Mosiah 4

“Kanunay Magbaton sa Kapasayloan sa Inyong mga Sala”

batan-on nga malipayon tan-awon

Unsa kaha ang kalahian sa imong kinabuhi kon gibati nimo ang dugang nga kalipay ug kalinaw sa tanlag? Ang mga Nephite, natandog sa mga pagtulun-an ni Hari Benjamin, “napuno sa hingpit nga kalipay” ug mibati og “kalinaw sa ilang tanlag” samtang sila naghinulsol ug nakadawat og kapasayloan sa ilang mga sala (Mosiah 4:3). Si Hari Benjamin mitudlo dayon kanila unsaon sa pagpadayon pagbaton niini nga kapasayloan sa ilang mga sala. Kini nga leksiyon makatabang kanimo nga makasabot unsa ang imong mahimo aron makadawat ug makapadayon sa pagbaton sa kapasayloan sa imong mga sala.

Pagtudlo pinaagi sa Espiritu. Ang Espiritu Santo nagsaksi sa kamatuoran, nagpamatuod kabahin ni Kristo, ug nag-usab sa mga kasingkasing. Pinaagi lamang sa Espiritu Santo nga matuman nato ang labing taas nga tumong sa pagtudlo sa ebanghelyo—ang pagtukod og hugot nga pagtuo diha ni Jesukristo ug pagtabang sa uban nga mas mahisama Kaniya. Pangita og mga paagi sa pagdapit sa Espiritu Santo sa pagbuhat sa Iyang mga tahas.

Pagpangandam sa estudyante: Dapita ang mga estudyante sa pagbasa sa Mosiah 4, mangita kon sa unsang paagi ang mga tawo naapektohan ni Jesukristo ug sa unsay gidapit ni Hari Benjamin nga buhaton sa iyang katawhan human sila nakadawat og kapasayloan sa ilang mga sala.

Mga Posibleng Kalihokan sa Pagkat-on

Pagpabiling espirituhanong lig-on

Tan-awa ang mosunod nga hulagway ug hunahunaa kon unsa ang kinahanglan nga buhaton sa usa ka tawo aron kini nga tanom magpabilin nga himsog ug magtubo.

Ikonsiderar ang pagdala og himsog nga tanom sa klase o ipakita ang hulagway sa ubos.

himsog nga tanom

• Unsa ang mahitabo niini nga tanom kon kini ibutang sa usa ka mangitngit nga lawak o dili gayod mabisbisan?

• Sa unsang paagi kini may kalabotan sa atong espirituwal nga kahimsog ug mga panginahanglan?

Sama sa pag-atiman sa usa ka tanom, ang pagpabilin sa atong kaugalingon nga himsog sa espirituhanong paagi nagkinahanglan og makanunayon nga paningkamot. Sa Mosiah 4, gitudloan ni Hari Benjamin ang iyang katawhan kon unsay ilang kinahanglang buhaton aron magpabiling lig-on sa espirituhanong paagi. Samtang magtuon ka, pamalandongi ang mga pagtulun-an nga makatabang nimo sa imong mga paningkamot nga magpabiling lig-on sa espirituhanong paagi sa tibuok nimong kinabuhi ug molambo nga mas mahisama sa Manluluwas.

Padayon nga magbaton og kapasayloan sa atong mga sala

Hinumdomi nga isip kabahin sa pakigpulong ni Hari Benjamin, mipaambit siya og mensahe nga iyang nadawat gikan sa usa ka anghel mahitungod sa pag-anhi ni Jesukristo ug sa kaimportante sa pagbuntog sa atong napukan nga kinaiya pinaagi sa Pag-ula sa Manluluwas (tan-awa sa Mosiah 3).

Basaha ang Mosiah 4:1–3, mangita sa mga panalangin ug mga pagbati nga nasinati sa katawhan ni Hari Benjamin.

• Unsay mipatigbabaw kanimo gikan niining mga bersikulo?

• Unsa sa imong hunahuna ang kinahanglan nga buhaton sa mga tawo aron magpabilin niining putli ug malipayon nga kahimtang?

Ikonsiderar ang pagdapit sa mga estudyante sa pagpiyong sa ilang mga mata ug pagpamalandong sa mosunod. Human sa pagpamalandong, mahimo nilang irekord ang ilang tubag sa pangutana diha sa ilang mga journal sa pagtuon.

Handurawa kon unsa kaha ang kahimtang nga nahimong usa sa mga katawhan ni Hari Benjamin nianang adlawa. Pamalandongi kon sa unsang paagi kaha kini makaimpluwensiya sa imong mga pagbati mahitungod ni Jesukristo ug unsa, gikan niini nga kasinatian, ang gusto nimong ipabilin uban kanimo hangtod sa kahangtoran.

• Unsa kaha ang kalainan nga mahimo niini sa imong kinabuhi kon gibati nimo ang kapasayloan sa imong mga sala sa kanunay?

Ang nahibilin sa mga pagtulun-an ni Hari Benjamin sa Mosiah 4 makatabang kanato nga makasabot nga human kita makadawat og kapasayloan gikan ni Jesukristo, kinahanglan gayod kita nga maningkamot nga padayon nga magbaton sa kapasayloan sa atong mga sala.

• Unsa sa imong hunahuna ang kalainan tali sa pagdawat ug padayon nga pagbaton sa kapasayloan sa atong mga sala?

• Ngano sa imong hunahuna nga importante alang kanato nga maningkamot sa pagpabiling magbaton sa kapasayloan sa atong mga sala sa tibuok natong kinabuhi?

Ang mosunod nga parapo gituyo aron sa pagtabang sa mga estudyante sa pagpamalandong ug paghunahuna ug dili sa pagpaambit sa ilang mga hunahuna o mga pagbati ngadto sa klase.

Ikonsiderar kon sa unsang paagi kini nga kamatuoran magamit sa imong kaugalingong kinabuhi. Unsa ka maayo paminaw nimo ang imong padayong pagbaton og kapasayloan sa imong mga sala? Samtang magpadayon ka sa pagtuon, pangitaa ang mga kamatuoran nga makatabang nimo nga makasabot unsay imong mahimo aron padayong magbaton sa kapasayloan sa imong mga sala.

Ikonsiderar ang paglista sa mosunod nga ulohan diha sa pisara: Unsa ang atong mahimo aron padayong magbaton sa kapasayloan sa atong mga sala. Mahimong ilista sa mga estudyante diha sa pisara ang ilang napalgan samtang sila nagtuon. Ang susamang listahan mahimong himoon diha sa ilang mga journal sa pagtuon.

Basaha ang Mosiah 4:9–16 ug pangitaa ang mga pagtulun-an ni Hari Benjamin nga makatabang kanato nga makasabot kon unsaon nato nga padayong magbaton og kapasayloan sa atong mga sala.

Isip kabahin sa mosunod nga kalihokan sa pagtuon, ikonsiderar ang pagtugot sa mga estudyante sa pagduol sa pisara ug sa pagsulat sa pipila ka hugpong sa mga pulong gikan sa Mosiah 4:9–16 nga ilang gibati nga labing makahuluganon ngadto kanila. Ang mga pangutana sama sa mosunod mahimo dayon nga gamiton sa pagtabang sa mga estudyante sa paghisgot sa ilang mga nakaplagan gikan niini nga mga bersikulo.

• Unsa ang labing menos tulo ka mga butang nga gitudlo ni Hari Benjamin nga kinahanglan natong buhaton aron padayon nga magbaton og kapasayloan sa atong mga sala nga labing makahuluganon alang kanimo?

• Sa imong hunahuna, unsa kaha alang kanimo ang pagbuhat niini nga mga pagdapit gikan ni Hari Benjamin diha sa imong kinabuhi?

• Sa unsang paagi nga ang pagbuhat niini nga mga butang makatabang kanimo nga padayon nga magbaton og kapasayloan sa imong mga sala?

Kon itugot sa panahon, mahimong tun-an sa mga estudyante ang paghatag og gibug-aton ni Hari Benjamin sa pag-atiman sa uban diha sa Mosiah 4:17–26. Ang ubang mga ideya makita ubos sa “Ang atong responsibilidad sa pag-amuma sa uban” diha sa seksiyon sa “Dugang nga mga Kalihokan sa Pagkat-on”.

Akong sunod nga mga lakang

Pamalandongi kon unsa ka maayo ang imong nahimo sa pagbuhat sa mga pagtulun-an ni Hari Benjamin gikan niini nga mga bersikulo. Mahimo nimo kini pinaagi sa pagtutok sa tulo o upat ka kinaiya nga bag-o lang nimo giila ug sa pagpangutana sa imong kaugalingon sama sa:

• Unsa ka dako ang akong paningkamot niini?

• Unsa ka sagad ang pagbuhat nako niini?

• Unsa nga mga pagbati ug mga impresyon ang akong gibati karon nga mahimong nagsugyot og mga bahin nga mahimo nakong pauswagon?

Sa mainampoon nga paagi paghimo og piho nga plano aron molambo sa usa ka bahin. Pamalandongi ang bisan unsang mga babag nga mahimo nimong atubangon samtang naningkamot ka nga molambo niini nga bahin ug unsa ang imong mahimo aron makadawat sa tabang sa Ginoo sa pagbuntog niini nga mga hagit. Mahimong makatabang ang pagpaambit sa imong tumong ngadto sa usa ka miyembro sa pamilya o sa minahal sa kinabuhi nga makasuporta kanimo niini. Mahimo usab nimong iapil kini nga tumong sa imong mga tumong sa Kabataan ug Kabatan-onan.

Komentaryo ug Background nga Impormasyon

Mosiah 4:2. Unsa ang gipasabot nga ang katawhan ni Hari Benjamin “nagsud-ong diha sa ilang mga kaugalingon … ubos kay sa abog sa yuta”?

Ang katawhan ni Hari Benjamin tingali mikonsiderar sa ilang kaugalingon nga “ubos kay sa abog sa yuta” (Mosiah 4:2) tungod kay ang abog sa yuta kanunay nga nagsunod sa mga sugo sa Ginoo, apan ang mga anak sa Dios sa kasagaran dili (tan-awa sa Helaman 12:4–8). Hinumdomi nga ang Langitnong Amahan naghatag og bili sa Iyang mga anak ug nga ang atong mga sala dili makaapekto sa atong balaanong bili (tan-awa sa Doktrina ug mga Pakigsaad 18:10).

Si Sister Joy D. Jones, kanhi Kinatibuk-ang Presidente sa Primary, mitudlo:

Joy D. Jones

Kon makasala ta, dili kaayo ta takus, apan dili gyud nga wala na tay bili! Magpadayon ta sa paghinulsol ug maningkamot nga mahisama ni Jesus uban sa atong bili nga bug-os. (Joy D. Jones, “Bili nga Dili Masukod,” Liahona, Nob. 2017, 14)

Unsa ang tahas sa mga ordinansa sa ebanghelyo sa atong padayon nga pagbaton og kapasayloan sa atong mga sala?

Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Isip mga miyembro sa gipahiuli nga Simbahan sa Ginoo, bulahan kita sa una natong pagkalimpyo sa sala kalabot sa bunyag ug sa potensiyal sa padayon nga paglimpyo gikan sa sala nga gihimong posible pinaagi sa pakig-uban ug gahom sa Espiritu Santo. …

Usahay ang mga Santos sa Ulahing mga Adlaw manghinaot nga unta mabunyagan sila og usab—ug mamahimong limpyo ug takos sama sa adlaw nga nadawat nila ang ilang unang makaluwas nga ordinansa sa ebanghelyo. Sa matinahurong paagi moingon ko nga dili tuyo sa atong Langitnong Amahan ug Iyang Pinalanggang Anak nga masinati nato ang ingon nga espirituhanong pagbati sa pagkabag-o, pagkapresko, ug pagpahiuli nga kausa ra sa atong kinabuhi. Ang mga panalangin sa pag-angkon ug kanunay nga pagbaton og kapasayloan sa atong mga sala pinaagi sa mga ordinansa sa ebanghelyo makatabang nga kita makasabot nga ang bunyag mao ang sinugdanan sa atong mortal nga espirituhanong panaw; dili kini usa ka destinasyon nga atong panganduyon nga balik-balikon sa kanunay. (David A. Bednar, “Kanunay nga Magbaton og Kapasayloan sa Inyong mga Sala,” Liahona, Mayo 2016, 61–62)

Unsa ang akong mahimo sa pag-amuma sa mga kabos ug timawa?

Si Elder Dieter F. Uchtdorf sa Korum sa Napulog Duha ka Apostoles mitudlo:

Elder Dieter F. Uchtdorf

Ang pamaagi sa Ginoo sa pag-amuma sa mga timawa lahi sa pamaagi sa kalibotan. Ang Ginoo miingon, “Kini kinahanglan nga pagahimoon sa akong kaugalingon nga pamaagi” [Doktrina ug mga Pakigsaad 104:16]. Dili lamang kay interesado Siya sa dinalian natong panginahanglan; nahingawa usab Siya sa atong mahangtoron nga kalamboan. Tungod niini, ang pamaagi sa Ginoo naglakip sa pagbarog sa kaugalingon ug pagserbisyo sa atong silingan agi og dugang sa pag-amuma sa mga kabos. (Dieter F. Uchtdorf, “Pagsangkap pinaagi sa Pamaagi sa Ginoo,” Liahona, Nob. 2011, 54)

Ikonsiderar ang pagpangita sa website nga JustServe.org alang sa mga kahigayonan sa pag-amuma sa mga kabos ug timawa sa inyong lugar.

Dugang nga mga Kalihokan sa Pagkat-on

Pagtandi sa Mosiah 4 ngadto sa 2 Nephi 31

Samtang magtuon ang mga estudyante sa Mosiah 4, ikonsiderar ang pagdapit kanila sa pagmatikod sa relasyon tali niini nga kapitulo ug sa mga pagtulun-an sa 2 Nephi 31:17–21. Sa unsang paagi ang mga pagtulun-an ni Hari Benjamin sa Mosiah 4 makatabang sa usa ka tawo nga makabaton og mas maayong pagsabot kon unsay gipasabot sa paglahutay hangtod sa kataposan subay sa higpit ug pig-ot nga dalan? Unsa nga mga pagkaparehas ang nakita sa mga estudyante tali sa mga pagtulun-an ni Nephi sa 2 Nephi 31:17–21 ug sa mga pagtulun-an ni Hari Benjamin sa Mosiah 4?

Bantayi ang inyong mga hunahuna, inyong mga pulong, ug inyong mga buhat (Mosiah 4:30)

Ipasabot nga human si Hari Benjamin mitudlo sa iyang mga katawhan kon unsaon padayon nga magbaton og kapasayloan sa ilang mga sala ug maluwas, siya mipasidaan kanila mahitungod sa unsay mahimong hinungdan nga sila “malaglag,” o mahimong espirituhanong mawala ug mabulag sa Dios. Ikonsiderar ang pagdapit sa mga estudyante sa pagbasa sa Mosiah 4:29–30, mangita kon unsaon nato sa paglikay nga malaglag sa espirituhanong paagi. Unsa ang relasyon tali sa atong mga hunahuna, mga pulong ug mga buhat? Unsa ang atong mahimo aron sa pagbantay sa atong mga kaugalingon?

Ang atong responsibilidad sa pag-amuma sa uban

Samtang nagtudlo mahitungod sa mga binuhatan nga kinahanglan natong himoon aron padayon nga magbaton og kapasayloan sa atong mga sala, si Hari Benjamin mihatag og gibug-aton nga kita kinahanglang mohatag ngadto sa uban kinsa mangayo sa atong tabang. Ang mga estudyante mahimong hangyoon sa pagbasa sa Mosiah 4:16–26, mangita sa mga pagtulun-an ni Hari Benjamin mahitungod sa pag-amuma sa mga kabos ug timawa. Dapita ang mga estudyante sa pagpaambit kon unsa ang mipatigbabaw diha kanila gikan niini nga mga bersikulo. Ang mga pangutana nga mahimo nimong ikonsiderar nga hisgotan naglakip sa: Sa unsang paagi ang paghinumdom sa atong relasyon sa Dios makapausab sa paagi sa atong pagtubag sa uban nga nanginahanglan? Ngano sa imong hunahuna nga si Hari Benjamin mihatag man og gibug-aton niini nga mga pagtulun-an sa usa ka kapitulo mahitungod sa pagdawat ug padayon nga pagbaton og kapasayloan sa atong mga sala?