ʻAlamā 5:1–32

Ngaahi Fehuʻi ʻa ʻAlamā ki he Vakaiʻi Fakatāutahá

ko ha liliu ʻo e lotó

ʻE lava ke tokoniʻi kitautolu ʻe he ngaahi momeniti ʻo e vakaiʻi fakatāutahá ke tau ʻiloʻi lelei ange ʻa e mālohi ʻo hotau vā fetuʻutaki mo Sīsū Kalaisí. ʻI hono ʻiloʻi ʻe ʻAlamā ʻa e founga naʻe hoko ai ʻa e hīkisiá mo e fakakikihí ko ha konga ʻo e Siasí, naʻá ne fai leva ha ngaahi fehuʻi ki he kāingalotu ʻo e Siasí ʻi Seilahemalá ʻa ia naʻá ne poupouʻi ai kinautolu ke nau fakakaukau ki he meʻa ʻoku fakatefito ai ʻenau tokangá pea mo honau tuʻunga ʻi he ʻao ʻo e ʻOtuá. ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi hoʻo fakalakalaka fakalaumālié mo fakamālohia hoʻo ului kia Sīsū Kalaisí.

Ko hono tokoniʻi ʻo e kau akó ke nau fekumi ki he fakahā fakatāutahá. ʻE lava ke tokoni hono ʻoange ha taimi ki he kau akó ke nau ako fakalongolongo mo fakakaukau ai ki he folofolá ke fakaafeʻi ʻa e Laumālie Māʻoniʻoní. ʻI he vakai ʻa e kau akó ki honau lotó ke fakafuofuaʻi ʻenau mahino mo e tui ki he ongoongoleleí, ʻe lava ke nau ʻiloʻi ʻa e meʻa kuo nau ʻosi ʻiló pea fakaafeʻi ʻa e Laumālie Māʻoniʻoní ke tokoni ke nau ʻiloʻi ʻa e meʻa ʻoku fiemaʻu ke nau ʻilo, ongoʻi, pea mo fakahoko ke nau ofi ange ai kia Sīsū Kalaisí.

Teuteu ʻa e tokotaha akó: Fakaafeʻi ʻa e kau akó ke nau sio vave hifo ki he ʻAlamā 5 pea fakaʻilongaʻi kotoa e ngaahi fakaʻilonga fehuʻi ʻi he vahé. ʻE lava foki ke ʻeke ʻe he kau akó kiate kinautolu pē ha niʻihi ʻo e ngaahi fehuʻi naʻe ʻeke ʻe ʻAlamā ki hono kakaí ʻi he vahe ko ʻení.

Ngaahi ʻEkitivitī Ako ʻOku Ala Fakahokó

Vakaiʻi fakatāutahá

Fakakaukau ki he ngaahi faingamālie kuó ke maʻu ke ʻinitaviu ai koe ʻe ha taha kehe, kau ai ʻa e ngaahi ʻinitaviu lekomeni temipalé, ʻinitaviu fakataʻu mo hoʻo pīsopé pe palesiteni fakakoló mo e ngaahi ʻinitaviu ngāué.

• Ko e hā e taumuʻa ʻo e ngaahi ʻinitaviú?

• ʻE founga fēfē haʻo ʻinitaviu pē ʻau koe?

Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi lelei ʻo hono tuku maʻu pē ha taimi ke vakaiʻi ai ʻetau fakalakalaka fakalaumālié. Mahalo te mou fie mamata ʻi he foʻi vitiō “Foki ʻo Maʻú,” ʻoku maʻu ʻi he ChurchofJesusChrist.org, mei he taimi 08:14 ki he 08:58, pe lau ʻa e fakamatala ʻi laló.

Palesiteni M. Russell Ballard

ʻOku ou ʻilo ko e nofotaha e tokangá ‘i he foki [ki he ʻao ʻo e ʻOtuá] ʻo maʻu e ngaahi tāpuaki kuo talaʻofá, ‘e fiemaʻu ke u toutou ʻeke kiate au, “ʻOku fēfē ʻeku ngāué?”

ʻOku hangē ia haʻo ʻinitaviu fakataautaha pē koé. Pea kapau ʻoku ngali kehe, fakakaukau ki ai: ko hai ʻi he māmaní ʻoku toe ʻilo lelei ange kiate koe? ʻOkú ke ʻiloʻi hoʻo fakakaukaú; hoʻo tōʻonga fakapulipulí, hoʻo holí mo e fakaʻamú, taumuʻá mo e palaní. Pea ʻokú ke ʻilo lelei ange ʻi ha toe taha ʻa e tuʻunga fakalakalaka ʻokú ke ʻi aí. (M. Russell Ballard, “Foki ʻo Maʻu,” Ensign pe Liahona, Mē 2017, 64)

Fakakaukau ki he tuʻo lahi hoʻo tuku ha taimi ke vakaiʻi ai hoʻo fakalakalaka fakalaumālié.

• Ko e hā ha faʻahinga lelei ʻe lava ke maʻu mei hono fakahoko maʻu pē ʻení?

Ko ha taukei te ke lava ʻo fakaʻaongaʻi ʻi hono ako hoʻo folofolá ko e tuku ha taimi ke kiʻi mālōlō ai peá ke vakaiʻi ʻa e tuʻunga lelei hoʻo moʻui ʻaki e ngaahi akonaki pe tefitoʻi moʻoni ʻokú ke akó. Te ke maʻu he ʻahó ni ha faingamālie ke ʻahiʻahi fakahoko ai ʻa e taukei ko iá ʻi hoʻo ako ʻa e ʻAlamā 5. ʻOku ʻi he vahe ko ʻení ha ngaahi fehuʻi lahi naʻe fai ʻe ʻAlamā ki hono kakaí. Te ke lava foki ʻo ʻeke kiate koe ʻa e ngaahi fehuʻi ko ʻení ke ke vakaiʻi ʻaki hoʻo fakalakalaka fakalaumālié. ʻI hoʻo akó, fekumi ki ha fakahinohino mei he Tamai Hēvaní ke tokoni atu ke ke ʻiloʻi ʻa e meʻa ʻokú ke fakahoko leleí mo e founga ʻokú Ne finangalo ke ke fakalakalaka aí.

Ke tokoniʻi e kau akó ke nau sio ki he lahi ʻo e ngaahi fehuʻi ʻoku ʻi he ʻAlamā 5, fakakaukau ke fakaafeʻi ʻa e kau akó ke nau vakai vave hifo ki he vahé pea fakatokangaʻi ʻa e lahi ʻo e ngaahi fakaʻilonga fehuʻi lahí. Te ke lava foki ʻo fakaafeʻi ʻa e kau akó ke tuku ha taimi lolotonga ʻenau ako folofola fakatāutahá ke fakaʻilongaʻi pe siakaleʻi kotoa e ngaahi fakaʻilonga fehuʻi ʻi he vahe ko ʻení kapau kuo teʻeki ke nau fai ia.

Ko e malanga ʻa ʻAlamā ki he kakai ʻo Seilahemalá

Manatuʻi ʻi he hili e vakai ʻa ʻAlamā ki he hīkisia mo e manumanu ʻi hono kakaí, naʻá ne hifo mei heʻene hoko ko e fakamaau lahi ki he kakai Nīfaí ke fakatapui kakato ange ʻene moʻuí ki hono akoʻi e folofola ʻa e ʻOtuá (vakai, ʻAlamā 4:19).

Naʻe kamata e malanga ʻa ʻAlamaá ʻi he fonua ko Seilahemalá. Naʻá ne fakamanatu ki he kakai ko ʻení ʻa e nofo pōpula fakalaumālie mo fakatuʻasino naʻe aʻusia ʻe he kau Nīfaí lolotonga e ngaahi ʻaho ʻo e Tuʻi ko Noá (vakai, ʻAlamā 5:3–5).

Lau ʻa e ʻAlamā 5:6–13, ʻo kumi e meʻa naʻe fiemaʻu ʻe ʻAlamā ke manatuʻi ʻe hono kakaí fekauʻaki mo e toʻu tangata kimuʻa ʻo e kakai Nīfaí.

• ʻOkú ke pehē ko e hā naʻe fiemaʻu ai ʻe ʻAlamā ke manatuʻi ʻe hono kakaí ʻa e ngaahi meʻá ni?

• Ko e hā naʻe fiemaʻu ʻe ʻAlamā ke ʻilo ʻe hono kakaí fekauʻaki mo Sīsū Kalaisi ʻi he veesi 7?

Lau ʻa e ʻAlamā 5:14, 26, ʻo kumi e ngaahi fehuʻi naʻe fai ʻe ʻAlamā ki hono kakaí hili ʻene fakamanatu kiate kinautolu honau tukufakaholo fakalaumālié.

• ʻOkú ke pehē ko e hā naʻe fiemaʻu ʻe ʻAlamā ke mahino ki hono kakaí ʻi heʻene ʻeke ange ʻa e ngaahi fehuʻi ko ʻení?

  ʻE lava ke ʻoatu ʻe he kau akó ha ngaahi moʻoni hangē ko ʻení: ʻOku finangalo ʻa e ʻEikí ke tau aʻusia ha fuʻu liliu lahi ʻo e lotó pea ʻi he hili hono fanauʻi fakalaumālie kitautolu ʻi he ʻOtuá, ʻoku fiemaʻu ke tau ngāue ke pukepuke ʻa e liliu ʻi hotau lotó.

• ʻOkú ke pehē ʻe liliu fēfē hoʻo moʻuí ʻi hoʻo ʻeke kiate koe ha ngaahi fehuʻi hangē ko ia ʻoku hā ʻi he veesi 14 mo e 26 ?

Ko hono fakaʻaongaʻi e ngaahi akonaki ʻa ʻAlamaá ke fakahoko ha vakaiʻi fakatāutahá

Fakaʻaliʻali e ngaahi fakahinohino ko ʻení pea ʻoange ha taimi feʻunga ki he kau akó (fakafuofua ki ha miniti ʻe 10–15, kapau ʻe lava) ke nau ngāue fakalongolongo ʻiate kinautolu pē ʻi he ʻekitivitī ko ʻení. ʻE lava ke ke fakakaukau ke tā leʻosiʻi ha ngaahi himi pe hiva fakalaumālie lolotonga hono fakakakato ʻe he kau akó ʻa e ʻekitivitií.

Tuku ha taimi ke ke ako ai e ngaahi lea ʻa ʻAlamā ki he kakai ʻo Seilahemalá ʻi he ʻAlamā 5:14–30 pea fakakaukau pe naʻá ke ʻosi aʻusia nai pe ʻokú ke lolotonga foua ʻa e liliu naʻe fakamatalaʻi ʻe ʻAlamaá. ʻI hoʻo akó, fakahoko hoʻo vakaiʻi fakatāutahá ʻaki haʻo fakaʻaongaʻi ha niʻihi pe kotoa ʻo e ngaahi fehuʻi naʻe fai ʻe ʻAlamā ʻi he ngaahi veesi ko ʻení. Ko ha niʻihi ʻeni ʻo e ngaahi founga ke fakahoko ai iá.

1. Kiʻi taʻofi ʻo fakakaukauloto ʻi he veesi ʻe ua ki he tolu kotoa pē, ʻo vakaiʻi e founga ʻoku fekauʻaki ai e ngaahi fehuʻi ʻa ʻAlamā ʻi he ngaahi veesi ko iá mo hoʻo moʻuí.

2. Fili ha niʻihi ʻo e ngaahi fehuʻi ʻa ʻAlamaá ʻokú ke ongoʻi ʻoku ʻuhingamālie mo ʻaonga taha kiate koé. Hiki e ngaahi fehuʻi ko ʻení ʻi hoʻo tohinoa akó pea hiki hoʻo ngaahi tali ki he fehuʻi takitaha kae pehē ki ha ngaahi fakakaukau pe ongo kehe ʻokú ke maʻu.

3. Hili hono ʻiloʻi e ngaahi fehuʻi naʻe fai ʻe ʻAlamā ʻi he ngaahi veesi ko ʻení, faʻu ha fehuʻi ʻe ua pe tolu te ke lava ʻo fakaʻaongaʻi ke fakafuofuaʻi ʻaki hoʻo fakalakalaka fakalaumālié. Lekooti hoʻo ngaahi talí ʻi hoʻo tohinoa akó.

Hili hono fakakakato ʻe he kau akó ʻa e ʻekitivitī ako ko ʻení, aleaʻi mo kinautolu ʻa e meʻa naʻa nau ako mo ongoʻi ʻi heʻenau fakahoko ʻenau vakaiʻi fakatāutahá. ʻE lava ke fakaʻaongaʻi e ngaahi fehuʻi ko ʻení ko ha konga ʻo e fealeaʻakí.

• Ko e fē ʻi he ngaahi fehuʻi ʻa ʻAlamaá naʻá ke ongoʻi naʻe mahuʻingamālie taha kiate koé? Ko e hā hono ʻuhingá?

• Ko e hā ha ngaahi foʻi lea pe kupuʻi lea naʻá ke maʻu mei he ngaahi veesi ko ʻení te ne lava ʻo ʻoatu kiate koe ʻa e holi mo e loto-toʻa ke fakatomalá?

• Ko e hā naʻá ke ako fekauʻaki mo e ʻOtuá mo Hono finangalo maʻaú mei he meʻa kuó ke akó?

Fakakaukau ki he meʻa kuó ke ako pe ongoʻi he ʻahó ni ʻi hoʻo fakaʻaongaʻi e ngaahi lea ʻa ʻAlamaá ke vakaiʻi ʻaki hoʻo fakalakalaka fakalaumālié. Feinga ke ʻiloʻi ha meʻa ʻe taha pe ua ʻokú ke fie ngāue ki ai koeʻuhí ko e meʻa kuó ke akó. Fakakaukau ki he meʻa te ke kamata fai he ʻahó ni, ngaahi faingataʻa te ke ala fehangahangai mo iá, mo e founga te ke lava ai ʻo fekumi ki he tokoni ʻa e ʻOtuá ke ikunaʻi hoʻo ngaahi faingataʻá. Lekooti hoʻo ngaahi fakakaukaú mo e ueʻi fakalaumālié ʻi hoʻo tohinoa akó.

Fakamatala Fakamahinó mo e Puipuituʻá

ʻAlamā 5:9, 26. Ko e hā te ne lava ʻo taʻofi kitautolu mei hono pukepuke ha liliu ʻo e lotó?

Naʻe akonaki ʻa ʻEletā Uilifooti W. ʻEnitaseni ʻo e Kau Fitungofulú ʻo pehē:

ʻEletā Wilford W. Andersen

ʻI heʻetau maʻu e meʻafoaki ʻo e Laumālie Māʻoniʻoní hili e papitaisó, ʻoku fakafonu kitautolu ʻe he fasi fakalangi ʻoku hoko ai e uluí. ʻOku liliu hotau lotó, pea ʻoku ʻikai ke tau toe “maʻu ha holi ke faikovi, ka ke failelei maʻu ai pē” (Mōsaia 5:2). Ka he ʻikai kātakiʻi ʻe he Laumālié ʻa e ʻulungaanga taʻeʻofá pe loto-hikisiá pe meheká. Kapau ʻe mole mei heʻetau moʻuí e tākiekina pelepelengesi ko iá, ʻe lava ke mole vave ʻa e moʻoni fakaʻofoʻofa ʻo e ongoongoleleí ʻo aʻu ki haʻane longo ʻaupito. Naʻe fai ʻe ʻAlamā ha fehuʻi mahuʻinga: “Pea kapau kuo mou fie hiva ʻaki ʻa e hiva ko ʻeni ʻo ʻene ʻofa huhuʻí, ʻoku ou fie fehuʻi atu, pe ʻoku mou lava ʻo ongoʻi pehē he taimí ni?” (ʻAlamā 5:26). (Wilford W. Andersen, “Ko e Hiva ʻo e Ongoongoleleí,” Ensign pe Liahona, Mē 2015, 55)

ʻAlamā 5:14. ʻOku ʻuhinga ki he hā ke fanauʻi ʻi he ʻOtuá?

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā David A. Bednar

ʻOku toutou akoʻi mai ʻe he kau tamaioʻeiki ʻa e ʻEikí kuo fakamafaiʻí ko e taha ʻo e ngaahi tefitoʻi taumuʻa ʻo ʻetau moʻui fakamatelié ke liliu fakalaumālie pea liliu ʻo fakafou ʻi he Fakalelei ʻa Sīsū Kalaisí. …

ʻOku fakahinohino kitautolu ke tau “haʻu kia Kalaisi, pea hoko ʻo haohaoa ʻiate ia, pea fakafisi ʻa [kitautolu] mei he anga taʻe-māʻoniʻoni kotoa pē” (Molonai 10:32), ke hoko ko e “fakatupu foʻou” ia ʻia Kalaisi (vakai 2 Kolinitō 5:17), ke fakafisi mei he “tangata fakakakanó” (Mōsaia 3:19), pea ke aʻusia ha “liliu lahi ʻi loto ʻiate [kitautolu], pe ʻi [hotau] lotó, ʻo ʻikai te [tau] toe maʻu ha holi ke faikovi, ka ke failelei maʻu ai pē” (Mōsaia 5:2). Kātaki ʻo fakatokangaʻi ko e ului naʻe fakamatalaʻi ʻi he ngaahi veesi ko ʻení ‘oku mālohi, ‘o ‘ikai vaivai—ko ha fanauʻi foʻou fakalaumālie mo ha liliu mahuʻinga ʻi he meʻa ʻoku tau ongoʻi mo fiemaʻú, ʻi heʻetau fakakaukaú mo ia ʻoku tau faí, pea mo kitautolu. ʻOku fakahoko moʻoni ʻe he ʻelito ʻo e ongoongolelei ʻa Sīsū Kalaisí ha liliu mahuʻinga mo fakaʻaufuli ʻi hotau angá pea ʻoku malava ia tuʻunga ʻi heʻetau falala ki he “ngaahi ngāue māʻoniʻoni, mo e ʻaloʻofa, mo e manavaʻofa ʻa e Mīsaia Māʻoniʻoní” (2 Nīfai 2:8). ʻI heʻetau fili ke muimui ki he ʻEikí, ʻoku tau fili ai ke liliu—ke fanauʻi foʻou fakalaumālie. (David A. Bednar, “Ye Must Be Born Again,” Ensign pe Liahona, May 2007, 19–20)

Ngaahi ʻEkitivitī Fakalahi ki he Akó

ʻAlamā 5:4–13. “Kuo feʻunga koā hoʻomou manatu ki he nofo pōpula ʻa hoʻomou ngaahi tamaí?”

Fakakaukau ke fakaafeʻi ʻa e kau akó ke omi mateuteu ki he kalasí ke vahevahe fekauʻaki mo ha kui naʻá ne tuku ha tukufakaholo ke nau muimui ai. Lolotonga hono aleaʻi ʻa e ʻAlamā 5:4–13, te ke lava ʻo fakaafeʻi ʻa e kau akó ke vahevahe ʻenau ngaahi talanoá. ʻE lava foki ke ke fakaʻaongaʻi ʻa e lea ko ʻeni ʻa ʻEletā Uiliami R. Uoka ʻo e Kau Fitungofulú ko ha konga ʻo e fealēleaʻaki ko ʻení:

“Ko ha toki meʻa fakaʻofoʻofa [kapau] naʻe ʻilo ʻe he Kāingalotu kotoa pē ʻa e ngaahi talanoa ki he ului ʻenau ngaahi kuí. …

“Ko e lahi ange ʻetau ongoʻi ʻoku tau fetaulaki mo ʻetau ngaahi kuí, hangehangē ʻe lahi ange ai ʻetau fai ha ngaahi fili fakapotopoto mo angatonú.

“ʻOku moʻoni ia. ʻE faitāpuekina lahi takitaha kitautolu kapau ʻoku tau ʻilo ʻa e ngaahi talanoa ʻo e tui mo e feilaulau ʻetau ngaahi kuí ke kau ki he Siasi ʻo e ʻEikí” (William R. Walker, “Tauhi Maʻu ʻa e Tuí,” Ensign pe Liahona, Mē 2014, 97, 99).

Katiōkalami (Cardiogram) fakalaumālié

Fakamatalaʻi ange ko e katiōkalamí ko ha saati ia ‘oku ngāue ʻaki ‘e he kau toketaá he taimi ʻe niʻihi ke fakafuofuaʻi ‘a e tuʻunga ‘o hotau mafu fakaesinó. ʻI he founga tatau pē, naʻe fakataumuʻa e ngaahi fehuʻi naʻe fai ʻe ʻAlamā ʻi he ʻAlamā 5 ke tokoni ki hono kakaí ke nau fakafuofuaʻi e tuʻunga fakalaumālie ʻo honau lotó.

Fakakaukau ke fakaʻaliʻali e ngaahi veesi ko ʻení: ʻAlamā 5:27, 28, 29, 30–31. Fakaafeʻi ʻa e kau akó ke ako ʻiate kinautolu pē ʻa e veesi pe ngaahi veesi takitaha pea tali ʻa e founga ʻoku fakamatalaʻi ai kinautolu ʻe he ngaahi fehuʻi ʻa ʻAlamaá ʻaki hono fakaʻaongaʻi ʻa e meʻafua ko ʻení: “Maʻu ai pē,” “Meimei maʻu ai pē,” “Angamaheni,” “Taimi ʻe niʻihi,” pe “Tātaaitaha, ʻo kapau ʻe ʻi ai ha taimi pehē.” Mahalo te ke fie fokotuʻu ange ke tali ʻe he kau akó ʻa e fehuʻi ʻi he veesi 29 ʻa ia ʻoku pehē, “Kuo mole kotoa meiate [kimoutolu] ʻa e meheká?”

Hili hono maʻu ʻe he kau akó ha taimi feʻunga ke fakakakato ʻa e ʻekitivitií, fakaafeʻi ke nau hiki ha faʻahinga fakakaukau pe ongo naʻa nau maʻu ʻi heʻenau tohinoa akó.

Ngaahi akonaki ʻa ʻAlamā kau ki he fanauʻi foʻoú

ʻE lava ke ʻaonga ki he kau akó ʻenau ako ʻa e ʻAlamā 5 ʻaki ha fakakaukau ʻo e feinga ke mahino lelei ange ʻa e uluí. Hangē ko ʻení, ʻe lava ke ako ʻe he kau akó ʻa e ʻAlamā 5:2–7, ʻo tokanga ki he fatongia ʻe lava ke fakahoko ʻe Sīsū Kalaisi ʻi hono tokoniʻi kitautolu ke fanauʻi foʻoú pea aʻusia ha liliu ʻo e lotó. Te nau lava ʻo ako ʻa e ʻAlamā 5:8–16, 21, ʻo kumi ʻa e mālohi ʻe lava ke maʻu ʻe he Fakamoʻuí kiate kinautolu ʻoku fanauʻi foʻoú mo fakamālohia ʻa e tui kiate Iá.

Vitiō ʻo e Tohi ʻa Molomoná

ʻE lava ke kau ʻi he ako ʻa e kau akó ki he ʻAlamā 5, hano huluʻi ʻa e “ʻOku fakamaau ʻe ʻAlamā ʻa e Siasi ʻo e ʻOtuá ʻi Seilahemalá” mei he taimi 0:00 to 3:02.