2 Nephi 1–2

Kinatibuk-ang Pagpasabot

Sa dihang hapit na mamatay si Lehi, namulong siya sa iyang mga anak sa pagdasig kanila sa pagsunod sa mga sugo sa Dios. Siya mitudlo nga ang kabubut-on, o ang kagawasan sa pagpili, mao ang usa sa pinakadakong gasa sa Dios ngari kanato. Siya mitudlo sa iyang mga anak mahitungod sa mga epekto sa Pagkapukan ni Adan ug Eva ug nga pinaagi sa Manluluwas atong mabuntog ang tanang mga hagit sa mortalidad. Mitudlo usab siya nga tungod ni Jesukristo, ang tanan “gawasnon sa pagpili sa kalingkawasan ug kinabuhing dayon” o “pagkabihag ug kamatayon” (2 Nephi 2:27).

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

2 Nephi 1

Katuyoan sa leksiyon: Kini nga leksiyon makatabang sa mga estudyante nga makat-on sa pag-ila sa mga baroganan nga, kon gamiton, makagiya kanila sa pagdawat sa tabang sa Dios sa ilang mga kinabuhi.

• Pagpangandam sa estudyante: Dasiga ang mga estudyante sa paghimo sa ilang inadlaw nga pagtuon sa kasulatan. Dapita sila sa pagpangita sa tinuod nga mga baroganan diha sa 2 Nephi 1 ug motambong nga andam sa pagpaambit og ehemplo.

• Hulagway: Ang hulagway nga adunay gitago nga mga butang

• Bidyo: “Gitudloan ni Lehi ang Iyang Pamilya” (3:47; tan-awa gikan sa time code 0:39 hangtod sa 3:35)

• Sugyot sa pagtudlo pinaagi sa videoconference: Human makaila ang mga estudyante og baroganan ug makompleto ang upat ka mga lakang sa kataposan sa leksiyon, ikonsiderar ang pagdapit kanila sa pagsulat diha sa chat sa baroganan nga ilang nailhan. Dayon dapita ang usa ka estudyante sa pagpili og baroganan nga gusto niyang makat-onan og dugang. Hangyoa ang estudyante nga miila niana nga baroganan sa pagpaambit giunsa niya pagkompleto ang upat ka mga lakang. Dayon dapita kana nga estudyante sa pagpili og laing baroganan. Hangyoa ang pipila ka mga estudyante sa pagpaambit.

2 Nephi 2:1–16

Katuyoan sa leksiyon: Kini nga leksiyon makatabang sa mga estudyante nga mas makasabot sa tahas sa kabubut-on diha sa plano sa Langitnong Amahan.

• Pagpangandam sa estudyante: Dapita ang mga estudyante sa pag-ila ug paghimo og lista sa importante nga mga pagpili nga ilang gihimo tali sa karon ug sa sunod nga leksiyon. Hangyoa sila sa pagtambong nga andam sa pagpaambit nganong ang pagpili importante sa atong mortal nga kinabuhi ug sa plano sa Langitnong Amahan sa kaluwasan.

• Handout: “Atong Gahom sa Pagpili”

• Sugyot sa pagtudlo pinaagi sa videoconference: Human makompleto sa mga estudyante ang ilang mga outline nga nagpasabot sa kabubut-on, ikonsiderar ang pagbahin sa mga estudyante ngadto sa mga breakout room ug i-drama-drama ang sitwasyon. Mahimong mapuslanon ang paghangyo sa usa ka estudyante sa matag grupo nga mahimong lider ug magdesisyon kon kinsa ang una nga mopasabot. O tingali epektibo ang pagdapit sa mga estudyante sa pagdiskobre kon si kinsa sa ilang grupo ang labing maguwang, labing taas, o labing sayo nga nakamata nianang buntaga ug paunaha pagpasabot kana nga tawo.

2 Nephi 2:17–26

Katuyoan sa leksiyon: Kini nga leksiyon makatabang sa mga estudyante nga mas magmapasalamaton sa Manluluwas ug sa Iyang Pag-ula samtang ilang masabtan ang Pagkapukan ni Adan ug Eva.

• Pagpangandam sa estudyante: Ikonsiderar ang pagdapit sa mga estudyante sa pagbasa sa ikaduhang artikulo sa hugot nga pagtuo ug paghunahuna kon unsaon nila kini pagpasabot ngadto sa laing tawo. Mahimo usab silang mohangyo og usa o duha ka mga tawo nga ilang gisaligan aron mopaambit kanila sa ilang panabot sa ikaduhang artikulo sa hugot nga pagtuo.

• Sugyot sa pagtudlo pinaagi sa videoconference: Sa dili pa ang klase, ikonsiderar ang pagpadala sa duha ka pamahayag ni Elder Jeffrey R. Holland ngadto sa duha ka estudyante. Dapita ang matag usa kanila sa pagbasa sa pamahayag nga ilang nadawat ug paghunahuna kon unsay kahulogan niini ngadto kanila. Sa tukma nga mga panahon atol sa leksiyon, hangyoa sila sa pagbasa sa ilang mga pamahayag ug sa pagpakigbahin sa ilang mga hunahuna.

Doktrinal nga Kahanas: 2 Nephi 2:25

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug mahinungdanon nga hugpong sa mga pulong sa kasulatan sa 2 Nephi 2:25, makapasabot sa doktrina, ug makabansay sa paggamit sa mga baroganan sa pag-angkon og espirituhanong kahibalo sa tinud-anay nga mga senaryo.

• Pagpangandam sa estudyante: Dapita ang mga estudyante nga motambong sa klase nga andam sa pag-recite sa 2 Nephi 2:25 gikan sa panumdoman ug andam nga mopaambit og usa ka paagi nga sila nakasinati og kalipay tungod sa Pagkapukan ni Adan ug Eva.

• Sugyot sa pagtudlo pinaagi sa videoconference: Human mabasa sa mga estudyante ang senaryo mahitungod ni Gideon, dapita sila sa pagpaambit kon unsay ilang mahimo aron makatabang. Kon ang mga estudyante miungot o kon kini makatabang sa panaghisgotan, ikonsiderar ang pagbahin sa mga parapo sa Mahinungdanon nga Dokumento sa Doktrinal nga Kahanas (2022) ngadto sa tulo ka grupo sa mga estudyante. Ibutang sila sa mga breakout room aron hisgotan ang mga parapo ug ang senaryo, ug dayon taposa ang mga breakout room aron ilang mapaambit ang ilang nakat-onan nga makatabang ni Gideon.

2 Nephi 2:26–30

Katuyoan sa leksiyon: Kini nga leksiyon makatabang sa mga estudyante sa paggamit sa ilang kabubut-on sa pagsunod ni Jesukristo.

• Pagpangandam sa estudyante: Dapita ang mga estudyante sa pagbasa sa 2 Nephi 2:27 ug sa mainampoong pagkonsiderar kon unsa nga mga pagpili sa ilang mga kinabuhi ang nagtabang kanila nga mas maduol sa Manluluwas ug makadawat sa mga panalangin nga Iyang gitanyag. Dapita usab sila sa pagkonsiderar sa bisan unsang mga pagpili nga gusto nilang usbon.

• Sugyot sa pagtudlo pinaagi sa videoconference: Dapita ang mga estudyante sa pagpaambit sa dayagram nga ilang gidrowing sa 2 Nephi 2:27 o ang mga pulong nga ilang gigamit sa pag-summarize niini. Kon midrowing sila og dayagram, hangyoa ang pipila kanila sa pagpaambit pinaagi sa pagpataas sa ilang dayagram ngadto sa ilang camera, ug tudloi ang klase sa pagpili sa speaker view aron makita kini og klaro. Pagkahuman, ikonsiderar ang pag-display sa diagram diha sa leksiyon ug gamita ang imong cursor o ang drawing feature aron i-highlight ang pipila ka bahin niini samtang nagpadayon ka sa leksiyon.