Toe Vakaiʻi Hono 10 ʻo e Fakataukei Fakatokāteliné

Fakaʻaongaʻi e Ngaahi Potufolofola Fakataukei Fakatokāteliné

toʻu tupu ʻoku ako ʻi ha komipiuta

Ko e taha ʻo e ngaahi taumuʻa ʻo e fakataukei fakatokāteliné ke tokoniʻi koe ke ke ako ʻa e founga ke fakaʻaongaʻi ʻi hoʻo moʻuí ʻa e tokāteline ʻoku akoʻi ʻi he ngaahi potufolofola fakataukei fakatokāteliné. ʻE ʻoatu ʻe he lēsoni ko ʻení ha ngaahi faingamālie ke ke ʻahiʻahi fakaʻaongaʻi ai ʻi hoʻo moʻuí ha niʻihi ʻo e ngaahi potufolofola fakataukei fakatokāteline kuó ke ako he taʻu ní.

Tokoni ke fakafehokotaki ʻe he kau akó ʻa e ngaahi tefitoʻi moʻoni ʻo e ongoongoleleí ki he moʻui fakaʻahó. Makehe mei hono talaange ki he kau akó ʻa e founga ke fakaʻaongaʻi ai e ngaahi moʻoni ʻo e ongoongoleleí, tokoniʻ ke nau ako ʻiate kinautolu pē ʻa e founga ke fakaʻaongaʻi ai e ongoongoleleí ʻi honau ngaahi tūkunga fakatāutahá. Fakaafeʻi ʻa e kau akó ke kole ki he ʻOtuá pea fakafanongo ki ha ngaahi ueʻi mei he Laumālié ke nau ʻiloʻi e founga te nau lava ai ʻo fakaʻaongaʻi e ongoongoleleí ʻi heʻenau moʻuí.

Teuteu ʻa e tokotaha akó: Fakaafeʻi ʻa e kau akó ke nau fili ha taha ʻo e ngaahi fuofua potufolofola fakataukei fakatokāteline ʻe 12 ʻoku nau pehē ʻoku ʻuhingamālié. Poupouʻi e kau akó ke nau omi mateuteu ke vahevahe ʻa e ʻuhinga ʻoku ʻuhingamālie ai kiate kinautolu ʻa e potufolofola kuo nau filí.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá ʻi he lele ʻa e seminelí.

Vakaiʻi e ngaahi potufolofola fakataukei fakatokāteliné

Fakaʻaliʻali pe ʻoange ki he kau akó ha tatau ʻo e saati ko ʻení.

Toe fakamanatu ʻa e ʻuluaki potufolofola fakataukei fakatokāteline ʻe 12 mo e ngaahi kupuʻi lea mahuʻinga mei he Tohi ʻa Molomoná, ʻo fakaʻaongaʻi ʻa e saati ko ʻení. Hili iá pea fili ha potufolofola ʻe taha ʻokú ke pehē ʻoku ʻuhingamālie pea lau kakato ʻa e potufolofolá.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Folofola Mahuʻingá
Potufolofolá 1 Nīfai 3:7	Kupuʻi Lea Folofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Potufolofolá 2 Nīfai 2:25	Kupuʻi Lea Folofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Potufolofolá 2 Nīfai 2:27	Kupuʻi Lea Folofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Potufolofolá 2 Nīfai 26:33	Kupuʻi Lea Folofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Potufolofolá 2 Nīfai 28:30	Kupuʻi Lea Folofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Potufolofolá 2 Nīfai 32:3	Kupuʻi Lea Folofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Potufolofolá 2 Nīfai 32:8–9	Kupuʻi Lea Folofola Mahuʻingá “Kuo pau ke mou lotu maʻu ai pē.”
Potufolofolá Mōsaia 2:17	Kupuʻi Lea Folofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Potufolofolá Mōsaia 2:41	Kupuʻi Lea Folofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Potufolofolá Mōsaia 3:19	Kupuʻi Lea Folofola Mahuʻingá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Potufolofolá Mōsaia 4:9	Kupuʻi Lea Folofola Mahuʻingá “Tui pē ki he ʻOtuá; … tui ʻokú Ne maʻu ʻa e poto kotoa.”
Potufolofolá Mōsaia 18:8–10	Kupuʻi Lea Folofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo ia.”

© 2023 by Intellectual Reserve, Inc. All rights reserved.

Fakakaukau ke fakaafeʻi ʻa e kau akó ke nau ʻunu takai ʻi he lokí ʻo vahevahe ʻa e potufolofola naʻa nau filí mo ha kaungāako kehe ʻe toko ua pe toko tolu. Te ke lava foki ʻo vahevahe mo e kau akó ha potufolofola fakataukei fakatokāteline ʻoku ʻuhingamālie fakataautaha kiate koe.

Ko hono fakafehokotaki e ngaahi moʻoni ʻo e ongoongoleleí ki hoʻo moʻuí mo e ngaahi tūkungá

ʻI hoʻo ako ʻa e folofolá, ko e founga ʻe taha ke ke fakaʻaongaʻi ai ʻa e meʻa ʻokú ke akó ko e feinga ke fakafehokotaki ki hoʻo moʻuí mo e ngaahi tūkungá. Hangē ko ʻení, mahalo ʻokú ke fefaʻuhi mo ha fehuʻi pe faingataʻa pau. Ko e fekumi ki ha ngaahi tali lolotonga hoʻo lau e folofolá ko ha founga lelei ia ke fakatupulaki ai e mahuʻinga ʻo hoʻo akó.

ʻEkitivitī A

Fakakaukau ke fakaafeʻi ʻa e kau akó ke lisi ʻi he palakipoé ha ngaahi faingataʻa kehekehe ʻi he māmaní. Vahevahe tauhoa e kau akó, pea vahe ki he hoa takitaha ha taha ʻo e ngaahi faingataʻá. ʻE lava ke faʻu ʻe he kau akó ha tūkunga pea nau fakafaivaʻi ia. ʻE lava ke fakamatalaʻi ʻe ha tokotaha ako ʻe taha ʻa e faingataʻá, pea ʻe lava ʻe he tokotaha ʻe tahá ʻo fili ha potufolofola fakataukei fakatokāteline mei he sātí pea feinga ke fakaleleiʻi e palopalemá ʻo fakaʻaongaʻi e ngaahi moʻoni mei he potufolofola ko iá. ʻE lava leva ke fetongi tuʻunga ʻa e kau akó, pe te ke fakaafeʻi ke nau fakatātaaʻi ʻenau tūkungá ʻi muʻa he kalasí.

Ko ha meʻa ʻe taha ke nau fili mei ai ko hono vahe ki he kau akó ha potufolofola fakataukei fakatokāteline pea faʻu leva ha ngaahi tūkunga ʻo makatuʻunga ʻi he ngaahi faingataʻa ʻe lava ke solova ʻe he potufolofolá.

• ʻOku ʻi ai nai ha ngaahi potufolofola fakataukei fakatokāteline ʻokú ke pehē te ne fakaleleiʻi e palopalemá? ʻE mei kehe fēfē nai ʻa e māmaní kapau naʻe fakaʻaongaʻi ʻe ha kakai tokolahi ʻa e ngaahi moʻoni mei he potufolofola kuó ke filí? Vahevahe ha sīpinga pau ʻe taha pe ua.

• ʻI hono fakaʻaongaʻi e tokāteline mei he potufolofola kuó ke filí, ko e hā te ke lava ʻo lea ʻaki ki ha taha ʻoku fehangahangai mo e faingataʻa ko ʻení?

ʻEkitivitī E

Fakakaukau ke fakaafeʻi ʻa e kau akó ke fakakakato fakalongolongo ʻa e ʻekitivitī ko ʻení ʻiate kinautolu pē. Kapau ʻoku ʻikai fuʻu fakataautaha, te ke lava ʻo fakaafeʻi ʻa e kau akó ke vahevahe ʻenau ngaahi fakakaukau mo e ongo fekauʻaki mo e potufolofola fakataukei fakatokāteline naʻe filí pea mo e founga ʻe ala tokoni ai ke nau hoko ʻo tatau ange mo Sīsū Kalaisí.

Fakakaukau ki ho ngaahi tūkunga lolotongá, kau ai ha faʻahinga fehuʻi fakataautaha, ngaahi faingataʻa, pe ngaahi ʻulungaanga ʻokú ke ala fiemaʻu tokoni ai. Toe vakaiʻi e lisi ʻo e ngaahi potufolofola fakataukei fakatokāteliné, ʻo kumi e ngaahi moʻoni ʻe lava ʻo tokoni atu ʻi he ngaahi fehuʻi, faingataʻa, pe ngaahi ʻulungaanga ko ʻení. Fili ha potufolofola ʻe taha pe lahi ange ʻe ala tokoni atu ʻi ha meʻa ʻokú ke fehangahangai mo ia he taimí ni.

• ʻE hoko fēfē hono fakaʻaongaʻi e tokāteline mei he potufolofola kuó ke filí ko ha tāpuaki ki hoʻo moʻuí mo hoʻo ngaahi tūkungá?

• ʻE tokoni fēfē hono fakaʻaongaʻi e ngaahi moʻoni mei he potufolofola ko iá ke ke ongoʻi ofi ange ai kia Sīsū Kalaisi pea hoko ʻo hangē ko Iá?

• Ko e hā ha kiʻi sitepu ʻe taha pe ua te ke lava ʻo fakahoko ke kamata fakaʻaongaʻi ai e ngaahi moʻoni ko ʻení ʻi hoʻo moʻuí?