Doktrinal nga Kahanas: Mosiah 3:19

“[Isalikway] ang … Kinaiyanhon nga Pagkatawo ug [Mahimo] nga usa ka Santos pinaagi sa Pag-ula ni Jesukristo.”

batan-on nga naggakos sa usag-usa

Sa imong pagtuon sa Mosiah 3:19, imong nakat-onan unsaon pagbuntog ang kinaiyanhon nga tawo pinaagi sa Pag-ula ni Jesukristo. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Mosiah 3:19. Makatabang usab kini kanimo nga mapasabot ang doktrina nga gitudlo niini nga tudling ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Pagdasig sa espirituhanong pagkat-on pinaagi sa pagpaningkamot. Ang pagkat-on sa ebanghelyo nga nagpalambo sa pagkakabig ug nagtabang sa ebanghelyo nga motuhop sa kinahiladman sa kasingkasing sa mga estudyante nagkinahanglan og labaw pa sa usa ka makugihong paningkamot sa bahin sa magtutudlo. Ang espirituhanong pagkat-on nagkinahanglan og makanunayon nga paningkamot sa bahin sa tigkat-on. Tabangi ang imong mga estudyante nga makita ang ilang papel sa proseso sa pagtudlo ug pagkat-on.

Pagpangandam sa estudyante: Dapita ang mga estudyante sa pagsugod sa pagsulay sa pagsag-ulo sa Mosiah 3:19. Ipasabot nga mohatag ka og panahon diha sa klase sa pagsag-ulo sa mahinungdanon nga hugpong sa mga pulong sa kasulatan, apan makaayo usab kanila ang pagpraktis sa pagsag-ulo sa tibuok bersikulo.

Mga Posibleng Kalihokan sa Pagkat-on

Kinahanglan nimong itudlo kini nga leksiyon sa doktrinal nga kahanas pagkahuman sa leksiyon sa “Mosiah 3:19,” nga mao ang pangkonteksto nga leksiyon alang sa tudling sa doktrinal nga kahanas sa Mosiah 3:19. Kon gikinahanglan nimong ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Atol sa miaging leksiyon, imong nakat-onan ang mosunod nga kamatuoran gikan sa Mosiah 3:19: Pinaagi sa pagtugyan ngadto sa mga pagdani sa Balaang Espiritu, kita makabuntog sa kinaiyanhon nga pagkatawo ug mahimong mga santos pinaagi sa Pag-ula ni Jesukristo. Ang mahinungdanong hugpong sa mga pulong sa kasulatan alang sa Mosiah 3:19 mao ang “[Isalikway] ang … kinaiyanhon nga pagkatawo ug [mahimo] nga usa ka Santos pinaagi sa Pag-ula ni Jesukristo.”

Hatagi ang mga estudyante og paagi nga makapraktis sa pagsag-ulo niini nga pakisayran ug mahinungdanon nga hugpong sa mga pulong sa kasulatan. Ang mosunod nga kalihokan maoy usa ka paagi nga mahimo nimo kini.

Pagdrowing og triyanggulo sama sa mosunod diha sa imong journal sa pagtuon. Bahina ang pakisayran ug ang mahinungdanon nga hugpong sa mga pulong sa kasulatan sa Mosiah 3:19 ngadto sa upat ka bahin. Isulat ang upat ka bahin sa imong triyanggulo. Sama pananglit, mahimo nimong isulat ang “Mosiah 3:19” sa ibabaw nga bahin sa imong drowing, “[Isalikway] ang … kinaiyanhon nga pagkatawo” sa ikaduhang bahin, ug uban pa. Pagpraktis sa pagsag-ulo sa tibuok hugpong sa mga pulong nga magsugod gikan sa ibabaw ngadto sa ubos sa imong drowing hangtod nga komportable ka na sa pag-recite niini nga dili magtan-aw.

yano nga itom-ug-puti [black-and-white] nga hulagway sa usa ka triyanggulo nga adunay upat ka mga seksiyon

Ipapraktis sa mga estudyante ang pagpasabot sa doktrina sa ilang kaugalingong mga pulong. Mahimo nimong gamiton ang mosunod nga ideya o laing ideya aron matabangan ang mga estudyante sa pagpraktis.

Hunahunaa nga nagtudlo ka og leksiyon mahitungod sa Mosiah 3:19 ngadto sa klase sa primary sa imong ward o branch. Unsaon kaha nimo sa pagpasabot ang mensahe niini nga tudling sa doktrinal nga kahanas ngadto sa grupo sa gagmay nga mga bata? Pagsulat og mubo nga parapo sa imong kaugalingon nga mga pulong nga nagpasabot sa doktrina sa Mosiah 3:19.

Ikonsiderar ang pagbahin sa mga estudyante nga magpares sa pagkompleto sa ilang mga pagpasabot. Mahimo nimong dapiton ang mga estudyante nga buot mobasa sa ilang mga pagpasabot ngadto sa tibuok klase.

Pagbansay sa paggamit

Iparebyo sa mga estudyante ang mga baroganan sa pag-angkon og espirituhanong kahibalo. Usa ka paagi sa pagbuhat niini mao ang pagdapit og pipila ka mga estudyante sa pagdrowing og mga simbolo o yano nga mga hulagway diha sa pisara nga nagrepresentar sa matag usa sa tulo ka mga baroganan. Sulayi ang paghimo sa kalihokan nga kini molungtad lamang og pipila ka minuto sa oras sa klase.

Hatagi ang mga estudyante og senaryo nga susama sa mosunod aron matabangan sila nga makapraktis gamit ang tanang tulo ka baroganan sa pag-angkon og espirituhanong kahibalo.

Si Nathan nakigbisog sa pagpugong sa iyang kasuko sulod sa daghang katuigan. Kanunay siyang masuko sa iyang mga igsoon ug mga ginikanan ug mopataas sa iyang tingog. Naglisod usab siya sa pakighalobilo sa uban diha sa eskwelahan. Usa ka adlaw, samtang nakig-istorya sa iyang mga ginikanan bahin sa iyang pagkadali masuko, siya misingka: “Unta mahimo kong mas mapailobon nga tawo, apan tan-aw nako dili nako kaya. Ingon ani gyud ko!”

Mahimo nimong ipahiangay kini nga senaryo aron mas matubag ang mga panginahanglan sa imong mga estudyante. Mahimo nimong usbon ang kinaiya sa pagkadali masuko sa senaryo ngadto sa laing hagit sama sa pagkatapulan, walay pagtahod nga pinulongan, o pagkadili mabination. Laing kapilian mao ang pagdapit sa mga estudyante sa paghimo og lista diha sa pisara sa mga kinaiya nga komon sa kinaiyanhon nga tawo. Dayon ang mga estudyante mahimong mopili og usa sa mga kinaiya ug mopahiangay sa senaryo aron iapil kini agig puli.

• Unsaon nimo paggamit ang mga pagtulun-an sa Mosiah 3:19 ug ang mga baroganan sa pag-angkon og espirituhanong kahibalo sa pagtabang niini nga sitwasyon?

Pahisgoti sa mga estudyante kon sa unsang paagi ang matag usa sa mga baroganan sa pag-angkon og espirituhanong kahibalo ug ang doktrina nga gitudlo sa Mosiah 3:19 makatabang niini nga sitwasyon. Mahimo kining buhaton sa mga estudyante nga magkauban isip usa ka klase o sa gagmay nga mga grupo.

Kon ang mga estudyante nagkinahanglan og dugang nga giya, ang mosunod mao ang mga ehemplo sa mga klase sa mga pangutana nga mahimo nimong ipaambit ngadto kanila isip kabahin niini nga diskusyon.

Tinguhaa ang dugang nga panabot pinaagi sa balaanong gitudlo nga mga tinubdan

• Sa imong hunahuna sa unsang paagi ang mga pagtulun-an sa Mosiah 3:19 makatabang niini nga sitwasyon?

• Unsa ang ubang mga kasulatan o mga pamahayag gikan sa mga lider sa Simbahan nga sa imong hunahuna nga makatabang?

Ikonsiderar ang pagpahinumdom sa mga estudyante sa mga cross-reference nga ilang gitun-an sa miaging leksiyon samtang ilang hisgotan ang mosunod nga pangutana. O mahimo nimong ipaambit ang pipila o ang tanan nga mga pamahayag nga makita sa “Komentaryo ug Background nga Impormasyon” gikan sa miaging leksiyon.

Susihon ang mga konsepto ug mga pangutana inubanan sa mahangtorong panglantaw

• Unsa ang pipila ka mga paagi nga imong makita kini nga kabalaka uban sa mahangtorong panglantaw?

• Sa unsa nga paagi nga ang paghinumdom sa mga katuyoan sa Ginoo sa pagtugot kanato sa pagpuyo sa usa ka napukan nga kalibotan makatabang?

• Unsa ang imong nahibaloan mahitungod ni Jesukristo ug sa Iyang Pag-ula nga makahimo og kalainan niini nga sitwasyon?

Lihokon inubanan sa hugot nga pagtuo

• Unsa ang pipila ka mga paagi nga ang usa ka tawo niini nga sitwasyon makalihok inubanan sa hugot nga pagtuo?

Rebyo sa doktrinal nga kahanas

Ikonsiderar ang paggamit sa mosunod nga kalihokan sa pagrebyo sa usa ka leksiyon nga gitudlo dayon human niini. Pagdrowing og triyanggulo diha sa pisara sama niadtong gikan sa leksiyon. Sugod sa ibabaw, dapita ang mga estudyante sa pagkompleto sa matag ang-ang sa triyanggulo gamit ang mahinungdanon nga hugpong sa mga pulong sa kasulatan alang sa Mosiah 3:19: “[Isalikway] ang … kinaiyanhon nga pagkatawo ug [mahimo] nga usa ka Santos pinaagi sa Pag-ula ni Jesukristo.” Balika kini nga proseso sa pipila ka mga higayon hangtod nga ang mga estudyante maka-recite niini gikan sa panumdoman.