Հակոբ 5.54–77, 6.1–13

«Որքան օրհնված են նրանք, ովքեր ջանասիրաբար աշխատել են Նրա այգում»

մարդիկ՝ Մորմոնի Գիրքը կարդալիս

Հակոբ 5 գլխում ներկայացված ձիթենիների այլաբանությունն ինչպե՞ս է առնչվում ձեզ: Այս այլաբանության վերջին հատվածը խորհրդանշում է վերջին օրերում Տիրոջ գործը՝ ներառյալ այն ջանքերը, որ Նա ու Նրա սպասավորները գործադրում են` հոգիները վերջին անգամ Նրա շուրջը հավաքելու համար: Այս դասը նախատեսված է օգնելու ձեզ ավելի մեծ ցանկություն զգալ աշխատելու Տիրոջ հետ և օգնելու դեպի Նրան դարձնել Երկնային Հոր զավակներին:

Յուրաքանչյուր ուսանողի օգնեք նպաստել ուսումնական գործընթացին: Յուրաքանչյուր ուսանող ունի ներդրում կատարելու կարիք: Որոշ ուսանողներ, ի տարբերություն այլ ուսանողների, գուցե ավելի հակված լինեն մասնակցելու: Ջանացեք օգնել յուրաքանչյուր ուսանողի՝ նպաստելու իրենց համար իմաստալից ու հարմար ձևով:

Ուսանողի նախապատրաստում. ուսանողներին կարող եք առաջարկել կատարել «Հակոբ 5.61–75. Տերը հրավիրում է ինձ աշխատելու Իր հետ Իր այգում» վերնագրի տակ բերված վարժությունը, տես «Ապրիլ 8–14: Հակոբ 5–7․ «Տերն աշխատում է մեզ հետ»» ուսումնասիրության համառոտ շարադրանքը Եկ, հետևիր ինձ․ անհատների և ընտանիքների համար․ Մորմոնի Գիրք 2024-ում:

Հնարավոր ուսումնական վարժություններ

Մեծ աշխատանք

Դասարանի հետ կիսվեք հետևյալ սցենարով.

Վերջերս Անիկայի եպիսկոպոսը նրան խնդրել էր աղոթքով մտածել, թե ինչ եղանակներով կարող է մոտենալ ու օգնել իր ծխի երիտասարդ կանանցից մեկին, որը չէր հաճախում եկեղեցի: Անիկան մի փոքր նյարդայնանում է և զարմանում․ «Ինչո՞ւ է եպիսկոպոսը խնդրում ինձ անել դա: Եպիսկոպոսը հավանաբար շատ ավելի արդյունավետորեն կօգներ նրան, քան ես»:

• Անիկայի եպիսկոպոսն ի՞նչ որոշ պատճառներով կարող էր առաջարկել, որ Անիկան մոտենա երիտասարդ կնոջը, այլ ոչ թե ինքը:

Նախքան ստորև ներկայացվող նախաբանով կիսվելը՝ օգտակար կլինի մի քանի ցանկացողի առաջարկել ամփոփ ներկայացնել այն, ինչ հիշում են նախորդ դասի ընթացքում ուսումնասիրած Հակոբ 5 գլխի այլաբանության մի քանի հատվածների մասին:

Այսօր կուսումնասիրեք Հակոբ 5 գլխի ձիթենիների այլաբանության վերջին մասը: Այլաբանության այդ հատվածը ներկայացնում է վերջին օրերը: Ճշմարտություններից մեկը, որ կարող ենք սովորել այլաբանության այս հատվածից, այն է, որ Տերն Իր վերջին օրերի սպասավորներին հրավիրում է աշխատել Իր այգում՝ մասնակցելով Իսրայելի հավաքմանը:

Նախքան ուսումնասիրելը մտածեք, թե ինչ զգացողություններ կունենայիք, եթե Տերը հրավիրեր ձեզ օգնելու հավաքել մարդկանց Իր շուրջը: Երբևէ մտածե՞լ եք, թե ինչու է Նա հրավիրում ձեզ օգնել Իրեն հոգիները փրկելու Իր աշխատանքում: Ուսումնասիրելու ընթացքում փնտրեք ուսմունքներ, որոնք կարող են օգնել ձեզ ավելի լավ հասկանալ Տիրոջ նպատակները, երբ նա հրավիրում է մեզ Իր հետ մասնակցել Իսրայելի հավաքմանը:

Այգու տերը սպասավորներին հրավիրում է աշխատել իր հետ

Այլաբանության վերջին մասը սկսվում է այգու տիրոջ (որը ներկայացնում է Հիսուս Քրիստոսին) և նրա սպասավորի (որը ներկայացնում է Տիրոջ մարգարեներին) միջև տեղի ունեցող զրույցով:

Կարդացեք Հակոբ 5.61–62, 70 հատվածները և փնտրեք, թե ինչ կարգադրեց այգու տերն իր ծառաներին անել, և ինչու նա խնդրեց անել դա:

• Այս հատվածներում ո՞վ կարող է ներկայացնել ձեզ և Եկեղեցու այլ անդամներին:

Նախագահ Ռասսել Մ. Նելսոնը քննարկել է վերջին օրերին Տիրոջ և Նրա սպասավորների կատարած աշխատանքը.

Նախագահ Ռասսել Մ. Նելսոն

Տերը մարգարե Ջոզեֆ Սմիթին ասաց, որ այժմ, այսինքն՝ մեր օրերում, ժամը տասնմեկն է և վերջին անգամը, որ Նա մշակներ կկանչի Իր այգի՝ աշխարհի չորս կողմերից ընտրյալներին հավաքելու հստակ նպատակով [տես Վարդապետություն և Ուխտեր 33.3, 6]: …

Արդյո՞ք կցանկանայիք օգնել հավաքել Իսրայելն այս թանկագին վերջին օրերում: …

… Պատկերացրեք միայն: Բոլոր մարդկանցից, ովքեր երբևէ ապրել են Երկիր մոլորակի վրա, մենք ենք այն մարդիկ, ովքեր մասնակցում են այս վերջին՝ մեծ հավաքման իրադարձությանը: Որքա՜ն ոգևորիչ է սա:

Մեր Երկնային Հայրն այս վերջին փուլի համար պահպանել է Իր ազնվագույն հոգիներին, հավանաբար կարող եմ ասել՝ Իր լավագույն թիմին: Այդ ազնիվ հոգիները, այդ լավագույն խաղացողները, այդ հերոսները դո՛ւք եք (Ռասսել Մ. Նելսոն և Վենդի Վ. Նելսոն, «Իսրայելի հույսը» [դեռահասների համաշխարհային հոգևոր հավաք, 3-ը հունիսի, 2018թ.], լրացում New Era և Ensign ամսագրերի համար, 8, ChurchofJesusChrist.org):

• Ի՞նչ օգնեցին սովորել կամ զգալ Աստծո մասին նախագահ Նելսոնի խոսքերը:

• Այդ խոսքերը ձեզ ի՞նչ սովորեցրին ձեր և այն դերի մասին, որ պետք է կատարեք Իսրայելի հավաքման գործում:

• Ըստ ձեզ՝ ինչո՞ւ է Տերը հրավիրում մեզ օգնելու հավաքել մարդկանց Իր շուրջը:

Ձեր բաժինը Տիրոջ այգում

Կարող եք դասարանի առաջ ինքներդ կատարել հետևյալ վարժությունը և ձեր նկարը ցույց տալ ուսանողներին որպես օրինակ:

Ձեր օրագրում կամ մեկ այլ թղթի վրա պատկերեք այգու կամ դաշտի նկար, որը ներկայացնում է Տիրոջ այգին: Ապա մի քանի բան նկարեք կամ գրեք, որոնք ներկայացնում են հետևյալը.

1. Տիրոջ այգում աշխատելու և Իսրայելի հավաքմանն օգնելու հնարավորությունները: Որպես օրինակ կարող են լինել այն նկարները կամ բառերը, որոնք ներկայացնում են մարդկանց, ում կարող եք օգնել ավելի մոտենալ Փրկչին, գործողություններ, որոնք կարող եք կատարել՝ ավետարանով անձամբ կամ առցանց կիսվելու համար, կամ ջանքեր՝ տաճարի և ընտանեկան պատմությունների միջոցով վարագույրի մյուս կողմում գտնվող մարդկանց օրհնելու համար:

2. Խոչընդոտներ, որոնց բախվում եք Տիրոջ այգում աշխատելու ձեր ջանքերը գործադրելիս: Որպես օրինակ կարող են լինել նկարներ կամ բառեր, որոնք ներկայացնում են այնպիսի խոչընդոտներ, ինչպիսիք են վախը, որևէ բան անելու անորոշությունը կամ այլ բաներով խիստ զբաղված լինելու զգացումը:

Ուսումնասիրեք հետևյալ հատվածները և փնտրեք ուսմունքներ, որոնք կարող են օգնել ձեզ հաղթահարել ձեր բացահայտած խոչընդոտները: Կարող եք ձեր նկարած այգուն ավելացնել նկարներ կամ բառեր՝ սովորածի հիման վրա։

• Հակոբ 5.71–72, 75

• Հակոբ 6.2–8 (ուսմունքներ, որոնցով կիսվեց Հակոբը այլաբանությունը մեջբերելուց հետո)

• Վարդապետություն և Ուխտեր 18.10–16

• Այս հատվածներից ի՞նչ սովորեցիք Տիրոջ մասին:

• Այս հատվածներից ի՞նչ բառեր կամ արտահայտություններ կարող են օգնել նրան, ով վարանում է մասնակցել Իսրայելի հավաքմանը:

Որպես հաջորդ հարցի վերաբերյալ քննարկման մաս՝ կարող եք կիսվել անձնական օրինակով:

• Ի՞նչ օրհնություններ եք տեսել կամ զգացել Տիրոջ հետ հոգիները դեպի Նրան բերելու աշխատանքին մասնակցելու համար:

Մի պահ մտածեք Տիրոջ հետ հոգիները դեպի Նրան բերելու աշխատանքին մասնակցելու ձեր հաջորդ քայլերի մասին: Ձեր օրագրում գրեք սրա հետ կապված մի նպատակ կամ հիմնվեք մի նպատակի վրա, որն ինքներդ արդեն սահմանել եք ձեզ համար: Կարող եք ներառել նաև բառեր կամ նկարներ, որոնք ներկայացնում են ձեր նպատակը ձեր պատկերած այգու վերաբերյալ: Ձեր նպատակների մասին խորհելիս կարող եք դիտել «2021 թվականի երիտասարդների թեմատիկ երգը՝ «Մեծ աշխատանք»» (4:06) տեսանյութը, որը հասանելի է այստեղ՝ ChurchofJesusChrist.org):

Կարող եք մի քանի կամավորի առաջարկել դասարանի հետ կիսվել իրենց ավարտած նկարներով ու նպատակներով: Վկայեք այսօր քննարկած ճշմարտությունների մասին և ուսանողներին առաջարկեք աշխատել այն նպատակների ուղղությամբ, որ սահմանել են իրենց համար: Ուսանողները հնարավորություն կունենան անդրադառնալու այդ նպատակին «Գնահատեք ձեր գիտելիքները» առաջիկա դասի ընթացքում:

Բացատրական և պատմական տեղեկություններ

Ձիթենիների այլաբանությունն ի՞նչ առնչություն ունի ինձ հետ:

Յոթանասունից երեց Բրենթ Հ. Նիլսոնն ուսուցանել է․

Երեց Բրենթ Հ. Նիլսոն

Փրկչի կոչն ուղղված է ձեզ՝ աճող սերնդին: Նա փնտրում է արժանավոր, պատրաստված, հավատացյալ երիտասարդ տղաների ու երիտասարդ աղջիկների, ովքեր կլսեն մարգարեի ձայնը, ովքեր քայլ կանեն ու կասեն, ինչպես Փրկիչն է ասում. «Ահա ես, ինձ ուղարկիր» (Աբրահամ 3.27): Կարիքը երբեք ավելի մեծ չի եղել: Դաշտը երբեք ավելի սպիտակ չի եղել: Ձեզ կանչում են գնալ «այս վերջին անգամ» (Հակոբ 5.62): Չկա ավելի մեծ աշխատանք, չկա ավելի մեծ կոչ (Բրենթ Հ. Նիլսոն, «Կոչ աճող սերնդին», Ensign կամ Լիահոնա, նոյեմբեր 2009, 97):

Ո՞վ է ղեկավարում Տիրոջ այգում կատարվող աշխատանքը:

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Երեց Դ. Թոդ Քրիստոֆերսոն

Մինչ մենք ձգտում ենք ջանասիրաբար աշխատել Սիոնը կառուցելիս, այդ թվում՝ Տիրոջ ընտրյալների հավաքման և մահացածների փրկագնման աշխատանքի մեր մասը կատարելով, մենք պետք է դադար առնենք և հիշենք, որ դա Տիրոջ գործն է, և Նա է կատարում դա: Նա է այգու Տերը, իսկ մենք Նրա ծառաներն ենք: Նա մեզ խնդրում է աշխատել այգում մեր ողջ զորությամբ, այս «վերջին անգամ», և Ինքն էլ մեզ հետ աշխատում է (տես Հակոբ 5.71–72): Հավանաբար ավելի ճիշտ կլինի ասել, որ Նա մեզ թույլ է տալիս աշխատել Իր հետ: … Այդ Նա է, որ արագացնում է Իր աշխատանքը իր ժամանակին: Գործարկելով մեր ակնհայտ անկատար ջանքերը, մեր «փոքր միջոցները», Տերն իրագործում է մեծ բաներ (տես 1 Նեփի 16.29) (Դ. Թոդ Քրիստոֆերսոն, «Պատրաստվել Տիրոջ վերադարձին», Ensign կամ Լիահոնա, մայիս 2019թ., 83–84):

Ես ի՞նչ եղանակներով կարող եմ աշխատել Տիրոջ այգում:

Կարող եք դիտել հետևյալ տեսանյութերը՝ տեսնելու այն եղանակների օրինակները, որոնցով կարող եք աշխատել Տիրոջ հետ Նրա աշխատանքում:

«Կիսվել Ավետարանով» (3:49)

«Քանի որ ինձ շատ է տրված» (4:25)

Օժանդակ ուսումնական վարժություններ

Թվերի ուժը

Որպեսզի ցույց տաք, թե ինչ չափով է արտադրողականությունը մեծանում, երբ Տիրոջ հետ միասին շատ մարդիկ են աշխատում Իսրայելը հավաքելու համար, կարող եք սենյակով մեկ մարդկանց անուններով կամ նկարներով 30–40 թերթիկներ ցիրուցան անել: Որևէ ցանկացողի առաջարկեք 10 վայրկյանում հնարավորինս շատ «մարդկանց» (նկարներ կամ անուններ) հավաքել: Հետո թերթիկները կրկին ցիրուցան արեք և մեկ այլ ցանկացողի խնդրեք միանալ առաջին ուսանողին և 10 վայրկյանում հավաքել թերթիկները: Համեմատեք, թե այս անգամ քանի թերթիկ է հավաքվել՝ ի տարբերություն այն ուսանողի հավաքած թվի, որը մենակ էր հավաքել: Ցանկության դեպքում կարող եք կրկնել այս վարժությունը ավելի շատ ուսանողների մասնակցությամբ:

Այլ սուրբ գրություններ Տիրոջ այգում աշխատելու վերաբերյալ:

Սուրբ գրություններում Տիրոջ այգու վերաբերյալ շատ հղումներ կան: Կարող եք ուսանողներին առաջարկել ուսումնասիրել ստորև ներկայացվող հատվածներից մի քանիսը՝ փնտրելով Տիրոջ այգում աշխատելու մասին լրացուցիչ գաղափարներ:

• Վարդապետություն և Ուխտեր 4.1–7

• Վարդապետություն և Ուխտեր 33.3–11

• Վարդապետություն և Ուխտեր 39.13, 17–20

Տիրոջ հետ Նրա այգում աշխատող մարդկանց օրինակ

Կարող եք ցուցադրել «Ինչպես մեկի դարձը եղբայրների մի խումբ դարձավ» տեսանյութը (3:44), որը հասանելի է այստեղ՝ ChurchofJesusChrist.org: Ուսանողներին կարող եք հանձնարարել գտնել, թե ինչպես երիտասարդ տղաների մի խումբ օրհնվեց Տիրոջ հետ Նրա այգում աշխատելու համար՝ ուրիշների գործադրած ջանքերի շնորհիվ:

«Օ՜, եղեք իմաստուն. ի՞նչ կարող եմ ասել ավելին» (Հակոբ 6.12):

Կարող եք ուսանողներին առաջարկել կարդալ Հակոբի եզրափակիչ խորհուրդը Հակոբ 6.11–12 հատվածում: Ուսանողներին կարող եք առաջարկել մտածել, թե ինչու իմաստուն քայլ կլինի Հակոբի խորհրդին հետևելով ապաշխարելը՝ հիմնվելով այն ամենի վրա, ինչ սովորեցին Հակոբ 5–6 գլուխներից: