“Alma 31:1–11: ‘Ang Hiyas sa Pulong sa Dios,’” Manwal sa Magtutudlo sa Basahon ni Mormon (2024)
“Alma 31:1–11,” Manwal sa Magtutudlo sa Basahon ni Mormon
Alma 31:1–11
“Ang Hiyas sa Pulong sa Dios”
Unsa nga mga matang sa mga butang ang tingale makapahimo kanimo nga mobati nga layo sa Manluluwas? Unsay makatabang nimo nga mobati nga mas duol Kaniya? Human makadungog nga ang mga Zoramite “nahulog ngadto sa dako nga mga kasaypanan” (Alma 31:9), si Alma mihimo og mga plano aron paggamit sa gahom sa pulong sa Dios sa pagdapit kanila sa pagbalik ngadto ni Jesukristo. Kini nga leksiyon makatabang kanimo nga mosalig sa gahom sa pulong sa Dios aron magpabilin nga matinud-anon ngadto ni Jesukristo.
Pagtabang sa mga tigkat-on nga makakita kon unsaon nila paghimo og epektibo nga matarong nga binuhatan. Makabenepisyo ang mga estudyante gikan sa pagkakaplag og nagkadaiyang mga paagi nga ilang magamit ang mga baroganan sa ebanghelyo sa mga sitwasyon sa kinabuhi. Human sila mamalandong o maghisgot og nagkalainlaing mga opsiyon, dapita ang mga estudyante sa pagbuhat sa usa nga ilang gibati nga labing makatabang kanila diha sa ilang kasamtangan nga mga kahimtang.
Pagpangandam sa estudyante: Dapita ang mga estudyante sa pagpakig-istorya sa usa ka tawo kon sa unsang paagi ang pulong sa Dios nakatabang nila nga magpabiling matinud-anon sa ebanghelyo ni Jesukristo.
Posible nga mga Kalihokan sa Pagkat-on
Mahisalaag
Si Elder Dieter F. Uchtdorf sa Korum sa Napulog Duha ka Apostoles mipakigbahin sa mga nakaplagan sa pagsiksik kon unsa ka lisod ang diretso lang og paglakaw sa tul-id nga linya kon kita walay makita nga mga timailhan. Samtang daghang mga indibidwal sa pagsulay sa panukiduki [research test] naghunahuna nga sila malamposon, ang mga resulta nagpakita nga “kon walay makitang kasaligan nga mga timailhan, mahisalaag kita sa dalan” (Dieter F. Uchtdorf, “Inadlaw nga Pagpahiuli,” Liahona, Nob. 2021, 77). Mahimo nimong tan-awon ang bidyo nga “Inadlaw nga Pagpahiuli”gikan sa time code 1:40 hangtod sa 3:25, anaa sa ChurchofJesusChrist.org,naghunahuna kon sa unsang paagi kini mahimong espirituhanon nga may kalabotan sa atong mga kinabuhi.
-
Sa unsang paagi kini may espirituhanon nga kalabotan kanato?
Sa Alma 31–35 imong mahibaloan ang bahin sa mga Zoramite kinsa mituo kaniadto kang Jesukristo apan nahisalaag gikan sa ilang hugot nga pagtuo. Sa dili pa nimo sugdan ang imong pagtuon sa Alma 31, pamalandongi kon sa unsang paagi milambo ang imong hugot nga pagtuo diha kang Jesukristo.
Mahimo nimong ipakita ang mosunod nga pangutana aron tubagan sa mga estudyante diha sa ilang mga journal sa pagtuon alang sa ilang personal nga pagpamalandong. Ayaw hangyoa ang mga estudyante sa pagpakigbahin sa ilang mga tubag niini nga pangutana.
-
Kon magpabilin ka sa imong dalan karon, mopaingon ka ba kang Kristo o mopalayo Kaniya?
Tumong ni Alma
Sa Alma 31:1–11 atong mahibaloan ang mahitungod sa mga Zoramite ug sa mga paningkamot ni Alma sa pagdapit kanila sa pagbalik ngadto sa Ginoo. Ang mosunod nga grapika makatabang kanimo nga masabtan kon giunsa ni Alma pagsulay sa pagpabalik ang mga Zoramite.
Ikonsiderar ang paghatag sa mga estudyante og kopya sa mosunod nga handout. Makatabang dayon kini sa mga estudyante sa pag-andam sa paghimo sa ilang kaugalingon nga tumong unya sa leksiyon.
Ang plano ni Alma sa pagtudlo sa mga Zoramite
Manwal sa Magtutudlo sa Basahon ni Mormon (2024)—“Alma 31:1–11:‘ Hiyas sa Pulong sa Dios’”
© 2024 by Intellectual Reserve, Inc. All rights reserved.
Basaha ang Alma 31:1–4, 8–11, mangita kon sa unsang paagi ug ngano nga ang mga Zoramite misugod sa pagkahisalaag. Irekord ang imong nakaplagan diha sa seksiyon nga “Problema”.
Ikonsiderar ang paggamit og mga pangutana sama sa mosunod aron matabangan ang mga estudyante nga makasabot sa pagkahisalaag sa mga Zoramite ug sa unsang paagi kini nakaapekto kanila. Tabangi ang mga estudyante nga makakita og mga pagkaparehas sa atong panahon. Sama pananglit, kon ang mga tawo mapakyas sa pagsunod sa mga sugo, pagsimba, pagsalmot sa mga ordinansa sama sa sakramento, ug pag-ampo, sila mahisalaag gikan sa Ginoo.
-
Sa unsang mga paagi nga ang mga Zoramite nahisalaag? Unsa nga mga problema ang hinungdan niini?
-
Unsa nga susamang mga binuhatan ang mahimong hinungdan sa pagkahisalaag sa mga tawo karon?
Basaha ang Alma 31:34, mangita sa tumong ug mga paglaom ni Alma alang sa mga Zoramite. Ikonsiderar ang pagsulat niini diha sa seksiyon nga “Tumong”.
-
Naghunahuna sa tumong ni Alma ug sa iyang mga pagbati nga imong nabasa diha sa Alma 31:1–2, unsa sa imong hunahuna ang nakapadasig ni Alma? Ngano kaha nga mahinungdanon kini?
Basaha ang Alma 31:5–7, 11, markahan ang mga pulong o mga hugpong sa mga pulong nga naghulagway sa plano ni Alma sa pagtuman sa iyang tumong. Mahimo nimong isulat tapad sa bersikulo 5 nga ang pulong nga hiyas naggikan sa Latin nga pulong nga virtus, nagpasabot og kalig-on o gahom (tan-awa sa Gospel Topics, “Virtue”), ug ang pulong nga sulay niini nga konteksto nagpasabot sa pagsulay o pag-eksperimento.
Aron maandam ang mga estudyante sa pagsulat sa seksiyon sa “Unsaon pagtuman sa tumong” diha sa handout, mahimo nimong ipangutana ang pipila sa mosunod nga mga pangutana.
-
Unsa sa imong hunahuna ang gipasabot sa “mosulay sa hiyas sa pulong sa Dios”? Asa nimo makita ang pulong sa Dios? (Ikonsiderar ang pagbasa ug pag-cross-reference sa Doktrina ug mga Pakigsaad 18:2–4, 34–36; 68:4.)
-
Unsa ang kamatuoran nga atong makat-onan gikan sa tumong ug plano ni Alma sa pagtuman niini?
Usa ka kamatuoran nga tingali imong naila mao nga ang pulong sa Dios adunay gahom sa paggiya sa mga tawo ngadto kang Jesukristo.
-
Unsa ang imong nahibaloan mahitungod sa Dios nga naghimo sa Iyang pulong nga gamhanan o lig-on diha kanimo? Ngano sa imong hunahuna nga kini mas gamhanan “kay sa espada, o sa bisan unsa pa”? (Alma 31:5).
-
Sa unsang paagi nga ang pulong sa Dios makatabang kanato sa pagpaambit sa ebanghelyo, pagkorihir sa sayop nga mga ideya, o paggiya sa uban ngadto kang Jesukristo?
-
Sa unsang paagi ang pulong sa Dios nakaapekto sa imong kinabuhi?
Gamit ang unsay imong nakat-onan gikan ni Alma ug sa imong mga panabot gikan sa miaging mga pangutana, sulati ang seksiyon sa “Unsaon pagtuman sa tumong”.
Ang pulong sa Dios sa akong kinabuhi
Hunahunaa kon sa unsang paagi nga ang unsay imong nakat-onan gikan kang Alma ug sa mga Zoramite nakonektar sa imong kinabuhi.
Ang mosunod nga mga pangutana gituyo aron sa pagtabang sa mga estudyante sa pagkonektar niini nga asoy sa ilang kaugalingong mga kinabuhi. Ikonsiderar ang pagpangutana og susama nga mga pangutana o uban pa nga imong mamugna.
-
Unsa ang pipila ka mga butang nga maoy hinungdan nga ang kabatan-onan mahisalaag gikan ni Jesukristo?
-
Sa unsang paagi nga ang pagsalig sa pulong sa Dios makapugong sa atong pagkahisalaag gikan ni Jesukristo o makatabang kanato sa pagbalik ngadto Kaniya?
Mahimo nimong ikonsiderar ang pagdapit sa mga estudyante sa pagpakigbahin ug paglista diha sa pisara sa mga kasulatan nga migiya kanila ngadto sa Ginoo. Makapangita usab sila og mga kasulatan nga naghisgot sa pipila ka mga hinungdan sa pagkahisalaag gikan sa Ginoo.
Hunahunaa ang imong relasyon uban ni Jesukristo. Aduna bay bisan unsa nga hinungdan nga ikaw mahisalaag gikan Kaniya? Gusto ba nimo og mas lig-on nga relasyon uban Kaniya? Mainampoong paghimo og personal nga tumong aron sa pagtabang kanimo sa paglig-on sa imong relasyon uban Kaniya. Kini nga tumong mahimong may kalabotan o madugang ngadto sa imong mga tumong sa Kabataan ug Kabatan-onan.
Ikonsiderar ang paghatag sa mga estudyante og laing handout nga gamiton sa pagsulat sa ilang kaugalingong tumong. Kon gikinahanglan, hisgoti ang nagkalainlaing mga paagi nga ang mga estudyante makasalig sa hiyas sa pulong sa Dios. Sama pananglit, pagtuon sa mga kasulatan adlaw-adlaw, pagpangita og mga tubag o giya diha sa mga kasulatan, pagtambong sa seminary, o ubang mga ideya. Ang mosunod nga mga sugyot makatabang sa mga estudyante sa pag-personalize kon sa unsang paagi nila masulatan ang tsart alang sa ilang kaugalingong tumong.
Isulat ang imong kaugalingong tumong diha sa seksiyon nga “Tumong”.
Mahimo usab nimong isulat ang bisan unsang mga babag sa imong tumong diha sa seksiyon nga “Problema”.
Diha sa “Unsaon pagtuman sa tumong nga seksiyon” isulat kon sa unsang paagi makasalig ka sa hiyas sa pulong sa Dios. Ilakip kon sa unsang paagi kini makatabang kanimo sa pagkab-ot sa imong tumong.
Ang mosunod nga mga pangutana makatabang.
Ang ubang mga estudyante mahimong komportable nga ipakigbahin ang ilang mga tumong. Mahimo nimong gamiton ang mosunod nga mga pangutana aron sa pagtabang kanila sa pagpakigbahin ug pagpahigayon og panaghisgotan.
-
Ngano nga kini nga tumong usa ka butang nga imong gibati nga imong gikinahanglan sa imong kinabuhi? Sa unsang paagi nga ang pagkab-ot niini makaimpluwensiya sa imong relasyon kang Jesukristo?
-
Unsa ang piho nga mga binuhatan ang imong mahimo aron sa pagtabang kanimo nga makasalig sa gahom sa pulong sa Dios? Sa unsang paagi kini makatabang kanimo sa pagkab-ot sa imong tumong?
-
Unsa nga mga kasulatan o mga pamahayag gikan sa mga lider sa Simbahan ang makapadasig kanimo sa pagpaningkamot niini nga tumong?
Ikonsiderar ang pagtapos pinaagi sa pagdapit sa mga estudyante sa pagpakigbahin sa ilang mga kasinatian sa pagtuon sa Alma 31:1–11 ug bisan unsang personal nga mga hunahuna o mga impresyon. Pagpakigbahin og pagpamatuod sa hiyas sa pulong sa Dios ug sa kamahinungdanon sa pagbuhat niadtong mga butang nga makapaduol kanato ngadto ni Jesukristo.