“Doktrinal nga Kahanas: Mosiah 4:9—‘Tuo sa Dios,’” Manwal sa Magtutudlo sa Basahon ni Mormon (2024)

“Doktrinal nga Kahanas: Mosiah 4:9,” Manwal sa Magtutudlo sa Basahon ni Mormon

Doktrinal nga Kahanas: Mosiah 4:9

“Tuo sa Dios”

Imahe

batan-on nga naghangad, namalandong

Sa imong pagtuon sa Mosiah 4:9–10, imong nakat-onan ang kamahinungdanon sa pagtuo sa Dios. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Mosiah 4:9, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Pag-focus sa Langitnong Amahan ug ni Jesukristo. Walay lain nga mahimo ang mga magtutudlo nga mas makapanalangin sa mga estudyante kay sa pagtabang kanila nga makaila ug mahigugma sa Langitnong Amahan ug ni Jesukristo. Samtang mangandam ka ug magtudlo, padayon sa pagtinguha og inspirasyon kon unsaon nimo pagbuhat niini.

Pagpangandam sa estudyante: Dapita ang mga estudyante sa pagpangutana sa pamilya o mga higala kon nganong gipili nila nga motuo sa Dios.

Mga Posibleng Kalihokan sa Pagkat-on

Kinahanglan nimong itudlo kini nga leksiyon sa doktrinal nga kahanas pagkahuman sa leksiyon sa “Mosiah 4:9–10,” nga mao ang pangkonteksto nga leksiyon alang sa tudling sa doktrinal nga kahanas sa Mosiah 4:9. Kon gikinahanglan nimong ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Ang mosunod mao ang usa ka paagi sa pagtabang sa mga estudyante sa pagpasabot sa doktrina nga gitudlo sa Mosiah 4:9 sa ilang kaugalingong mga pulong.

Hinumdomi ang imong kasinatian sa pagtuon sa pagdapit ni Hari Benjamin diha sa Mosiah 4:9–10 aron ang iyang mga katawhan motuo sa Dios. Kon gikinahanglan, ikonsiderar ang pagbasa niini nga mga bersikulo pag-usab ug ang pagrebyo sa dayagram nga imong gihimo diha sa imong journal sa pagtuon gikan sa miaging leksiyon.

Unsa nga importante nga mga kinaiya o mga hiyas sa Dios ang gidapit ni Hari Benjamin nga tuohan sa iyang katawhan?
Sa unsang paagi nga ang pagtuo niining balaanong mga hiyas sa Dios makaapekto sa imong kinabuhi?

Pagpili og usa sa mga kinaiya o mga hiyas sa Dios nga gihisgotan sa Mosiah 4:9–10 nga gitudlo ni Hari Benjamin sa iyang katawhan nga tuohan. Ipaambit kon unsaon kaha nimo kini pagpasabot ngadto sa usa ka tawo nga wala makasabot sa gipasabot niini.

Dapita ang mga estudyante sa pagsag-ulo sa pakisayran sa tudling sa doktrinal nga kahanas nga Mosiah 4:9 ug ang kauban niini nga mahinungdanon nga hugpong sa mga pulong nga “Tuo sa Dios; … tuo nga siya aduna sa tanan nga kaalam.” Ang mosunod mao ang usa ka ehemplo kon unsaon kini sa pagbuhat.

Sa imong journal sa pagtuon isulat ang pulong nga tuo sa dagko nga mga letra. Ubos niini, isulat ang hugpong sa mga pulong nga sa Dios, ug ubos niini isulat ang hugpong sa mga pulong nga tuo nga siya aduna sa tanan nga kaalam. Dayon isulat ang pakisayran sa kasulatan sa Mosiah 4:9 sa dagko nga mga letra diha sa ubos. Sugod sa ibabaw, isulti og kusog ang matag linya samtang imong itudlo ang pulong, hugpong sa mga pulong, o pakisayran. Sublia kini nga kalihokan sa makadaghang higayon hangtod nga masaligon ka na nga namemorya nimo kini.

Isip alternatibo sa miaging kalihokan, ikonsiderar ang pagsulat sa pulong nga tuo diha sa pisara. Ipasabot nga kini nga pulong makita kaduha ka higayon sa mahinungdanon nga hugpong sa mga pulong sa kasulatan sa Mosiah 4:9. Dapita ang mga estudyante sa pagsag-ulo og una sa hugpong sa mga pulong nga “Tuo sa Dios,” dayon ang hugpong sa mga pulong nga “tuo nga siya aduna sa tanan nga kaalam.” Sunod, ipasag-ulo nila ang pakisayran sa kasulatan nga Mosiah 4:9. Dayon dapita ang tulo ka estudyante sa pagduol sa atubangan sa lawak [room]. I-assign ang matag estudyante sa pagsulti sa usa sa gisag-ulo nga mga bahin. Sublia kini uban sa mga estudyante sa tinagtulo ka mga grupo aron matabangan sila nga makahimo sa pagmemorya sa mahinungdanon nga hugpong sa mga pulong ug sa pakisayran.

Pagbansay sa paggamit

Dapita ang mga estudyante sa pagrebyo sa mga baroganan sa pag-angkon og espirituhanong kahibalo. Mahimo nilang makompleto ang mosunod sa gitakdang gidugayon sa panahon. Mahimo nimong ipahiangay kini nga kalihokan pinaagi sa paglista sa mga baroganan isip usa ka klase ug dapita dayon ang mga estudyante sa pagpili og usa ka baroganan ug ipasabot kon sa unsang paagi nila kini gigamit o magamit. Ang mga estudyante mahimong magtudlo sa usag usa aron sa pagrebyo sa tanang tulo ka mga baroganan.

Rebyoha sa daklit ang mga baroganan sa pag-angkon og espirituhanong kahibalo sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Mahimo nimong sulayan ang paglista sa tanang tulo ka baroganan gikan sa memorya. Dayon, sa imong journal sa pagtuon, irekord kon giunsa nimo paggamit o mahimong magamit kining mga baroganan.

Si Myra anaa sa usa ka klase diin ang magtutudlo nagbiaybiay sa relihiyon ug dili motuo sa Dios. Kini nga mga komentaryo nakapasamok kang Myra sa sinugdanan, apan sulod sa pipila ka bulan sa klase, nagsugod siya sa paghunahuna kon ang iyang magtutudlo tingali husto. Kanunay siyang nagtuo sa Dios, apan karon gibati niya nga tingali nagsugod na siya sa pagduhaduha sa pagkatinuod sa Dios.

Gamita ang mga baroganan sa pag-angkon og espirituhanong kahibalo ug ang doktrina sa Mosiah 4:9 aron pagtabang sa sitwasyon ni Myra o sa laing sitwasyon nga may kalabotan sa pagtuo sa Dios nga mas adunay kalabotan sa imong kinabuhi.

Dili nimo kinahanglan nga ipangutana ang mosunod nga mga pangutana sa klase nga magsunod-sunod. Gituyo kini nga mahimong mga pananglitan sa mga pangutana nga mahimo nimong ipangutana samtang magbansay ang mga estudyante sa paggamit sa mga baroganan sa pag-angkon og espirituhanong kahibalo. Tugoti ang mga estudyante nga mangutana ug motubag sa mga pangutana sa usag usa. Tinguhaa ang giya sa Espiritu Santo aron makahibalo kanus-a mangutana ug dili mangutana og follow-up nga mga pangutana (bisan kadtong gilista dinhi o sa uban).

Lihokon inubanan sa hugot nga pagtuo

Unsa nga matinud-anon nga mga buhat ang mahimong buhaton sa usa ka tawo kon siya nanlimbasog sa pagtuo sa Dios?
Sa unsang paagi nga ang pagbuhat niini nga mga buhat makatabang kanila?

Susihon ang mga konsepto ug mga pangutana inubanan sa mahangtorong panglantaw

Unsa nga mga pagtulun-an gikan sa Mosiah 4:9 ang makatabang sa usa ka tawo niini nga sitwasyon nga makabaton og mahangtorong panglantaw?
Sa unsang paagi ang desisyon sa usa ka tawo nga motuo o dili motuo sa Dios makaapekto sa iyang kaugmaon?

Tinguhaa ang dugang nga panabot pinaagi sa balaanong gitudlo nga mga tinubdan

Unsa nga dugang nga mga tudling sa kasulatan o mga kasinatian (nga aduna ka o ang uban) nga makatabang sa usa ka tawo niini nga hagit?
Asa pa ang mga tawo makakita og impormasyon aron makatabang kanila niini nga sitwasyon? Pangita og bisan usa ka laing tinubdan ug ipasabot kon sa unsang paagi kini makatabang.

Sa pagtapos niini nga leksiyon, mahimo nimong dapiton ang mga estudyante sa pagpamalandong sa mga sitwasyon nga sila o ang uban anaa o mahimo nga maanaa diin ang ilang pagtuo sa Dios mahimong mahagit ug tabangi sila nga maandam alang niini nga mga kasinatian. Mahimo nimo kini pinaagi sa pagpangutana sa mga estudyante sa pipila sa mosunod nga mga pangutana:

Sa unsang paagi ang imong kasinatian karon makatabang niini nga mga sitwasyon?
Unsa nga piho nga mga butang ang gusto nimong mahinumdoman kon ang imong pagtuo sa Dios gihagit?

Isip kabahin niini nga panaghisgotan, pagpamatuod, o dapita ang mga estudyante sa pagpamatuod, sa kamahinungdanon sa pagtuo sa Dios.

Rebyo sa doktrinal nga kahanas

Gamita ang mosunod nga kalihokan sa pagrebyo sa usa ka leksiyon nga imong itudlo sa dili madugay human niini.

Sugdi pagsulat ang pakisayran sa kasulatan sa Mosiah 4:9 ug ang mahinungdanon nga hugpong sa mga pulong sa kasulatan nga Tuo sa Dios; … tuo nga siya aduna sa tanan nga kaalam diha sa pisara usa ka pulong sa matag higayon. Sa dili pa isulat ang sunod nga pulong, hunong aron makita kon ang mga estudyante makasulti ba niini sa dili pa nimo kini isulat. Sublia kini sa pipila ka mga higayon hangtod nga ang mga estudyante makasulti na niini gikan sa memorya.