“Mōsaia 7–10: Vakai Fakalūkufuá,” Tohi ʻa Molomoná – Tohi Lēsoni ʻa e Faiakó (2024)

“Mōsaia 7–10,” Tohi ʻa Molomoná – Tohi Lēsoni ʻa e Faiakó

Mōsaia 7–10

Vakai Fakalūkufuá

ʻOku ʻi he Mōsaia 5 ʻa e fakaʻosinga ʻo e malanga ʻa e Tuʻi ko Penisimaní ki hono kakaí ʻi he taimi naʻá ne tānaki fakataha ai kinautolu ke foaki kiate kinautolu ha hingoá (vakai, Mōsaia 1:11). ʻI he Mōsaia 7–8, naʻe fakahinohino ai ʻe ʻĀmoni ʻa e Tuʻi ko Limihaí ki he palōfitá mo fakamatalaʻi e ngaahi moʻoni mahuʻinga fekauʻaki mo e fatongia ʻo e kau palōfitá, kau tangata kikité, mo e kau tangata maʻu fakahaá. ʻI he Mōsaia 9–10, naʻe fuʻu tokanga ʻaupito ʻa Sēnifi ke foki ki he fonua ko Nīfaí ʻo toe langa ʻa e ngaahi kolo ʻi aí pea ʻikai ai ke ne fakakaukau ki ha niʻihi ʻo e ngaahi nunuʻa kovi ʻe ala hoko mei he fili naʻá ne faí. Hili hono aʻusia ʻe Sēnifi mo hono kakaí ha niʻihi ʻo e ngaahi nunuʻá, naʻa nau tafoki ki he ʻEikí ʻi he tui.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 5:1–5

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke fakatupulaki ʻenau holi ke liliú pe hokohoko atu ke liliu ʻi he tokoni ʻa e ʻEikí.

Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ʻokú ne ʻai ke nau fie ofi ange ai ki he Tamai Hēvaní mo Sīsū Kalaisí.
Vitiō: “ʻOku Fakahoko ʻe he Kakai ʻo e Tuʻi ko Penisimaní ha Fuakava” (3:40; sio mei he taimi 0:00 ki he 1:37); “Ko ha Liliu ʻo e Lotó” (4:39)
Meʻa ke fakaʻaliʻalí: Ko e saati fekauʻaki mo e liliú, ʻe lava pē ke fakaʻaliʻali pe hiki hano tatau ʻi he palakipoé
Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke taipeʻi ʻa e konga ʻuluaki ʻo e sētesi, “ʻI he liliu hotau lotó ʻi he Laumālie ʻo e ʻEikí, ʻoku tau …” Tuku leva ki ha kau ako kehekehe ke fakakakato ʻa e sētesí ʻo fakatefito ʻi heʻenau ako ʻa e Mōsaia 5:1–5.

Mōsaia 5:6–15

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó ʻa e mahuʻinga ʻo hono toʻo kiate kinautolu ʻa e huafa ʻo Sīsū Kalaisí.

Teuteu ʻa e tokotaha akó: Fakaafeʻi e kau akó ke fakalaulauloto ki he fehuʻi “ʻOku ʻuhinga ki he hā ke toʻo kiate koe ʻa e huafa ʻo Kalaisí?”
Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi e kau akó ke fakakakato e sātí ʻi ha fakamatala ʻi heʻenau meʻangāue fakaʻilekitulōniká. Fakaafeʻi ke nau vahevahe ʻenau screen mo ʻenau saati kuo kakató. Kapau te ke fili ke fai ʻeni, ʻai ke tomuʻa ʻilo ʻe he kau akó ʻe fakaafeʻi kinautolu ke vahevahe ʻenau screen mo e sātí.

Mōsaia 7–8

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e fatongia ʻo e kau palofitá ko ha kau tangata kikite ʻi he palani ʻa e Tamai Hēvaní.

Teuteu ʻa e tokotaha akó: Fakakaukau ke fakaafeʻi e kau akó ke fakakaukau ki haʻanau tali kapau ʻe fehuʻi ange ʻe ha taha pe ko e hā ʻoku nau tui ai ki he kau palōfitá.
Meʻa ke fakaʻaliʻalí: Ko e fakatātā ʻo e ngaahi fononga ʻi he tohi ʻa Mōsaiá, tatau ai pē pe ʻoku fakaʻaliʻali pe hiki hano tatau ʻi he palakipoé (ʻE lava pē ke tuku ʻeni ko ha maʻuʻanga tokoni ki he lēsoni hokó.)
Fokotuʻu ki hono akoʻi ʻi he konifelenisi vitioó: ʻI he hokosia e taimi ke fakakakato ai ʻe he kau akó ha taha ʻo e ngaahi ʻekitivitī fekauʻaki mo e mahuʻinga ʻo e kau tangata kikité, fakakaukau ke fakaʻaliʻali e ngaahi meʻa ke fili mei ai ʻi he screen pe fakahū kinautolu ʻi he polokalama fetalanoaʻakí. ʻI he mateuteu ʻa e kau akó ke vahevahe ʻa e meʻa ne nau maʻú, fakaafeʻi kinautolu ke taipeʻi ʻi he polokalama fetalanoaʻakí ʻa e lahi ʻo e ʻekitivitī kuo nau fakakakató. Kole leva ki ha kau ako ʻe niʻihi naʻa nau fakakakato ha ngaahi ʻekitivitī kehekehe ke vahevahe ʻa e meʻa naʻa nau maʻú.

Mōsaia 9–10

Taumuʻa ʻo e lēsoní: ʻE lava ke tokoni e lēsoni ko ʻení ke ʻiloʻi ʻe he kau akó e founga te nau lava ai ʻo maʻu ha mālohi mei he ʻEikí ʻi heʻenau lotu pea laka atu ʻi he tuí.

Teuteu ʻa e tokotaha akó: Fakaafeʻi e kau akó ke kumi ha fakaʻuhinga ʻo e ngaahi lea fuʻu fakaʻamu lahí. Poupouʻi kinautolu ke omi mateuteu ke vahevahe ʻa e meʻa ʻoku faʻa loto-lahi ai ʻa e toʻu tupú pea mo e ngaahi faingataʻa ʻe ala hokó.
Meʻa ke fakaʻaliʻalí: Ko e ʻīmisi ʻo e mate ʻa e laʻaá/māhiná; ko e fehuʻi fekauʻaki mo e mate ʻa e laʻaá pe māhiná ke fakaʻaliʻali pe hiki ʻi he palakipoé; ko e fakatātā ʻo e ngaahi fononga ʻi he tohi ʻa Mōsaiá; ko e ngaahi veesi mo e ngaahi fehuʻi ʻi he ʻuluʻi tohi “Tafoki ki he ʻEikí”
Vitiō: “Lotu” (4:12)
Fokotuʻu ki hono akoʻi ʻi he konifelenisi vitioó: ʻI hoʻo aʻu ki he tūkunga ʻi he fakaʻosinga ʻo e lēsoní, fakaafeʻi e kau akó ke tali e ngaahi fehuʻí ʻo fakaʻaongaʻi ʻa e polokalama fetalanoaʻakí. Fili leva ha niʻihi ʻo e ngaahi tali ke vahevahe mo e kalasí.

Toe Vakaiʻi Hono 7 ʻo e Fakataukei Fakatokāteliné

Taumuʻa ʻo e lēsoní: ʻE lava ke tokoni e lēsoni ko ʻení ke ako ʻe he kau akó e founga ke fakaʻaongaʻi ai e tokāteline ʻoku akoʻi ʻi he ngaahi potufolofola fakataukei fakatokāteliné ki he ngaahi tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke toe vakaiʻi ha ngaahi potufolofola fakataukei fakatokāteline kuo nau ako pea ke fakalaulauloto ki he founga ʻe ala fakaʻaongaʻi ai e ngaahi potufolofola ko iá ki he moʻui ʻa ha toʻu tupu he ʻahó ni.
Vitiō: “ʻOkú Ne Akoʻi Kitautolu ke Tau Liʻaki e Tangata Fakakakanó” (10:51; mamata mei he taimi 0:00 ki he 5:15)
Meʻa ke fakaʻaliʻalí: Ko e saati ʻo e ngaahi potufolofola fakataukei fakatokāteliné mo e ngaahi kupuʻi lea folofola mahuʻingá; ko e ngaahi fakahinohino ki he tohí
Fokotuʻu ki hono akoʻi ʻi he konifelenisi vitioó: ʻI he ofi ki he fakaʻosinga ʻo e lēsoní, hili hono hiki ʻe he kau akó ʻenau ʻū tohí, fakakulupu e kau akó ʻi he ngaahi loki fetalanoaʻakí ke nau lava ʻo vahevahe e meʻa ne nau tohí. Fakamanatu ange ke nau vahevahe foki mo e tūkunga naʻa nau faʻú. ʻI heʻenau foki ki he kalasí, fakaafeʻi ha tokotaha ako ʻi he kulupu takitaha ke ne vahevahe ha meʻa naʻe ongo kiate ia fekauʻaki mo e tohi ʻa ha tokotaha ako kehe.