« នីហ្វៃទី ១ ៨:១–១៨ ៖ សេចក្តីស្រឡាញ់នៃព្រះគឺជាសេចក្ដីស្រឡាញ់ដែលគួរឲ្យប្រាថ្នាដ៏លើសលប់ជាងអ្វីៗទាំងអស់ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ១ ៨:១–១៨ ៖ សេចក្តីស្រឡាញ់នៃព្រះគឺជាសេចក្ដីស្រឡាញ់ដែលគួរឲ្យប្រាថ្នាដ៏លើសលប់ជាងអ្វីៗទាំងអស់ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ១ ៨:១–១៨
សេចក្តីស្រឡាញ់នៃព្រះគឺជាសេចក្ដីស្រឡាញ់ដែលគួរឲ្យប្រាថ្នាដ៏លើសលប់ជាងអ្វីៗទាំងអស់
តើអ្នកនឹងពណ៌នាអំពីសេចក្ដីស្រឡាញ់របស់ព្រះយ៉ាងដូចម្ដេច ? លីហៃបានមានការនិមិត្តមួយដែលលោកបានឃើញដើមឈើដ៏ស្រស់ស្អាតមួយ ។ លោកបានបរិភោគផ្លែឈើនៃដើមនោះ ហើយវា « មានរសជាតិផ្អែមបំផុត គឺផ្អែមជាងអ្វីៗទាំងអស់ » ដែលលោកធ្លាប់បានភ្លក់ពីមុនមក ( នីហ្វៃទី ១ ៨:១១ ) ។ ដើមឈើនេះ និងផ្លែរបស់វាតំណាងឲ្យសេចក្តីស្រឡាញ់នៃព្រះ ដែលបានបង្ហាញនៅក្នុងការប្រសូត ព្រះជន្ម ការងារបម្រើ និងពលិកម្មដ៏ធួនរបស់ព្រះយេស៊ូវគ្រីស្ទ ។ សេចក្ដីស្រឡាញ់នេះធ្វើឲ្យ « ព្រលឹងវិញ្ញាណ [ របស់លីហៃ ] ពោរពេញទៅដោយសេចក្ដីអំណរជាអតិបរមា » ( នីហ្វៃទី ១ ៨:១២ ) ។ គោលបំណងនៃមេរៀននេះគឺជួយអ្នកបង្កើនបំណងប្រាថ្នារបស់អ្នក ដើម្បីទទួលបទពិសោធន៍នៃសេចក្តីស្រឡាញ់របស់ព្រះ និងដង្វាយធួនរបស់ព្រះយេស៊ូវគ្រីស្ទ ។
សូមលើកទឹកចិត្តសិស្សឲ្យចែកចាយបទពិសោធន៍នានា ។បុគ្គលម្នាក់ៗនៅក្នុងថ្នាក់មានធនធានដ៏បរិបូរមួយនៃទីបន្ទាល់ ការយល់ដឹង និងបទពិសោធន៍នានានៅក្នុងការរស់នៅតាមដំណឹងល្អ ។ សូមផ្តល់ឱកាសឲ្យសិស្សចែកចាយបទពិសោធន៍ផ្ទាល់ខ្លួនដែលសមរម្យ ។ សូមបង្ហាញការដឹងគុណដល់សិស្ស នៅពេលពួកគេមានបំណងចែកចាយបទពិសោធន៍បែបនេះ ។
ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិតសំណួរខាងក្រោមនេះ ៖ តើមនុស្សម្នាក់អាចមានបទពិសោធន៍អំពីសេចក្ដីស្រឡាញ់របស់ព្រះតាមរបៀបណា ? តើនៅពេលណាដែលអ្នកទទួលអារម្មណ៍ពីសេចក្ដីស្រឡាញ់របស់ទ្រង់សម្រាប់អ្នក ? សិស្សក៏អាចនិយាយជាមួយសមាជិកគ្រួសារ ឬអ្នកដឹកនាំសាសនាចក្រអំពីរបៀបដែលពួកគេដកពិសោធសេចក្តីស្រឡាញ់របស់ព្រះចំពោះពួកគេផងដែរ ។
សកម្មភាពរៀនសូត្រដែលអាចមាន
ភាពងងឹត និងពន្លឺ
សូមពិចារណាពីការបង្ហាញវីដេអូនៃរឿងមួយក្នុងចំណោមរឿងទាំងនេះដែលបានចែកចាយក្នុងសន្និសីទទូទៅ ។ អ្នកក៏អាចចែកចាយបទពិសោធន៍ផ្ទាល់ខ្លួនផងដែរ ដើម្បីជួយសិស្សចាប់ផ្តើមទទួលអារម្មណ៍ថា តើវាមានសភាពបែបណាដែលនៅក្នុងភាពងងឹត ហើយចង់បានពន្លឺ ។ ការណ៍នេះអាចជួយសិស្សរៀបចំដើម្បីរៀនអំពីតម្រូវការរបស់ពួកគេសម្រាប់ព្រះយេស៊ូវគ្រីស្ទ ដើម្បីយកឈ្នះលើភាពងងឹតនៅក្នុងជីវិតរបស់ពួកគេ ។
ការជិះកង់ឆ្លងកាត់ផ្លូវរូងក្រោមដីប្រវែង ២៤ គីឡូម៉ែត្រ ( សូមមើល វើន ភី ស្តែនហ្វីល « Choose the Light » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៥៥–៥៧ ) ។
ពន្លឺភ្លើងអំពូលនៃព្រះវិហារបរិសុទ្ធសលត៍ លេក មិនត្រូវបានបើកនៅពេលយប់ទេ ( សូមមើល សារ៉ុន អូប៊ែង « Christ: The Light That Shines in Darkness » Ensign ឬ Liahona ខែ ឧសភា ឆ្នាំ ២០១៩ ទំព័រ ៧៣–៧៦ ) ។
ការលោតចូលទៅក្នុងរូងភ្នំដ៏ជ្រៅមួយ ( សូមមើល ធីម៉ូស៊ី ជេ ឌីឆេស « Light Cleaveth unto Light » Liahona ខែ ឧសភា ឆ្នាំ ២០២១ ទំព័រ ១១២–១១៥ ) ។
លីហៃអធិស្ឋានទូលសុំសេចក្ដីមេត្តាករុណារបស់ព្រះអម្ចាស់
អំឡុងពេលរស់នៅក្នុងទីរហោស្ថាន លីហៃបានចែកចាយព័ត៌មានលម្អិតនៃការនិមិត្តមួយដែលលោកបានមានជាមួយនឹងគ្រួសាររបស់លោក ។ នៅក្នុងការនិមិត្តនេះ លោកបាននៅក្នុង « ទីរហោស្ថានដ៏ងងឹត និងអាប់អួរមួយ » ( នីហ្វៃទី ១ ៨:៤ ) ។
ដើម្បីជួយសិស្សឲ្យស្រមៃមើលខគម្ពីរខាងក្រោម វាអាចមានប្រយោជន៍ក្នុងការសូមឲ្យពួកគេអានយឺតៗ ឬទុកឲ្យអ្នកអានខគម្ពីរទាំងនោះ ហើយអញ្ជើញសិស្សឲ្យបិទភ្នែករបស់ពួកគេ ហើយស្រមៃមើលពីអ្វីដែលខគម្ពីរទាំងនោះពិពណ៌នា ។
សូមអាន នីហ្វៃទី ១ ៨:៥–៨ ដោយរកមើលអ្វីដែលបានកើតឡើងចំពោះលីហៃ និងអារម្មណ៍ដែលលោកបានមាន ។ វាអាចមានប្រយោជន៍ក្នុងការស្រមៃមើលអ្វីដែលអ្នកបានអាន ។ សូមរកមើលព័ត៌មានលម្អិតដែលបានពិពណ៌នា ដែលអាចជួយអ្នកបង្កើតរូបភាពផ្លូវចិត្ត ឬស្រមៃមើលព្រឹត្តិការណ៍ដូចជាភាពយន្តមួយ ។
-
តើគំនិត ឬអារម្មណ៍បែបណាដែលអ្នកគិតថា បានធ្វើឲ្យលីហៃអធិស្ឋានទូលសូមសេចក្ដីមេត្តាករុណា ?
សូមចំណាយពេលបន្តិច ដើម្បីពិចារណាពីវិធីផ្សេងៗ ដែលយើងអាចមានអារម្មណ៍ដឹងពីភាពងងឹតនៅក្នុងជីវិតរបស់យើង និងមូលហេតុដែលយើងអាចអំពាវនាវរកព្រះអម្ចាស់ទូលសូមសេចក្តីមេត្តាករុណា ។
សូមអាន នីហ្វៃទី ១ ៨:៩–១២ ដោយរកមើលរបៀបដែលព្រះអម្ចាស់បានជួយលីហៃ ។
ដើម្បីជួយសិស្សបន្តស្រមៃមើលអំពីបទគម្ពីរ សូមពិចារណាបង្ហាញវីដេអូ « Lehi Discovers the Tree of Life » ( ៤:៣២ ) ចាប់ពីនាទី ១:៥២ ដល់នាទីទី ៤:៣២ ។
នៅក្នុងសៀវភៅកំណត់ហេតុការសិក្សារបស់អ្នក សូមគូរគំនូរសាមញ្ញមួយតំណាងឲ្យដើមឈើដែលលីហៃបានឃើញ ។ សូមគូរផ្លែឈើនៅលើដើមឈើនោះ ហើយដាក់ស្លាកឈ្មោះផ្លែឈើដោយផ្អែកលើការពន្យល់របស់លីហៃនៅក្នុង នីហ្វៃទី ១ ៨:១០–១២ ។ ( សម្រាប់ការពិពណ៌នាបន្ថែមដើម្បីដាក់ស្លាកឈ្មោះលើផ្លែឈើរបស់ដើមឈើនោះ សូមអាន នីហ្វៃទី ១ ១៥:៣៦ និង អាលម៉ា ៣២:៤២ ) ។ នៅពេលអ្នកគូរ សូមគិតអំពីអ្វីដែលដើមឈើនេះ និងផ្លែរបស់វាតំណាងឲ្យ ។
ក្រោយមក នីហ្វៃចង់ដឹង និងយល់ដោយផ្ទាល់នូវការនិមិត្តនេះ រួមទាំងអត្ថន័យនៃដើមឈើដែលលីហៃបានឃើញ ។ ពេលកំពុងសញ្ជឹងគិតពីអ្វីដែលលោកត្រូវបានបង្រៀន នោះព្រះវិញ្ញាណបានបង្ហាញដល់នីហ្វៃនូវការនិមិត្តអំពីស្ត្រីព្រហ្មចារីយម៉ារា បីព្រះឱរសព្រះយេស៊ូវនៅក្នុងដៃរបស់នាង ( សូមមើល នីហ្វៃទី ១ ១១:១៣, ២០ ) ។
សូមមើលរូបភាពខាងក្រោម ហើយគិតអំពីមូលហេតុដែលនីហ្វៃអាចត្រូវបានបង្ហាញរូបនេះ នៅពេលលោកចង់ដឹងពីអត្ថន័យនៃដើមឈើនេះ ។
សូមអាន នីហ្វៃទី ១ ១១:២១–២៣ ដោយរកមើលអ្វីផ្សេងទៀតដែលនីហ្វៃត្រូវបានបង្ហាញ និងរបៀបដែលវាបានជួយលោកឲ្យរៀនពីអត្ថន័យនៃដើមឈើនោះ ។ អ្នកអាចដាក់ស្លាកឈ្មោះដើមឈើនោះដោយផ្អែកលើអ្វីដែលអ្នករៀន ។
-
តើអ្នកគិតថាព្រះអង្គសង្គ្រោះជួយយើងឲ្យទទួលអារម្មណ៍នៃសេចក្តីស្រឡាញ់របស់ព្រះយ៉ាងដូចម្ដេច ?
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀនថា ៖
ការបង្ហាញដ៏អស្ចារ្យបំផុតនៃសេចក្តីស្រឡាញ់របស់ព្រះចំពោះកូនចៅរបស់ទ្រង់ គឺការងារបម្រើក្នុងព្រះជន្មរមែងស្លាប់ ការពលិកម្មដ៏ធួន និងការមានព្រះជន្មរស់ឡើងវិញរបស់ព្រះអម្ចាស់យេស៊ូវគ្រីស្ទ ។ ផ្លែឈើនៅលើដើមឈើអាចចាត់ទុកថាជានិមិត្តរូបមួយសម្រាប់ពរជ័យនៃដង្វាយធួនរបស់ព្រះអង្គសង្គ្រោះ ។ ( ដាវីឌ អេ បែដណា « Come and See » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ១០៩ )
-
ចេញពីការនិមិត្តរបស់លីហៃ និងសេចក្តីថ្លែងការណ៍របស់អែលឌើរ បែដណា តើសេចក្ដីពិតអ្វីខ្លះដែលអ្នកអាចរកឃើញអំពីសេចក្ដីស្រឡាញ់របស់ព្រះ ?
សិស្សអាចរកឃើញសេចក្តីពិតផ្សេងៗជាច្រើន ។ សូមលើកទឹកចិត្តសិស្សឲ្យបង្ហាញពីមូលហេតុនៃសេចក្តីពិតដែលពួកគេបានរកឃើញមានសារៈសំខាន់សម្រាប់ពួកគេ ។
ការទទួលអារម្មណ៍អំពីសេចក្តីស្រឡាញ់របស់ព្រះ និងសេចក្តីអំណរដ៏អស្ចារ្យតាមរយៈព្រះយេស៊ូវគ្រីស្ទ
សេចក្តីពិតមួយដែលយើងអាចរៀនបានគឺថា សេចក្តីស្រឡាញ់របស់ព្រះដែលបង្ហាញតាមរយៈព្រះយេស៊ូវគ្រីស្ទ គឺគួរឲ្យប្រាថ្នាជាងអ្វីផ្សេងទៀត ហើយនាំមកនូវសេចក្តីអំណរបំផុត ។
សកម្មភាពខាងក្រោមអាចជួយអ្នកឲ្យស្គាល់ពីរបៀបដែលអ្នកអាចទទួលអារម្មណ៍នៃសេចក្តីស្រឡាញ់របស់ព្រះចំពោះអ្នក ដោយសារព្រះយេស៊ូវគ្រីស្ទ ។ នៅពេលអ្នកធ្វើសកម្មភាពទាំងនេះ សូមព្យាយាមរកមើលពរជ័យជាច្រើនដែលកើតមានតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ ហើយសរសេរវានៅលើ ឬជុំវិញផ្លែឈើដែលអ្នកបានគូរនោះ ។
វាអាចមានប្រសិទ្ធភាពក្នុងការធ្វើសកម្មភាពនីមួយៗខាងក្រោមខុសៗគ្នា ។ សិស្សអាចធ្វើការជាគូ ឬជាក្រុមតូចៗសម្រាប់សកម្មភាពទី ១ ។ សកម្មភាពទី ២ អាចធ្វើបានល្អបំផុតដោយជ្រើសរើសវីដេអូមួយ ហើយមើលវាក្នុងថ្នាក់ទាំងមូល ។ សកម្មភាពទី ៣ សិស្សអាចធ្វើបានរៀងៗខ្លួន ។
សកម្មភាពទី ១
សូមអានអ្វីដែលលីហៃបានថ្លែងទីបន្ទាល់ពីការឃើញការនិមិត្តនេះនៅក្នុង នីហ្វៃទី ១ ១០:៥–៦ ។ សូមអានផងដែរនូវខគម្ពីរមួយចំនួនខាងក្រោម ឬរកមើលខគម្ពីរផ្សេងទៀតដែលបង្ហាញពីពរជ័យដែលយើងអាចទទួលបានតាមរយៈដង្វាយធួននៃព្រះយេស៊ូវគ្រីស្ទ ៖ អេសាយ ៥៣:៤–៥; យ៉ូហាន ១:១៧; ម៉ូសាយ ៤:២–៣; អាលម៉ា ៧:១១–១២; ហេលេមិន ៥:១២ ។
សកម្មភាពទី ២
សូមមើលវីដេអូមួយក្នុងចំណោមវីដេអូខាងក្រោម ដែលមាននៅលើគេហទំព័រ ChurchofJesusChrist.org ដោយរកមើលពរជ័យដែលកើតមានឡើងតាមរយៈព្រះយេស៊ូវគ្រីស្ទ ៖
« Atonement—Not a One-Time Thing » ( ៣:០០ )
« Because of Him » ( ២:៣៦ )
« Peace in Christ » ( ៤:០៩ )
សកម្មភាពទី ៣
សូមសញ្ជឹងគិតពីរបៀបដែលអ្នកបានដកពិសោធនូវពរជ័យដែលព្រះយេស៊ូវគ្រីស្ទបានប្រទានឲ្យ ឬរបៀបដែលអ្នកបានឃើញវានៅក្នុងជីវិតរបស់អ្នកដទៃ ។ ការណ៍នេះអាចរួមបញ្ចូលវិធីនានាដែលព្រះអម្ចាស់បានប្រទានពរអ្នកក្នុងគ្រាលំបាក ។
តើអ្នកបានរៀនអ្វីខ្លះ ?
សូមចំណាយពេលបន្តិច ដើម្បីរំឭកពីពរជ័យ ដែលយើងអាចទទួលបាន តាមរយៈដង្វាយធួននៃព្រះយេស៊ូវគ្រីស្ទ ដែលអ្នកបានសរសេរនៅលើគំនូរផ្លែឈើរបស់អ្នក ។ សូមសញ្ជឹងគិតពីមូលហេតុដែលពរជ័យទាំងនេះអាច « ធ្វើឲ្យមនុស្សសប្បាយរីករាយ » ( នីហ្វៃទី ១ ៨:១០) មាន « រសជាតិផ្អែមបំផុត គឺផ្អែមជាងអ្វីៗទាំងអស់ » ( នីហ្វៃទី ១ ៨:១១ ) ហើយអ្នកពោរពេញ « ទៅដោយសេចក្តីអំណរជាអតិបរមា » ( នីហ្វៃទី ១ ៨:១២ ) ។
សូមអញ្ជើញសិស្សបីបួននាក់ឲ្យចែកចាយអ្វីដែលពួកគេបានរៀន និងមូលហេតុដែលវាមានអត្ថន័យចំពោះពួកគេ ។ សំណួរខាងក្រោមនេះអាចមានប្រយោជន៍ ៖
-
តើអ្នកបានរៀនអ្វីខ្លះអំពីសេចក្ដីស្រឡាញ់របស់ព្រះចំពោះអ្នក ?
-
តើពរជ័យណាខ្លះដែលកើតមានឡើងតាមរយៈព្រះយេស៊ូវគ្រីស្ទ ដែលអ្នកចង់បានបំផុតក្នុងជីវិតរបស់អ្នក ? ហេតុអ្វី ?
-
តើអ្នកបានទទួលពរជ័យដោយរបៀបណា ដោយសារសេចក្តីស្រឡាញ់ដែលព្រះបានបង្ហាញក្នុងការបញ្ជូនព្រះរាជបុត្រារបស់ទ្រង់គឺព្រះយេស៊ូវគ្រីស្ទឲ្យធួនសម្រាប់អ្នក ?
បន្ទាប់ពីបានស្តាប់ឮបទពិសោធន៍របស់សិស្សរួច សូមពិចារណាចែកចាយគំនិត និងទីបន្ទាល់ផ្ទាល់ខ្លួនអំពីសេចក្ដីស្រឡាញ់របស់ព្រះ និងពរជ័យដែលយើងអាចទទួលបានតាមរយៈព្រះអង្គសង្គ្រោះ និងដង្វាយធួនរបស់ទ្រង់ ។