Հարոմ–Օմնի

Ձեր հոգին ամբողջովին մատուցեք Հիսուս Քրիստոսին

երիտասարդ աղջիկն աղոթում է

Երբ կյանքի կարևոր որոշումներ եք կայացնում, ո՞ւմ եք դիմում ուղղորդման համար: Երկնային Հայրը և Հիսուս Քրիստոսը տվել են սուրբ գրությունները՝ որպես ուղղորդման և օգնության առաջնային աղբյուր բոլորի համար: Հարոմի և Օմնիի գրքերում տարբեր ուսմունքներ կան, որոնք կարող են օրհնել ձեր կյանքը: Այս դասը նախատեսված է օգնելու ձեզ փորձել բացահայտել և կիրառել սուրբ գրությունների սկզբունքները, որոնք կարող են օրհնել և ուղղորդել ձեր կյանքը:

Օգնեք ուսանողներին հայտնաբերել ավետարանի վարդապետությունն ու սկզբունքները: Վարդապետությունը Հիսուս Քրիստոսի ավետարանի հիմնական, անփոփոխ ճշմարտությունն է: Սկզբունքը հավերժական ճշմարտություն է, որն ուղղորդում է մարդկանց որոշումներ կայացնելիս: Ավետարանի սկզբունքները համընդհանուր ճշմարտություն են և օգնում են մարդկանց ավետարանի վարդապետությունը կիրառել իրենց կյանքում:

Ուսանողի նախապատրաստում. ուսանողներին առաջարկեք սուրբ գրություններն ամեն օր ուսումնասիրելիս փորձել բացահայտել այն սկզբունքները, որոնք օգտակար են իրենց կյանքի համար: Խրախուսեք նրանց պատրաստվել և կիսվել իրենց գտած առնվազն մեկ սկզբունքով:

Հնարավոր ուսումնական վարժություն

Նավի ղեկավարումը

նավի ղեկ՝ նավի վրա

Դասն սկսելու համար կարող եք ցուցադրել նավի նկար կամ գրատախտակին նավ նկարել: Կամ կարող եք որևէ ուսանողի հանձնարարել գրատախտակին նավ նկարել: Կարող եք հարցնել նրանց, թե նավի ինչ մասեր են անհրաժեշտ, որոնք կօգնեն անձնակազմին նավարկել դեպի նպատակակետը:

Պատկերացրեք, որ ձեր կյանքի ճամփորդությունը նման է օվկիանոսում նավարկող նավի: Ի՞նչը կարող եք համեմատել ճամփորդության ժամանակ նավն ուղղորդող ղեկանվի կամ նավի ղեկի հետ:

Կարող եք գրատախտակին գրի առնել ուսանողների պատասխանները:

Տասներկու Առաքյալների Քվորումից երեց Դեյվիդ Ա. Բեդնարը տվել է հնարավոր պատասխան․

Երեց Դեյվիդ Ա. Բեդնար

Ավետարանի սկզբունքները ինձ և ձեզ համար հենց այն են, ինչ ղեկը նավի համար: Ճիշտ սկզբունքները մեզ հնարավորություն են տալիս գտնել մեր ճանապարհը և կայուն, հաստատուն ու անխախտ կանգնել, որպեսզի չկորցնենք մեր հավասարակշռությունը և չընկնենք վերջին օրերի մշուշի ու խառնաշփոթի կատաղի փոթորիկների մեջ: (Դեյվիդ Ա. Բեդնար, «Իմ ավետարանի սկզբունքները», Լիահոնա, մայիս 2021թ., 126):

• Ավետարանի սկզբունքն ինչպե՞ս կարող է նավի ղեկանվի կամ ղեկի նման լինել:

• 1-10-ը միավորի սանդղակով գնահատեք, թե ինչպիսին է սուրբ գրություններից ճշմարիտ սկզբունքները բացահայտելու և դրանք ձեր կյանքի ուղղորդման համար կիրառելու ձեր վստահության մակարդակը: Ինչո՞ւ:

• Ի՞նչ եք արել անցյալում, որն օգնել է ձեզ գտնել սկզբունքները սուրբ գրություններում:

Ուշադիր լսեք ուսանողների պատասխանները: Կարող եք նրանց ասածները գրել գրատախտակին, որը կօգնի նրանց դասընկերներին:

Եթե ցանկանում եք վերանայել սկզբունքները բացահայտելու եղանակները, կարող եք կրկին այցելել հետևյալ դասերը. «2 Նեփի 1» և «Հակոբ 4»:

Մի պահ մտածեք, թե սեմինարիայի կամ սուրբ գրությունների ձեր անձնական ուսումնասիրության ժամանակ վերջինը ո՞ր սկզբունքն եք բացահայտել:

• Ի՞նչ սկզբունք եք գտել: Ինչպե՞ս է այդ սկզբունքն օրհնել ձեր կյանքը:

Կարող եք մի քանի ուսանողի առաջարկել կիսվել: Ուշադիր լսեք, որպեսզի գնահատեք, թե որքան լավ են նրանք բացահայտում սկզբունքները, և ինչպես կարող եք օգնել նրանց զարգացնել կարողությունն այս դասի ընթացքում: Նաև շնորհավորեք նրանց իրենց կատարած ուսումնասիրության համար և խրախուսեք շարունակել:

Բացահայտեք ավետարանի սկզբունքները

Հարոմի և Օմնիի գրքերը պարունակում են Նեփիի փոքր թիթեղների վերջին գրառումները և ներառում են շատ սկզբունքներ, որոնք կարող են օրհնել մեր կյանքը: Հարոմը թիթեղներն ստացել էր հորից` Ենովսից, և արձանագրել էր նեփիացիների մոտավորապես 40 տարվա տառապանքներն ու օրհնությունները: Հետո նա թիթեղները փոխանցել էր իր որդի Օմնիին: Օմնիի գիրքը պարունակում է նեփիացի հինգ տարբեր արձանագիրների գրությունները և ընդգրկում է մոտավորապես 190 տարի:

Որոշեք, թե ինչը լավագույնս կօգնի ձեր ուսանողներին ավետարանի սկզբունքներն իմաստալից կերպով բացահայտելու համար: Սկզբունքները սուրբ գրությունների մեկ կամ մի քանի հղումներում բացահայտելու համար ուսանողները կարող են աշխատել անհատապես կամ բաժանվել փոքր խմբերի և աշխատել միասին:

Կարդացեք սուրբ գրությունների հետևյալ հատվածները և փորձեք բացահայտել ավետարանի այն սկզբունքները, որոնք կարող եք օգտագործել ձեր կյանքում: Հատվածների յուրաքանչյուր խումբ կարող է մի քանի սկզբունք պարունակել: Սուրբ գրությունների յուրաքանչյուր հատվածում բացահայտեք առնվազն մեկը:

1. Հարոմ 1.3–4

2. Հարոմ 1.5–9

3. Հարոմ 1.10–12

4. Օմնի 1.12–16

5. Օմնի 1.25–26

Կարող եք ուսանողներին առաջարկել իրենց բացահայտած սկզբունքներից մի քանիսը գրել գրատախտակին:

Տրվելով Փրկչին և Նրա գործին

Որևէ սկզբունք բացահայտելուց հետո կարևոր է ժամանակ հատկացնել և խորհել, թե ինչ է նշանակում այդ սկզբունքը, և ինչպես կարող է կիրառվել այն ձեր կյանքում: Օրինակ՝ Օմնի 1.26 հատվածում կարող եք բացահայտել հետևյալ սկզբունքը. եթե գանք դեպի Քրիստոսը և մեր հոգիներն ամբողջովին մատուցենք Նրան, մենք կփրկվեք:

• Ի՞նչ եղանակներով կարող եք ավելի լավ հասկանալ և կիրառել այս սկզբունքը:

Ահա մեկ գաղափար.

Օգտակար կլինի այս սկզբունքը համեմատել մի բանի հետ, որը կառաջարկեիք ուրիշներին առօրյա կյանքում:

• Ի՞նչ կառաջարկեիք մեկ ուրիշին:

• Հնարավո՞ր է, որ առաջարկեք միայն մի մասն այն բանի, ինչը կարող եք տալ: Ինչո՞ւ:

• Ե՞րբ կառաջարկեք այն ամենն ամբողջությամբ, ինչը կարող եք տալ: Ինչո՞ւ:

• Սա ինչպե՞ս կարող է կիրառվել «մեր հոգիներն ամբողջությամբ Հիսուս Քրիստոսին մատուցելու» սկզբունքի համար:

Ուսանողների պատասխանները լսելիս հետևյալ հարցերը կարող են օգտակար լինել. Ըստ ձեզ՝ ի՞նչ է նշանակում ձեր հոգին Հիսուս Քրիստոսին տալը: Մարդուն ի՞նչը կարող է հետ պահել ամբողջությամբ Հիսուս Քրիստոսին նվիրվելուց:

• Ըստ ձեզ՝ ի՞նչ է նշանակում ձեր հոգին ամբողջությամբ մատուցել Հիսուս Քրիստոսին:

• Ըստ ձեզ՝ ինչո՞ւ է Տերը խնդրում մեզ մեր հոգիներն ամբողջությամբ Իրեն տալ:

• Ո՞ւմ եք ճանաչում, որ լավ օրինակ է այնպիսի մարդու, որը փորձում է իր հոգին ամբողջովին մատուցել Հիսուս Քրիստոսին: Ինչպե՞ս է օրհնվել նա այդպես վարվելու համար:

Կարող եք դիտել «Ձեր ողջ սրտով» տեսանյութը (3:26 (հասանելի է այստեղ՝ ChurchofJesusChrist.org), որում մի երիտասարդ տղայի օրինակով կտեսնեք, թե ինչպես է նա փորձում ամբողջովին նվիրվել Տիրոջը:

Կարող եք մի շրջան նկարել, որը ձեր կյանքն է ներկայացնում: Ստվերագծեք շրջանի այն հատվածը, որն ըստ ձեզ, լավագույնս ներկայացնում է, թե ինչ չափով եք ներկայումս նվիրվում Տիրոջը: Մի պահ խորհեք, թե ինչպես կարող եք ձեր հոգին ամբողջությամբ տալ Հիսուս Քրիստոսին: Գրեք մեկ կամ երկու եղանակ, որոնք ձգտելու եք անել, և դա անելն ինչ օգուտ կարող է տալ ձեր կյանքին:

Հասկանալ և կիրառել սկզբունքները

Հիշեք այն սկզբունքները, որոնք ավելի վաղ բացահայտել էիք Հարոմի և Օմնիի գրություններում:

• Ձեր բացահայտած սկզբունքներից ո՞րն է ամենանշանակալիցը ձեզ համար: Ինչո՞ւ:

• Ինչպե՞ս կարող եք ավելի լավ հասկանալ և կիրառել այդ սկզբունքը:

• Ինչպե՞ս կարող է այդ սկզբունքով ապրելն ավելի լավ ուղղորդել ձեր կյանքը դեպի Հիսուս Քրիստոսը:

Բացատրական և պատմական տեղեկություններ

Օմնի 1.12–22 Որո՞նք են Օմնիի գրքում հիշատակվող մարդկանց տարբեր խմբերը:

Օմնիի գրքում մենք սովորում ենք մարդկանց երեք խմբի մասին, որոնց Տերը բերեց ավետյաց երկիր: Հիշատակված առաջին խումբը Լեքիի ընտանիքն էր և նրա ժառանգները: Երկրորդ խումբը կոչվում է Զարահեմլայի ժողովուրդ կամ մյուլեքցիներ, որոնք լքեցին Երուսաղեմը և ճամփորդեցին դեպի Ամերիկա գրեթե այն նույն ժամանակ, ինչ Լեքիի ընտանիքը: Նրանք միացան նեփիացիներին՝ Մոսիա թագավորի իշխանությամբ (տես Օմնի 1.19): Երրորդ խումբը հարեդացիներն էին, որոնք առաջին երկու խմբերից բավական առաջ էին եկել ավետյաց երկիր: Ք.ծ.ա. 600-300 թվականներին նրանք միմյանց կործանել էին քաղաքացիական պատերազմներում: Հարեդացիների վերջին թագավորը Կորիանթումր անունով մի մարդ էր, որը պատերազմներից և կործանումից ողջ էր մնացել և, ըստ երևույթին, թափառել էր այնքան, մինչև մահանալուց առաջ գտել էր Զարահեմլայի ժողովրդին (տես Օմնի 1.21): Եթերի գիրքը պարունակում է Մորոնիի համառոտագրությունը հարեդացիներ հիշատակարանի մասին:

Օմնի 1.26 Ինչպե՞ս կարող եմ իմ հոգին ամբողջովին մատուցել Հիսուս Քրիստոսին:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Երեց Ջեֆրի Ռ. Հոլլանդ

Մեզանից յուրաքանչյուրը պետք է գա դեպի Քրիստոսը՝ … ավետարանի հանդեպ անզիջում նվիրվածությամբ: … Այսօրվա երիտասարդների բառապաշարով՝ մենք պետք է ամբողջությամբ «տրվենք» (Ջեֆրի Ռ. Հոլլանդ, «Մեծագույն հարստությունը», Լիահոնա, նոյեմբեր 2021թ., 8):

Տասներկու Առաքյալների Քվորումից երեց Նիլ Ա. Մաքսվելը (1926–2004) ուսուցանել է մեզ Տիրոջը մատուցելու նշանակությունը.

Երեց Նիլ Ա. Մաքսվել

Իսկական, անձնական զոհաբերությունը երբեք կենդանուն խորանի վրա դնելը չի եղել: Այլ դա պատրաստակամություն է՝ մեր միջի կենդանուն խորանին դնելու և թողնելու, որ այն սպառվի (Նիլ Ա. Մաքսվել, «Հրաժարվեք բոլոր անաստվածություններից», Ensign, մայիս 1995թ., 68):

Նույն թեմայի մասին երեց Մաքսվելն ավելի ուշ ուսուցանել է.

Երբ ձեր կամքը ենթարկում եք Աստծուն, Նրան եք տալիս այն միակ բանը, որ կարող եք իրականում տալ Նրան, որն իսկապես ձերն է, որ տաք (Նիլ Ա. Մաքսվել, «Հիշեք, թե որքան ողորմած է եղել Տերը», Ensign, մայիս 2004թ., 46):

Կիրակնօրյա դպրոցի նախկին գերագույն նախագահ եղբայր Ռասսել Տ. Օսգութորփը հավելել է.

Եղբայր Ռասսել Տ. Օսգաթորփ

Մեր կամքը Տիրոջը հանձնելը մի բան է, որ ամեն օր անում ենք: Դա առանձին գործողություն չէ: Դա ոչ թե վերջն է, այլ ընդամենը սկիզբը: Մենք կարող ենք ասել այն, ինչ Նա ցանկանում է, որ ասվի: Մենք կարող ենք անել այն, ինչ Նա ցանկանում է, որ արվի: Մենք կարող ենք Աստծո Սիրելի Որդու վկան լինել աշխարհի համար. ամենը նրա համար, քանի որ ցանկանում ենք անել այդ բաները: Երբ այս փոփոխությունը տեղի ունենա մեր սրտերում, Քավության համար մեր երախտագիտությունն այնքան կմեծանա, որ մենք շարունակաբար կզորանանք դրանով (Ռասսել Տ. Օսգութորփ, «Ես ինձ կնվիրեմ Նրան» [Եկեղեցու կրթական համակարգի հավաք չափահաս երիտասարդների համար, 3-ը նոյեմբերի, 2013թ.]):

Օժանդակ ուսումնական վարժություններ

Հարոմ 1.9 «Տիրոջ խոսքը հաստատվեց»

Եթե ուսանողների համար օգտակար կլինի ավելին իմանալ իրենց կյանքում Տիրոջ խոստումների կատարման մասին, առաջարկեք նրանց կարդալ Հարոմ 1.5–9 հատվածը և գտնել այն դասերը, որոնք նրանք կարող են սովորել Հարոմի ժամանակաշրջանի մասին: Ուսանողներին օգնեք բացահայտել Հարոմ 1.9 հատվածի սկզբունքը, օրինակ այն, որ երբ վստահենք Տիրոջը և պահենք Նրա պատվիրանները, մենք կստանանք Նրա խոստացած օրհնությունները: Խորհեք հետևյալ հարցերի շուրջ.

• Ինչո՞ւ է կարևոր հիշել, որ Աստծո խոստումները ոչ միշտ են անմիջապես կատարվում:

• Ի՞նչ եք սովորել Տիրոջ մասին, որը Նրա խոստումների հանդեպ վստահություն է տվել ձեզ:

• Սուրբ գրություններում ի՞նչ այլ օրինակներ կան, որոնցում Աստծո խոսքերն ի վերջո կատարվել են:

• Ե՞րբ է Տերն օրհնել ձեզ կամ ձեզ ծանոթ մեկին՝ Իր պատվիրանները պահելու համար:

Որպես այս սկզբունքի օրինակ կարող եք ցուցադրել «Շարունակեք համբերությամբ» տեսանյութը (2:41) կամ հղում կատարեք նախկինում Առաջին նախագահությունից նախագահ Դիտեր Ֆ. Ուխդորֆի նույն վերնագրով ելույթին 2010 թվականի ապրիլի գերագույն համաժողովից:

Օմնի 1.14–19 Սուրբ գրության արժեքը

Կարող եք ուսանողներին առաջարկել մտածել այն օգուտների ու օրհնությունների մասին, որոնք գտել են սուրբ գրությունները կանոնավոր կերպով ուսումնասիրելու արդյունքում: Ուսանողները կարող են ուսումնասիրել Օմնի 1.14–19 հատվածը և փնտրել, թե ինչ տեղի ունեցավ մյուլեքցիների հետ այն պատճառով, որ նրանք Երուսաղեմից «հիշատակարաններ չէին բերել իրենց հետ» (Օմնի 1.17): Ուսանողներին հիշեցրեք, թե Հոգին ինչ էր ասել Նեփիին. որ մի ողջ ազգ անհավատության մեջ կընկնի ու կկորչի, եթե նա Լաբանից չստանա արույրե թիթեղները (տես 1 Նեփի 4.13): Զարահեմլայի ժողովուրդն այդ նախազգուշացման կենդանի վկան էր: Կարող եք ուսանողներին խնդրել թվել որոշ բաներ, որոնց մասին հիշելուն օգնում է սուրբ գրությունների կանոնավոր ուսումնասիրությունը կամ մտածել դրանց մասին և գրել դրանք գրատախտակին: