Հակոբ 7

Անսասան հավատք առ Հիսուս Քրիստոս

փոխարինում

Եթե կարծում եք, որ որոշ մարդիկ այսօր միտումնավոր փորձում են սասանել Փրկչի Եկեղեցու անդամների հավատքը, ճիշտ եք: Դա նորություն չէ: Նեփիացիների շրջանում Շերեմ անունով մի մարդ «գործում էր ջանասիրաբար, որ կարողանար մոլորեցնել մարդկանց սրտերը» (Հակոբ 7.3): Այս դասը կօգնի ձեզ պատրաստվել հաղթահարելու Հիսուս Քրիստոսի և Նրա ավետարանի հանդեպ հավատքի մարտահրավերները:

Օգնեք ուսանողներին հասկանալ սուրբ գրությունների բովանդակությունը: Սուրբ գրությունների բովանդակության հիմքում պատմական ժամանակացույցն է, մարդիկ, իրադարձությունները, քարոզները և բացատրությունները: Հասկանալով այս տարրերը՝ ուսանողները կարող են կապ ստեղծել սուրբ գրությունների կերպարների հետ և ստանալ ոգեշնչմամբ գրված քարոզների խրատաբանությունը:

Ուսանողի նախապատրաստում. ուսանողներին առաջարկեք պատրաստվել և դասին խոսել մի մարդու մասին, որն օրինակ է այն բանի, թե ինչպես է ամուր կանգնել իր հավատքով, երբ ուրիշները փորձել են շեղել նրան հավատքի ուղուց:

Հնարավոր ուսումնական վարժություններ

Պատրաստվել ապագայի մարտահրավերներին

Նախքան այս խոսքերով կիսվելը՝ կարող եք հարցնել. «Մեկից տասը սանդղակով գնահատեք, թե այսօր որքանո՞վ է դժվար Հիսուս Քրիստոսի անվեհեր աշակերտ լինելը»: Կարող եք ուսանողներին խնդրել մատներով ցույց տալ այն թիվը, որը համապատասխանում է իրենց պատասխանին, ապա մի քանիսին խնդրեք կիսվել, թե ինչու են այդ պատասխանը տվել:

Նախագահ Ռասսել Մ. Նելսոնը խոսել է այն դժվար մարտահրավերի մասին, որին բախվելու ենք.

Նախագահ Ռասսել Մ. Նելսոն

Դժվարին ժամանակներ են սպասվում: Ապագայում հեշտ չի լինի Վերջին Օրերի հավատարիմ Սուրբ լինել, ոչ էլ նրանք ընդունված կլինեն: Մեզանից յուրաքանչյուրը կստուգվի: Պողոս Առաքյալը նախազգուշացրել է, որ նրանք, ովքեր ջանասիրաբար կհետևեն Տիրոջը, «հալածանք պիտի կրեն» վերջին օրերում [Բ Տիմոթեոս 3.12]: Հենց այդ հալածանքը կա՛մ կջախջախի ձեզ՝ հասցնելով լուռ թուլության, կա՛մ կմղի ձեզ դառնալ լավ օրինակ՝ դարձնելով ձեզ խիզախ ձեր առօրյա կյանքում (Ռասսել Մ. Նելսոն, «Ապագան դիմավորեք հավատքով», Ensign կամ Լիահոնա, մայիս 2011թ., 35–36):

• Նախագահ Նելսոնն այս խոսքերն ասել է 2011 թվականին: Ի՞նչ տարբերակներով եք արդեն զգացել կամ տեսել այն, ինչ նա նկարագրել է:

• Ինչո՞ւ կարող է ապագայում ավելի քիչ տարածված լինել Հիսուս Քրիստոսի վերականգնված ավետարանին հավատարիմ մնալը: Ըստ ձեզ՝ ինչո՞ւ այնուամենայնիվ արժե հավատարիմ մնալ:

• Ըստ ձեզ՝ Տերն ինչո՞ւ է այդ դժվարությունների մասին նախապես ասում մեզ:

Մի պահ մտածեք Հիսուս Քրիստոսի ավետարանի մասին ձեր վկայության հաստատունության մասին, և այն մասին, թե որքանով եք պատրաստ հավատարիմ մնալ Նրան սպասվող դժվար ժամանակներում: Երբ ուսումնասիրեք Հակոբ 7 գլուխը, փնտրեք, թե ինչպես էր Հակոբը պատրաստվել հավատարիմ մնալ, երբ Շերեմ անունով մի ամբարիշտ մարդ փորձել էր սասանել նրա հավատքը:

Շերեմը քարոզում է Քրիստոսի դեմ

Կարդացեք Հակոբ 7:1–7 հատվածը կամ դիտեք «Շերեմը մերժում է Քրիստոսին» տեսանյութի 0:33-2:21 հատվածը: Այս տեսանյութը հասանելի է այստեղ՝ ChurchofJesusChrist.org: Փնտրեք, թե Շերեմն ինչ էր ուսուցանում՝ փորձելով սասանել նեփիացիների հավատքը Քրիստոսի հանդեպ:

• Ի՞նչ էր ուսուցանում Շերեմը՝ փորձելով սասանել նեփիացիների հավատքը:

• Այսօր մարդիկ ի՞նչ ձևերով կարող են փորձության ենթարկել Քրիստոսի աշակերտների հավատքը:

Ուսանողներին առաջարկեք լուռ խորհել հետևյալի շուրջ.

Խորհեք, թե արդյոք ձեր շրջապատում տեսել եք մեկին, ով ուրիշների ազդեցությամբ սկսել է կասկածել Հիսուս Քրիստոսի և Նրա վերականգնված ավետարանի հանդեպ ունեցած իր հավատքին: Նկատե՞լ եք մեկին, ով փորձության է ենթարկում Նրա հանդեպ ձեր հավատքը:

Հակոբի հավատքը հնարավոր չէ սասանել

Կարող եք ուսանողներին առաջարկել փոքր խմբերով կարդալ հետևյալ հատվածները: Ապա յուրաքանչյուր խմբի ներկայացուցչին հրավիրեք գրատախտակին գրելու, թե ինչ են սովորել Հակոբի օրինակից: Ահա մի քանի ճշմարտություն, որ ուսանողները կարող են գտնել. Հոգին կարող է օգնել մեզ իմանալ ինչ անել և ասել, երբ մեր հավատքը փորձության է ենթարկվել և Քրիստոսի հանդեպ մեր հավատքն ամրապնդելու համար կարող ենք հիմնվել մարգարեների ուսմունքների վրա:

Երբ ուսանողները կիսվեն իրենց մտքերով, կարող եք հիշեցնել նրանց, որ վարդապետության սերտման հատվածները և հոգևոր գիտելիքներ ձեռք բերելու սկզբունքները կարող են պատրաստել նրանց դիմակայելու Հիսուս Քրիստոսի հանդեպ ունեցած իրենց հավատքի մարտահրավերներին:

Կարդացեք Հակոբ 7.5, 8–12 հատվածները և փնտրեք, թե ինչն օգնեց Հակոբին մերժել Շերեմի ուսմունքները:

Ճշմարտություններից մեկը, որ կարող ենք սովորել հատված 5-ից, հետևյալն է. մենք կարող ենք հաղթահարել Հիսուս Քրիստոսի հանդեպ ունեցած մեր հավատքի մարտահրավերները՝ հիշելով անցյալի հոգևոր փորձառությունները, որոնք ամրապնդել են մեր հավատքը:

• Դիմակայելու ընթացքում ի՞նչ հատուկ բաների մասին հիշեց Հակոբը, որոնք օգնեցին նրան:

• Մեր անցյալի հոգևոր փորձառությունները հիշելը ինչո՞ւ կարող է ամրապնդել մեզ, երբ բախվենք մեր հավատքի մարտահրավերներին:

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Երեց Նիլ Լ. Անդերսեն

Սուրբ Հոգու կողմից մեզ տրվող խաղաղ ուղղորդման հետ միասին ժամանակ առ ժամանակ Աստված զորությամբ և խիստ անհատապես հավաստիացնում է մեզնից յուրաքանչյուրին, որ Ինքը ճանաչում է մեզ, սիրում և օրհնում է մեզ առանձնահատուկ ձևով և անկեղծորեն: Ապա՝ դժվարության պահերին, Փրկիչը մեզ հիշեցնում է այդ փորձառությունները: …

Սիրով և հաճախ անդրադարձեք ձեր սրբազան հիշողություններին: Հավատացեք դրանց: Գրի առեք դրանք: … Ես խոստանում եմ, որ երբ դուք պատրաստակամ ընդունեք և զգուշորեն, գանձի պես պահպանեք ձեր կյանքի կարևոր հոգևոր իրադարձությունները, ավելի շատ կունենաք ձեր կյանքում: Երկնային Հայրը գիտի ձեզ և սիրում է ձեզ: (Նեյլ Լ. Անդերսեն, «Կարևոր հոգևոր հիշողություններ», Ensign կամ Լիահոնա, մայիս 2020թ., 19, 21–22)

Ստորև բերված գաղափարն օգտագործելու դեպքում ուսանողներին բավարար ժամանակ հատկացրեք, որպեսզի խորհեն, աղոթեն և գրի առնեն իրենց զգացողություններն ու փորձառությունները: Ապա ցանկացողներին առաջարկեք չկիսվել խիստ անձնական փորձառություններով: Կարող եք կիսվել անձնական օրինակով, որը այնքան էլ սուրբ կամ յուրահատուկ չէ, որպեսզի ուսանողները կարողանան առնչվել ձեր փորձառությանը:

Հիշեք այն զգացողությունները և փորձառությունները, որ Աստված տվել է ձեզ՝ հավաստիացնելով, որ Նա գիտի և սիրում է ձեզ: Դրանցից մի քանիսը գրի առեք ձեր օրագրում կամ ձեր սուրբ գրքերում: Եթե նման փորձառություններ հիշելու համար օգնության կարիք ունենաք, աղոթքում խնդրեք Երկնային Հորը, որ օգնի ձեզ ճանաչել կամ հիշել դրանք: Նա կանի դա Իր ժամանակին և եղանակով:

Կարող եք դիտել «Կարևոր հոգևոր հիշողություններ» տեսանյութի 13:40-14:46 հատվածը: Փնտրեք, թե երեց Անդերսենի լուսաբանումն ինչպես է ցույց տալիս, որ փորձության ժամանակներում մեր հոգևոր հիշողությունները կարող են լուսավորել թե՛ մեր, թե՛ ուրիշների ճանապարհը: Տեսանյութը հասանելի է այստեղ՝ ChurchofJesusChrist.org:

Կարող եք օգտագործել ստորև ներկայացվող առաջարկները և ուսանողներին մի քանի րոպե հատկացնել, որպեսզի սիրելի անձնավորությանը հաղորդագրություն կամ է-նամակ գրեն: Օգտակար կլինի նրանց հիշեցնել, որ որոշ նեղ անձական փորձառություններ պետք չէ բացահայտել:

Խորհեք, թե ում գիտեք, որ կարող է ամրապնդվել՝ լսելով ձեր փորձառություններից մեկի մասին: Մտածեք, թե ինչպես կարող եք կիսվել նրա հետ ձեր փորձառությամբ:

Նաև մտածեք այն սիրելի մարդկանց և Եկեղեցու ղեկավարների մասին, որոնց հավատքն ու փորձառությունները կարող են ամրապնդել ձերը: Կարող եք դիմել նրանց օգնության համար:

Նշան Աստծուց

Կարդացեք Հակոբ 7.13–23 հատվածները կամ դիտեք «Շերեմը մերժում է Քրիստոսին» տեսանյութի 2:22-7:16 հատվածը և իմացեք, թե ինչ պատահեց Շերեմին:

Կարող եք ցուցադրել հետևյալ հարցերը և ուսանողներին ժամանակ տալ խորհելու դրանց շուրջ: Ապա առաջարկեք կամավորներին կիսվել իրենց պատասխաններով:

• Ըստ ձեզ՝ Հակոբն ինչո՞ւ էր գրելու այս պատմությունը մեր օրերի մարդկանց համար:

• Ըստ ձեզ՝ Երկնային Հայրն ինչպե՞ս է պատվիրելու, որ այսօրվա ձեր սովորածը կիրառեք ձեզ հանդիպած որևէ իրավիճակում:

Բացատրական և պատմական տեղեկություններ

Ինչպե՞ս կարող եմ ավելի լավ ճանաչել և հիշել հոգևոր փորձառությունները:

Առաջին Նախագահությունից նախագահ Հենրի Բ. Այրինգը խոսել է այն ժամանակի մասին, երբ հուշում է ստացել գրի առնել իր օրագրում, թե ինչպես է տեսել Տիրոջ ձեռքը.

Նախագահ Հենրի Բ. Այրինգ

Տարիներ շարունակ ես ամեն օր մի քանի տող գրում էի: … Նախքան գրելը ես խորհում էի այս հարցի շուրջ. «Արդյո՞ք տեսել եմ Աստծո ձեռքը, որն օգնության է հասել մեզ, մեր երեխաներին կամ մեր ընտանիքին այսօր»։ Երբ սկսեցի դրա վրա կենտրոնանալ, սկսեց ինչ-որ բան կատարվել։ Երբ հետ էի նայում ամբողջ օրվան, տեսնում էի վկայություններ այն մասին, թե ինչ էր Աստված արել մեզանից որևէ մեկի համար, ինչը չէի նկատել օրվա զբաղված պահերին։ Երբ դա տեղի էր ունենում, իսկ դա հաճախ էր լինում, ես հասկացա, որ երբ փորձում էի հիշել, Աստված ցույց էր տալիս, թե Ինքն ինչ էր արել։ (Հենրի Բ. Այրինգ, «Օ՜, հիշիր, հիշիր», Ensign կամ Լիահոնա, նոյեմբեր 2007թ., 67):

Ինչպե՞ս կարող եմ ճանաչել նրանց ուսմունքները, ովքեր մեր օրերում ձգտում են ոչնչացնել Քրիստոսի հավատքը:

Տասներկու Առաքյալների Քվորումից երեց Դ. Թոդ Քրիստոֆերսոնն ասել է․

Երեց Դ. Թոդ Քրիստոֆերսոն

Աշխարհի ուղին, ինչպես գիտեք, հակաքրիստոսն է կամ «ամեն ինչ, բացի Քրիստոսից»։ Մեր օրերում, կարծես, կրկնվում են Մորմոնի Գրքի պատմությունները, երբ նշանավոր դեմքերը ձգտում են անիրավ իշխանություն գործադրել ուրիշների նկատմամբ, գովաբանում են սեռական ազատությունը և խրախուսում են հարստության կուտակումը` որպես մեր գոյության նպատակ։ Նրանց փիլիսոփայությունը «կարդարացնի մի փոքր մեղք գործելը» [2 Նեփի 28.8] կամ նույնիսկ շատ մեղքերը, սակայն ոչ ոք չի կարող փրկագնում առաջարկել: Այն գալիս է միայն Գառի արյան միջոցով։ Ամբոխը, որն ասում է՝ «ամեն ինչ, բացի Քրիստոսից» կամ «ամեն ինչ, բացի ապաշխարությունից», լավագույն դեպքում կարող է առաջարկել անհիմն պնդում, որ մեղք գոյություն չունի, իսկ եթե գոյություն ունի, ի վերջո, հետևանքներ չունի։ Ես չեմ կարծում, որ այդ տեսակետը հաջողություն կունենա Վերջին Դատաստանի ժամանակ (Դ. Թոդ Քրիստոֆերսոն, «Աստծո սերը», Լիահոնա, նոյեմբեր 2021թ., 17):

Կարող եք ուսումնասիրել «Ձեռք բերել հոգևոր գիտելիքներ» բաժնի պարբերություն 12-ը Վարդապետության սերտման հիմնարար փաստաթղթում (2022):

Իսկ եթե ես չգիտեմ ինչպե՞ս պատասխանել, երբ որևէ մեկը կասկածի տակ է առնում իմ հավատքը:

Յոթանասունից երեց Յորգ Քլեբինգաթն ասել է․

Երեց Յորգ Քլեբինգաթ

Հիշեք, որ նույնիսկ երեխան կարող է խաղահրապարակում Քրիստոսի պաշտպան լինել՝ ունենալով մի պարզ վկայություն, որ ճշմարտության վկա լինելու համար պարտադիր չէ ավետարանն ուսումնասիրող գիտնական լինել, որ պարտավոր չեք ունենալ բոլոր պատասխանները, որ չեք սխալվի, եթե երբեմն ասեք «Չգիտեմ» (Յորգ Քլեբինգաթ, «Պաշտպանել հավատքը», Ensign, սեպտեմբեր 2017թ., 53):

Օժանդակ ուսումնական վարժություններ

Տարաձայնության հարթումն առանց վեճի

Գուցե դժվար լինի սիրալիր լինել մարդկանց հետ, երբ կասկածի տակ են դնում և գրոհում են ձեզ վրա ձեր համոզմունքների համար: «Առօրյա օրինակ՝ երբ համոզմունքները կասկածի տակ են» տեսանյութի 3:13-ից մինչև 7:07 հատվածը կարող է օգնել ուսանողներին հասկանալ, թե ինչպես է հնարավոր ավելի լավ հարթել այդպիսի իրավիճակները: Տեսանյութը մի երիտասարդ աղջկա մասին է, որին դպրոցում դասընկերը գրոհի է ենթարկում նրա համոզմունքների համար: Նա խորհուրդ է հարցնում իր եպիսկոպոսից, թե ինչպես ավելի լավ հարթել այս իրավիճակը:

Կարող եք բերել իրավիճակների օրինակներ, երբ ուսանողների համոզմունքները կարող են առդեմ կամ առցանց կասկածի տակ դրվել: Այնուհետև հրավիրեք ուսանողներին կիսվել գաղափարներով, թե ինչպես ամուր մնալ իրենց հավատքում՝ չստեղծելով կամ չավելացնելով վիճելի զգացմունքներ ուրիշների հանդեպ:

Խորացնել հասկացողությունը խաչաձև հղումների միջոցով

Ուսանողներին առաջարկեք խաչաձև հղում կատարել կամ կապել Հակոբ 7.5 հատվածը Հելաման 5.12 և Ջոզեֆ Սմիթ—պատմություն 1.22–26 հատվածների հետ: Ապա առաջարկեք նրանց դասընկերոջ հետ ուսումնասիրել այս հղումները, որպեսզի հասկանան, թե ինչպես ավելի ամուր լինեն իրենց հավատքում:

Ուսումնասիրել սուրբ գրությունները կասկածի առաջ կանգնելու դեպքում

Կարող եք ցուցադրել «Հետևել վարդապետությանը և Քրիստոսի ավետարանին» տեսանյութի 7:34-9:41 հատվածը: Տեսանյութում Տասներկու Առաքյալների Քվորումից նախագահ Մ. Ռասսել Բալլարդը խոսում է այն մասին, թե ինչպես է սուրբ գրությունների ուսումնասիրությունը մի միսիոների օգնել հաղթահարել հարցերը և կասկածը: