ទំព័របុព្វកថានៃព្រះគម្ពីរមរមន
ទីបន្ទាល់នៃពួកសាក្សីបីនាក់ និងទីបន្ទាល់នៃពួកសាក្សីប្រាំបីនាក់
« យើង … បានឃើញផ្ទាំងទាំងឡាយ »
អស់ពេលមួយរយៈ យ៉ូសែប ស្ម៊ីធ មិនបានអនុញ្ញាតឲ្យបង្ហាញផ្ទាំងមាសដល់អ្នកណាឡើយ ។ នៅក្នុងការសម្រេចតាមការព្យាករណ៍ នៅទីបំផុតព្រះអម្ចាស់បានបើកសម្ដែងដល់យ៉ូសែបថា សាក្សីបន្ថែមនឹងត្រូវបានអនុញ្ញាតsឲ្យឃើញផ្ទាំងចំណារនោះ និងថ្លែងទីបន្ទាល់អំពីការពិតនៃផ្ទាំងចំណារទាំងនោះ ( សូមមើល នីហ្វៃ ទី២ ២៧:១២–១៤ )។ មេរៀននេះអាចជួយអ្នកឲ្យយល់អំពីសារៈសំខាន់នៃសាក្សីជាច្រើននៃព្រះគម្ពីរមរមន ហើយគិតពិចារណាពីសាក្សីផ្ទាល់របស់អ្នក ។
ការជួយសិស្សឲ្យរៀនដោយព្រះវិញ្ញាណ ។របៀបមួយគឺត្រូវលើកទឹកចិត្តពួកគេឲ្យគិតពិចារណាពីបទពិសោធន៍ផ្ទាល់ខ្លួនរបស់ពួកគេទាក់ទងនឹងមេរៀននេះ ។ សូមផ្តល់ពេលឲ្យសញ្ជឹងគិតអំពីពរជ័យដែលពួកគេបានទទួលដោយការរស់នៅតាមដំណឹងល្អនៃព្រះយេស៊ូវគ្រីស្ទ និងរបៀបដែលពួកគេបានប្រែកាន់តែដូចជាទ្រង់ ។
ការរៀបចំសិស្ស ៖ សូមអញ្ជើញសិស្សឲ្យមករៀនដោយត្រៀមខ្លួនដើម្បីចែកចាយបទពិសោធន៍ដែលបានជួយពួកគេ ឬអ្នកដទៃឲ្យដឹងថាព្រះគម្ពីរមរមនគឺមកពីព្រះ ។
សកម្មភាពរៀនសូត្រដែលអាចមាន
សាក្សីនៃផ្ទាំងចំណារ មាស
សូមពិចារណាប្រើកថាខណ្ឌខាងក្រោមនេះ ដើម្បីជួយសិស្សឲ្យដឹងថា វាពិតជាលំបាកប៉ុនណាសម្រាប់ យ៉ូសែប ស្ម៊ីធ ដើម្បីធ្វើជាសាក្សីផ្ទាល់ភ្នែកតែម្នាក់គត់នៃផ្ទាំងចំណារមាសសម្រាប់គ្រាមួយនោះ ។
សូមស្រមៃគិតថា តើវាមានសភាពបែបណាសម្រាប់ យ៉ូសែប ស្ម៊ីធ ដែលក្លាយជាមនុស្សតែម្នាក់គត់ដែលអាចមើលឃើញផ្ទាំងចំណារមាសនោះ ។ សូមគិតថាតើវាពិបាកប៉ុនណាសម្រាប់អ្នក ដែលគេមិនជឿអ្នក គេចំអកឲ្យអ្នក និងគេហៅអ្នកថាជាជនបោកប្រាស់ ពីព្រោះអ្នកនឹងមិនបង្ហាញផ្ទាំងចំណារដល់មនុស្ស ។ សូមស្រមៃថាបានប្រាប់អ្នកដែលបានគាំទ្រអ្នកថា ពួកគេមិនអាចមើលឃើញផ្ទាំងចំណារនោះទេ ។
ខណៈកំពុងបកប្រែព្រះគម្ពីរមរមន យ៉ូសែប បានសរសេរតាមពាក្យសន្យាដែលព្រះអម្ចាស់បានធ្វើទាក់ទងនឹងផ្ទាំងចំណារមាស ។ សូមអាន នីហ្វៃទី២ ២៧:១២–១៤ ដើម្បីមើលការសន្យាដែលព្រះអម្ចាស់បានធ្វើអំពីផ្ទាំងចំណារមាស ( សូមមើលផងដែរ អេធើរ ៥:២–៤ ) ។
-
តើអ្នកចាប់អារម្មណ៍អ្វីខ្លះអំពីការព្យាករណ៍នេះ ? ហេតុអ្វី ?
-
តើយ៉ូសែបអាចមានអារម្មណ៍យ៉ាងណាពេលគាត់អានការព្យាករណ៍នេះ? ហេតុអ្វី ?
-
តើអ្នកបានរៀនអ្វីខ្លះពីវគ្គបទគម្ពីរនេះអំពីព្រះអម្ចាស់ និងព្រះគម្ពីរមរមន ?
សេចក្តីពិតមួយដែលយើងអាចរៀនពីការព្យាករណ៍ទាំងនេះគឺថា ព្រះអម្ចាស់បានប្រទានសាក្សីជាច្រើននាក់ពីផ្ទាំងចំណារមាសនៃព្រះគម្ពីរមរមន ។
-
ហេតុអ្វីបានជាវាងាយស្រួលជាងក្នុងការជឿថា អ្វីមួយជាការពិតពេលមានសាក្សីច្រើនជាងម្នាក់នោះ ?
កាលអ្នកបន្តសិក្សា សូមស្វែងរកជំនួយពីព្រះវរបិតាសួគ៌ តាមរយៈព្រះវិញ្ញាណបរិសុទ្ធ ដើម្បីយល់អំពីភាពសំខាន់នៃសាក្សីនៃផ្ទាំងចំណារមាស ហើយពិចារណាពីរបៀបដែលទីបន្ទាល់របស់ពួកលោកអាចជួយអ្នកទទួលបាន ឬពង្រឹងទីបន្ទាល់ផ្ទាល់ខ្លួន ។
សូមបង្ហាញកថាខណ្ឌខាងក្រោម ឬអញ្ជើញសិស្សឲ្យអានកថាខណ្ឌនេះ ។
ព្រះអម្ចាស់បានប្រទានដល់ក្រុមបុរសបីនាក់ ហើយបន្ទាប់មកប្រាំបីនាក់ដើម្បីឃើញផ្ទាំងចំណារមាសនេះ ។ សាក្សីជាច្រើននាក់ទាំងនេះបានជួយតាមមធ្យោបាយមួយចំនួនជាមួយនឹងការលេចចេញមកនៃព្រះគម្ពីរមរមន ។ ឧទាហរណ៍ ៖ ដាវីឌ វិតមើរ បានអញ្ជើញ យ៉ូសែប និង អិមម៉ា ឲ្យរស់នៅជាមួយពួកគាត់ ខណៈដែល យ៉ូសែប បកប្រែ ម៉ាទិន ហារីស បានបញ្ចាំកសិដ្ឋានរបស់លោកដើម្បីបង់ថ្លៃបោះពុម្ពព្រះគម្ពីរមរមន ហើយ អូលីវើរ ខៅឌើរី បានបម្រើជាស្មៀនសម្រាប់ការបកប្រែដ៏ច្រើននេះ ។ ឪពុករបស់យ៉ូសែប និងបងប្រុសរបស់លោកគឺ ហៃរ៉ុម និងប្អូនប្រុសលោកគឺ សាំយូអែល ក៏ជាសាក្សីអំពីផ្ទាំងចំណារនេះដែរ ហើយបានជួយ យ៉ូសែប តាមមធ្យោបាយសំខាន់ៗ ។ ក្រោយមកទោះបីជាបុរសមួយចំនួនក្នុងចំណោមបុរសទាំងនេះ បានចាកចេញពីសាសនាចក្រក៏ដោយ ក៏គ្មានពួកគាត់ណាម្នាក់ធ្លាប់បដិសេធទីបន្ទាល់របស់ខ្លួនអំពីព្រះគម្ពីរមរមនឡើយ ។ ( សូមមើល Gospel Topics « Witnesses of the Book of Mormon » នៅលើគេហទំព័រ topics.ChurchofJesusChrist.org ) ។
សូមអាន « ទីបន្ទាល់នៃពួកសាក្សីបីនាក់ » និង « ទីបន្ទាល់នៃពួកសាក្សីប្រាំបីនាក់ » ដោយរកមើលអ្វីដែលពួកគាត់បានឃើញ បានទទួលអារម្មណ៍ និងបានដឹង ។
អ្នកក៏ប្រហែលជាចង់មើល « A Day for the Eternities » ចាប់ពីកូដនាទីទី ១៥:០០ ដល់ នាទីទី ១៨:៣៧ ដើម្បីមើលការពិពណ៌នាអំពីបទពិសោធន៍ទាំងនេះ ។
សូមពិចារណាផ្តល់សំណៅចែកដូចខាងក្រោមដល់សិស្ស ហើយអញ្ជើញពួកគេឲ្យបំពេញតារាងរៀងៗខ្លួន ជាថ្នាក់ទាំងមូល ឬជាក្រុមតូចៗ ។
ទីបន្ទាល់នៃពួកសាក្សីបីនាក់ និង ទីបន្ទាល់នៃពួកសាក្សីប្រាំបីនាក់
|
ពួកសាក្សីបីនាក់ ៖ |
ពួកសាក្សីប្រាំបីនាក់ ៖ | |
|---|---|---|
|
អ្វីដែលពួកសាក្សីបានឃើញ និងបានទទួលអារម្មណ៍ ។ | ||
|
អ្វីដែលពួកសាក្សីបានដឹង ។ | ||
|
អ្វីដែលពួកសាក្សីបានធ្វើ ។ |
-
តើអ្នកបានឃើញភាពស្រដៀងគ្នា និងភាពខុសគ្នាអ្វីខ្លះនៅក្នុងបទពិសោធន៍នៃក្រុមទាំងពីរនេះ ?
-
ហេតុអ្វីបានជាភាពខុសគ្នានេះអាចមានសារៈសំខាន់អ្វីម្ល៉េះ ?
ជួនកាលយើងអាចប្រាថ្នាចង់មានបទពិសោធន៍ដូចពួកសាក្សីទាំងនេះ នោះព្រះអម្ចាស់បានថ្លែងទីបន្ទាល់ថា សូម្បីតែការឃើញអ្វីៗទាំងនេះក៏នឹងមិនបញ្ចុះបញ្ចូលមនុស្សអំពីសេចក្ដីពិតដែរ ( សូមមើល គោលលទ្ធិ និង សេចក្តីសញ្ញា ៥:៧ ) ។ ប្រធាន ជែមស៍ អ៊ី ហ្វោស្ត ( ឆ្នាំ ១៩២០–២០០៧ ) ក្នុងគណៈប្រធានទីមួយបានពន្យល់ថា ៖
នៅសម័យ និងពេលវេលារបស់យើង យើងត្រូវដឹងពីការពិតនៃអ្វីដែលមាននៅលើផ្ទាំងចំណារមាសដោយមិនបានឃើញវា ។ យើងគ្មានផ្ទាំងចំណារមាសមើល និងកាន់ដូចដែលវាធ្លាប់មានសម្រាប់សាក្សីបីនាក់ និងសាក្សីប្រាំបីនាក់នោះទេ ។ មនុស្សមួយចំនួនដែលបានឃើញ និងកាន់ផ្ទាំងចំណារមាសយ៉ាងពិតប្រាកដ មិនបានបន្តស្មោះត្រង់ចំពោះសាសនាចក្រនោះទេ ។ ការឃើញទេវតាមួយអង្គអាចជាបទពិសោធន៍ដ៏អស្ចារ្យមួយ ប៉ុន្តែវាកាន់តែអស្ចារ្យជាងនេះក្នុងការដឹងអំពីទេវភាពរបស់ព្រះអង្គសង្គ្រោះតាមរយៈសេចក្ដីជំនឿ និងសាក្សីនៃព្រះវិញ្ញាណ [ សូមមើល យ៉ូហាន ២០:២៩ ] ។ ( ជែមស៍ អ៊ី ហ្វោស្ត « It Can’t Happen to Me » Ensign ខែ ឧសភា ឆ្នាំ ២០០២ ទំព័រ ៤៨ )
-
ហេតុអ្វីបានជាអ្វីដែលត្រូវបានបង្រៀននៅក្នុងសេចក្ដីថ្លែងការណ៍នេះមានសារៈសំខាន់ចំពោះអ្នក ?
សាក្សីរបស់អ្នកអំពីព្រះយេស៊ូវគ្រីស្ទ និងព្រះគម្ពីរមរមន
គោលបំណងដ៏សំខាន់មួយនៃព្រះគម្ពីរមរមនគឺដើម្បីបញ្ចុះបញ្ចូលមនុស្សថាព្រះយេស៊ូវគឺជាព្រះគ្រីស្ទ ( សូមមើល ទំព័រចំណងជើងនៃព្រះគម្ពីរមរមន ) ។ សូមគិតថាតើសាក្សីផ្ទាល់ខ្លួនរបស់អ្នកអំពីព្រះយេស៊ូវគ្រីស្ទ និងព្រះគម្ពីរមរមនរឹងមាំដូចដែលអ្នកចង់បានដែរឬទេ ។ សូមសញ្ជឹងគិតពីរបៀបដែលការទទួលបាន ឬការពង្រឹងសាក្សីនោះអាចជាពរជ័យសម្រាប់អ្នក និងអ្នកដទៃ ។
សូមពិចារណាផ្តល់ពេលវេលាដល់សិស្សឲ្យគិតពិចារណាអំពីការរៀបចំខ្លួនរបស់ពួកគេដើម្បីចូលរៀន ។ បន្ទាបមក សូមបង្ហាញកថាខណ្ឌខាងក្រោម ហើយលើកទឹកចិត្តពួកគេឲ្យសញ្ជឹងគិត ហើយសរសេរអារម្មណ៍របស់ពួកគេ ។
សូមសរសេរទីបន្ទាល់របស់អ្នកអំពីព្រះយេស៊ូវគ្រីស្ទ និងព្រះគម្ពីរមរមន ។ ប្រសិនបើអ្នកមានអារម្មណ៍ថាអ្នកគ្មានទីបន្ទាល់នៅឡើយ សូមសរសេរនូវអ្វីដែលអ្នកអាចធ្វើបានដើម្បីទទួលបានទីបន្ទាល់ ។ សូមបញ្ចូលពីរបៀបដែលទីបន្ទាល់របស់អ្នកដទៃអាចជះឥទ្ធិពលលើទីបន្ទាល់របស់អ្នកផ្ទាល់ ។ សូមពិចារណាបន្ថែមលើចំណុចនេះ នៅពេលអ្នកបន្តសិក្សាព្រះគម្ពីរមរមន ។
បន្ទាប់ពីសិស្សមានពេលគ្រប់គ្រាន់ដើម្បីសរសេរហើយ សូមអញ្ជើញសិស្សខ្លះឲ្យចែកចាយទីបន្ទាល់របស់ពួកគេអំពីព្រះយេស៊ូវគ្រីស្ទ និងព្រះគម្ពីរមរមន ។