« នីហ្វៃទី ២ ៣ ៖ ‹ អ្នកមើលឆុតដ៏ជម្រើសម្នាក់ ដែលយើងនឹងបង្កើតឡើង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ២ ៣ ៖ ‹ អ្នកមើលឆុតដ៏ជម្រើសម្នាក់ ដែលយើងនឹងបង្កើតឡើង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ២ ៣
« អ្នកមើលឆុតដ៏ជម្រើសម្នាក់ ដែលយើងនឹងបង្កើតឡើង »
ជំពូកទី ៣ នៃ នីហ្វៃទី ២ កត់ត្រាពីពាក្យសម្តីហៀបនឹងស្លាប់របស់លីហៃទៅកាន់កូនប្រុសពៅរបស់លោកគឺយ៉ូសែប ។ លីហៃបានដកស្រង់ការព្យាករណ៍មួយដែលបានព្យាករដោយយ៉ូសែបនៅស្រុកអេស៊ីព្ទប្រហែលជា ១,៧០០ ឆ្នាំពីមុនការប្រសូតរបស់ព្រះគ្រីស្ទ ។ សូមស្រមៃអំពីការភ្ញាក់ផ្អើលរបស់ យ៉ូសែប ស្ម៊ីធ នៅពេលលោកបានរកឃើញថាលោកជាប្រធានបទនៃការព្យាករណ៍ជាច្រើនដែលបានព្យាករដោយយ៉ូសែប នៅស្រុកអេស៊ីព្ទ ។ គោលបំណងនៃមេរៀននេះគឺជួយអ្នកឲ្យមានទីបន្ទាល់កាន់តែខ្លាំងអំពីការហៅដ៏ទេវភាពរបស់ព្យាការី យ៉ូសែប ស្ម៊ីធ ។
ការបង្រៀនព្រះគម្ពីរ និងពាក្យនៃការព្យាករណ៍ប្រកបដោយការជឿជាក់ និងគោលបំណង ។ព្រះគម្ពីរ និងប្រសាសន៍របស់ពួកព្យាការី និងពួកសាវកថ្ងៃចុងក្រោយ គឺជាប្រភពនៃសេចក្តីពិត ។ សូមប្រាកដថា អ្វីគ្រប់យ៉ាងដែលអ្នកបង្រៀនស្របនឹងបទគម្ពីរ និងប្រសាសន៍របស់ពួកព្យាការី ។ ការបង្រៀនសេចក្តីពិតនឹងយាងអញ្ជើញព្រះវិញ្ញាណបរិសុទ្ធចូលទៅក្នុងថ្នាក់រៀន ។
ការរៀបចំសិស្ស ៖ សូមអញ្ជើញសិស្សឲ្យអាន ឬមើលសុន្ទរកថារបស់អែលឌើរ នែល អិល អាន់ឌើរសិន « Joseph Smith » ពីសន្និសីទទូទៅខែ តុលា ឆ្នាំ ២០១៤ ( សូមមើល Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៨–៣១ ) ហើយរកមើលមូលហេតុដែលវាសំខាន់ដើម្បីមានទីបន្ទាល់ផ្ទាល់ខ្លួនថា យ៉ូសែប ស្ម៊ីធ ត្រូវបានព្រះហៅ ។
សកម្មភាពរៀនសូត្រដែលអាចមាន
សូមកត់ចំណាំថា មេរៀននេះផ្តោតលើបេសកកម្មដ៏ទេវភាពរបស់ យ៉ូសែប ស្ម៊ីធ ។ មេរៀននេះនឹងពណ៌នាអំពីតួនាទីនៃបទគម្ពីរដូចបានរៀបរាប់នៅក្នុង នីហ្វៃទី ២ ៣:១២ ។
យ៉ូសែបបួននាក់
សូមពិចារណាពីលទ្ធភាពមួយក្នុងចំណោមលទ្ធភាពខាងក្រោម ៖ អ្នកអាចបង្ហាញរូបភាព និងសេចក្ដីយោងនៃបទគម្ពីរខាងក្រោមនេះច្របល់ចូលគ្នា ហើយអញ្ជើញសិស្សឲ្យផ្គូផ្គងខគម្ពីរជាមួយនឹងរូបភាពត្រឹមត្រូវ ។ ឬបង្ហាញសេចក្ដីយោងនៃបទគម្ពីរជាមួយនឹងខគម្ពីរដែលទាក់ទង ហើយអញ្ជើញសិស្សឲ្យរកមើលថាបុគ្គលនោះជានរណា ។ សូមលើកទឹកចិត្តសិស្សឲ្យកត់ត្រាឈ្មោះទាំងនេះនៅក្នុងព្រះគម្ពីរផ្ទាល់ខ្លួនរបស់ពួកគេ ។
បុគ្គលបួននាក់ដែលបានលើកឡើងនៅក្នុង នីហ្វៃទី ២ ៣ ទាំងអស់មានឈ្មោះដូចគ្នា ។ សូមអានខគម្ពីរសម្រាប់រូបភាពនីមួយៗ ហើយរកមើលថា តើរូបភាពទាំងបួននេះតំណាងឲ្យអ្នកណា ។
នីហ្វៃទី ២ ៣:៣; នីហ្វៃទី ២ ៣:៤; នីហ្វៃទី ២ ៣:១១; នីហ្វៃទី ២ ៣:១៥
សូមធានាឲ្យបានថា សិស្សយល់ថា តួអង្គទាំងនេះគឺតំណាងឲ្យ (១) យ៉ូសែប កូនប្រុសរបស់លីហៃ, (២) យ៉ូសែប នៅស្រុកអេស៊ីព្ទ, (៣) ព្យាការី យ៉ូសែប ស្ម៊ីធ និង (៤) ឪពុករបស់ព្យាការីគឺ យ៉ូសែប ស្មីធ ស៊ីញ័រ
ភាគច្រើននៃ នីហ្វៃទី ២ ៣ ផ្ដោតលើការព្យាករណ៍ដែលព្យាករដោយ យ៉ូសែបនៅស្រុកអេស៊ីព្ទអំពី « អ្នកមើលឆុត » និងព្យាការី យ៉ូសែប ស្ម៊ីធ និងបេសកកម្មរបស់លោកនៅថ្ងៃចុងក្រោយ ។
ប្រធាន ព្រិកហាំ យ៉ង់ ( ឆ្នាំ ១៨០១–១៨៧៧ ) បានថ្លែងសេចក្ដីថ្លែងការណ៍ដូចខាងក្រោមអំពីការរៀបចំរបស់ព្រះអម្ចាស់សម្រាប់បេសកកម្មរបស់យ៉ូសែប ស្ម៊ីធ ៖
វាត្រូវបានសម្រេចនៅក្នុងការប្រឹក្សានៃភាពអស់កល្បជានិច្ច ជាយូរមុនពេលគ្រឹះនៃផែនដីត្រូវបានបង្កើត លោកគឺ យ៉ូសែប ស្ម៊ីធ គួរតែជាបុរសនៅក្នុងគ្រាកាន់កាប់ត្រួតត្រាចុងក្រោយនៃពិភពលោកនេះ ដើម្បីនាំមកនូវព្រះបន្ទូលនៃព្រះដល់មនុស្ស ហើយទទួលបានភាពពេញលេញនៃកូនសោ និងអំណាចបព្វជិតភាពនៃព្រះរាជបុត្រានៃព្រះ ។ ព្រះអម្ចាស់បានទតមើលលោក និងឪពុករបស់លោក និងជីតារបស់លោក និងលើបុព្វបុរសរបស់ពួកលោក … រហូតដល់អ័ដាម ។ ទ្រង់បានឃ្លាំមើលគ្រួសារនោះ និងលោហិតនោះនៅពេលវាធ្វើដំណើរចេញពីប្រភពរបស់វាទៅកាន់កំណើតនៃបុរសនោះ ។ គាត់ត្រូវបានតែងតាំងជាមុនក្នុងភាពអស់កល្បជានិច្ច ដើម្បីធ្វើជាអធិបតីលើគ្រាកាន់កាប់ត្រួតត្រាចុងក្រោយនេះ ។ ( ការបង្រៀនរបស់ប្រធានសាសនាចក្រ ៖ ព្រិកហាំ យ៉ង់ [ ឆ្នាំ ១៩៩៧ ] ទំព័រ ៩៦, ទំព័រ ៣៤៣ )
-
តើពាក្យទាំងនេះអាចបង្រៀនយើងអ្វីខ្លះអំពីការហៅរបស់ យ៉ូសែប ស្ម៊ីធ ?
-
តើពាក្យទាំងនេះអាចបង្រៀនយើងអ្វីខ្លះអំពីព្រះអម្ចាស់ ?
ការព្យាករណ៍អំពី យ៉ូសែប ស្ម៊ីធ
សម្រាប់សកម្មភាពខាងក្រោម សូមពិចារណាបំបែកសិស្សជាគូៗ ហើយឲ្យសិស្សម្នាក់អាន នីហ្វៃទី ២ ៣:៦–១២ និងសិស្សផ្សេងទៀតអាន នីហ្វៃទី ២ ៣:១៣–១៥, ២៤ ។ បន្ទាប់មក សិស្សម្នាក់ៗអាចបង្រៀនអ្នកដទៃអំពីអ្វីដែលគាត់បានរកឃើញ ។ វាអាចមានប្រយោជន៍ក្នុងការដើរចុះឡើងក្នុងបន្ទប់ និងជួយសិស្សណាដែលអាចមានសំណួរអំពីខគម្ពីរទាំងនោះ ។
ពេលកំពុងនិយាយទៅកាន់យ៉ូសែប ជាកូនប្រុសរបស់លោក លីហៃបានដកស្រង់ផ្នែកមួយនៃការព្យាករណ៍ដោយយ៉ូសែបនៅស្រុកអេស៊ីព្ទ ពីផ្ទាំងលង្ហិន ( សូមមើលផងដែរ ការបកប្រែដោយយ៉ូសែប ស្ម៊ីធ លោកុប្បត្តិ ៥០:២៤–៣៨ [ នៅក្នុងឧបសម្ព័ន្ធព្រះគម្ពីរប៊ីប ] ) ។ ការព្យាករណ៍នេះគឺភាគច្រើនអំពីព្យាការី យ៉ូសែប ស្ម៊ីធ នៅថ្ងៃចុងក្រោយ ។ សូមអាន នីហ្វៃទី ២ ៣:៦–១៥, ២៤ ហើយគូសចំណាំពាក្យ ឬឃ្លាដែលបង្រៀនអ្នកអំពីយ៉ូសែប ស្ម៊ីធ ។ ( សូមកត់ចំណាំថាពាក្យ « ផលនៃពោះ » សំដៅទៅលើកូនចៅ ឬពូជពង្ស ) ។
-
តើអ្នកចាប់អារម្មណ៍អ្វីខ្លះអំពី យ៉ូសែប ស៊្មីធ ?
សូមពិចារណាអញ្ជើញសិស្សឲ្យសរសេរពាក្យ ឬឃ្លាដែលធ្វើឲ្យពួកគេចាប់អារម្មណ៍នៅលើក្ដារខៀន ។ អ្នកអាចចង្អុលទៅឃ្លានៅលើក្ដារខៀន ហើយសូមសិស្សឲ្យចែកចាយពីមូលហេតុដែលឃ្លាទាំងនេះមានអត្ថន័យចំពោះពួកគេ ។
-
តើអ្នកនឹងសង្ខេបការបង្រៀនអំពីព្យាការី យ៉ូសែប ស៊្មីធ មកពីអ្វីដែលអ្នកអាននៅក្នុង នីហ្វៃទី ២ ៣ ដោយរបៀបណា ?
សេចក្តីពិតមួយដែលយើងអាចរៀនបានគឺថា ព្រះអម្ចាស់បានលើកព្យាការី យ៉ូសែប ស៊្មីធ ឡើងដើម្បីជួយនាំមកនូវការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទ ។
-
ហេតុអ្វីអ្នកគិតថា វាសំខាន់ដើម្បីមានទីបន្ទាល់ផ្ទាល់ខ្លួនអំពីសេចក្ដីពិតនេះ ?
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
មតិអវិជ្ជមានអំពីព្យាការី យ៉ូសែប ស៊្មីធ នឹងកើនឡើង ពេលយើងដើរឆ្ពោះទៅរកការយាងមកជាលើកទីពីររបស់ព្រះអង្គសង្គ្រោះ ។ សេចក្ដីពិតពាក់កណ្ដាល និងការបោកបញ្ឆោតដ៏ប្រសប់នឹងមិនអន់ថយឡើយ ។ នឹងមានសមាជិកគ្រួសារ និងមិត្តភក្តិដែលនឹងត្រូវការជំនួយរបស់អ្នក ។ …
ចំពោះយុវជន … ខ្ញុំសូមផ្តល់ការអញ្ជើញជាក់លាក់មួយ ៖ ចូរទទួលបានទីបន្ទាល់ផ្ទាល់ខ្លួនអំពីព្យាការី យ៉ូសែប ស្ម៊ីធ ។ ( នែល អិល អាន់ឌើសិន « Joseph Smith » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៣០ )
វាអាចជាការល្អបំផុតក្នុងការឲ្យសិស្សសញ្ជឹងគិត ហើយពិចារណាលើចម្លើយរបស់ពួកគេចំពោះសំណួរបន្ទាប់ដោយស្ងៀមស្ងាត់ ។ អ្នកថែមទាំងអាចសូមឲ្យពួកគេកត់ត្រាការឆ្លើយតបរបស់ពួកគេនៅក្នុងសៀវភៅកំណត់ហេតុការសិក្សា ។
-
តើអ្នកមានទំនុកចិត្តយ៉ាងណាចំពោះការហៅដ៏ទេវភាពរបស់ព្យាការី យ៉ូសែប ស្ម៊ីធ ?
សិស្សអាចទទួលបានប្រយោជន៍ពីការសួរសំណួរអំពី យ៉ូសែប ស្ម៊ីធ ឬអំពីការទទួលបានទីបន្ទាល់នៃការហៅប្រកបដោយការព្យាការណ៍របស់លោក ។ សុន្ទរកថារបស់អែលឌើរ អាន់ឌើរសិន ដែលមាននៅក្នុងការរៀបចំសិស្សអាចជាធនធានដ៏មានប្រយោជន៍ដើម្បីឆ្លើយសំណួររបស់ពួកគេ ។ សិស្សដែលអានសុន្ទរកថាក្នុងការរៀបចំសម្រាប់មេរៀននេះ ប្រហែលជាអាចឆ្លើយសំណួរខ្លះៗរបស់មិត្តរួមថ្នាក់របស់ពួកគេ ។
ការទទួលបានទីបន្ទាល់អំពី យ៉ូសែប ស្ម៊ីធ
សូមស្រមៃពីស្ថានភាពខាងក្រោមនេះ ៖
នៅពេលមិត្តភក្តិរបស់អ្នក ម៉ាកូស បានដឹងថាអ្នកជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះគាត់បានចាប់ផ្តើមអានអំពី យ៉ូសែប ស្ម៊ីធ នៅលើគេហទំព័ររបស់សាសនាចក្រ ។ គាត់ចាប់អារម្មណ៍យ៉ាងខ្លាំងទៅនឹងការអញ្ជើញឲ្យរៀនដោយខ្លួនឯងថា យ៉ូសែប ស្ម៊ីធ គឺជាព្យាការីរបស់ព្រះ ។ នៅពេលគាត់បានចែកចាយជាមួយអ្នកនូវអ្វីដែលគាត់កំពុងរៀន គាត់បានសួរថា « តើយើងអាចរៀនដោយខ្លួនឯងដោយរបៀបណាថា យ៉ូសែប ស៊្មីធ គឺជាព្យាការី ?
-
តើអ្នកចង់និយាយអ្វីខ្លះទៅកាន់ម៉ាកូស ?
សម្រាប់គំនិតផ្សេងទៀតអំពីការទទួលបានទីបន្ទាល់ថា យ៉ូសែប ស៊្មីធ គឺជាព្យាការីរបស់ព្រះអម្ចាស់ សូមមើល ឬអានអ្វីដែលអែលឌើរ អាន់ឌើរសិន បានផ្ដល់យោបល់ ៖
ទីបន្ទាល់មួយអំពីព្យាការី យ៉ូសែប ស្ម៊ីធ អាចកើតឡើងចំពោះយើងម្នាក់ៗខុសៗគ្នា ។ វាអាចកើតឡើង ពេលអ្នកលុតជង្គង់ចុះអធិស្ឋានសូមព្រះឲ្យបញ្ជាក់ថា លោកគឺជាព្យាការីពិត ។ វាអាចកើតឡើង ពេលអ្នកអានដំណើររឿងរបស់ព្យាការីអំពីការនិមិត្តដំបូង ។ ទីបន្ទាល់អាចចាក់ដោតទៅក្នុងព្រលឹងរបស់អ្នក ពេលអ្នកអានព្រះគម្ពីរមរមនម្ដង ហើយម្ដងទៀត ។ វាអាចកើតឡើង ពេលអ្នកថ្លែងទីបន្ទាល់ផ្ទាល់ខ្លួនរបស់អ្នកអំពីព្យាការី ឬពេលអ្នកឈរក្នុងព្រះវិហារបរិសុទ្ធ ហើយដឹងថា តាមរយៈ យ៉ូសែប ស្ម៊ីធ អំណាចនៃការផ្សារភ្ជាប់ដ៏បរិសុទ្ធត្រូវបានស្ដារឡើងវិញលើផែនដី ។ ដោយមានសេចក្ដីជំនឿ និងចេតនាពិត នោះទីបន្ទាល់របស់អ្នកអំពីព្យាការី យ៉ូសែប ស្ម៊ីធ នឹងត្រូវបានពង្រឹងឡើង ។ ( នែល អិល អាន់ឌើសិន « Joseph Smith » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៣០ )
អ្នកប្រហែលជាចង់មើលវីដេអូ « A Choice Seer Will I Raise Up: Prophet of the Restoration » ( ៤:៤២ ) ដើម្បីស្ដាប់ទីបន្ទាល់អំពី យ៉ូសែប ស្ម៊ីធ ដែលបានចែកចាយដោយយុវជននៃសាសនាចក្រ ។
នេះអាចជាឱកាសដ៏ល្អមួយដើម្បីអញ្ជើញសិស្សឲ្យចែកចាយទីបន្ទាល់របស់ពួកគេអំពី យ៉ូសែប ស្ម៊ីធ ។ អ្នកអាចជួយរៀបចំសិស្សដោយអញ្ជើញពួកគេឲ្យសរសេរចម្លើយរបស់ពួកគេចំពោះសំណួរខាងក្រោមមួយចំនួននៅក្នុង សៀវភៅកំណត់ហេតុការសិក្សារបស់ពួកគេ ។ នៅពេលសិស្សសរសេរហើយ សូមអញ្ជើញសិស្សដែលស្ម័គ្រចិត្តឲ្យចែកចាយជាមួយសិស្សក្នុងថ្នាក់ ។ សូមពិចារណាចែកចាយទីបន្ទាល់ផ្ទាល់ខ្លួនរបស់អ្នកអំពី យ៉ូសែប ស្ម៊ីធ ។ វាក៏អាចជាការល្អផងដែរក្នុងការជួយសិស្សឲ្យទទួលស្គាល់ថា ជម្រើសដើម្បីជឿលើការហៅដ៏ទេវភាពរបស់ យ៉ូសែប ស្ម៊ីធ គឺគួរឲ្យសរសើរ ទោះបីជាមានភាពមិនប្រាកដប្រជាក៏ដោយ ។ ជំនឿរបស់ពួកគេអាចត្រូវបានពង្រឹងបន្តិចម្តងៗតាមរយៈបទពិសោធន៍ ។
-
តើអ្វីបានជួយអ្នកឲ្យជឿថា យ៉ូសែប ស្ម៊ីធ ជាព្យាការី ?
-
តើព្យាការី យ៉ូសែប ស៊្មីធ បានជួយអ្នកយល់ ឬទទួលអារម្មណ៍អ្វីខ្លះអំពីព្រះយេស៊ូវគ្រីស្ទ ?
-
តើអ្នកអាចធ្វើអ្វីខ្លះដើម្បីមានទីបន្ទាល់កាន់តែខ្លាំងអំពីព្យាការី យ៉ូសែប ស្ម៊ីធ ?
-
តើការមានទីបន្ទាល់អំពី យ៉ូសែប ស្ម៊ីធ នឹងជះឥទ្ធិពលដល់ជីវិតអ្នកយ៉ាងដូចម្ដេច ?