Sa tibuok nimong kinabuhi, mag-atubang ka og mga pagpili. Pipila sa mga pagpili nga imong himoon adunay malungtaron, usahay gani mahangturon, nga mga sangpotanan. Si Lehi mitudlo nga tungod ni Jesukristo, ang tanan “gawasnon sa pagpili sa kalingkawasan ug sa kinabuhi nga dayon,” o “sa pagkabihag ug sa kamatayon,” (2 Nephi 2:27). Kini nga leksiyon makatabang kanimo sa paggamit sa imong kabubut-on sa pagsunod ni Jesukristo.
Pag-ila sa mga kahimtang sa matag estudyante. Matag estudyante adunay lain-laing mga kasinatian ug mga relasyon nga makaimpluwensiya kon sa unsang paagi sila maghunahuna ug mobati mahitungod sa mga kamatuoran sa ebanghelyo. Paningkamot nga masabtan ang matag estudyante ug ang ilang background. Samtang nag-andam ka ug nagtudlo sa mga leksiyon, hunahunaa ang mga hinungdan nga mahimong makaapekto sa reaksiyon sa mga estudyante.
Pagpangandam sa estudyante: Dapita ang mga estudyante sa pagbasa sa 2 Nephi 2:27 ug sa mainampoong pagkonsiderar kon hain nga mga pagpili sa ilang mga kinabuhi ang nagtabang kanila nga mas maduol sa Manluluwas ug makadawat sa mga panalangin nga Iyang gitanyag. Dapita usab sila sa pagkonsiderar sa bisan unsang mga pagpili nga gusto nilang usbon.
Mga Posibleng Kalihokan sa Pagkat-on
Paghimo og mga pagpili
Isulat diha sa pisara ang mosunod nga mga lista. Dapita ang mga estudyante sa paghisgot nga managpares, diha sa ginagmay nga mga grupo, o isip usa ka klase.
Ikonsiderar ngano nga ang lainlaing mga tawo mahimong modesisyon nga mobuhat o dili mobuhat sa mosunod:
pag-ampo kanunay
pagsimba
paghinulsol
pagsunod sa Pulong sa Kaalam
pagpasaylo sa uban
Pamalandong sa imong kaugalingon nga mga rason sa pagpili sa pagbuhat o dili pagbuhat niini nga mga aksiyon. Ikonsiderar usab ang ubang mga sugo nga nalakip sa ebanghelyo ni Jesukristo. Samtang nagtuon ka niini nga leksiyon, pangayo og tabang gikan sa Espiritu Santo aron masabtan kon unsaon nimo paggamit ang imong kabubut-on sa mga paagi nga giuyonan sa Ginoo ug kon unsaon nimo sa pag-uswag.
Gawasnon sa pagpili
Sa padulong nga hinapos sa iyang kinabuhi, si propeta Lehi mitudlo sa iyang pamilya mahitungod sa mahinungdanong mga bahin sa plano sa kaluwasan sa Langitnong Amahan. Ang iyang mga pagtulun-an naglakip sa Pagkapukan, Pag-ula sa Manluluwas, ug kabubut-on.
Basaha ang 2 Nephi 2:26, nga mangita sa unsay gitudlo ni Lehi mahitungod niining tulo ka mga bahin.
Unsay imong nakat-onan?
Samtang mopaambit ang mga estudyante, mahimong mapuslanon ang paghisgot sa hugpong sa mga pulong nga “sila natubos gikan sa pagkapukan” ug pangutan-a kon unsay ilang nahinumduman mahitungod sa Pagkapukan.
Sa unsang paagi nga ang Pagkapukan ug ang Pag-ula sa Manluluwas naghimo nga posible alang kanato nga makabaton og kabubut-on?
Basaha ang 2 Nephi 2:27. Pagdrowing og yano nga diagram aron ipakita kon unsay gitudlo sa bersikulo, o i-summarize kini sa imong kaugalingong mga pulong.
Dapita ang mga estudyante sa pagpaambit kon unsay ilang nadrowing o giunsa nila pag-summarize ang bersikulo. Ang mga estudyante mahimong mopaambit nga magtinagurha, diha sa gagmay nga mga grupo, o isip usa ka klase.
Ang 2 Nephi 2:27 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Ikonsiderar ang pagdrowing og diagram diha sa pisara sama sa gihulagway sa ubos, o paggamit og bersiyon nga gihimo sa mga estudyante. Pag-refer sa diagram samtang tubagon sa mga estudyante ang mosunod nga mga pangutana. Mahimo nimong ipakita ang tibuok graphic sa makausa, o mahimo nimong ipakita una ang ibabaw nga katunga ug dayon idugang ang ubos nga katunga sa dihang maghisgot sa ikatulo ug ikaupat nga mga pangutana.
Ang mosunod maoy usa ka paagi sa pagrepresentar niini nga bersikulo:
Usa ka paagi nga mahimo nimong i-summarize ang pagtulon-an sa Manluluwas diha sa bersikulo 27 mao nga kita gawasnon sa pagpili sa kalingkawasan ug sa kinabuhi nga dayon pinaagi ni Jesukristo o sa pagpili sa pagkabihag ug sa kamatayon.
Matikdi nga sa ibabaw lang sa kahon nga giulohan og “Gawasnon sa Pagpili,” ang mga pana nagsugod nga duol sa usag usa. Ang ubang mga tawo tingali mobati nga ang paggamit sa atong kabubut-on sa pagsunod ni Jesukristo naglimitar sa atong mga pagpili ug sa tinuod mokuha sa atong kagawasan.
Ngano kaha nga gibati sa ubang mga tawo nga ang pagsunod kang Jesukristo nagpugong sa atong kagawasan?
Matikdi kon sa unsang paagi kini nga diagram nagpakita nga samtang kita nagsunod kang Jesukristo, ang mga pana moabli og mas halapad. Sa pagkatinuod, ang pagsunod kang Jesukristo naghatag kanato og dugang nga mga pagpili ug mas dakong kagawasan.
Sa unsang mga paagi nga ang pagsunod kang Jesukristo magdala ngadto sa kagawasan?
Matikdi nga sa pikas nga bahin sa diagram, ang mga pana nagsugod nga magkalayo ug dayon mas nagkaduol sa usag-usa.
Ngano kaha nga gibati sa ubang mga tawo nga ang pagsupak kang Jesukristo mosangpot sa kagawasan?
Sa unsang paagi nga ang pagpili sa pagsupak kang Jesukristo mosangpot ngadto sa pagkabihag?
Si Elder D. Todd Christofferson sa Korum sa Napulog Duha ka Apostoles mihulagway ngano nga ang pagsupak sa Ginoo mosangpot sa nagkakunhod nga kagawasan:
Imahe
Elder D. Todd Christofferson
Si Satanas … nagpasiugda sa pamatasan ug mga pagpili nga naglimitar sa atong kagawasan sa pagpili pinaagi sa pag-ilis sa impluwensiya sa Balaang Espiritu sa iyang kaugalingong pagmando (tan-awa sa D&C 29:40; 93:38–39). Ang pagnunot sa iyang mga tintasyon mosangpot ngadto sa nagkadiyutay nga nagkadiyutay nga kapilian hangtod nga wala nay mahabilin ug ngadto sa mga pagka-adik nga wala kitay gahom sa pagbuntog. (D. Todd Christofferson, “Moral Agency,” Ensign, Hunyo 2009, 49)
Basaha ang 2 Nephi 2:28–30, ug paggahin og pipila ka minuto sa pagpamalandong kon giunsa nimo pagpili sa paggamit sa imong kabubut-on.
Pamalandongi ang imong mga tubag sa mosunod nga mga pangutana:
Sa unsang paagi nga ang imong mga pagpili sa pagsunod ni Jesukristo nagtultol kanimo ngadto sa kalingkawasan ug sa kinabuhi nga dayon? Sa unsang paagi gipanalanginan ka sa Ginoo sa imong mga paningkamot?
Sa unsang paagi nga ang pipila sa imong mga pagpili magdala kanimo ngadto sa pagkabihag? Unsa ang imong mahimong unang lakang sa pagbag-o? Sa unsang paagi kaha ang Ginoo makatabang kanimo?
Pasaligi ang mga estudyante nga ang bisan unsa nga dili maayong mga pagpili nga ila nang nabuhat mahimong mabuntog pinaagi sa hugot nga pagtuo diha ni Jesukristo ug sa paghinulsol. Pagpamatuod kabahin sa Manluluwas, sa Iyang Pag-ula, ug sa Iyang abilidad sa paglig-on kanato sa paghimo og mga pagpili nga modala ngadto sa kalipay ug sa kinabuhi nga dayon. Kon aghaton, mahimong makatabang ang pagpahinumdom sa mga estudyante nga ang ilang bishop o presidente sa branch adunay mga yawe sa pagkapari aron sa pagtabang ni bisan kinsa nga mobalik ngadto sa dalan sa pakigsaad.
