1 Նեփի 8.1–18

Աստծո սերն ամենացանկալին է բոլոր բաներից

Կենաց ծառը

Ինչպե՞ս կնկարագրեիք Աստծո սերը: Լեքին տեսիլք տեսավ, որում նա մի գեղեցիկ ծառ տեսավ: Նա կերավ այդ ծառի պտուղը, և «այն ամենաքաղցրն էր բոլորից», որոնք նա երբևէ ճաշակել էր (1 Նեփի 8.11): Այս ծառն ու դրա պտուղները խորհրդանշում են Աստծո սերը, որը դրսևորվում է Հիսուս Քրիստոսի ծննդյան, կյանքի, ծառայության և քավիչ զոհաբերության մեջ: Այդ սերը «չափազանց մեծ ուրախությամբ լցրեց [Լեքիի] հոգին» (1 Նեփի 8.12): Այս դասը նպատակ ունի օգնել ձեզ մեծացնել Աստծո սիրո և Հիսուս Քրիստոսի Քավության միջոցով ուրախություն զգալու ձեր ցանկությունը:

Խրախուսեք ուսանողներին՝ կիսվել փորձառություններով: Դասարանում յուրաքանչյուր ոք վկայության, գաղափարների և ավետարանով ապրելու փորձառությունների հարուստ աղբյուր ունի: Ուսանողներին հնարավորություն տվեք կիսվելու համապատասխան անձնական փորձառություններով: Երբ ուսանողները պատրաստակամություն են ցուցաբերում կիսվելու նման փորձառություններով, նրանց շնորհակալություն հայտնեք:

Ուսանողի նախապատրաստում. ուսանողներին առաջարկեք խորհել հետևյալ հարցերի շուրջ. Ի՞նչ ձևերով կարելի է զգալ Աստծո սերը: Ե՞րբ եք զգացել Նրա սերը ձեր հանդեպ: Ուսանողները կարող են նաև ընտանիքի որևէ անդամի կամ Եկեղեցու ղեկավարի հետ խոսել այն մասին, թե ինչպես են զգում Աստծո սերն իրենց հանդեպ:

Հնարավոր ուսումնական վարժություններ

Խավար և լույս

Կարող եք ցուցադրել գերագույն համաժողովում ներկայացված պատմություններից մեկի տեսանյութը: Կարող եք նաև կիսվել անձնական փորձառությամբ, որը կօգնի ուսանողներին զգալ, թե ինչ է նշանակում լինել խավարի մեջ և լույս ցանկանալ: Դա կօգնի ուսանողներին հասկանալ, որ իրենց կյանքում խավարը հաղթահարելու համար նրանք Հիսուս Քրիստոսի կարիքն ունեն:

Վարելով հեծանիվը 15 մղոն երկարությամբ թունելում (տես Վերն Փ. Սթենֆիլ, «Ընտրեք լույսը», Ensign կամ Լիահոնա, նոյեմբեր 2015, 55–57):

Սոլթ Լեյքի տաճարի լույսերը չեն վառվում գիշերը (տես Շերոն Յուբանկ, «Քրիստոս. Լույսը, որը շողում է խավարում», Ensign կամ Լիահոնա, մայիս 2019թ., 73–76):

Իջնելով խոր քարանձավի մեջ (տես Թիմոթի Ջ. Դայչես, «Լույսը հարում է լույսին», Լիահոնա, մայիս 2021թ., 112–15):

Լեքին աղոթում է Տիրոջ ողորմության համար

Անապատում ապրելիս Լեքին իր ընտանիքին պատմեց իր ունեցած տեսիլքի մանրամասները: Այդ տեսիլքում նա «մի մութ ու մռայլ անապատում էր» (1 Նեփի 8.4):

Որպեսզի օգնեք ուսանողներին պատկերացնել ստորև ներկայացվող հատվածները, կարող եք խնդրել նրանց դանդաղ կարդալ կամ ձեզ համար կարդալ այդ հատվածները, ապա առաջարկեք ուսանողներին փակել աչքերը և պատկերացնել այն, ինչ նկարագրվում է այդ հատվածներում:

Կարդացեք 1 Նեփի 8.5–8 հատվածները և գտեք, թե ինչ պատահեց Լեքիի հետ, և ինչ էր նա զգում: Օգտակար կլինի, եթե պատկերացնեք այն, ինչ կարդում եք: Գտեք նկարագրական մանրամասներ, որոնք կարող են օգնել ձեզ մտքում ստեղծել պատկերը կամ պատկերացնել իրադարձությունները կինոնկարի նման:

• Ձեր կարծիքով, ի՞նչ մտքեր կամ զգացողություններ ստիպեցին Լեքիին աղոթքով ողորմություն խնդրել:

Մի պահ խորհեք, թե ինչ տարբեր ձևերով կարող ենք մեր կյանքում խավար զգալ, և ինչ պատճառներ կան, որոնց համար կարող ենք Տիրոջ ողորմությունն աղերսել:

Կարդացեք 1 Նեփի 8.9–12 հատվածները և փորձեք գտնել, թե Տերն ինչպես օգնեց Լեքիին:

Որպեսզի օգնեք ուսանողներին պատկերացնել սուրբ գրությունը, կարող եք ցուցադրել «Լեքին հայտնաբերում է կենաց ծառը» (4:32) տեսանյութը՝ 1:52-4:32:

Ձեր օրագրում մի պարզ բան նկարեք, որը կպատկերի Լեքիի տեսած ծառը: Ծառի վրա նկարեք պտուղը և ըստ 1 Նեփի 8:10–12 հատվածներում տրված Լեքիի բացատրությունների՝ վրան մի անուն գրեք (Ծառի պտուղն անվանելու համար լրացուցիչ նկարագրություններ կարդացեք 1 Նեփի 15.36 և Ալմա 32.42 հատվածներում): Նկարելիս մտածեք, թե ինչ կարող են խորհրդանշել այս ծառը և դրա պտուղը:

Հետո Նեփին ցանկացավ անձամբ իմանալ և հասկանալ տեսիլքը, ինչպես նաև Լեքիի տեսած ծառի իմաստը: Երբ Նեփին մտորում էր այն մասին, թե ինչ էր իրեն ուսուցանվել, Հոգու միջոցով նրան երևաց նորածին Հիսուսին գրկած Կույս Մարիամի տեսիլքը (տես 1 Նեփի 11.13, 20):

Նայեք ներքևի նկարին և մտածեք, թե ինչու կարող էր Նեփիին երևալ այդ նկարը, երբ նա ցանկանում էր ծառի խորհուրդն իմանալ:

Մարիամը և նորածին Հիսուսը

Կարդացեք 1 Նեփի 11.21–23 հատվածները և գտեք, թե ուրիշ ինչ երևաց Նեփիին, և դա ինչպես օգնեց նրան հասկանալ ծառի խորհուրդը: Ծառը կարող եք անվանել ըստ ձեր սովորածի:

• Ձեր կարծիքով, Փրկիչն ինչպե՞ս է օգնում մեզ զգալ Աստծո սերը:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Երեց Դեյվիդ Ա. Բեդնար

Իր զավակների հանդեպ Աստծո սիրո մեծագույն դրսևորումներից մեկը մահկանացու ծառայությունն է, քավող զոհաբերությունը և Տեր Հիսուս Քրիստոսի Հարությունը: Ծառի վրայի պտուղը կարող է Փրկչի Քավության օրհնությունների խորհրդանիշ համարվել: (Դեյվիդ Ա. Բեդնար, «Եկեք և տեսեք», Ensign կամ Լիահոնա, նոյեմբեր 2014, 109):

• Աստծո սիրո մասին ի՞նչ ճշմարտություններ կարող եք առանձնացնել Լեքիի տեսիլքից և երեց Բեդնարի հայտարարությունից:

Ուսանողները կարող են տարբեր ճշմարտություններ նշել: Ուսանողներին խրախուսեք արտահայտվել և ասել, թե իրենց բացահայտած ճշմարտությունն ինչու է կարևոր իրենց համար:

Ինչպես զգալ Աստծո սերը և մեծ ուրախություն՝ Հիսուս Քրիստոսի միջոցով

Մեր սովորած ճշմարտություններից մեկն այն է, որ Աստծո սերը, որը դրսևորվում է Հիսուս Քրիստոսի միջոցով, ավելի ցանկալի է, քան որևէ այլ բան, և ամենամեծ ուրախությունն է բերում:

Ստորև ներկայացվող վարժությունները կօգնեն ձեզ հասկանալ, թե ինչպես եք դուք զգում Աստծո սերը Հիսուս Քրիստոսի շնորհիվ: Այդ վարժությունները կատարելիս փորձեք առանձնացնել այն բազմաթիվ օրհնությունները, որոնք գալիս են Հիսուս Քրիստոսի և Նրա Քավության միջոցով, և գրեք դրանք ձեր նկարած պտղի վրա կամ դրա շուրջը:

Արդյունավետ կլինի, եթե ստորև ներկայացվող վարժությունները տարբեր ձևով կատարեք: Վարժություն 1-ի համար ուսանողները կարող են աշխատել զույգերով կամ փոքր խմբերով: Վարժություն 2-ի համար լավագույն ձևը կլինի՝ ընտրել որևէ տեսանյութ և դիտել այն դասարանով: Վարժություն 3-ը ուսանողները կարող են անհատապես կատարել:

Վարժություն 1

Կարդացեք, թե ինչի մասին վկայեց Լեքին 1 Նեփի 10.5–6 հատվածներում՝ այս տեսիլքը տեսնելուց հետո: Նաև կարդացեք հետևյալ սուրբ գրություններից մի քանիսը կամ փնտրեք ուրիշները, որոնք ցույց են տալիս այն օրհնությունները, որ կարող ենք ստանալ Հիսուս Քրիստոսի Քավության միջոցով. Եսայիա 53.4–5, Հովհաննես 1.17; Մոսիա 4.2–3, Ալմա 7.11–12, Հելաման 5.12:

Վարժություն 2

Դիտեք ChurchofJesusChrist.org կայքում հասանելի հետևյալ տեսանյութերից մեկը և գտեք, թե ինչ օրհնություններ են գալիս Հիսուս Քրիստոսի միջոցով.

«Քավությունը մեկանգամյա իրադարձություն չէ» (3:00)

«Նրա շնորհիվ» (2:36)

«Խաղաղություն Քրիստոսում» (4:09)

Վարժություն 3

Մտածեք, թե ինչ ձևերով եք զգացել Հիսուս Քրիստոսի օրհնությունները, կամ ինչպես եք տեսել դրանք այլ մարդկանց կյանքում: Այդ ձևերրց կարող է լինել այն, թե Տերն ինչպես է օրհնել ձեզ խավարի ժամանակներում:

Ի՞նչ սովորեցիք

Մի պահ ուսումնասիրեք այն օրհնությունները, որոնք կարող ենք ստանալ Հիսուս Քրիստոսի Քավության միջոցով, և որոնք գրել եք ծառի պտղի նկարի վրա: Մտածեք, թե այս օրհնություններն ինչու կարող են «երջանկացնել մարդուն» (1 Նեփի 8.10), լինել «ամենաքաղցրը բոլորից» (1 Նեփի 8.11) և լցնել ձեզ «չափազանց մեծ ուրախությամբ» (1 Նեփի 8.12):

Մի քանի ուսանողի առաջարկեք կիսվել իրենց սովորածով և բացատրել, թե ինչու է այն կարևոր իրենց համար: Ստորև ներկայացվող հարցերը կարող են օգտակար լինել.

• Ի՞նչ սովորեցիք ձեր հանդեպ Աստծո սիրո մասին:

• Հիսուս Քրիստոսի միջոցով եկող օրհնություններից որո՞նք եք ամենաշատը ցանկանում ձեր կյանքում: Ինչո՞ւ:

• Ինչպե՞ս եք օրհնվել ձեր հանդեպ Աստծո ցուցաբերած սիրո շնորհիվ, երբ նա Իր Որդի Հիսուս Քրիստոսին ուղարկեց՝ հատուցելու ձեր փոխարեն:

Ուսանողների փորձառությունները լսելուց հետո կարող եք կիսվել ձեր մտքերով և վկայել Աստծո սիրո և այն օրհնությունների մասին, որոնք կարող ենք ստանալ Փրկչի և Նրա Քավության միջոցով:

Բացատրական և պատմական տեղեկություններ

Ի՞նչ օրհնություններ կարող ենք ստանալ Հիսուս Քրիստոսի Քավության միջոցով:

Սուրբ գրությունները Փրկչի բազմաթիվ օրհնությունների մասին են վկայում, որոնք նա մեզ է առաջարկում Իր Քավությամբ: Մենք կարող ենք ներում ստանալ մեր մեղքերից, և մեր սրտերը կարող են մաքրվել (տես Մոսիա 4.2–3): Մենք կարող ենք հաշտվել Աստծո հետ (տես Հակոբ 4.11): Մենք ստանում ենք «շնորհ և ճշմարտություն» (Հովհաննես 1.17): Մենք կարող ենք դիմակայել աշխարհին և խաղաղություն զգալ (տես Հովհաննես 16.33): Մենք կարող ենք մեր ձախորդությունների, ցավերի, վշտերի ու հիվանդությունների համար աստվածային օգնություն և բուժում ստանալ (տես Եսայիա 534–5, Ալմա 7.11): Նա գիտի մեր թուլությունները և կօգնի մեզ հաղթահարել դրանք (տես Ալմա 7.12): Նա կարող է ուժ տալ մեզ՝ դիմակայելու գայթակղությանը (տես Վարդապետություն և Ուխտեր 62.1): Նա ամուր հիմք է, և եթե մեր կյանքը կառուցենք Նրա վեմի վրա, երբեք չենք սայթաքի (տես Հելաման 5.12): Ողջ մարդկությունը հարություն է առնելու մեռելներից (տես Մոսիա 16.7–8, Ալմա 7.12, Ա Կորնթացիս 15.22): Մենք կարող ենք նմանվել Փրկչին և հավերժական կյանք ժառանգել (տես Մորոնի 7.48, 2 Նեփի 2.27):

Օժանդակ ուսումնական նյութ

Հիսուս Քրիստոսի միջոցով ուրախություն զգալու օրինակներ սուրբ գրություններից

Այս վարժությունը կարող է օգտակար լինել և օգնել ուսանողներին հասկանալ այն ճշմարտությունը, որ Հիսուս Քրիստոսով դրսևորվող Աստծո սերն ավելի ցանկալի է, քան որևէ այլ բան, և ամենամեծ ուրախությունն է բերում: Մորմոնի Գրքում և մյուս սուրբ գրություններում նկարագրվում են կարիքավոր մարդկանց կրկնվող օրինակներ, որոնք դարձել են դեպի Աստված և զգացել են Նրա սերն ու ուրախությունը (խորհրդանշանակորեն ճաշակելով կենաց ծառի պտուղը): Ուսանողներին ժամանակ տվեք՝ կարդալու մեկ օրինակ և տեսնելու, թե ինչ կարող են սովորել այդ օրինակից:

Օրինակ 1. Բենիամին թագավորի ժողովուրդը

• Մարդիկ Տիրոջ երկյուղից ընկել էին գետնին (Մոսիա 4.1):

• Նրանք աղոթքով ողորմություն էին խնդրում (Մոսիա 4.2):

• Նրանք ուրախությամբ լցվեցին Հիսուս Քրիստոսի միջոցով (Մոսիա 4.3):

• Բենիամին թագավորը մատնանշեց, որ նրանք Աստծո սերն էին ճաշակել (Մոսիա 4.11):

Օրինակ 2. Ալմա

• Ալման վախի ու մեղքի զգացում ուներ (Ալմա 36.11–16):

• Նա աղոթքով ողորմություն էր խնդրում (Ալմա 36.17–18):

• Նա ուրախություն գտավ Հիսուս Քրիստոսի միջոցով (Ալմա 36.19–21):

Օրինակ 3. Ջոզեֆ Սմիթ

• Ջոզեֆ Սմիթին պատել էր խավարը, և նա վախ էր զգում (Ջոզեֆ Ամիթ — Պատմություն 1.15):

• Նա աղոթեց ազատման համար (Ջոզեֆ Ամիթ — Պատմություն 1.16):

• Երկնային Հայրը և Հիսուս Քրիստոսը հայտնվեցին նրան մեծ փառքով (Ջոզեֆ Ամիթ — Պատմություն 1.17):

• Ջոզեֆ Սմիթը Սրբազան պուրակի իր փորձառության մասին գրել է. «Իմ հոգին լցվեց սիրով, և երկար ժամանակ ես շատ ուրախ էի» (Պատմություն, մոտավորապես 1832 թվականի ամառ, 3, josephsmithpapers.org):

• Այլ օրինակներ են Ենովսը (տես Ենովս 1.1–8), թագավոր Լամոնին (տես Ալմա 18.20–21, 41, 19.6, 12–13), թագավոր Լամոնիի կինը (տես Ալմա 19.4, 8–11, 29–30), լամանացիների մի խումբ (տես Հելաման 5.23–28, 40–48) և նեփիացիները՝ Հիսուս Քրիստոսի հայտնությամբ (տես 3 Նեփի 8.19–25, 11.1–17, 4 Նեփի 1.16):

Ուրիշների հետ ուրախությամբ կիսվելու ցանկություն

Երբ Լեքին ճաշակեց ծառի պտուղը և մեծ ուրախություն զգաց, նա այդ ուրախությամբ իր ընտանիքի հետ կիսվելու ցանկություն ունեցավ (տես 1 Նեփի 8.12): Երեց Դեյվիդ Ա. Բեդնարն ուսուցանել է. «Կենաց ծառի պտղից ճաշակելուց և մեծ ուրախություն զգալուց հետո Լեքիի վայրկենական արձագանքն իր ընտանիքի հետ կիսվելու և նրանց ծառայելու մեծ ցանկությունն էր: Այսպիսով, երբ նա դարձավ դեպի Քրիստոսը, նա նաև դարձավ դեպի մյուսները՝ սիրով և ծառայությամբ» («Եկեք և տեսեք», Ensign կամ Լիահոնա, նոյեմբեր 2014թ., 109):

Ուսանողների համար գուցե օգտակար լինի Փրկիչ Հիսուս Քրիստոսին հետևելու շնորհիվ նրանց գտած ուրախության և այդ ուրախությամբ իրենց ընտանիքի և ուրիշների հետ կիսվելու քննարկումը: