« នីហ្វៃទី ២ ៥:១–៩ ៖ សេចក្តីព្រមានទាំងឡាយរបស់ព្រះ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ២ ៥:១–៩ ៖ សេចក្តីព្រមានទាំងឡាយរបស់ព្រះ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ២ ៥:១–៩
សេចក្តីព្រមានទាំងឡាយរបស់ព្រះ
នីហ្វៃច្បាស់ជាខូចចិត្តណាស់ ។ ដោយសារ លេមិន និង លេមយួល មានគម្រោងសម្លាប់លោក នោះនីហ្វៃត្រូវបានព្រមានឲ្យនាំ « ពួកដែលជឿនូវសេចក្ដីព្រមានទាំងឡាយ និងវិវរណៈទាំងឡាយរបស់ព្រះ » ( នីហ្វៃទី ២ ៥:៦ ) ហើយរត់គេចចូលទៅក្នុងទីរហោស្ថាន ។ ជួនកាល យើងក៏អាចត្រូវបានព្រះអម្ចាស់ព្រមានអំពីគ្រោះថ្នាក់ខាងរូបកាយ និងខាងវិញ្ញាណដែលនៅជុំវិញយើងដែរ ។ មេរៀននេះអាចជួយអ្នកឲ្យធ្វើតាមការព្រមានដែលព្រះអម្ចាស់ប្រទានឲ្យដោយក្ដីស្រឡាញ់ដើម្បីការពារអ្នក ។
ការជំរុញឲ្យមានបរិយាកាសនៃការទទួលយក និងការគោរព ។ សូមបណ្ដុះអារម្មណ៍នៃការមានចំណែកក្នុងសិស្សម្នាក់ៗ ដោយការទទួលស្គាល់យ៉ាងពិតប្រាកដថាសិស្សម្នាក់ៗមានគេត្រូវការ ការឲ្យតម្លៃអំពីប្រវត្តិ និងកាលៈទេសៈផ្សេងៗ ហើយផ្ដល់ឱកាសសម្រាប់សិស្សដើម្បីទទួលយកកម្លាំងពីគ្នាទៅវិញទៅមក និងពីព្រះអង្គសង្គ្រោះ ។ អ្នកក៏អាចជួយសិស្សឲ្យឃើញថា ពួកគេមានតួនាទីក្នុងកិច្ចការរបស់ព្រះផងដែរ ។
ការរៀបចំសិស្ស ៖ សូមពិចារណាអញ្ជើញសិស្សឲ្យមកថ្នាក់រៀន ដោយរៀបចំដើម្បីចែកចាយបទពិសោធន៍មួយ នៅពេលនរណាម្នាក់បានផ្ដល់ការព្រមានដល់ពួកគេ ដែលពួកគេមានអំណរគុណចំពោះរឿងនោះ ។
សកម្មភាពរៀនសូត្រដែលអាចមាន
ការព្រមានទាំងឡាយ
សូមពិចារណាបង្ហាញសញ្ញាព្រមានមួយចំនួន ហើយសួរសំណួរដូចខាងក្រោម ដើម្បីជួយសិស្សពិភាក្សាអំពីរបៀបដែលការព្រមានអាចជាពរជ័យ ។
អ្នកក៏អាចពិចារណាដាក់អ្វីដែលកខ្វក់ ឬស្អិតនៅលើកៅអីណាមួយ ហើយដាក់សញ្ញាព្រមានជុំវិញកៅអីនោះមុនពេលចូលរៀន ។
-
ហេតុអ្វីសញ្ញាព្រមានបែបនេះមានសារៈសំខាន់ ?
-
ហេតុអ្វីមនុស្សមួយចំនួនមើលសញ្ញាព្រមានដោយការដឹងគុណ ? ដោយក្តៅក្រហាយ ?
-
តើពេលណាដែលអ្នកមានអំណរគុណដែលអ្នកត្រូវបានព្រមាន ?
នៅពេលអ្នកសិក្សាថ្ងៃនេះ សូមគិតអំពីមូលហេតុដែលព្រះបញ្ជូនការព្រមានមកយើង ។ សូមព្យាយាមផងដែរដើម្បីចងចាំរបៀបផ្សេងៗដែលអ្នកប្រហែលជាមានប្រតិកម្មចំពោះការព្រមានដែលទ្រង់បានប្រទានមក ។
ការព្រមានទាំងឡាយរបស់ព្រះចំពោះនីហ្វៃ
សូមអាន នីហ្វៃទី ២ ៥:១–៩ ដោយរកមើលការព្រមានមួយដែលព្រះអម្ចាស់បានប្រទានដល់នីហ្វៃ បន្ទាប់ពីលោកបានក្លាយជាអ្នកដឹកនាំខាងវិញ្ញាណនៃគ្រួសារបន្ទាប់ពីការស្លាប់របស់លីហៃ ។ ឬអ្នកប្រហែលជាចង់មើលវីដេអូ « The Nephites Flee into the Wilderness » ចាប់ពីនាទីទី ០:០០ ដល់នាទីទី ៣:២១ ។
សូមព្យាយាមដាក់ខ្លួនអ្នកជំនួសក្មេងជំទង់សាសន៍នីហ្វៃម្នាក់ដែលគ្រួសារត្រូវបានអញ្ជើញឲ្យដើរតាមនីហ្វៃ ។
-
ហេតុអ្វីវាពិបាកក្នុងការចាកចេញ ?
-
តើវាត្រូវការអ្វីខ្លះសម្រាប់អ្នកក្នុងការសម្រេចចិត្តដើរតាមនីហ្វៃទៅក្នុងទីរហោស្ថាន ?
-
យោងតាម ខទី ៦ តើអ្នកដែលបានទៅជាមួយលោក ជាបុគ្គលដែលមានការតាំងចិត្តអ្វីខ្លះ ?
សេចក្តីពិតមួយដែលយើងអាចរៀនពីដំណើររឿងនេះគឺថា ព្រះអាចនាំយើងឲ្យចេញឆ្ងាយពីគ្រោះថ្នាក់ ប្រសិនបើយើងជ្រើសរើសជឿលើវិវរណៈរបស់ទ្រង់ ហើយស្តាប់តាមព្យាការីរបស់ទ្រង់ ។
ការពិភាក្សាក្នុងថ្នាក់អាចជួយសិស្សឲ្យមានអារម្មណ៍ដឹងគុណដែលព្រះស្រឡាញ់យើងគ្រប់គ្រាន់ដើម្បីព្រមានយើងពីគ្រោះថ្នាក់ ។
ដើម្បីជួយសម្រួលដល់ការពិភាក្សា អ្នកអាចលើកទឹកចិត្តសិស្សឲ្យព្យាយាមស្រមៃមើលថា តើពិភពលោកនេះ ( ឬជីវិតផ្ទាល់ខ្លួនរបស់ពួកគេ ) ខុសគ្នាយ៉ាងណា ប្រសិនបើព្រះមិនដែលព្រមានយើងអំពីអ្វីនោះ ។ សូមអញ្ជើញសិស្សឲ្យចែកចាយគំនិតរបស់ពួកគេជាមួយសិស្សនៅក្នុងថ្នាក់ ។ នៅពេលសិស្សពិភាក្សាអំពីគំនិតរបស់ពួកគេ សូមជួយពួកគេឃើញថា ការព្រមានរបស់ព្រះជាសញ្ញានៃសេចក្តីស្រឡាញ់ និងការយកព្រះទ័យទុកដាក់របស់ទ្រង់ចំពោះយើង ។ វីដេអូ និងសំណួរមួយចំនួនខាងក្រោមអាចប្រើដើម្បីបន្តការពិភាក្សាក្នុងថ្នាក់ ។
អ្នកប្រហែលជាចង់មើលវីដេអូ « Enemy Territory » ( ៣:៣៨ ) មាននៅគេហទំព័រ ChurchofJesusChrist.org ដោយរកមើលពីរបៀបដែលការព្រមានរបស់ព្រះអាចផ្តល់ពរដល់ជីវិតរបស់យើង ។
-
ហេតុអ្វីអ្នកគិតថាយើងត្រូវការការព្រមានរបស់ព្រះនៅជំនាន់របស់យើង ?
-
តើមានរបៀបខុសគ្នាអ្វីខ្លះដែលព្រះធ្វើឲ្យមនុស្សទូទៅ និងបុគ្គលម្នាក់ៗ ស្គាល់ការព្រមានរបស់ទ្រង់ អំពីកាលៈទេសៈជាក់លាក់របស់ពួកគេ ?
-
តើមានហេតុផលអ្វីខ្លះដែលមនុស្សម្នាក់អាចជ្រើសរើសមិនធ្វើតាមការព្រមានរបស់ព្រះ ហើយតើអ្នកអាចឆ្លើយតបយ៉ាងណាចំពោះនរណាម្នាក់ដែលផ្តល់ហេតុផលមួយក្នុងចំណោមហេតុផលទាំងនេះ ?
-
តើអ្នក ឬមនុស្សជាទីស្រឡាញ់របស់អ្នកត្រូវបានការពារតាមរយៈការធ្វើតាមការព្រមានពីព្រះយ៉ាងដូចម្ដេច ? សូមចែកចាយឧទាហរណ៍ជាក់លាក់មួយ ប្រសិនបើអ្នកអាចគិតឃើញពីឧទាហរណ៍នោះ ។
ព្រះព្រមានយើងតាមរយៈពួកព្យាការីរបស់ទ្រង់
របៀបមួយដែលព្រះព្រមានយើងដោយក្ដីស្រឡាញ់ពីគ្រោះថ្នាក់ គឺតាមរយៈព្យាការីដែលមានជីវិតរស់នៅរបស់ទ្រង់ ។ ឧទាហរណ៍ ៖ នៅក្នុង នីហ្វៃទី ២ ៥:៥–៦ គ្រួសារសាសន៍នីហ្វៃជាច្រើន បានស្តាប់តាមការព្រមានដែលព្រះអម្ចាស់បានប្រទានដល់លោកឲ្យចាកចេញទៅក្នុងទីរហោស្ថាន ។ ( សូមមើលផងដែរ អេម៉ុស ៣:៧ ) ។ យើងក៏រកឃើញការព្រមានជាច្រើនពីព្រះសម្រាប់យើងនៅក្នុងព្រះគម្ពីររបស់ទ្រង់ផងដែរ ។
សូមចំណាយពេលខ្លះដើម្បីស្វែងរកបទគម្ពីរអំពីការព្រមាន ដែលព្រះបានប្រទានដល់យើងតាមរយៈព្យាការីរបស់ទ្រង់កាលពីអតីតកាល ។ ( ឧទាហរណ៍មួយចំនួនរួមមាន អាលម៉ា ៤១:១០; មរ៉ូណៃ ១០:៣០, ៣២; គោលលទ្ធិ និង សេចក្តីសញ្ញា ៦៣:៥៧–៥៨; ៨៩:១–៤ ) ។
សូមពិចារណាឲ្យសិស្សស្វែងរកការព្រមានពីព្រះនៅក្នុងព្រះគម្ពីរដោយខ្លួនឯង ។ អ្នកអាចផ្តល់ឧទាហរណ៍ខាងលើ ឬឧទាហរណ៍ផ្សេងទៀត ប្រសិនបើពួកគេត្រូវការជំនួយ ។
សូមបង្ហាញសំណួរខាងក្រោមនៅពេលពួកគេសិក្សា ។ បន្ទាប់មក សូមអញ្ជើញពួកគេឲ្យចែកចាយចម្លើយរបស់ពួកគេជាក្រុមតូចៗ ។
-
តើការព្រមានអ្វីខ្លះដែលអ្នករកឃើញ ដែលអ្នកគិតថាពិភពលោកត្រូវការបំផុតនាពេលបច្ចុប្បន្ននេះ ?
-
តើអ្នកគិតថាមានផលវិបាកយ៉ាងណាចំពោះការគោរព ឬមិនគោរពការព្រមានទាំងនេះ ?
-
តើការព្រមានទាំងនេះជាសញ្ញានៃសេចក្តីស្រឡាញ់របស់ព្រះយ៉ាងដូចម្ដេច ?
-
តើការគោរពតាមការព្រមានដែលអ្នកបានរកឃើញនឹងជួយអ្នកឲ្យប្រែក្លាយកាន់តែដូចជាព្រះយេស៊ូវគ្រីស្ទយ៉ាងដូចម្ដេច ?
-
តើការមិនអើពើនឹងការព្រមានរបស់ទ្រង់អាចធ្វើឲ្យយើងឃ្លាតឆ្ងាយពីទ្រង់ដោយរបៀបណា ?
ការព្រមានទាំងឡាយរបស់ព្រះសម្រាប់អ្នក
សូមពិចារណាចែកចាយបទពិសោធន៍ផ្ទាល់ខ្លួនមួយ នៅពេលដែលអ្នកបានទទួលពរដោយធ្វើតាមការព្រមានមួយពីព្រះ ។
បន្ទាប់មក ផ្តល់ឲ្យសិស្សនូវពេលវេលាស្ងប់ស្ងាត់គ្រប់គ្រាន់ដើម្បីសញ្ជឹងគិត និងសរសេរគំនិត និងអារម្មណ៍របស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ដើម្បីបញ្ចប់មេរៀន ។ សេចក្តីថ្លែងការណ៍ និងការបំផុសគំនិតខាងក្រោមអាចមានប្រយោជន៍ក្នុងការរៀបចំសិស្សមុនពេលសរសេរ ។
ប្រធាន ប៊យដ៍ ខេ ផាកកឺ ( ឆ្នាំ ១៩២៤–២០១៥ ) ក្នុងកូរ៉ុមនៃពួកសាវកដប់ពីរនាក់បានពន្យល់ ៖
ជីវិតនេះមិនរំពឹងថា អ្នកមិនដែលធ្វើខុសនោះទេ ប៉ុន្តែអ្នកនឹងមិនធ្វើកំហុសធំៗដោយគ្មានការព្រមានប្រាប់ជាមុន តាមរយៈការបំផុសគំនិតនៃព្រះវិញ្ញាណនោះឡើយ ។ ការសន្យានេះអនុវត្តចំពោះសមាជិកសាសនាចក្រគ្រប់រូប ។ ( ប៊យដ៍ ខេ ផាកកឺ « Counsel to Youth » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ១៨ )
-
តើព្រះវរបិតាសួគ៌បានព្រមានខ្ញុំអំពីអ្វីមួយជាក់លាក់នៅក្នុងជីវិតរបស់ខ្ញុំតាមរយៈគំនិត ឬអារម្មណ៍មកពីព្រះវិញ្ញាណដែរឬទេ ?
-
តើមានការព្រមានជាក់លាក់ពីព្រះដែលខ្ញុំបានទទួលតាមរយៈថ្នាក់ដឹកនាំសាសនាចក្រ ឪពុកម្ដាយ ពរជ័យបព្វជិតភាព ឬមធ្យោបាយផ្សេងទៀតដែរឬទេ ? តើខ្ញុំធ្វើតាមពួកលោកដោយរបៀបណា ?
-
តើមានអ្វីមួយដែលខ្ញុំគិតថា ព្រះវរបិតាសួគ៌សព្វព្រះទ័យឲ្យខ្ញុំធ្វើជាមួយនឹងអ្វីដែលខ្ញុំបានរៀន ឬទទួលអារម្មណ៍នូវថ្ងៃនេះ ?