ʻoku akoʻi ʻi he ʻAlamā 34:9–10 mo e ngaahi tefitoʻi moʻoni ki hono maʻu ʻo e ʻilo fakalaumālié ki he kakai ʻoku nau ongoʻi he ʻikai lava ke fakamolemoleʻi ʻenau ngaahi angahalá.

• Fokotuʻu ki hono akoʻi ʻi he konifelenisi vitioó: Lolotonga ʻa e ʻekitivitī akoako hono fakaʻaongaʻí, fakakaukau ke vahevahe ʻa e kau akó ki ha loki fakataha ʻe tolu pea vahe ki he kulupu takitaha ke nau tokanga taha ki ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié. ʻE lava ke lisi ʻe he kau ako mei he kulupu takitaha ʻa e ngaahi founga kotoa ʻoku nau pehē ʻe lava ke tokoniʻi ai ʻe he tefitoʻi moʻoni ko ʻení ʻa ʻŌlive ʻi hono tūkungá. Fakaafeʻi leva e kau mēmipa ʻo e kulupu takitaha ke lipooti e meʻa ne nau aleaʻí mo e toenga ʻo e kalasí.

ʻAlamā 34:17–41

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ʻi heʻenau feinga teuteu ke feʻiloaki mo e ʻOtuá.

• Teuteu ʻa e tokotaha akó: Fakaafeʻi e kau akó ke lau ʻa e ʻAlamā 34:32 pea fakakaukau ki ha ngaahi founga te nau lava ai ʻo muimui ki he faleʻi ʻi he vēsí. ʻE lava ke nau hiki ha niʻihi ʻo e ngaahi founga ʻoku nau teuteu ai ke foki ki he ʻao ʻo e ʻOtuá pea mo e ngaahi liliu te nau lava ʻo fai ke tokoni ke nau mateuteu lelei angé.

• Fokotuʻu ki hono akoʻi ʻi he konifelenisi vitioó: ʻI hono ʻiloʻi ʻe he kau akó ha ngaahi tefitoʻi moʻoni mei he ʻAlamā 34:17–41, fakakaukau ke fakaʻaongaʻi ʻa e polokalama palakipoé (whiteboard) ke fakaʻatā kinautolu ke hiki ʻa e ngaahi tefitoʻi moʻoni naʻa nau maʻú.