Ենովս

Հիսուս Քրիստոսի հանդեպ հավատքը կարող է մեղքերի ներում բերել

Ենովսն աղոթում է

Երբևէ մտածե՞լ եք, թե ինչպես եք ներում ստանալու ձեր մեղքերի համար: Հակոբի որդի և Լեքիի թոռ Ենովսը «զորեղ աղոթքով» աղոթում էր Աստծուն (Ենովս 1.4) իր մեղքերի ներման համար: Այս դասի նպատակն է օգնել ձեզ հավատք գործադրել հավատք Հիսուս Քրիստոսի հանդեպ և ապաշխարել ներում ստանալու համար:

Աղոթք: Երբ պատրաստվեք դասերն ուսուցանելու, կարող եք աղոթել Երկնային Հորը՝ խնդրելով Նրան օգնել ձեր ուսանողներին: Կարելի է աղոթել, որ նրանք իմանան ինչ անել Հիսուս Քրիստոսի հանդեպ իրենց հավատքն ամրապնդելու համար և օգնել նրանց լսել Սուրբ Հոգու տպավորությունները:

Ուսանողի նախապատրաստում. ուսանողներին առաջարկեք դասարանի առաջ կարդալ Ենովս 1.1–8 հատվածը՝ մտածելով, թե ինչ էր զգում Ենովսը, և ինչ իմացավ Տիրոջ ու իր մեղքերը ներելու մասին: Կարող եք ուսանողներին առաջարկել մտածել, թե իրենց կարծիքով այս փորձառությունն ինչպես փոխեց Ենովսի կյանքը:

Հնարավոր ուսումնական վարժություն

Մտածեք, թե ինչ է նշանակում ներումը ձեզ համար

Կարող եք կատարել հետևյալ վարժությունը, որը կօգնի ուսանողներին պատրաստվել ուսումնասիրելու Ենովսի և ներման մասին:

Պատկերացրեք, որ մի ընկեր ունեք, որը ձեզ հարցնում է ապաշխարության և ներման մասին: Մտածեք, թե ինչպես կարող եք պատասխանել հետևյալ հարցերին.

• Ինչպե՞ս կիմանաք, որ որևէ բանի համար ներման կարիք ունեք:

• Ինչպե՞ս կարող եք մեղքերի ներում ստանալ:

• Ինչպե՞ս կարող է մարդն իմանալ, որ ներվել է այն բանից հետո, երբ փորձել է ապաշխարել:

Մտածեք, թե ինչ կասեիք ձեր ընկերոջը: Մտածեք, թե ինչ գիտեք ներման մասին և ինչ եք զգացել ներում խնդրելիս, ինչպես նաև՝ ինչը կցանկանայիք ավելի լավ իմանալ:

Կարող եք մի քանի ուսանողի առաջարկել կիսվել, թե իրենք ինչ կասեին:

Երբ այս դասի ընթացքում ուսումնասիրեք Ենովսի պատմությունը, գտեք, թե նա ինչ արեց իր մեղքերի ներումը ստանալու համար, և դա ինչպես կարող է կիրառվել ձեր կյանքում:

Ներումը սկսվում է ձեր և Աստծո միջև խոր հաղորդակցումից

Հակոբի որդի և Լեքիի թոռ Ենովսը «զորեղ աղոթքով» աղոթում էր Աստծուն մեղքերի ներման համար:

Կարդացեք Ենովս 1.1–8 հատվածը և նշեք այն բառերն ու արտահայտությունները, որոնք կօգնեն ձեզ ավելի լավ հասկանալ, թե ինչպես ներում խնդրել և ստանալ:

Կարող եք ուսանողներին առաջարկել գրատախտակին գրել այն արտահայտությունները, որոնք տպավորիչ էին իրենց համար:

Ժամանակ հատկացնելը և կարևոր արտահայտությունների մասին խորհելը կարող է սուրբ գրությունների ուսումնասիրման օգտակար հմտություն լինել: Այն թույլ է տալիս Սուրբ Հոգուն ավելի մեծ հասկացողությամբ ոգեշնչել ձեզ: Խորհելու համար կարող եք մտածել, թե ինչ է նշանակում արտահայտությունը և Սուրբ գրքերի կամ Թեմաների ուղեցույցում փնտրել բոլոր այն բառերը, որոնք կցանկանայիք ավելի լավ հասկանալ: Կարող եք խորհել, թե ինչու էր Ենովսն օգտագործել տվյալ արտահայտությունը, և արդյոք երբևէ ունեցել եք նմանատիպ զգացողություն:

Ընտրեք ստորև ներկայացվող արտահայտություններից մի քանիսը կամ ձեր բացահայտած ուրիշ արտահայտություններ և փոքր-ինչ մտածեք, թե ինչ կարող եք սովորել դրանցից:

Կարող եք գրատախտակին ավելացնել ստորև ներկայացված արտահայտություններից ցանկացածը: Երբ ուսանողները կիսվեն այս արտահայտություններով, կարող եք լրացուցիչ հարցեր տալ, օրինակ՝ «Ըստ ձեզ՝ Ենովսն ի՞նչ կարող էր նկատի ունենալ «հոգին քաղցում էր» արտահայտությամբ»: «Հավերժական կյանքի և Սրբերի ցնծության վերաբերյալ ուսմունքների մասին մտածելիս ինչպե՞ս կարող է մարդու հոգին քաղց զգալ»: «Ինչո՞ւ ենք մեղքի պատճառով հոգևոր դատարկություն զգում»: «Ինչո՞ւ է պայքարը լավ բառ՝ ապաշխարելու մեր ջանքերը նկարագրելու համար»:

• «Պայքար, որը ես ունեցա Աստծո առաջ» (հատված 2)

• «Խորը ընկղմվել էին իմ սրտում» (հատված 3)

• «Իմ հոգին քաղցում էր» (հատված 4)

• «Զորեղ աղոթք և աղաչանք» (հատված 4)

• «Քո մեղքերը ներված են քեզ» (հատված 5)

• «Իմ հանցանքը սրբվեց» (հատված 6)

• «Տե՛ր, ինչպե՞ս է դա արվում» (հատված 7)

• «Քրիստոսի հանդեպ քո հավատքի շնորհիվ» (հատված 8)

Կարող եք ուսանողներին բաժանել զույգերի և առաջարկել նրանց կիսվել իրենց սովորածով: Նրանք կարող են միասին պատասխանել հետևյալ հարցերին.

• Ո՞ր բառերն ու արտահայտությունները կարևորեցիք: Ինչո՞ւ:

• Ի՞նչ իմացաք, երբ խորհեցիք այդ արտահայտությունների շուրջ:

• Ըստ ձեզ՝ Աստված ի՞նչ է ուսուցանում Ենովսի փորձառությամբ:

Եթե ուսանողներն այս հարցերին պատասխանել են փոքր խմբերով, մի քանի ուսանողի առաջարկեք դասարանի հետ կիսվել, թե ինչ սովորեցին, կամ ինչը դուր եկավ իրենց դասընկերոջ ասածից: Երբ ուսանողները կիսվեն ճշմարիտ սկզբունքներով, կարող եք դրանք գրել գրատախտակին:

Եթե ուսանողները դժվարանում են կիսվել ճշմարտություններով, կարող եք տալ այսպիսի հարցեր. «Ի՞նչն էր պատճառը, որ Ենովսը սրբեց իր հանցանքը»: «Ի՞նչ իմացավ Ենովսը Տիրոջից այն մասին, թե ինչու ներվեցին իր մեղքերը»:

Ենովսի պատմությունից սովորած կարևոր սկզբունքներից մեկն այն է, որ երբ ապաշխարում և գործում ենք Հիսուս Քրիստոսի հանդեպ ունեցած մեր հավատքով, մեր մեղքերը կարող են ներվել, և մենք կապրենք: Կարող եք այս սկզբունքը գրել ձեր օրագրում:

Կարդացեք Տասներկու Առաքյալների Քվորումից երեց Դիտեր Ֆ. Ուխդորֆի հետևյալ հայտարարությունը․

Երեց Դիտեր Ֆ. Ուխդորֆ

Երբ մենք իսկապես ապաշխարենք, Քրիստոսը կհեռացնի մեր մեղավորության զգացողության բեռը: Մենք կարող ենք իմանալ, որ ներվել ենք և մաքրվել: Սուրբ Հոգին կհաստատի դա մեզ. Նա է Մաքրագործողը: Ներման ոչ մի այլ վկայություն չի կարող ավելի հզոր լինել (Դիտեր Ֆ. Ուխդորֆ, «Ապահով վերադարձի կետ», Ensign կամ Լիահոնա, մայիս 2007թ., 101):

Եթե ուսանողները սկզբունքը գրեն իրենց օրագրում, կարող եք առաջարկել նրանց շրջանի մեջ վերցնել սկզբունքի այն հատվածը, որը կցանկանան ավելի լավ հասկանալ: Ապա խնդրեք նրանց կիսվել, թե ինչն են շրջանի մեջ վերցրել: Մյուս ուսանողներին խնդրեք կիսվել, թե ինչ գիտեն, որը կարող է օգնել իրենց դասընկերներին: Օգնելու համար նրանք կարող են օգտվել սուրբ գրություններից, փորձառություններից կամ Եկեղեցու ղեկավարների խոսքերից: Ստորև ներկայացվող հարցերը նույնպես կարող են օգտակար լինել.

• Ըստ ձեզ՝ ի՞նչ տեղի կունենա, երբ որևէ մեկը փորձի ներում խնդրել առանց ապաշխարելու և առանց Հիսուս Քրիստոսի հանդեպ հավատք գործադրելու: Ինչո՞ւ:

• Ենովսն ի՞նչ եղանակներով փորձեց ապաշխարել և հավատք գործադրել Հիսուս Քրիստոսի հանդեպ:

• Ըստ ձեզ՝ ի՞նչ է նշանակում ապրեցնել:

Կարող է օգտակար լինել տեսնելը, թե դասի սկզբում ներկայացված իրավիճակի հարցերից որո՞նց կարող եք պատասխանել՝ օգտվելով Ենովսի պատմությունից:

Այսօր մենք կարող ենք ունենալ այնպիսի փորձառություններ, ինչպիսին Ենովսն ուներ

Շատ մարդիկ ներումը չեն ստանում այնքան արագ ու հանկարծակի, ինչպես Ենովսը: Սակայն երբ մենք Հիսուս Քրիստոսի հանդեպ հավատք գործադրենք և ապաշխարենք այնպես, ինչպես Ենովսը, մենք նույնպես կարող ենք ներում ստանալ ու ապրեցվել:

Ուսանողներին օգնեք խորհել, թե ինչպես կարող են հավատք գործադրել Հիսուս Քրիստոսի հանդեպ և ապաշխարել: Ուսանողներին օգնելու համար կարող եք ցուցադրել այս նկարները կամ ձեր նախընտրած այլ նկարներ:

• Խորհեք, թե ինչ գիտեք Հիսուս Քրիստոսի և մեզ ներելու ու օգնելու Նրա ցանկության մասին: Ըստ ձեզ՝ Նա ի՞նչ է ցանկանում, որ անեք Իր հանդեպ հավատք գործադրելու և ապաշխարելու համար:

• Մտածեք, թե վերջին անգամ երբ եք զգացել, որ Հիսուս Քրիստոսի հանդեպ հավատք եք գործադրել և ապաշխարել: Դա վերջե՞րս է եղել: Ինչո՞ւ այո, կամ ինչո՞ւ ոչ:

• Կարող եք ծրագրել և ժամանակ հատկացնել՝ Հիսուս Քրիստոսի հանդեպ մեծ հավատքով աղոթելու համար: Սովորականից տարբերվող ի՞նչ մոտեցմամբ կաղոթեք: Ինչպե՞ս կարող եք Ենովսի նման դրսևորել Տիրոջ ներումը ստանալու ձեր ցանկությունը:

Կարող եք ուսանողներին առաջարկել կիսվել Փրկիչ Հիսուս Քրիստոսի մասին տպավորություններով ու վկայություններով, նաև, թե ինչ սովորեցին Ենովսից: Կարող եք կիսվել նաև ձեր մտքերով ու վկայությամբ:

Բացատրական և պատմական տեղեկություններ

Ուրիշ ի՞նչ պետք է իմանամ Հիսուս Քրիստոսի հանդեպ հավատքի մասին:

Առաջին Նախագահությունից նախագահ Դալլին Հ. Օուքսն ասել է.

Նախագահ Դալլին Հ․ Օուքս

Տիրոջ հանդեպ հավատքը Տիրոջ հանդեպ վստահություն է: Մենք չենք կարող ունենալ ճշմարիտ հավատք առ Տերը, առանց կատարյալ ապավինում ունենալու ինչպես Տիրոջ կամքի, այնպես էլ Տիրոջ ժամանակի նկատմամբ: Դա բերում է նրան, որ մեր հավատքը, անկախ այն բանից, թե որքան ուժեղ է, չի կարող տալ այնպիսի արդյունք, որը հակառակ լինի Նրա կամքին, ում հավատում ենք: Հիշեք, թե երբ ձեր աղոթքներին չի տրվում պատասխան ձեր ցանկալի ձևով կամ ձեր ցանկացած ժամանակ: Տեր Հիսուս Քրիստոսի հանդեպ հավատքի գործադրումը միշտ ենթարկվում է երկնքի կարգին, Տիրոջ բարությանը և կամքին, իմաստությանն ու ժամանակին: Երբ մենք նման կերպով ենք հավատում և վստահում Տիրոջը, մենք իրական անվտանգություն և անդորր ենք ունենում մեր կյանքում (Դալլին Հ. Օուքս, «Քավությունը և հավատքը» [սեմինարի ընթացքում միսիաների նոր նախագահներին տրված ուղերձ, հունիս 2001թ.]):

Ի՞նչ կարող եմ անել ավելի լավ աղոթելու համար:

Տասներկու Առաքյալների Քվորումից երեց Դեյվիդ Ա. Բեդնարն ասել է.

Երեց Դեյվիդ Ա. Բեդնար

Մեր աղոթքների առարկան չպետք է լինի ցանկությունների ցուցակ կամ խնդրանքների շարան ներկայացնելը, այլ մեր և ուրիշների համար օրհնություններ ապահովելը, որոնք Աստված այդքան շատ ցանկանում է շնորհել մեզ Իր կամքով և ժամանակին: Մեր Երկնային Հայրը լսում և պատասխանում է յուրաքանչյուր անկեղծ աղոթքի, սակայն մեր ստացած պատասխանները գուցե չհամապատասխանեն մեր սպասածին, չգան մեր ցանկացած ժամանակ կամ այն ձևով, ինչպես մենք ենք ակնկալում: …

Աղոթքն արտոնություն է և հոգու անկեղծ ցանկությունը: Մենք կարող ենք հրաժարվել առօրեական և «ցանկով» աղոթքներից և իմաստալից աղոթք անել, երբ պատշաճ ձևով խնդրենք ու գործենք հավատքով, երբ համբերությամբ անցնենք մեր հավատքի փորձություններով, և երբ խոնարհաբար ընդունենք «ոչ թե իմ, այլ Քո կամքը լինի» (Դեյվիդ Ա. Բեդնար, «Խնդրեք հավատքով», Ensign կամ Լիահոնա, մայիս 2008թ., 97):

Օժանդակ ուսումնական վարժություններ

Ինչպե՞ս կարող եմ իմանալ՝ արդյոք ներվել եմ:

Եթե կարծում եք, որ ձեր ուսանողների համար օգտակար կլինի վերոնշյալ հարցը հասկանալը, կարող եք առաջարկել նրանց կարդալ Մոսիա 4.1–3 հատվածը և ցուցադրել «Ինչպես ենք իմանում, որ Տերը ներել է մեզ» տեսանյութը (3:18): Տասներկու Առաքյալների Քվորումից երեց Նիլ Լ. Անդերսենը խոսել է իմաստալից աղոթքի կարևորության մասին, երբ մենք անկեղծ ապաշխարության և իրական մտադրության միջոցով հավատում ենք Աստծո՝ մեզ ներելու ցանկությանը:

Ի՞նչ ազդեցություն ունեցավ Ենովսի փորձառությունն իր վրա:

Ուսանողների համար կարող է օգտակար լինել իմանալ, թե ինչ արեց Ենովսը Տիրոջից ներում ստանալուց հետո: Կարդացեք Ենովս 1.9–18 հատվածը և փնտրեք, թե հաջորդը ում համար աղոթեց Ենովսը և ինչու: Խորհեք, թե ինչ եք սովորում նրա փորձից: Կարող եք կարդալ նաև 2 Նեփի 26.33 հատվածը և խորհել, թե ինչ կապ ունի այն նշված հատվածների հետ: Մտածեք, թե ում համար կարող եք աղոթել և օգնություն խնդրել:

Ի՞նչ կարող եք սովորել Ենովսի աղոթքի փորձառությունից:

Ներման վրա կենտրոնանալու փոխարեն ուսանողներին առաջարկեք կարդալ Ենովսի գիրքը և փնտրել գաղափարներ աղոթքի վերաբերյալ: Նրանց առաջարկեք կիսվել, թե Ենովսի աղոթքն ինչպես օգնեց նրան, միգուցե կիսվել, թե ինչպես փոխվեց Ենովսի սիրտն այդ փորձառության միջոցով: Ուսանողներին առաջարկեք կիսվել նաև, թե ինչ կարող են անել իրենց աղոթքներն ավելի իմաստալից դարձնելու համար: