“Mōsaia 5:6–15: ʻToʻo Kiate Kimoutolu ʻa e Huafa ʻo Kalaisí,’” Tohi ʻa Molomoná –Tohi Lēsoni ʻa e Faiakó (2024)
“Mōsaia 5:6–15,” Tohi ʻa Molomoná – Tohi Lēsoni ʻa e Faiakó
Mōsaia 5:6–15
“Toʻo Kiate Kimoutolu ʻa e Huafa ʻo Kalaisí”
ʻE lava ke ʻuhingamālie ʻaupito ʻa e ngaahi hingoá. ʻOku ʻuhinga ki he hā ke toʻo kiate koe ʻa e huafa ʻo Kalaisí? ʻOku ʻi he Mōsaia 5 ʻa e fakaʻosinga ʻo e malanga ʻa e Tuʻi ko Penisimaní ki hono kakaí ʻi he taimi naʻá ne tānaki fakataha ai ʻa e kakaí ke foaki kiate kinautolu ha hingoá (vakai, Mōsaia 1:11). ʻE lava ke tokoni atu e lēsoni ko ʻení ke mahino kiate koe ʻa e mahuʻinga hono toʻo kiate koe ʻa e huafa ʻo Sīsū Kalaisí.
Ko e muimui ki he sīpinga ʻa Sīsū Kalaisí Naʻe fokotuʻu ʻe he Fakamoʻuí ʻa e sīpinga haohaoa ʻo e founga kuo pau ke tau moʻui ai ke hoko ʻo hangē ko Iá. ʻI hoʻo tokoni ke ʻiloʻi ʻe he kau akó e ngaahi lea, ngāue, mo e ngaahi ʻulungaanga ʻo Sīsū Kalaisí, fakaafeʻi kinautolu ke kumi ha ngaahi founga ke muimui ai ʻi Heʻene sīpingá ʻi heʻenau moʻui fakatāutahá.
Teuteu ʻa e tokotaha akó: Fakaafeʻi e kau akó ke fakalaulauloto ki he fehuʻi, “ʻOku ʻuhinga ki he hā ke toʻo kiate koe ʻa e huafa ʻo Kalaisí?”
Ngaahi ʻEkitivitī Ako ʻOku Ala Fakahokó
Ko ha hingoa foʻou
Ko e ʻekitivitī ko ʻení ko ha founga ia ʻe taha ke tokoniʻi ʻaki e kau akó ke nau teuteu ke ako fekauʻaki mo hono toʻo kiate kinautolu ʻa e huafa ʻo Kalaisí. Kapau ʻe ngali ongoʻingofua ki ha kau ako ʻa e fakakaukau ʻo e paeá pe ohí, fakakaukau ke fai ha ʻekitivitī ʻe taha.
Fakakaukauloto ki ha kiʻi leka paea ʻoku ʻikai ha taha ke tokoniʻi pe tokangaʻi ia kae faifai kuó ne feohi mo ha fāmili ʻofa mo pau ʻoku nau loto ke ohi ia.
-
Ko e hā ha ngaahi ʻuhinga ʻe niʻihi ʻe ala fiemaʻu ai ʻe he leka paeá ke ohi mo ʻai kiate ia e hingoa hono fāmili foʻoú?
-
Ko e hā ha ngaahi tāpuaki ʻe lava ke foaki ange ʻe heʻene faʻē mo e tamai foʻoú he ʻikai lava ke ne maʻu ʻiate ia peé?
-
Ko e hā nai ha ongo ʻe ala maʻu ʻe he paeá fekauʻaki mo hono fāmili foʻoú?
ʻI he lea maʻongoʻonga ʻa e Tuʻi ko Penisimaní ki hono kakaí, naʻá ne pehē, “ʻOku ou fakaʻamu ke mou toʻo kiate kimoutolu ʻa e huafa ʻo Kalaisí” (Mōsaia 5:8) pea ui kimoutolu “ko e fānau ʻa Kalaisí” (Mōsaia 5:7). Ko ha niʻihi ʻo e kakai ʻo e Tuʻi ko Penisimaní ko ha kau Nīfai, pea niʻihi ko ha hako ʻo Mūleki. Naʻe fiemaʻu ʻe he Tuʻi ko Penisimaní ke fakatahaʻi ʻa e kakai kotoa pē ʻi ha hingoa pē ʻe taha ʻo hangē ha fāmilí.
ʻI hoʻo ako e folofolá he ʻaho ní, fakalaulauloto ki ha ngaahi founga ʻokú ke hangē ai ko e tokotaha paea ʻi he tūkunga ʻi ʻolungá pea mo e ʻEikí ʻo hangē ko e mātuʻa foʻoú.
Fakakaukau ke tā ʻa e saati ko ʻení ʻi he palakipoé. Te ke lava ʻo vahevahe tauhoa e kau akó pea vahe ki he tokotaha ako takitaha ha taha ʻo e ngaahi kōlomú.
|
Ko e ngaahi tāpuaki ʻo hono toʻo kiate kitautolu ʻa e huafa ʻo e Fakamoʻuí |
Founga ʻoku ou toʻo ai kiate au ʻa e huafa ʻo e Fakamoʻuí |
|---|---|
Manatuʻi naʻe fakamoʻoniʻi ʻe he kakaí ʻi he Mōsaia 5:1–5, kuo fakahoko ʻe he Laumālie ʻo e ʻEikí “ha fuʻu liliu lahi” ʻiate kinautolu pea naʻa nau “loto fiemālie ke fai ha fuakava mo [e] … ʻOtuá ke fai ʻa hono finangaló” (Mōsaia 5:2, 5).
Kole ki he kau akó ke lau fakalelei ʻa e Mōsaia 5:6–10 pea hiki ha faʻahinga meʻa pē ʻoku nau ʻilo ʻoku fekauʻaki mo ʻenau kōlomú. Hili ha taimi feʻunga, ʻai ke fevahevaheʻaki ʻe he kau akó, pea fakakau ʻenau ngaahi talí ʻi he palakipoé. Mahalo ʻe tokoni ke ʻiloʻi ʻe he kau akó ʻoku fokotuʻu mai ʻe he toʻukupu toʻomataʻu ʻo e ʻOtuá ʻa e fakataipe ʻo e ʻofá pea ʻoku fakataipe ʻe he toʻukupu toʻohemá ʻa e taʻe-fiemālié.
Kapau ʻoku ʻikai vahevahe ʻe he kau akó ʻa e tali ki he ngaahi fehuʻi ko ʻení ʻiate kinautolu pē, fakakaukau ke fehuʻi ange:
-
Ko e hā ha ngaahi tāpuaki ʻokú ke fiemaʻu ʻi hoʻo moʻuí ʻa ia ko e Fakamoʻuí pē te Ne lava ʻo ʻoatú? (Fakakaukau ke fakaʻaongaʻi e ngaahi kupuʻi lea naʻá ke maʻu mei he lea ʻa e Tuʻi ko Penisimaní ke tali ʻa e fehuʻi ko ʻení.) Ko e hā ʻokú ke fiemaʻu ai e ngaahi tāpuakí ni?
-
ʻE lava fēfē ke hangē ʻa e Fakamoʻuí ko ha mātuʻa ʻofa kiate kitautolú?
ʻE ala fiemaʻu ke ke fakahoko ha ngaahi fehuʻi vakaiʻi hangē ko e “Ko e hā ha ngaahi founga ʻoku fakatauʻatāinaʻi ai kitautolu ʻe he Fakamoʻuí?” “Ko e hā ʻoku ʻaonga ai ke ʻiloʻi ʻʻoku ʻikai ke ʻi ai mo ha toe huafa kehe … ʻe maʻu ai ʻa e fakamoʻuí’?”
-
Fakatatau ki he Tuʻi ko Penisimaní, naʻe hoko fēfē ʻa e kakaí ko e fānau ʻa Kalaisi, pe toʻo kiate kinautolu ʻa e huafa ʻo Sīsū Kalaisí?
Founga ʻoku tau toʻo ai e huafa ʻo Kalaisí
Ko e moʻoni ʻe taha te tau lava ʻo ako mei he Tuʻi ko Penisimaní, ʻi he taimi ʻoku tau fakahoko mo tauhi ai e ngaahi fuakava toputapú, ʻoku tau hoko ko e fānau ʻa Kalaisi pea toʻo kiate kitautolu Hono huafá.
Lau e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí ke fakamahinoʻi ʻa e founga ʻoku tau toʻo ai kiate kitautolu ʻa e huafa ʻo e Fakamoʻuí.
Fakatatau ki he sīpinga fakafolofolá, ko e kakai ʻoku papitaisó ʻoku nau fakamoʻoni ʻi he ʻao ʻo e Siasí “kuo nau fakatomala moʻoni mei heʻenau ngaahi angahala kotoa pē, pea ʻoku nau loto fiemālie ke toʻo kiate kinautolu ʻa e huafa ʻo Sīsū Kalaisí, mo fakapapau honau lotó ke tauhi kiate ia ʻo aʻu ki he ngataʻangá.” (T&F 20:37; vakai foki, 2 Nīfai 31:13; Molonai 6:3.) ʻI heʻetau maʻu e sākalamēnití, ʻoku tau fakafoʻou ai e fuakava ko ʻení mo e ngaahi fuakava kehe kotoa pē ne tau fai ʻi he vai ʻo e papitaisó. (Dallin H. Oaks, “Taking upon Us the Name of Jesus Christ,” Ensign, May 1985, 80)
-
Kuo hoko fēfē nai ʻa hono fakahoko mo tauhi ʻo e ngaahi fuakavá ke ke ofi ange ai ki he Fakamoʻuí?
Ke tokoni ke hokohoko atu hono fakaloloto hoʻo mahino fekauʻaki mo hono toʻo kiate koe e huafa ʻo Sīsū Kalaisí, lau ʻa e Mōsaia 5:11–13, 15, ʻo kumi ha faleʻi lahi ange mei he Tuʻi ko Penisimaní fekauʻaki mo hono toʻo kiate koe ʻa e huafa ʻo Sīsū Kalaisí.
ChurchofJesusChrist.org
Fakakaukau ke fai ha fehuʻi vakaiʻi hangē ko ʻení: “ʻOkú ke pehē ʻoku ʻuhinga ki he hā ke tohi ʻa e huafa ʻo Kalaisí ʻi ho lotó?” (vakai, Mōsaia 5:11–12). “Ko e hā ha ngaahi tāpuaki ʻoku maʻu ʻe kinautolu ʻoku nau maʻu ʻa e huafa ʻo Kalaisí ʻi honau lotó?” “ʻOku fakaʻaiʻai fēfē nai koe ʻi hono toʻo kiate koe e huafa ʻo Kalaisí ʻi hoʻo ngaahi fakakaukaú mo e ngāue fakaʻahó, ke ke hoko ai ko Haʻane ākonga lelei ange?”
Fakakaukau ki ha ngaahi sīpinga kuó ke mamata ai ʻi hoʻo moʻuí ki ha kakai kuo nau toʻo kiate kinautolu ʻa e huafa ʻo Kalaisí.
-
Ko e hā ʻoku nau fai ʻoku fakahaaʻi ai kuo nau toʻo kiate kinautolu Hono huafá?
-
Ko e hā ha fatongia ʻo e sākalamēnití ʻi hono tokoniʻi kitautolu ke toe lelei ange ʻetau fai ʻení?
Ko e huafa ʻo Sīsū Kalaisí
Ke tokoni ke fakafuofuaʻi ʻe he kau akó e tuʻunga lelei ʻo ʻenau toʻo e huafa ʻo e ʻEikí ki honau lotó, fakakaukau ke fakaafeʻi kinautolu ke fakalaulauloto fakalongolongo ki he ngaahi meʻá ni:
-
Ko e hā ha ngaahi founga te ke lava ʻo fakahaaʻi ai kuó ke toʻo kiate koe ʻa e huafa ʻo Kalaisí?
-
Ko e hā ha ngaahi tāpuaki kuo maʻu ʻi hono toʻo kiate koe ʻa e huafa ʻo Kalaisí?
Fakakaukau ki he ngaahi fakakaukau mo e ngaahi ongo kuó ke maʻu mei he Laumālie Māʻoniʻoní ʻi hoʻo ako he ʻaho ní. Fakakaukau ki ha meʻa te ke lava ʻo fai ke ke toʻo kakato ange ai kiate koe ʻa e huafa ʻo Kalaisí.
Poupouʻi e kau akó ke nau ngāueʻi e meʻa ʻoku nau ongoʻi ʻoku ueʻi kinautolu ke faí. Fakakaukau ke vahevahe ʻa e founga kuo tākiekina ai hoʻo moʻuí ʻi hoʻo toʻo kiate koe ʻa e huafa ʻo Kalaisí.