Alma 30–31

Kinatibuk-ang Pagpasabot

Usa ka daotan nga tawo nga ginganlan og Korihor miabot taliwala sa mga Nephite. Siya misangyaw batok sa mga panagna mahitungod ni Jesukristo ug midala sa kasingkasing sa daghang mga tawo palayo sa Dios. Siya gidala sa atubangan ni Alma, ug si Alma mipamatuod nga “ang tanan nga mga butang nagpakita nga adunay Dios” (Alma 30:44). Si Korihor milimod sa pagkaanaa sa Dios hangtod nga siya naamang pinaagi sa gahom sa Dios. Samtang, ang mga Zoramite, kinsa kanhi sakop sa tinuod nga Simbahan sa Dios, misugod sa pagtuo sa sayop nga mga pagtulun-an. Ang ilang sayop nga matang sa pagsimba mipahilayo sa ilang mga kasingkasing gikan sa Dios ug midala kanila sa pagmaltratar sa uban. Human makadungog nga ang mga Zoramite “nahulog ngadto sa dako nga mga kasaypanan” (Alma 31:9), si Alma mihimo og mga plano aron paggamit sa gahom sa pulong sa Dios sa pagdapit kanila sa pagbalik ngadto ni Jesukristo.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 30:1–29

Katuyoan sa leksiyon: Kini nga leksiyon makatabang sa mga estudyante sa pag-ila ug pagsalikway sa mga pagtulun-an nga makapahilayo kanila gikan ni Jesukristo.

• Pagpangandam sa estudyante: Mahimong makig-istorya ang mga estudyante sa usa ka sakop sa pamilya o lider sa Simbahan mahitungod sa mga paagi sa pag-ila sa sayop nga mga pagtulun-an.

• Bidyo: “Ang Balaanong Gasa sa Paghinulsol” (15:22; tan-awa gikan sa time code 2:08 hangtod sa 2:40)

• Sugyot sa pagtudlo pinaagi sa videoconference: Ikonsiderar ang paggamit sa mga breakout room aron tugotan ang mga estudyante nga magtinabangay nga magpares o sa gagmay nga mga grupo samtang maghisgot sila sa mga mensahe nga anti-Kristo nga ilang nasugatan. Ang matag grupo mahimong mopili og tigpamaba aron ipakigbahin sa klase kon unsay gihisgotan sa ilang grupo.

Alma 30:30–60

Katuyoan sa leksiyon: Kini nga leksiyon makatabang sa mga estudyante sa pag-ila sa ebidensiya nga ang Dios anaa ug mopili nga motuo Kaniya.

• Pagpangandam sa estudyante: Dapita ang mga estudyante sa pagbasa sa Alma 30:40–41 o sa Moises 6:63. Hangyoa sila sa pagpangita og ebidensiya sa Dios sa ilang palibot ug tingali pagkuha og hulagway aron ipakita sa klase.

• Mga Hulagway: Mga hulagway nga naghatag og ebidensiya sa pagkaanaa sa Dios

• Bidyo: “Dali, Sunod Kanako” (17:50; tan-awa gikan sa time code 14:24 hangtod sa 14:56)

• Sugyot sa pagtudlo pinaagi sa videoconference: Ikonsiderar ang pagdapit sa mga estudyante sa pagpakita og hulagway o butang nga nagpamatuod sa Dios ug sa pagpasabot nganong gipili nila kini.

Alma 31:1–11

Katuyoan sa leksiyon: Kini nga leksiyon makatabang sa mga estudyante nga mosalig sa gahom sa pulong sa Dios aron magpabilin nga matinud-anon ngadto ni Jesukristo.

• Pagpangandam sa estudyante: Dapita ang mga estudyante sa pagpakig-istorya sa usa ka tawo kon sa unsang paagi ang pulong sa Dios nakatabang nila nga magpabiling matinud-anon sa ebanghelyo ni Jesukristo.

• Bidyo: “Inadlaw nga Pagpahiuli” (13:43; tan-awa gikan sa time code 1:40 hangtod sa 3:25)

• Handout: “Ang Plano ni Alma sa Pagtudlo sa mga Zoramite”

• Sugyot sa pagtudlo pinaagi sa videoconference: Alang sa tumong ni Alma sa pagtabang sa mga Zoramite nga makabalik ngadto sa Ginoo, gidapit ang mga estudyante sa paghimo og vision board: usa ka biswal nga representasyon sa tumong, ang nagdasig niini, ug ang mga detalye mahitungod sa pagtuman niini. Ikonsiderar ang pagpangita og mga ehemplo sa mga vision board sa internet ug ipakigbahin kini sa mga estudyante.

Alma 31:12–38

Katuyoan sa leksiyon: Kini nga leksiyon makatabang sa mga estudyante sa pagpalambo sa ilang relasyon ngadto sa Langitnong Amahan ug kang Jesukristo samtang ilang susihon kon sa unsang paagi ang garbo ug pagpaubos makaimpluwensiya sa ilang relasyon uban Kanila ug sa uban.

• Pagpangandam sa estudyante: Sa pagpangandam sa pagtuon sa Alma 31, dapita ang mga estudyante sa pag-ampo, nga magtutok sa mga panginahanglan sa uban.

• Hulagway: Mga hulagway sa mga estudyante nga nagsimba; usa ka hulagway sa Rameumptom

• Content nga ipakita: Ang tsart bahin sa pag-ampo, mahimong ipakita o ikopya diha sa pisara

• Bidyo: “Si Alma ug ang Iyang Kaigsoonan Nagsangyaw sa Pulong sa Dios taliwala sa mga Zoramite” (6:07; tan-awa gikan sa mga time code 0:22 hangtod sa 3:58 ug 4:03 hangtod sa 5:55)

• Sugyot sa pagtudlo pinaagi sa videoconference: Ikonsiderar ang paggamit sa whiteboard function aron ipakita ang tsart mahitungod sa pag-ampo. Dapita ang mga estudyante sa pagdugang sa tsart sa tibuok leksiyon ug sa pagkopya niini ngadto sa ilang mga journal sa pagtuon.

Rebyo 14 sa Doktrinal nga Kahanas

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagsag-ulo og daghan nga mga pakisayran sa kasulatan ug mahinungdanon nga mga hugpong sa mga pulong sa kasulatan gikan sa kataposang 12 ka tudling sa doktrinal nga kahanas diha sa Basahon ni Mormon.

• Pagpangandam sa estudyante: Dapita ang mga estudyante sa pagpili ug pagsag-ulo og tudling sa doktrinal nga kahanas nga makatabang kanila nga mobati nga duol sa Manluluwas o makatabang kanila sa panginahanglanon karon.

• Handout: “Doktrinal nga Kahanas sa Basahon ni Mormon: Alma–Moroni”

• Sugyot sa pagtudlo pinaagi sa videoconference: Ikonsiderar ang pagpakita og unod [content] gikan sa app sa Doktrinal nga Kahanas ug magtinabangay sa mga kalihokan isip usa ka klase.