Alma 30:1–29

Ang mga Pagtulun-an ni Korihor Nagpahilayo sa Kadaghanan gikan sa Manluluwas

Korihor nagpahisalaag sa mga tawo

Usa ka daotan nga tawo nga ginganlan og Korihor miabot taliwala sa mga Nephite. Siya misangyaw batok sa mga panagna mahitungod ni Jesukristo ug midala sa kasingkasing sa daghang mga tawo palayo sa Dios. Sa atong panahon adunay daghang mga tingog nga nagtinguha sa pagpahilayo kanato gikan ni Jesukristo. Kini nga leksiyon makatabang kanimo sa pag-ila ug pagsalikway sa mga pagtulun-an nga makapahilayo kanimo gikan ni Jesukristo.

Pag-andam sa imong kaugalingon nga mahimong instrumento sa Espiritu Santo. Ang Espiritu Santo mao ang tinuod nga magtutudlo ug ang tinuod nga tinubdan sa pagkakabig alang kanimo ug sa imong mga estudyante. Dapita ang Espiritu sa pagtudlo ug pagkabig pinaagi sa pagpakabuhi sa paagi nga magpabilin ang Iyang pakig-uban diha sa imong kinabuhi. Sa pagbuhat nimo sa ingon, makadawat ka sa Iyang giya ug makatabang sa mga estudyante sa pagdapit Kaniya sa ilang kasinatian sa pagkat-on.

Pagpangandam sa estudyante: Mahimong makig-istorya ang mga estudyante sa usa ka sakop sa pamilya o lider sa Simbahan mahitungod sa mga paagi sa pag-ila sa sayop nga mga pagtulun-an.

Posible nga mga Kalihokan sa Pagkat-on

Ang pagpanglingla ni Satanas

Sugdi ang leksiyon pinaagi sa paghisgot og maka-feke o laing matang sa bitik nga gidisenyo sa paglingla ug paglit-ag.

Ang maka-feke usa ka paon sa kugita. Ang mga paon sa kugita gidesinyo nga susama kaayo sa hitsura sa usa ka tinuod nga pagkaon nga ang usa ka nailad nga kugita modumili sa pagbuhi niini sa higayon nga makuptan. Kon kini mahitabo, ang mananagat dali na nga makaitsa sa kugita ngadto sa iyang sakayan.

maka-feke

Si Presidente Thomas S. Monson (1927–2018) migamit sa ehemplo sa usa ka maka-feke sa pagtudlo kon sa unsang paagi si Satanas molihok.

Presidente Thomas S. Monson

Karon gilibotan kita sa mga maka-feke nga gibutang sa daotan sa atong atubangan ug maoy iyang gigamit sa pagdani ug paglit-ag kanato. Kon magunitan na, ang maka-feke lisod na kaayo––ug usahay imposible––na nga mabuhian. Aron makalikay, kinahanglan makaila kita kon unsa kini ug dayon dili magduhaduha sa atong determinasyon sa paglikay niini. (Thomas S. Monson, “Matinud-anon sa Hugot nga Pagtuo,” Liahona, Mayo 2006, 18)

• Unsa ka kamasaligon sa imong paminaw diha sa imong abilidad sa pag-ila sa sayop nga mga pagtulun-an ni Satanas nga “makadani” ug “makalit-ag” kanimo?

Paglikay sa mga butang nga makapahilayo kanato gikan sa Manluluwas

Human sa usa ka dako nga gubat tali sa mga Nephite ug sa mga Lamanite, ang kalinaw mipabilin sa yuta. Mga duha ka tuig ang milabay, usa ka tawo nga ginganlan og Korihor misugod sa pagsangyaw taliwala sa katawhan sa Zarahemla. Gisultihan ni Satanas si Korihor unsay isulti (tan-awa sa Alma 30:53). Samtang magtuon ka karon, pamatikdi kon giunsa ni Korihor paggamit ang iyang mga pulong ug sayop nga mga pagtulun-an isip maka-feke sa paglit-ag sa mga tawo.

Basaha ang Alma 30:6, 12, mangita sa mga pulong ug mga hugpong sa mga pulong nga naghulagway sa mensahe ug misyon ni Korihor.

• Unsa sa imong hunahuna ang gipasabot nga siya “Anti-Kristo”? (Alma 30:6).

Ang pulong nga anti-Kristo nagpasabot sa “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga sa dayag o sa tinago misupak kang Kristo” (Giya ngadto sa mga Kasulatan, “Anti-Kristo,” scriptures.ChurchofJesusChrist.org). Usa ka kamatuoran nga atong makat-onan gikan sa asoy ni Korihor mao nga si Satanas naggamit og sayop nga mga pagtulun-an aron pagpahilayo kanato gikan ni Jesukristo.

Anti-Kristo nga mga pagtulun-an ni Korihor

Basaha ang Alma 30:12–18, mangita sa sayop nga mga pagtulun-an ni Korihor. Ikonsiderar ang pagmarka sa mga pagtulun-an ni Korihor sa paagi nga malain kini (pananglitan, adunay talagsaon nga kolor o simbolo) o isulat kini diha sa imong journal sa pagtuon.

• Unsa ang pipila sa sayop nga mga pagtulun-an ni Korihor?

Ikonsiderar ang pagdapit sa mga estudyante sa paglista sa mga pagtulun-an ni Korihor diha sa pisara. Ilha ang buhat niini sa pagkaplag og mga tubag. Kon gikinahanglan, mahimo nimong danihon ang atensiyon sa mosunod:

• “walay tawo nga nasayod sa bisan unsa nga moabot” (bersikulo 13)

• “mga panagna … mga binuang nga mga tradisyon sa inyong mga amahan” (bersikulo 14)

• “kamo dili masayod sa mga butang nga kamo dili makakita” (bersikulo 15)

• “kamo dili masayod nga adunay usa ka Kristo” (bersikulo 15)

• “kini mao ang sangputanan sa usa ka nagsalimoang nga hunahuna” (bersikulo 16)

• “walay pag-ula nga gihimo alang sa mga sala sa mga tawo” (bersikulo 17)

• “ang matag tawo makasinati niini nga kinabuhi sumala sa panglihok sa tawo” (bersikulo 17)

• “ug bisan unsa ang buhaton sa tawo dili kalapasan” (bersikulo 17)

• “kon ang usa ka tawo mamatay, mao na kana ang kataposan niana” (bersikulo 18)

Kuhaan og basehan ang mga pagtulun-an ni Korihor nga gilista diha sa pisara, mahimong motubag ang mga estudyante sa mosunod nga mga pangutana nga magpares o sa gagmay nga mga grupo. Mahimong ma-assign sa nagkalainlaing mga grupo sa mga estudyante ang nagkadaiyang sayop nga mga pagtulun-an aron susihon, ug dayon mahimo nilang ipakigbahin ang ilang mga tubag ngadto sa uban.

• Sa unsang paagi kaha nimo usbon ang pagkasulti sa mga pagtulun-an ni Korihor gamit ang pinulongan nga mas komon sa atong panahon?

• Gamit ang sukdanan gikan sa 1 ngadto sa 10 (nga ang 10 mao ang labing kusog), unsa ka makusganon nimong nakita nga ang mga pagtulun-an ni Korihor giduso [promote] karon?

• Unsa ang anaa niini nga mga pagtulun-an nga mopahilayo sa mga tawo gikan ni Jesukristo? Nganong peligroso man kini nga mga ideya?

Tinguhaa ang giya sa Espiritu ug pamalandongi ang epekto sa mga pagtulun-an ni Korihor sa imong kaugalingong kinabuhi. Ikonsiderar ang mga paagi nga ang bisan hain niining sayop nga mga pagtulun-an mahimong makaimpluwensiya kanimo sa personal.

Si Elder D. Todd Christofferson sa Korum sa Napulog Duha ka Apostoles namulong mahitungod ni Korihor ug sa iyang mga pagtulun-an. Mahimo nimong tan-awon ang bidyo nga “Ang Balaanong Gasa sa Paghinulsol” gikan sa time code 2:08 hangtod sa 2:40, anaa sa ChurchofJesusChrist.org.

Elder D. Todd Christofferson

[Ang mga tawo sama ni] Korihor … mihimakak sa pagkaanaa ni Kristo ug sa pagkaanaa sa sala. Ang ilang doktrina mao nga ang mga hiyas, mga sumbanan, ug gani ang kamatuoran pareho ra. Mao nga, bisan unsay bation sa tawo nga sakto alang kaniya dili mahimong hukman sa uban nga sayop o sala.

Kon tan-awon ang ingon nga mga pilosopiya murag nindot kay nagtugot nato sa pagtugyan ngadto sa mga gana o tinguha bisan unsa pa ang mga sangputanan. (D. Todd Christofferson, “Ang Balaanong Gasa sa Paghinulsol,” Liahona, Nob. 2011, 38)

• Sa unsang paagi sa imong hunahuna kini nga mga pagtulun-an makadala sa mga tawo sa pagbuhat og sala? (Tan-awa sa bersikulo 18.)

Basaha ang Alma 30:19–21, mangita kon giunsa pagtubag sa mga tawo sa Jershon ug Gideon ang mga pagtulun-an ni Korihor.

Ngano sa imong hunahuna nga ang ilang tubag “labaw pa nga maalamon” (Alma 30:20) kay sa katawhan sa Zarahemla? (tan-awa sa Alma 30:18).

Dasiga ang daghang mga estudyante sa pagtubag sa mosunod nga pangutana. Mahimong isulat sa mga estudyante ang ilang mga tubag diha sa pisara o sa usa ka piraso nga papel nga ipasapasa sa klase. Ang panaghisgotan mahimong maglakip kon sa unsang paagi ang piho nga matarong nga mga aksiyon ug pagwagtang sa daotan nga mga impluwensiya mahimong makatabang kanila nga mahimong “labaw pa nga maalamon.” Sama pananglitan, ang mga estudyante mahimong motan-aw sa social media, musika, ug mga bidyo nga kanunay nilang adtoan ug tangtangon ang bisan unsa nga makapahuyang sa ilang hugot nga pagtuo diha kang Jesukristo ug makapasilo sa Espiritu Santo.

• Sa unsang paagi kita mahimong “labaw pa nga maalamon” ug isalikway ang mga mensahe nga anti-Kristo?

• Sa unsang paagi nga ang imong kahibalo ug relasyon sa Manluluwas maapektohan sa kon unsa ka dako ang impluwensiya niining anti-Kristo nga mga pagtulun-an diha kanimo?

Mahimo nimong dapiton ang mga estudyante sa pagpakigbahin og pagpamatuod o mahangturong kamatuoran mahitungod ni Jesukristo. Mahimo usab nimo silang hangyoon sa pagpaambit og mga kasulatan o mga pagtulun-an sa Manluluwas nga nagtugbang sa sayop nga mga ideya ni Korihor. Ang mga pananglitan naglakip sa Jacob 7:11–12; Alma 32:21; Mormon 7:3, 5–7.

Pamalandongi ang imong nakat-onan ug gibati gikan sa imong pagtuon. Tinguhaa ang giya sa Espiritu Santo aron sa pagtabang kanimo sa pagtutok kang Jesukristo ug pagsalikway sa mga pagtulun-an nga makapahilayo kanimo gikan Kaniya.

Komentaryo ug Background nga Impormasyon

Ngano nga importante ang pagdawat og tambag gikan sa mga propeta ug apostoles sa modernong panahon?

Si Presidente Henry B. Eyring miingon:

Presidente Henry B. Eyring

Nakiglalis si Korihor, sama sa gilalisan sa mga kalalakin-an ug mga kababayen-an sa sayop nga paagi sa pagsugod sa panahon, nga ang pagsunod sa tambag nga gikan sa mga sulugoon sa Dios mao ang pagtahan sa hinatag sa Dios nga mga katungod sa pagkagawasnon. Apan ang gilalisan sayop tungod kay dili eksakto ang pagpasabot niini sa reyalidad. Kon atong isalikway ang tambag nga gikan sa Dios, wala kita mopili nga mahimong gawasnon sa impluwensiya sa gawas. Mipili kita og laing impluwensiya. Atong gisalikway ang panalipod sa usa ka hingpit nga mapinanggaon, makagagahom sa tanan, Amahan sa Langit nga nahibalo sa tanan, kansang katuyoan sa kinatibuk-an, sama sa Iyang Hinigugma nga Anak, mao ang paghatag og kinabuhing dayon, nga ihatag ang tanan nga anaa Kaniya, ug modala kanato og balik nga pamilya ngadto sa mga bukton sa Iyang gugma. Sa pagsalikway sa Iyang tambag, mipili kita sa impluwensiya sa laing gahom, kansang katuyoan mao ang paghimo kanatong miserable ug kansang motibo mao ang pagdumot. (Henry B. Eyring, “Finding Safety in Counsel,” Ensign, Mayo 1997, 25)

Sa unsang paagi nga ang sayop nga mga pagtulun-an makaapekto sa atong mga kinabuhi?

Si Presidente Russell M. Nelson miingon:

Presidente Russell M. Nelson

Samtang makugihon kitang motutok diha sa Manluluwas ug dayon mosunod sa Iyang sumbanan sa pagtutok sa kalipay, kinahanglan natong likayan ang mga butang nga makabalda sa atong kalipay. Nahinumdom mo ni Korihor, ang anti-Kristo? Nagsulti og daghang mga bakak mahitungod sa Manluluwas, si Korihor miadto og lain-laing mga dapit hangtod nga gidala siya sa atubangan sa usa ka high priest kinsa nangutana kaniya: “Ngano nga ikaw naglibot-libot aron sa pagtuis sa mga paagi sa Ginoo? Ngano nga ikaw nagtudlo niini nga katawhan nga walay Kristo, aron sa pagsumpo sa ilang mga kalipay?” [Alma 30:22].

Bisan unsa nga mosupak ni Kristo o sa Iyang doktrina mobalda sa atong kalipay. Naglakip kana sa mga pilosopiya sa tawo, nga daghan kaayo diha sa internet ug sa mga blog, nga nagbuhat sa unsa gayod ang gibuhat ni Korihor.

Kon motan-aw kita diha sa kalibotan ug mosunod sa mga pormula niini sa kalipay, dili gayod kita makaila og hingpit nga kalipay. (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 83–84)

Unsaon nato pagkahibalo sa kamatuoran ug pagsunod sa Manluluwas?

Si Presidente Russell M. Nelson mitudlo:

Presidente Russell M. Nelson

Ang kalibotanon nga mga impluwensiya ug mga pag-aghat miasdang ug daghan kaayo. Apan daghan kaayo sa mga impluwensiya ang malinglahon, matintalon, ug makapalayo kanato sa dalan sa pakigsaad. Aron malikayan ang dili kapugngan nga kasakit nga mosunod, ako mohangyo kaninyo karon nga suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi––matag adlaw. (Russell M. Nelson, “Paggahin og Panahon alang sa Ginoo,” Liahona, Nob. 2021, 120)

Presidente Russell M. Nelson

Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Unsa ang pipila ka anti-Kristo nga mga mensahe nga gitudlo sa atong panahon?

Si Sister Julie B. Beck, kanhi Kinatibuk-ang Presidente sa Relief Society, mitudlo:

Presidente Julie B. Beck

Si Korihor usa ka anti-Kristo. Ang anti-Kristo supak sa pamilya. Bisan unsa nga doktrina o baroganan nga ang atong kabatan-onan makadungog gikan sa kalibotan nga supak sa pamilya usa usab ka anti-Kristo. Ingon ana kini ka klaro. Kon ang atong mga kabatan-onan mohunong sa pagtuo sa matarong nga mga tradisyon sa ilang mga amahan … , kon ang atong kabatan-on wala makasabot sa ilang bahin diha sa plano, sila mahimong masalaag. (Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 35)

Dugang nga mga Kalihokan sa Pagkat-on

Unsa ang gitutokan niadtong kinsa nagtudlo og sayop nga doktrina?

Aron matabangan ang mga estudyante nga makaila sa sayop nga mga pagtulun-an, dapita sila sa pagbasa sa Alma 30:6 ug dayon sa 1 Nephi 11:34–36. Tabangi ang mga estudyante nga makasabot nga daghan kinsa moatake sa tinuod nga doktrina sa kasagaran dayag nga mosaway sa mga propeta. Ikonsiderar ang pagpangutana sa mga estudyante sama sa “Nganong sa imong hunahuna ang ubang mga tawo matinguhaon kaayo sa pagpangita og sayop sa mga propeta sa modernong panahon?” o “Sa unsang paagi nga ang mga propeta sa modernong panahon nakatabang kanimo sa paglikay sa pagpanglingla?”

Sa unsang paagi nga ang mga pagtulun-an nga anti-Kristo makaapekto sa atong kalipay diha sa ebanghelyo?

Ang mosunod makatabang sa mga estudyante nga masabtan kon sa unsang paagi nga ang pagtuo sa mga mensahe sa anti-Kristo dili mosangpot sa kalipay. Ikonsiderar ang pagdapit sa mga estudyante sa pagbasa sa Alma 30:22. Dapita sila sa paghunahuna kon unsa ang gipasabot sa hugpong sa mga pulong nga “pagsumpo sa ilang mga kalipay”. Mahimong hisgotan sa mga estudyante kon sa unsang paagi ang anti-Kristo nga mga pagtulun-an mosumpo sa ilang kalipay. Mahimo dayon silang mopakigbahin og mga pagtulun-an o mahitungod ni Jesukristo nga makatabang kanato nga mobati og kalipay. Mahimo sab nimong ikonsiderar ang pagpakigbahin sa pamahayag ni Presidente Nelson diha sa seksiyon sa “Komentaryo ug Background nga Impormasyon” ubos sa ulohan nga “Sa unsang paagi ang sayop nga mga pagtulun-an makaapekto sa atong mga kinabuhi?”

Pagtabang sa mga estudyante sa paghimo og mga koneksiyon sa atong panahon

Aron matabangan ang mga estudyante nga makaila sa mga mensahe nga anti-Kristo karon, ikonsiderar ang pagbutang kanila nga magpares o sa gagmay nga mga grupo ug i-assign sila og usa ka hilisgotanan gikan sa Alang sa Kalig-on sa mga Kabatan-onan (booklet, 2022). Dapita sila sa paghisgot kon sa unsang paagi si Satanas mahimong mopakaylap og mga mensahe nga anti-Kristo mahitungod sa ilang gi-assign nga hilisgotanan.