Enos–Mga Pulong ni Mormon

Kinatibuk-ang Pagpasabot

Ang mga basahon gikan sa Enos ngadto sa Mga Pulong ni Mormon naglangkob sa gatosan ka mga tuig ug nagpaila kanato sa lain-laing mga propeta ug dinasig nga mga tawo. Si Enos, ang anak ni Jacob ug apo ni Lehi, nag-ampo ngadto sa Dios “sa hilabihan nga pag-ampo” alang sa iyang mga sala (Enos 1:4). Ang mga basahon ni Jarom ug Omni naglangkob sa lain-laing mga pagtulun-an nga makapanalangin sa atong mga kinabuhi. Si Mormon gigiyahan sa Espiritu sa Ginoo sa paglakip sa gagmay nga mga palid “alang sa usa ka maalamon nga katuyoan,” sumala sa kabubut-on sa Ginoo (tan-awa sa Mga Pulong ni Mormon 1:3–7). Ug si Hari Benjamin mitudlo sa iyang mga anak sa importante nga tahas sa mga kasulatan sa ilang hugot nga pagtuo.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Enos

Katuyoan sa leksiyon: Kini nga leksiyon gituyo aron matabangan ang mga estudyante nga makapakita sa hugot nga pagtuo diha kang Jesukristo ug maghinulsol aron makadawat og kapasayloan.

• Pagpangandam sa estudyante: Dapita ang mga estudyante sa pagbasa sa Enos 1:1–8 sa wala pa ang klase, mamalandong kon unsay gibati ni Enos ug unsay iyang nakat-onan kabahin sa Ginoo ug pagpasaylo sa iyang mga sala. Ikonsiderar ang paghangyo sa mga estudyante sa pagpamalandong kon sa unsang paagi kaha kini nga kasinatian nakapausab sa kinabuhi ni Enos.

• Sugyot sa pagtudlo pinaagi sa videoconference: Human ang pagdapit sa mga estudyante sa pagpamalandong sa mahinungdanon nga mga hugpong sa pulong gikan sa Enos 1:1–8, ikonsiderar ang pagtugot kanila sa pagpaambit niini gamit ang whiteboard feature. Mahimong mopili ang mga estudyante og usa niini nga mga hugpong sa mga pulong nga gusto nilang mas masabtan ug modugang og mga mubo nga sulat gikan sa ilang pagtuon tapad sa hugpong sa mga pulong. Mahimo dayon silang hangyoon sa pagpasabot sa ilang mga mubo nga sulat.

Jarom–Omni

Katuyoan sa leksiyon: Kini nga leksiyon gituyo aron matabangan ang mga estudyante sa pagbansay sa pag-ila ug paggamit sa mga baroganan gikan sa mga kasulatan nga makapanalangin ug makagiya sa ilang mga kinabuhi.

• Pagpangandam sa estudyante: Samtang gihimo sa mga estudyante ang ilang inadlaw nga pagtuon sa kasulatan, dapita sila sa pagpraktis sa pag-ila sa mga baroganan nga makatabang kanila sa ilang mga kinabuhi. Dasiga sila sa pagtambong nga andam sa pagpaambit og bisan usa ka baroganan nga ilang nakaplagan.

• Hulagway: Usa ka hulagway sa usa ka barko nga adunay timon, nga gipakita o gidrowing diha sa pisara

• Sugyot sa pagtudlo pinaagi sa videoconference: Ikonsiderar ang pagsugod sa klase niini nga pangutana: “Handurawa ang imong panaw sa kinabuhi nga sama sa usa ka barko nga naglawig sa kadagatan. Unsa ang pipila ka mga butang nga mahimo nimong itandi ngadto sa manibela o timon nga naggiya sa barko diha sa panaw?” Dapita ang mga estudyante sa pagtubag sa pangutana gamit ang chat feature. Basaha og kusog ang pipila sa ilang mga tubag sa dili pa ipakita ang pamahayag gikan ni Elder David A. Bednar.

Ang Mga Pulong ni Mormon

Katuyoan sa leksiyon: Kini nga leksiyon makatabang sa mga estudyante nga mobati og kasegurohan nga ang Ginoo nasayod sa tanang mga butang ug nga ang Iyang buhat kay matuman.

• Pagpangandam sa estudyante: Mahimong mangutana ang mga estudyante sa usa ka ginikanan o lider sa Simbahan kon sa unsang paagi sila gigiyahan o napanalanginan pinaagi sa pagsanong sa usa ka espirituhanong impresyon o pag-aghat. 

• Sugyot sa pagtudlo pinaagi sa videoconference: Sa higayon nga basahon sa mga estudyante ang 1 Nephi 9:5–6 ug Mga Pulong ni Mormon 1:7–8, ikonsiderar ang pagbahin sa klase ngadto sa breakout room aron sa paghisgot sa mga pangutana ug pag-ila sa mga baroganan nga ilang nakaplagan. Depende sa gidak-on sa kada grupo, ang usa ka estudyante gikan sa kada grupo mahimong mopaambit ngadto sa klase kon unsa ang nahisgotan sa ilang grupo sa 1 Nephi 9:5–6, ug dayon laing usa ka estudyante gikan sa kada grupo ang mahimong mopaambit kon unsa ang nahisgotan sa ilang grupo sa Mga Pulong ni Mormon 1:7–8.

Mga Pulong ni Mormon 1:12–18; Mosiah 1

Katuyoan sa leksiyon: Kini nga leksiyon makatabang sa mga estudyante nga madugangan ang ilang tinguha sa pagtuon sa mga kasulatan.

• Pagpangandam sa estudyante: Dapita ang mga estudyante sa paghimo sa ilang personal nga pagtuon sa kasulatan ug sa pagpamalandong kon sa unsang paagi kini makaapekto diha kanila, ilabi na sa ilang mga pagbati ug pagsalig diha kang Jesukristo.

• Sugyot sa pagtudlo pinaagi sa videoconference: Sa hapit na matapos ang leksiyon, kon makapili na ang mga estudyante og pipila ka mga kalihokan mahitungod sa pagtuon sa kasulatan nga pagabuhaton, ikonsiderar ang paghimo sa kalihokan sa pagbidyo isip usa ka klase. Ipa-download ang usa sa mga bidyo ug dapita ang mga estudyante sa pagtan-aw niini nga mangita og mga ehemplo kon sa unsang paagi ang pagtuon sa kasulatan makapanalangin sa atong mga kinabuhi ug makadugang sa atong hugot nga pagtuo diha sa Langitnong Amahan ug ni Jesukristo. Dapita sila sa pagpaambit sa ilang mga hunahuna sa dili pa mopili og duha sa nahabilin nga mga kalihokan.

Rebyo 6 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante sa pagpalawom sa ilang pagsabot ug makapasabot sa mga kamatuoran gikan sa usa o daghan pa sa mga tudling sa doktrinal nga kahanas gikan sa Basahon ni Mormon.

• Pagpangandam sa estudyante: Dapita ang mga estudyante sa pagrebyo sa mga tudling gikan sa tsart niini nga leksiyon ug papilia og usa nga gusto pa nilang mas masabtan. Hangyoa sila sa pagbasa sa tudling nga ilang napilian ug sa pagpaningkamuot nga mas masabtan pa kini. Mahimong maglakip kini sa pagpangita sa ubang nagsuporta nga mga kasulatan, pagsulat sa ilang mga hunahuna mahitungod niini diha sa ilang journal, o pagpangutana sa uban kon unsay ilang nasabtan gikan sa bersikulo. Dapita sila sa pagtambong nga andam sa pagpaambit sa unsay ilang gibuhat ug unsay ilang nakat-onan.

• Mga hulagway: Mga hulagway sa nagkalain-laing mga dula o sporting event

• Sugyot sa pagtudlo pinaagi sa videoconference: Ikonsiderar ang pagbutang sa mga estudyante sa mga breakout room ug pagdapit sa matag grupo nga magtinabangay sa paghimo sa ilang kaugalingon nga “Pagtulun-an human sa usa ka Pagtulun-an” nga kalihokan. Human sa igong panahon, pabalika sila nga magdungan aron sa pagpaambit sa ilang mga kalihokan uban sa tibuok klase.