« នីហ្វៃទី ១ ៨:១៩–៣៨ ៖ កាន់ខ្ជាប់នឹងព្រះបន្ទូលនៃព្រះ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ១ ៨:១៩–៣៨ ៖ កាន់ខ្ជាប់នឹងព្រះបន្ទូលនៃព្រះ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ១ ៨:១៩–៣៨
កាន់ខ្ជាប់នឹងព្រះបន្ទូលនៃព្រះ
មនុស្សជាច្រើនក្នុងពិភពលោកចង់ទទួលអារម្មណ៍នៃអំណរ និងសេចក្ដីស្រឡាញ់ ប៉ុន្តែមិនដឹងថាត្រូវទៅរកវានៅឯណាទេ ។ តាមរយៈការនិមិត្តរបស់លោកអំពីដើមជីវិត លីហៃបានរៀនអំពីផ្លូវដែលយើងត្រូវធ្វើដំណើរ និងរបៀបបន្តនៅលើផ្លូវនោះ ដើម្បីរីករាយនឹងពរជ័យនៃសេចក្តីស្រឡាញ់របស់ព្រះ ។ មេរៀននេះអាចជួយអ្នកធ្វើតាមព្រះបន្ទូលនៃព្រះ ដើម្បីដឹកនាំអ្នកទៅរកពរជ័យដ៏មហិមាបំផុតរបស់ទ្រង់ ។
ការអធិស្ឋានសម្រាប់សិស្សរបស់អ្នកជាទៀងទាត់ ។ព្រះវរបិតាសួគ៌ស្គាល់សិស្សម្នាក់ៗរបស់អ្នក ។ នៅពេលអ្នកអធិស្ឋានទៅកាន់ទ្រង់ ទ្រង់អាចជួយអ្នកញែកដឹងពីតម្រូវការរបស់សិស្សអ្នក និងបំផុសគំនិតអ្នកនូវវិធីនានាដើម្បីបំពេញតម្រូវការទាំងនោះ ។ សូមស្តាប់ការបំផុសគំនិត នៅពេលអ្នករៀបចំបង្រៀន និងអំឡុងពេលមេរៀន ។
ការរៀបចំសិស្ស ៖ អធិស្ឋានសម្រាប់សិស្សរបស់អ្នកជាទៀងទាត់ ។ ព្រះវរបិតាសួគ៌ស្គាល់សិស្សម្នាក់ៗរបស់អ្នក ។ នៅពេលអ្នកអធិស្ឋានទៅកាន់ទ្រង់ ទ្រង់អាចជួយអ្នកញែកដឹងពីតម្រូវការរបស់សិស្សអ្នក និងបំផុសគំនិតអ្នកនូវវិធីនានាដើម្បីបំពេញតម្រូវការទាំងនោះ ។ សូមស្តាប់ការបំផុសគំនិត នៅពេលអ្នករៀបចំបង្រៀន និងអំឡុងពេលមេរៀន ។
សកម្មភាពរៀនសូត្រដែលអាចមាន
ការនិមិត្តរបស់លីហៃ
សូមចំណាយពេលបន្តិចដើម្បីមើលគំនូរនេះអំពីការនិមិត្តរបស់លីហៃ ។ វារួមមានទាំងដើមឈើដែលតំណាងឲ្យសេចក្តីស្រឡាញ់នៃព្រះ និងផ្លែរបស់វា ដែលជានិមិត្តរូបនៃពរជ័យដែលបានប្រទានមកតាមរយៈដង្វាយធួននៃព្រះយេស៊ូវគ្រីស្ទ ( សូមមើល ដាវីដ អេ បែដណា « Lehi’s Dream: Holding Fast to the Rod » Ensign ខែ តុលា ឆ្នាំ ២០១១ ទំព័រ ៣២–៣៧ ) ។ វាក៏មានធាតុមួយចំនួនបន្ថែមទៀតផងដែរ ។
-
តើអ្នកចាប់អារម្មណ៍អ្វីខ្លះអំពីរូបគំនូរនេះ ?
-
តើអ្នកអាចរៀនអ្វីខ្លះពីអ្វីដែលអ្នកសង្កេតឃើញ ?
ប្រធាន ប៊យដ៍ ខេ ផាកកឺ ( ឆ្នាំ ១៩២៤–២០១៥ ) ក្នុងកូរ៉ុមនៃពួកសាវកដប់ពីរនាក់បានពន្យល់ថា ៖
អ្នកប្រហែលជាគិតថាសុបិន ឬការនិមិត្តរបស់លីហៃគ្មានអត្ថន័យពិសេសសម្រាប់អ្នកទេ ប៉ុន្តែវាពិតជាមាន ។ អ្នកស្ថិតនៅក្នុងសុបិន ឬការនិមិត្តនោះ យើងទាំងអស់គ្នាស្ថិតនៅក្នុងសុបិន ឬការនិមិត្តនោះផងដែរ ។ ( ប៊យដ៏ ខេ ផាកកឺ « Finding Ourselves in Lehi’s Dream » Ensign ឬ Liahona ខែ សីហា ២០១០ ទំព័រ ២២ )
នៅពេលអ្នកសិក្សាមេរៀននេះ សូមស្វែងរកការណែនាំពីព្រះវរបិតាសួគ៌ ដើម្បីយល់ពីរបៀបដែលការនិមិត្តរបស់លីហៃអាចទាក់ទងនឹងជីវិតរបស់អ្នក ។ សូមរកមើលសេចក្តីពិតដែលអាចជួយអ្នកឲ្យទទួលបានអំណរដែលបានសន្យាតាមរយៈព្រះអង្គសង្គ្រោះ ក៏ដូចជាឧបសគ្គអ្វីខ្លះដែលអ្នកប្រហែលជាត្រូវចៀសវាង ឬយកឈ្នះ ។
មនុស្សជាច្រើនកំពុងតែប្រជ្រៀតទៅមុខ
ក្នុងសុបិនរបស់លោក លីហៃបានឃើញ « ក្រុមមនុស្សជាច្រើនឥតគណនា » ( នីហ្វៃទី ១ ៨:២១ ) ព្យាយាមធ្វើដំណើរទៅកាន់ដើមជីវិត ។ ពួកគេបានជួបប្រទះធាតុសំខាន់ៗមួយចំនួនទៀតដែលជះឥទ្ធិពលដល់សមត្ថភាពរបស់ពួកគេក្នុងការមកកាន់ដើមឈើនោះ ៖ អ័ព្ទនៃសេចក្ដីងងឹត ដំបងដែក និងមនុស្សនៅក្នុងអគារដ៏ធំ និងទូលាយមួយ ។ អ្នកអាចឃើញធាតុសំខាន់ៗទាំងបីនេះនៅក្នុងគំនូរខាងលើ ។
អ្នកប្រហែលជាចង់អញ្ជើញសិស្សឲ្យគូររូបតំណាងផ្ទាល់ខ្លួននៃការនិមិត្តនេះនៅពេលពួកគេសិក្សា ។ សិស្សអាចបន្ថែមព័ត៌មានលម្អិតពេញទាំងមេរៀន ។
សកម្មភាពអានខាងក្រោមគឺវែង ។ សូមអញ្ជើញសិស្សដែលពិបាកអានដោយខ្លួនឯងឲ្យអានជាគូៗ ។ សូមលើកទឹកចិត្តសិស្សឲ្យចែកចាយអ្វីដែលពួកគេរកឃើញ និងចំណាប់អារម្មណ៍របស់ពួកគេជាមួយគ្នាទៅវិញទៅមក ។
នៅពេលអ្នកអាន នីហ្វៃទី ១ ៨:២២–៣៤ សូមរកមើលធាតុសំខាន់ៗទាំងនេះ និងអ្វីដែលអ្នកគិតអំពីនិមិត្តរូបនៃធាតុសំខាន់ៗទាំងនេះ ។ អ្នកក៏អាចចង់មើល « Lehi Sees an Iron Rod and Those Who Fall Away » ( ៣:៣០ ) ដែលមាននៅលើគេហទំព័រ ChurchofJesusChrist.org ។
-
តើអ្នកគិតថាធាតុសំខាន់ៗទាំងនេះពីការនិមិត្តរបស់លីហៃអាចតំណាងឲ្យអ្វី ?
ក្រោយមក នីហ្វៃបានឃើញក្នុងការនិមិត្តនូវអ្វីដែលឪពុករបស់លោកបានឃើញ ហើយបានពន្យល់អំពីនិមិត្តរូបទាំងនេះ ។ សូមអាន នីហ្វៃទី ១ ១២:១៧–១៨ ដើម្បីមើលអ្វីដែលនីហ្វៃបានបង្រៀន ។ សូមកត់ត្រាអ្វីដែលអ្នកបានរៀន ។
ប្រសិនបើសិស្សគូររូបតំណាងផ្ទាល់របស់ពួកគេអំពីការនិមិត្ត នោះពួកគេអាចដាក់ស្លាកឈ្មោះលើគំនូររបស់ពួកគេជាមួយអ្វីដែលពួកគេបានរៀនពីការពន្យល់របស់នីហ្វៃ ។
ដើម្បីជួយសិស្សពិភាក្សាអំពីអ្វីដែលពួកគេបានរៀន និងអនុវត្តវាទៅក្នុងជីវិតរបស់ពួកគេ សូមពិចារណាសួរសំណួរដូចតទៅនេះ ៖
-
តើអគារដ៏ធំ និងទូលាយ និងអ័ព្ទនៃសេចក្តីងងឹតមើលទៅមានលក្ខណៈដូចម្ដេចនៅសម័យយើងនេះ ?
-
តើឧបសគ្គទាំងនេះធ្វើឲ្យមនុស្សវង្វេងផ្លូវដោយរបៀបណានាពេលសព្វថ្ងៃនេះ ?
-
តើអ្នកបានរៀនអ្វីខ្លះដែលសំខាន់ដើម្បីយល់អំពីដំណើរជីវិតរបស់អ្នក ?
វាអាចមានប្រយោជន៍ដល់សិស្ស ដើម្បីពិភាក្សាបន្ថែមទៀតអំពីអ័ព្ទនៃសេចក្តីងងឹត និងអគារដ៏ធំ ហើយទូលាយ ដោយការចោទសួរសំណួរខាងក្រោមនេះ ៖
-
ហេតុអ្វីព្រះអម្ចាស់អាចបង្ហាញឲ្យឃើញឧបសគ្គទាំងនេះតាមវិធីនេះ ?
-
ហេតុអ្វីអ្នកគិតថាមនុស្សជាច្រើនបានស្វះស្វែងទៅនៅក្នុងអគារដ៏ធំ និងទូលាយនោះ ?
សូមគិតអំពីការល្បួងដែលអ្នកប្រឈមមុខ និងរបៀបដែលអំនួតអាចជះឥទ្ធិពលដល់អ្នក ។ សូមសញ្ជឹងគិតពីរបៀបដែលការណ៍ទាំងនេះអាចរំខានអ្នក ឬរារាំងសមត្ថភាពរបស់អ្នកក្នុងការមករកព្រះគ្រីស្ទ ហើយទទួលអារម្មណ៍នៃសេចក្តីស្រឡាញ់របស់ព្រះ ។
ជំនួយដែលព្រះប្រទានឲ្យយើង
នៅក្នុងការនិមិត្តរបស់លីហៃ ព្រះក៏បានរៀបចំវិធីដើម្បីជួយបុត្រាបុត្រីរបស់ទ្រង់ឲ្យមករកដើមឈើផងដែរ ។ មាន « ផ្លូវតូច ហើយចង្អៀត » ( នីហ្វៃទី ១ ៨:២០ ) ដែលនាំទៅដល់ដើមឈើនោះ ។ នៅតាមផ្លូវ ទ្រង់បានប្រទាន « ដំបងដែក » ដែលដឹកនាំមនុស្ស ( នីហ្វៃទី ១ ៨:១៩, ២៤, ៣០ ) ។
-
តើអ្នកគិតថាអ្វីអាចជារឿងសំខាន់អំពីដំបងដែលធ្វើពីដែកនោះ ?
សូមអាន នីហ្វៃទី ១ ១៥:២៣–២៥ ដើម្បីស្វែងយល់ពីអ្វីដែលនីហ្វៃបានបង្រៀនអំពីអត្ថន័យនៃដំបងនោះ និងការសន្យារបស់លោកអំពីវា ។
-
តើមានអ្វីខ្លះដែលអ្នកចាប់អារម្មណ៍នៅក្នុងខគម្ពីរទាំងនេះ ?
សិស្សដែលគូររូបអំពីការនិមិត្តនេះ អាចបន្ថែមផ្លូវ និងដំបងដែក និងអ្វីដែលវាតំណាងឲ្យ ។ សូមអញ្ជើញសិស្សឲ្យសង្ខេបអ្វីដែលពួកគេបានរៀនអំពីដំបងដែក និងរបៀបដែលវាអាចជួយពួកគេ ។ ខាងក្រោមនេះគឺជាសេចក្តីពិតមួយដែលអាចមានប្រយោជន៍ ។
សេចក្តីពិតមួយដែលយើងអាចរៀនគឺថា ប្រសិនបើយើងស្តាប់តាម ហើយកាន់ខ្ជាប់នឹងព្រះបន្ទូលរបស់ព្រះអម្ចាស់ នោះការល្បួងរបស់មារសត្រូវនឹងគ្មានឥទ្ធិពលលើយើងឡើយ ។
-
តើព្រះបន្ទូលរបស់ព្រះអម្ចាស់នៅក្នុងព្រះគម្ពីរ និងពាក្យដែលព្យាការីទ្រង់បានថ្លែងអាចផ្តល់សុវត្ថិភាព និងកម្លាំងក្នុងអំឡុងគ្រានៃការល្បួងដោយរបៀបណា ?
-
តើមានគំរូអ្វីខ្លះអំពីរបៀបដែលព្រះបន្ទូលរបស់ព្រះអាចដឹកនាំយើងឲ្យទទួលបានពរជ័យ និងអំណរដែលព្រះអង្គសង្គ្រោះប្រទានឲ្យតាមរយៈដង្វាយធួនរបស់ទ្រង់ ?
-
តើសេចក្ដីពិតនេះបង្រៀនអ្នកអ្វីខ្លះអំពីព្រះអម្ចាស់ ?
ប្រសិនបើវាមានប្រយោជន៍ដល់សិស្សក្នុងការពិភាក្សាបន្ថែមទៀតអំពីដំបងដែក នោះសំណួរមួយ ឬសំណួរជាច្រើនខាងក្រោមអាចមានប្រយោជន៍ ៖
-
ហេតុអ្វីព្រះអម្ចាស់បានតំណាងព្រះបន្ទូលរបស់ទ្រង់ទៅជាដំបងដែក ?
-
តើ « ប្រុងស្ដាប់តាមព្រះបន្ទូលនៃព្រះ ហើយ … តោងជាប់តាមព្រះបន្ទូលនៃព្រះ » អាចមានន័យយ៉ាងណា ? ( នីហ្វៃទី ១ ១៥:២៤ ) ។
-
តើមានវិធីខុសគ្នាណាខ្លះដែលយើងអាចអាន ស្តាប់ឮ ឬទទួលព្រះបន្ទូលរបស់ព្រះ ?
សិស្សដែលកំពុងគូររូបអំពីការនិមិត្ត អាចបន្ថែមសេចក្តីយោងខគម្ពីរមួយចំនួននៅតាមដំបងដែក ដែលជួយពួកគេផ្ទាល់ឲ្យបន្តនៅលើផ្លូវ យកឈ្នះលើការល្បួង ឬទទួលបានពរជ័យនៃដង្វាយធួនរបស់ព្រះអង្គសង្គ្រោះ ។ ប្រសិនបើពួកគេត្រូវការជំនួយក្នុងការស្វែងរកបទគម្ពីរ នោះពួកគេអាចស្វែងរកសេចក្តីយោងដែលប្រើពាក្យ « ព្រះបន្ទូលនៃព្រះ » ( សេចក្ដីណែនាំដល់បទគម្ពីរទាំងឡាយ scriptures.ChurchofJesusChrist.org ) ។ សូមពិចារណាចែកចាយឧទាហរណ៍ផ្ទាល់ខ្លួនជាមួយសិស្សក្នុងថ្នាក់រៀន ឬសូមឲ្យសិស្សស្ម័គ្រចិត្ត ។
ដើម្បីបញ្ចប់មេរៀននេះ សូមសញ្ជឹងគិតពីកន្លែងដែលអ្នកកំពុងនៅក្នុងការនិមិត្តនោះ ។ តើអ្នកបានមករកព្រះអង្គសង្គ្រោះដោយរបៀបណា ហើយតើអ្នកកំពុងបន្តព្យាយាមដើម្បីមករកទ្រង់ដោយរបៀបណា ? តើអ្នកប្រឈមមុខនឹងការរំខាន និងការល្បួងអ្វីខ្លះ ? តើព្រះអម្ចាស់ជួយអ្នកតាមរយៈព្រះបន្ទូលរបស់ទ្រង់យ៉ាងដូចម្តេច ?
សូមពិចារណាវាយតម្លៃគោលដៅសិក្សាព្រះគម្ពីររបស់អ្នក និងរបៀបដែលវាកំពុងជួយអ្នក ព្រមទាំងការកែលម្អ ឬការផ្លាស់ប្តូរណាមួយដែលអ្នកចង់ធ្វើ ។ ប្រសិនបើអ្នកគ្មានគោលដៅសិក្សាទេ សូមពិចារណាចំណាយពេលពីរបីនាទីដើម្បីដាក់គោលដៅនោះ ។