Ալմա 10-11

«Տիրոջ Հոգուն համահունչ»

Ամուղեկը և Զիզրոմը

Ձեզ երբևէ խաբե՞լ են։ Հիշո՞ւմ եք, թե ինչ էիք զգում։ Ամմոնիայի ժողովրդին վկայություն տալու ժամանակ Ալման և Ամուղեկը բախվեցին մարդկանց, որոնք խորամանկությամբ փորձում էին կանգնեցնել նրանց։ Այդ խորամանկության մասին Ալմային ու Ամուղեկին հայտնի դարձավ Սուրբ Հոգու միջոցով։ Այս դասը կօգնի ձեզ ավելի ընկալունակ լինել Սուրբ Հոգու հուշումներին, որպեսզի իմանաք ճշմարտությունը և հասկանաք հակառակորդի թաքնված խորամանկությունները։

Օգնեք ուսանողներին սուրբ գրությունները կապել իրենց կյանքի հետ։ Երբ ուսանողները սուրբ գրություններում կարդացածը կապում են իրենց կյանքի իրավիճակների հետ, դա ավելի է ոգևորում նրանց՝ սովորելու և կիրառելու ավետարանի ուսմունքները։ Նրանք կարողանում են տեսնել նաև, թե սուրբ գրություններն ինչպես են պատասխաններ տալիս և ուղղորդում իրենց իրական կյանքի իրավիճակներում։

Ուսանողի նախապատրաստում․ ուսանողներին առաջարկեք խորհել այն եղանակների մասին, որոնցով սատանան կարող է փորձել մոլորեցնել իրենց։

Հնարավոր ուսումնական վարժություններ

Զգուշացեք չարիքից

Տասներկու Առաքյալների Քվորումից երեց Նիլ Լ. Անդերսենը կիսվել է հետևյալ պատմությամբ մի ընկերոջ մասին, որը Միացյալ Նահանգների կառավարությունում քննիչ էր աշխատում․ Փնտրեք, թե ինչ կարող եք սովորել այս փորձառությունից՝ խորամանկությունից խուսափելու համար։

Երեց Նիլ Լ. Անդերսեն

Իմ ընկերը հետաքննում էր կազմակերպված հանցավոր խմբերին, որոնք անօրինական ճանապարհով թմրանյութեր էին տեղափոխում Միացյալ Նահանգներ։

Մի առիթով նա և մեկ այլ գործակալ մոտեցան մի բնակարանի, որտեղ նրանց կարծիքով, հայտնի թմրանյութեր վաճառողը կոկաին էր բաժանում։ Իմ ընկերը նկարագրում է, թե ինչ պատահեց.

«Մենք թակեցինք թմրանյութ վաճառողի դուռը։ Կասկածյալը բացեց դուռը, և մեզ տեսնելուն պես փորձեց փակել մեր տեսադաշտը: Սակայն արդեն շատ ուշ էր, մենք տեսել էինք նրա սեղանին դրված կոկաինը:

«Սեղանի մոտ նստած տղամարդն ու կինը անմիջապես սկսեցին հեռացնել կոկաինը։ Մենք պետք է կանխեինք նրանց, որ չոչնչացնեին փաստերը, ուստի ես արագ մի կողմ հրեցի թմրադեղերի կասկածյալին, որը արգելափակել էր դուռը: Երբ ես հրեցի նրան, իմ հայացքը հանդիպեց նրա հայացքին: Տարօրինակ էր այն, որ նա ո՛չ բարկացած էր թվում, ո՛չ էլ վախեցած: Նա ժպտում էր ինձ:

«Նրա աչքերը և զինաթափ անող ժպիտը տպավորություն ստեղծեցին ինձ մոտ, որ նա վտանգավոր չէ, ուստի, ես հապճեպ թողեցի նրան ու սկսեցի սեղանի կողմը քայլել: Կասկածյալն այժմ գտնվում էր իմ հետևում: Այդ պահին մի հստակ, զորեղ միտք հնչեց գլխումս. «Զգուշացիր ժպտացող աչքերի հետևում թաքնված չարից»։

«Ես անմիջապես շրջվեցի դեպի կասկածյալը։ Նրա ձեռքն առջևի մեծ գրպանում էր: Ես մեխանիկորեն բռնեցի նրա ձեռքը և դուրս քաշեցի նրա գրպանից: Միայն այդ պահին ես նկատեցի նրա ձեռքում ամուր բռնած կիսաավտոմատ ատրճանակը, որը պատրաստ էր կրակելու: Լարված պայքարի արդյունքում ինձ հաջողվեց զինաթափել նրան»: (Նիլ Լ. Անդերսեն, «Զգուշացիր ժպտացող աչքերի հետևում թաքնված չարից», Ensign կամ Լիահոնա, մայիս, 2005թ․, 46)

• Ի՞նչը հատկապես տպավորեց ձեզ երեց Անդերսենի փորձառության մեջ։

• Սատան ի՞նչ եղանակներով կարող է փորձել մոլորեցնել մեզ այսօր։

Կարող եք ուսանողների պատասխանները գրել գրատախտակին:

Այսօր ուսումնասիրելու ընթացքում փնտրեք եղանակներ, որոնցով կարող եք հասկանալ խորամանկությունը, որպեսզի կարողանաք խուսափել հոգևորապես ձեզ վնասող երևույթներից։

Նախազգուշացում խորամանկությունից

Ստորև ներկայացված համառոտ շարադրանքի փոխարեն ուսանողներին կարելի է տրամադրել Ալմա 10.15–17 11.21–25; 12.2–7 հատվածները և առաջարկել նրանց պատասխանել հետևյալ հարցերին․ Ինչպիսի՞ խորամանկություն էր օգտագործվել։ Ինչպե՞ս այն բացահայտվեց։

Երբ Ամուղեկն Ամմոնիայի ժողովրդին վկայում էր, որ ինքն Աստծո կողմից է կանչված, որոշ մարդիկ ապշել էին (տես Ալմա 10.12)։ Նա «մի մարդ [էր] ոչ փոքր համբավով» (Ալմա 10.4) իր ժողովրդի շրջանում, և միացավ Ալմային՝ նրանց առաջ վկայելու համար։ Որոշ հմուտ օրինագետներ ցանկանում էին խաբել Ալմային և Ամուղեկին ու գումար աշխատել դրանով (տես Ալմա 10.13; 11.20)։

Կարդացեք Ալմա 10.15–17 հատվածները և փնտրեք, թե Ամուղեկն ինչպես պատասխանեց այս օրինագետներին։

• Խորամանկություններն ինչպե՞ս են նման «թակարդների ու ծուղակների»: (Ալմա 10.17)

Շարունակելով ձեր ուսումնասիրությունը՝ փնտրեք, թե Ամուղեկն ինչպես կարողացավ հասկանալ օրինագետների մտքերն ու թակարդները։

Զիզրոմը՝ օրինագետներից մեկը, որը «գիտակ էր դևի հնարքներին» (Ալմա 11.21), թակարդ էր պատրաստել։

Կարդացեք Ալմա 11.21–25 հատվածները և փնտրեք, թե Զիզրոմն ինչպես էր փորձում խաբել և գայթակղել Ամուղեկին, որպեսզի նա ժխտի Աստծո գոյությունը։ Օգտակար կլինի իմանալ, որ «արծաթի վեց օնթին» (Ալմա 11.22) օրինագետի մոտ վեց շաբաթվա վարձատրությունն էր (տես Ալմա 11.3, 11–13)։

Ավելի լավ հասկանալու համար, թե ինչ էր առաջարկում Զիզրոմը Ամուղեկին, ուսանողները գուցե ցանկանան իմանալ, թե վեց շաբաթվա համար որքան է վարձատրվում փաստաբանն իրենց համայնքում։

• Ի՞նչ սովորեցիք Ամուղեկի պատասխանից։

Նույնիսկ եթե Ամուղեկը ժխտեր Աստծուն, Զիզրոմը բոլորովին էլ մտադիր չէր նրան գումար տալ․ նա զուտ առաջարկեց դա, որպեսզի փորձի վարկաբեկել և «կործանել» Ամուղեկին (Ալմա 11.25)։

Ավելի ուշ Ալման Զիզրոմին բացատրեց, թե Ալման ու Ամուղեկն ինչպես կարողացան հասկանալ նրա խորամանկություններն ու թակարդները։ Կարդացեք Ալմա 12.2–7 հատվածը և փնտրեք պատասխանը։

Երբ ուսանողները կիսվեն այն ամենով, ինչ գտել են, գրատախտակին գրեք հետևյալ սկզբունքը։ Եթե ուսանողները դժվարանան պատասխանել, առաջարկեք նրանց վերընթերցել Ալմա 12.3 հատվածը։

Ճշմարտություններից մեկը, որ կարող ենք սովորել, այն է, որ Աստված կարող է Սուրբ Հոգու միջոցով օգնել մեզ ճանաչել սատանայի խորամանկությունները։

• Երեց Անդերսենի պատմությունն ինչո՞վ էր այս սկզբունքի օրինակը հանդիսանում։

  Ստորև ներկայացվող հարցերը տալու փոխարեն կարող եք դասարանը բաժանել փոքր խմբերի, որպեսզի սովորեն, թե Սուրբ Հոգին ինչպես է հաղորդակցվում։ Ուսանողներին առաջարկեք ուսումնասիրել ստորև փակագծերում նշված նյութերը և ներկայացնել, թե ինչ գտան։ Ներկայացնելու ընթացքում կարող եք հարցնել․ «Այս տեղեկության իմացությունն ինչպե՞ս է օգնում մեզ, երբ խորամանկության ենք հանդիպում»։

• Ի՞նչ ուղիներով է Սուրբ Հոգին հաղորդակցվում է մեզ հետ: (Օգտակար կլինի կարդալ Վարդապետություն և Ուխտեր 8.2–3, 9.7–9, 11.12 և Թեմաների ուղեցույցում կամ Սուրբ գրքերի ուղեցույցում ուսումնասիրել «Սուրբ Հոգի» հոդվածը:)

• Մեր կատարած ընտրություններն ինչպե՞ս են ազդում Սուրբ Հոգու կողմից առաջնորդվելու մեր ունակության վրա։

Կարող եք Ալմա 11.22 հատվածում նշել բոլոր այն արտահայտությունները, որոնք ցույց են տալիս Հոգուն հետևելու Ամուղեկի հաստատակամությունը։ Մտածեք, թե այդ ընտրությունն ինչպես օգնեց նրան։

Խուսափեք խորամանկությունից՝ իմանալով ճշմարտությունը

Եղանակներից մեկը, որով սատանան փորձում է մոլորեցնել մեզ, Հիսուս Քրիստոսի մասին մեր հասկացողությունը շփոթեցնելն է։

Դասարանով հետևյալ հատվածները կարդալու փոխարեն կարող եք երկու ուսանողի առաջարկել գալ և դասարանի առջև կարդալ Ամուղեկի ու Զիզրոմի զրույցը։ Կարող եք տպել տեքստը և ընդգծել երկու հատված՝ հեռացնելով նկարագրական արտահայտությունները, օրինակ՝ «և նա պատասխանեց» (Ալմա 11.29)։

Կարդացեք Ալմա 11.26–37, 40–41 հատվածները՝ փնտրելով Զիզրոմի կեղծ ուսմունքները Հիսուս Քրիստոսի մասին և Ամուղեկի պատասխանը։

Այս հատվածները հասկանալու համար կարող եք հետևյալ աղյուսակը պատկերել ձեր օրագրում։ Յուրաքանչյուր ուսմունքի տակ գրեք այն մոտեցումները, գաղափարները կամ վարքագծերը, որոնց կարող է հանգեցնել յուրաքանչյուր ուսմունք։

Կարող եք գրատախտակին պատկերել ստորև ներկայացվող աղյուսակը: Ուսանողների պատասխանելու ընթացքում նրանց մտքերը գրեք համապատասխան վերնագրի տակ։

Կեղծ ուսմունք․ Հիսուս Քրիստոսը կփրկի մեզ «[մեր] մեղքերի մեջ» առանց ապաշխարության (Ալմա 11.34)։	Ճշմարիտ ուսմունք․ Հիսուս Քրիստոսը կփրկի մեզ մեր մեղքերից, երբ մենք անկեղծորեն դարձի գանք դեպի Նա և ապաշխարենք։

• Ինչո՞ւ է կարևոր իմանալ, որ Հիսուս Քրիստոսը կարող է փրկել մեզ մեր մեղքերից, այլ ոչ մեր մեղքերի մեջ։

• Ի՞նչ եք սովորում այն պատասխաններից, որ Ամուղեկը տվեց Զիզրոմի հարցերին։

Ուսանողները կարող են ստորև ներկայացվող վարժության համար օգտագործել դասի սկզբում գրատախտակին գրված խորամանկությունները։

Թվեք առնվազն երեք իրատեսական եղանակ, որոնցով սատանան կարող է մեր օրերում փորձել մոլորեցնել դեռահասներին։ Կարող եք ներառել այն խորամանկությունները, որոնց բախվեց Ամուղեկը, օրինակ՝ կեղծ համոզմունքները Աստծո մասին, հարստության կամ զորության մասին խոստումը կամ գրոհներն Աստծո մասին մեր վկայության վրա։ Հնարավոր այլ խորամանկություններ են՝ որևէ բարի բանը չար դարձնելը կամ հակառակը (տես Եսայիա 5.20) և այն սուտը, որ չկա ճիշտ կամ սխալ (տես 2 Նեփի 28.22)։

Սատանայի՝ մեզ խաբելու եղանակներից յուրաքանչյուրի կողքին գրեք առնվազն մեկ եղանակ, որով կարող ենք Սուրբ Հոգու միջոցով խնդրել Աստծո օգնությունը՝ այդ գայթակղությունը հաղթահարելու համար։ Գրեք, թե ինչ հատուկ բաներ գիտեք Սուրբ Հոգու մասին, որոնք կարող են օգնել։

Ուսանողներին խրախուսեք հրավիրել Սուրբ Հոգուն՝ օգնելու իրենց դիմակայել խորամանկությանը։ Վկայեք Սուրբ Հոգու դերի և այն օրհնության մասին, որ Նա կարող է բերել մեր կյանք։

Բացատրական և պատմական տեղեկություններ

Ինչպիսի՞ խորամանկ ռազմավարություն է օգտագործում հակառակորդը։

Առաջին Նախագահությունում ծառայելիս նախագահ Դիտեր Ֆ․ Ուխդորֆը բացատրել է.

Նախագահ Դիտեր Ֆ. Ուխդորֆ

Մահկանացուներին ճշմարտությունից հեռացնելու համար հակառակորդը բազմաթիվ խորամանկ ռազմավարություններ ունի։ Նա առաջարկում է այն համոզմունքը, որ ճշմարտությունը հարաբերական է․ դիմելով հանդուրժողականության, արդարության մեր զգացումին՝ նա թաքցնում է իրական ճշմարտությունը և պնդում, որ մեկի «ճշմարտությունը» նույնքան վավեր է, որքան ցանկացած ուրիշինը։

Ոմանց նա հրապուրում է հավատալ, որ ինչ-որ տեղ բացարձակ ճշմարտություն կա, բայց անհնար է, որ որևէ մեկն իմանա դա։

Նույնիսկ նրանց համար, ովքեր արդեն ընդունել են ճշմարտությունը, նրա հիմնական ռազմավարությունը կասկածի սերմեր տարածելն է: (Դիտեր Ֆ. Ուխդորֆ, «Ի՞նչ է ճշմարտությունը» [Բրիգամ Յանգ համալսարանի հոգևոր հավաք, հունվարի 13, 2013թ․], 5, speeches.byu.edu)

Ինչպե՞ս կարող եմ իմանալ, թե որն է ճիշտը։

Նախագահ Ռասսել Մ. Նելսոնը վկայել է․

Նախագահ Ռասսել Մ. Նելսոն

Դուք չպետք է կասկածեք այն բանի վերաբերյալ, ինչը ճշմարիտ է: Դուք չպետք է կասկածեք նրան, ում կարող եք ապահովությամբ վստահել: Անձնական հայտնության միջոցով կարող եք ստանալ ձեր վկայությունը … որը տրվել է ձեր սրտին և մտքին այն մասին, ինչը ճշմարիտ է (Ռասսել Մ. Նելսոն, «Հայտնություն Եկեղեցու համար, հայտնություն մեր կյանքի համար», Ensign կամ Լիահոնա, մայիս 2018թ., 95):

Ինչպե՞ս կարող եմ խուսափել Հիսուս Քրիստոսի մասին մոլորությունից։

Փրկչի մասին ճշմարտություններ կարող ենք որոնել, երբ ուսումնասիրում ենք սուրբ գրությունները կամ նմանատիպ նյութեր՝ «Կենդանի Քրիստոսը․ Առաքյալների վկայությունը», որը հասանելի է այստեղ՝ ChurchofJesusChrist.org։

Օժանդակ ուսումնական վարժություններ

Երբ մյուս օրինագետները հարցեր էին տալիս Ամուղեկին

Ուսանողները կարող են ուսումնասիրել Ալմա 10.15–17 հատվածները՝ վերանայելու Ամուղեկի պատասխանը իրեն հարցեր տված այլ օրինագետներին։ Ուսանողներին առաջարկեք կիսվել, թե ինչ էր հասկացել Ամուղեկը։

Ավելացրեք խորամանկության լրացուցիչ օրինակ

Խորամանկության լրացուցիչ օրինակի համար կարող եք օգտվել Յոթանասունից երեց Ջեք Ն․ Ջերարդի՝ հոգևոր հավաքում ունեցած «Ապրեք օրը» ելույթի հատվածներից, որում նա քննարկում է հակառակորդի մարտավարությունը («Ապրեք օրը» [Այդահոյի հոգևոր հավաք, Բրիգամ Յանգի համալսարան, հոկտեմբերի 29, 2019թ․], byui.edu)։

Սատանան օգտագործում է հարստությունը խորամանկելու համար

Կարող եք ուսանողներին առաջարկել կարդալ Ղուկաս 4.6–8 հատվածը՝ իմանալու համար, թե սատանան ինչպես է օգտագործում հարստությունը և իշխանությունը՝ խորամանկելու համար։ Հարցրեք, թե նրանք ինչ են սովորում այն տեսարանից, որտեղ Փրկիչը պատասխանում է սատանայի՝ Իրեն գայթակղելու փորձերին։

Ուսանողները կարող են դիտել նաև «Ինչ պետք է տա մարդն իր հոգու փոխարեն» տեսանյութը (2:04), որը հասանելի է՝ ChurchofJesusChrist.org, և փնտրեք, թե ինչպես կարող ենք սխալ ընտրություն կատարել, երբ անտեսում ենք հետևանքները:

Ալմա 11.42–45։ Պատասխանել հարության մասին հարցերին

Եթե օգտակար լինի ուսանողների համար, կարող եք խնդրել նրանց հարության մասին իրենց հարցերի պատասխանները գտնելու համար կարդալ Ալմա 11.42–45 հատվածը։ Եթե կան հարցեր, որոնց պատասխաններն այդ հատվածները չեն տալիս, կարող եք ուսանողներին առաջարկել Սուրբ գրքերի ուղեցույցում, Աստվածաշնչի բառարանում կամ Թեմաների ուղեցույցում որոնել «հարություն» բառը։

Մեկ այլ տարբերակ է՝ ուսանողներին առաջարկել գրել հարության մասին իրենց հարցերը և դրանք ընդգրկել հետագա որևէ դասում։ Ալմա 40-ի վերաբերյալ դասը ներառում է Ալմա 11.42–45 հատվածները և անդրադառնում է հոգևոր աշխարհին ու հարության թեմային։