Molonai 10:26–34

“Haʻu kia Kalaisi”

Fakamoʻuí ʻoku fakamafao mai Hono toʻukupú

Naʻe ʻomi kitautolu ki māmani ke tau ako mo tupulaki kae lava ke tau maʻu ʻa e moʻui taʻengatá. Ke tokoniʻi kitautolú, naʻe fekauʻi mai ʻe he Tamai Hēvaní Hono ʻAlo ko Sīsū Kalaisí. Kuó Ne ui foki mo ha kau palōfita ke akoʻi mo fakamoʻoni kia Sīsū Kalaisi. ʻI he ngaahi veesi fakaʻosi ʻo e Tohi ʻa Molomoná, naʻe fakaafeʻi ʻe Molonai ʻa e taha kotoa ke muimui ki he Fakamoʻuí. ʻE lava ke tokoni ʻa e lēsoni ko ʻení ke ke “haʻu kia Kalaisi, pea hoko ʻo haohaoa ʻiate ia” (Molonai 10:32).

Ngaahi taumuʻa ʻo e Tohi ʻa Molomoná

Kuó ke fakakaukau nai ki he ʻuhinga naʻe foaki mai ai ʻe he ʻOtuá ʻa e Tohi ʻa Molomoná kiate kitautolú?

Te ke ako ʻi he ʻahó ni ʻa e ngaahi veesi fakaʻosi ʻo e Tohi ʻa Molomoná. ʻI hoʻo akó, fakakaukau ki he ngaahi taumuʻa mo e ngaahi tāpuaki ʻo e Tohi ʻa Molomoná.

ʻI he peesi talamuʻaki ʻo e Tohi ʻa Molomoná, naʻe fakahā ai ʻe Molonai naʻe hiki ʻa e Tohi ʻa Molomoná ke fakalotoʻi kitautolu “Ko Sīsū ʻa e Kalaisí.” Ko e foʻi lea “Kalaisí” ko e lea “faka-Kalisi ia ʻo e Mīsaiá. Ko hono ʻuhingá ko e Palōfita, Taulaʻeiki, Tuʻi, mo e Tokotaha Fakahaofi kuo pani” (Fakahinohino ki he Ngaahi Folofolá “Mīsaiá,” scriptures.ChurchofJesusChrist.org).

• Kuo fakamālohia fēfē nai ʻe hono ako ʻo e Tohi ʻa Molomoná hoʻo tui kia Sīsū Kalaisí?

• Kuo tokoniʻi fēfē nai koe ʻe hoʻo ako ʻa e Tohi ʻa Molomoná ke ke muimui kia Sīsū Kalaisí?

• Ko e hā hoʻo ongo ki he tūkunga lolotonga hoʻo feinga ke muimui kiate Iá?

Ngaahi fakaafe fakaʻosi ʻa Molonaí

Hili hono akoʻi ʻe Molonai ʻa e ngaahi meʻafoaki ʻo e laumālié mo e fakatokanga fekauʻaki mo e ngaahi nunuʻa ʻo e taʻetuí, naʻá ne lea fekauʻaki mo e Tohi ʻa Molomoná.

Lau ʻa e Molonai 10:27–29, ʻo kumi ʻa e meʻa naʻe kikiteʻi ʻe Molonai ʻe hokó.

• Ko e hā hoʻo fakakaukau ki haʻo feʻiloaki mo Molonai ʻi he taimi ʻo e fakamaauʻanga lahí?

Naʻe fai mai leva ʻe Molonai ʻene naʻinaʻi fakaʻosí, pe ngaahi fakaafé.

Lau ʻa e Molonai 10:30–34, ʻo kumi ʻa e meʻa naʻe fakaafeʻi kitautolu ʻe Molonai ke tau faí pea mo e ngaahi tāpuaki kuo talaʻofa mai naʻá ne vahevahé

Ako ha fakaafe ʻe ua pe lahi ange mo ha talaʻofa ʻe ua mei he Molonai 10:30–34. ʻE lava ke tokoni ʻa e saati ko ʻení. Mahalo ʻe tokoni ke hiki ʻa e ngaahi potufolofola kehé mo e ngaahi tokoni ki he akó ʻi hoʻo folofolá ʻo ofi ki he ngaahi kupuʻi lea pau mei he Molonai 10:30–34. Te ke lava foki ʻo ako ha ngaahi fakaafe kehe pe ngaahi talaʻofa ʻokú ke maʻu ʻi he Molonai 10:30–34 ʻa ia ʻoku ʻikai ʻasi ʻi he sātí.

Meʻa kuo pau ke tau faí (ngaahi fakaafe ʻa Molonaí)

Ko e ngaahi talaʻofa ʻa e Tamai Hēvaní

Meʻa kuo pau ke tau faí (ngaahi fakaafe ʻa Molonaí) Puke maʻu ‘a e meʻa kotoa pē ʻoku leleí. (Vakai, Molonai 7:19; Tokāteline mo e Ngaahi Fuakava 6:7.) Fakaʻehiʻehi mei he ngaahi meʻafoaki koví mo e ngaahi meʻa taʻemaʻá. (Vakai, 2 Nīfai 4:27–28; Molomona 9:28.) Fakafisi ʻa kitautolu mei he anga taʻe-māʻoniʻoni kotoa pē. (Vakai, Liliu ʻa Siosefa Sāmita, Mātiu 16:25–29; Mōsaia 3:19.) ʻOfa ki he ʻOtuá ʻaki hotau iví, ʻatamaí, mo e mālohí kotoa. (Vakai, Mātiu 22:36–38; ʻAmenai 1:26.)

Ko e ngaahi talaʻofa ʻa e Tamai Hēvaní ʻOku feʻunga ʻEne ʻaloʻofá pea te Ne lava ʻo fakahaohaoaʻi kitautolu. (Vakai, 2 Nīfai 10:24; 25:23; ʻEta 12:27; Fakahinohino ki he Ngaahi Folofolá, “ʻAloʻofá,” scriptures.ChurchofJesusChrist.org.) ʻE fakamāʻoniʻoniʻi kitautolu mo tau maʻu ha fakamolemole ʻo ʻetau ngaahi angahalá. (Vakai, 3 Nīfai 27:20; Tokāteline mo e Ngaahi Fuakava 76:41; Fakahinohino ki he Ngaahi Folofolá, “Fakamāʻoniʻoniʻí,” scriptures.ChurchofJesusChrist.org.) Te tau hoko ʻo māʻoniʻoni taʻe ʻi ai ha ʻila. (Vakai, Levitiko 19:2; Tokāteline mo e Ngaahi Fuakava 87:8; Fakahinohino ki he Ngaahi Folofolá, “Toputapú,” scriptures.ChurchofJesusChrist.org.)

fakaʻilonga, lekooti

1. Tali ʻa e ngaahi fehuʻi ko ‘ení:

   • Ko e ngaahi fakaafe pe palōmesi fē ʻoku ʻuhingamālie taha kiate koé, pea ko e hā hono ʻuhingá?

   • ʻE tokoniʻi fēfē koe ʻi hoʻo ngāueʻi ʻa e ngaahi fakaafe ko ʻení ke ke haʻu kia Sīsū Kalaisí?

   • Ko e hā ha ngaahi tefitoʻi moʻoni te tau lava ʻo ako mei he Molonai 10:30–34?

Ko e tefitoʻi moʻoni ʻe taha ʻoku tau akó ko e taimi ʻoku tau haʻu ai kia Sīsū Kalaisí, ʻe lava ke fakahaohaoaʻi kitautolu ʻiate Ia.

“Haʻu kia Kalaisi, pea hoko ʻo haohaoa ʻiate ia”

Mahalo te mou fie sio ʻi he foʻi vitiō “Come unto Christ: 2014 Theme Song (Haʻu kia Kalaisi: Hiva ʻo e Kaveinga 2014)” (4:48), ʻoku maʻu ʻi he ChurchofJesusChrist.org. Fakalaulauloto ki he founga kuo tokoniʻi ai koe ʻe he ʻaloʻofa ʻa e Fakamoʻuí ʻi ho ngaahi taimi faingataʻaiá.

fakaʻilonga, lekooti

2. Tali ha fehuʻi ʻe taha ʻo e ongo fehuʻi ko ʻení pe tali fakatouʻosi kinaua:

   • Ko e hā naʻe fai ʻe Sīsū Kalaisi kae lava ke tau maʻu ʻa e ngaahi talaʻofa ʻi he Molonai 10:30–34 pea hoko ʻo haohaoa ʻiate Iá?

   • Kuó ke mamata fēfē ki he ngāue ʻa e ʻaloʻofa (tokoni pe mālohi fakalangi) ʻa e Tamai Hēvaní mo Sīsū Kalaisí ʻi hoʻo moʻuí?

Fakakaukau ki ha meʻa te ke lava ʻo fai ke haʻu ai kia Kalaisi pea hoko ʻo haohaoa ʻiate Ia. Kapau ʻoku ʻikai ke ke fakapapauʻi ʻa e meʻa ke faí, ʻe ala tokoni hoʻo fakalaulauloto ki he ngaahi fehuʻi ko ʻení. Kapau ʻoku ʻi ai ha meʻa ʻokú ke ongoʻi te ke lava ʻo fai ʻi he taimí ni, fai ia. Mahalo kuo ʻosi tokoniʻi koe ʻe ha taha ʻo hoʻo ngaahi taumuʻa fakalakalaka ʻi he toʻu tupú ke ke haʻu kia Kalaisí. ʻE lava ke hokohoko atu hoʻo ngāueʻi ʻa e taumuʻa ko iá.

• ʻOku ʻi ai nai ha faʻahinga meʻa taʻe faka-ʻOtua ʻi heʻeku moʻuí ʻoku fiemaʻu ke u siʻaki (hangē ko e ngaahi ivi tākiekina ʻo e mītiá pe ngaahi tōʻonga koví)?

• Te u lava fēfē ʻo ʻofa lahi ange ki he ʻOtuá ʻaki hoku iví, ʻatamaí, mo e mālohí kotoa?

• ʻE tokoniʻi fēfē au ʻe hono fakahoko ʻo e ngaahi meʻa ko ʻení ke u hangē ko Sīsū Kalaisí?

Fili Pē: Fie Ako Lahi Ange?

ʻE tāpuekina fēfē au ʻi heʻeku tali ʻa e fakaafe ke haʻu kia Kalaisí?

Naʻe vahevahe ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Gerrit W. Gong

ʻOku fonu ʻa e ngaahi fakaafe ʻa e ʻOtuá ʻi he ʻofa mo e ivi malava koeʻuhí ko Sīsū Kalaisi ʻa e “halá, mo e moʻoní, pea mo e moʻuí” [Sione 14:6]. Kiate kinautolu ʻoku nau ongoʻi mafasiá, ʻokú Ne fakaafeʻi, “Ha‘u kiate au,” pea kiate kinautolu ʻoku haʻu kiate Iá, ʻokú Ne talaʻofa, “Te u foaki ʻa e fiemālié kiate kimoutolu” [Mātiu 11:28]. “Haʻu kia Kalaisi, pea hoko ʻo haohaoa ʻiate ia, … ʻofa ki he ʻOtuá ʻaki homou iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate kimoutolu, koeʻuhí ke tupu ʻi heʻene ʻaloʻofá ʻa hoʻomou haohaoa ʻia Kalaisí” [Molonai 10:32].

ʻOku ʻi he fakapapau foki ko ʻeni, “ke tupu ʻi heʻene ʻaloʻofá ʻa hoʻomou haohaoa ʻia Kalaisí” ʻa e nongá, melinó, mo e talaʻofa te tau lava ʻo hokohoko atu ʻi he tui mo e loto-falala ki he ʻEikí ʻo aʻu ki he taimi ʻoku ʻikai hoko ai ʻetau ngaahi ʻamanakí, fakaʻānauá, pe mahalo mo e meʻa ʻoku totonu ke tau maʻú, neongo ʻoku ʻikai ko hotau foʻui, pea naʻa mo e hili ʻetau fai hotau lelei tahá. (Gerrit W. Gong, “Ko ʻEtau Tafuʻanga Afi ʻo e Tuí,” Ensign pe Liahona, Nōvema 2018, 42)

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Jeffrey R. Holland

Naʻe kole mai ʻe Molonai, “ʻIo, haʻu kia Kalaisi, pea hoko ʻo haohaoa ʻiate ia …” “ʻOfa ki he ʻOtuá ʻaki homou iví, ʻatamaí, mo e mālohí kotoa pē, pea ʻe … tupu ʻi heʻene ʻaloʻofá ʻa hoʻomou haohaoa ʻia Kalaisí” [Molonai 10:32; naʻe tānaki atu hono fakamamafaʻí]. Ko hotau ʻamanaki leleiʻanga pē ki ha haohaoa moʻoní, ko ʻetau maʻu ia ko ha meʻafoaki mei he langí—ʻoku ʻikai ke tau lava ʻo “ngāueʻi” ia. Ko ia, ʻoku ʻikai ngata pē ʻi hono foaki mai ʻe he ʻaloʻofa ʻa Kalaisí ʻa e fakamoʻui mei he mamahí mo e angahalá pea mo e maté, ka ʻoku fakahaofi ai foki kitautolu mei heʻetau toutou fakaangaʻi pē kitautolú. (Jeffrey R. Holland, “Ko Ia ke Haohaoa ʻA Kimoutolu,” Ensign pe Liahona, Nōvema 2017, 41)

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā D. Todd Christofferson

Manatuʻi, ʻoku ʻikai ngata pē hono toʻo ʻe he ʻaloʻofa ʻa Kalaisí ʻa e ongoʻi halaia ʻo e angahalá mo e fehalāakí, ka ʻokú ne fakamaʻa mo ʻai kitautolu ko ha kakai māʻoniʻoni, ke tau lava ʻo nofo ʻi he ʻao ʻo e ʻOtuá. (D. Todd Christofferson, “Filí mo e Tukupaá,” [fakataha lotu fakaemāmani lahi maʻá e kakai lalahi kei talavoú, 12 Sānuali, 2020], broadcasts.ChurchofJesusChrist.org)

Molonai 10:34. ʻE fēfē ʻa e Fakamaau Fakaʻosí?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

Palesiteni Dieter F. Uchtdorf

Ko e ʻAho Fakamāú, ko ha ʻaho ia ʻo e ʻaloʻofa mo e ʻofa—ko ha ʻaho ʻe fakamoʻui ai ʻa e ngaahi loto kuo kafó, fetongi ai ʻa e loʻimata ʻo e mamahí ʻaki ʻa e loʻimata ʻo e houngaʻiá, pea fakatonutonu ai ʻa e meʻa kotoa pē.

ʻIo, ʻe ʻi ai ha ongoʻi mamahi lahi koeʻuhi ko e angahalá. ʻIo, ʻe ʻi ai ʻa e fakameʻapangoʻiá mo mamahi koeʻuhí ko ʻetau ngaahi fehalākí, fakavalevalé pea mo ʻetau loto-fefeká ʻo mole ai ʻa e ngaahi faingamālie ki ha kahaʻu lelei angé.

Ka ʻoku ou tui he ʻikai ngata pē ʻi heʻetau fiemālie ki he fakamaau ʻa e ʻOtuá; ka te tau ofo mo lōmekina foki ʻi Heʻene ʻaloʻofá, manavaʻofá, angaʻofá pea mo ʻEne ʻofa kiate kitautolu ko ʻEne fānaú. Kapau naʻe lelei ʻetau ngaahi holí mo ʻetau ngāué, kapau naʻa tau tui ki ha ʻOtua moʻui, ta ʻoku tau lava ʻo hanganaki atu ki he meʻa naʻe ui ʻe Molonai ko e “ʻao ʻo e fakamaau lelei ʻo Sihova Māfimafí, ko e Fakamaau Taʻengatá” [Molonai 10:34]. (Dieter F. Uchtdorf, “Hono ʻIkai Maʻongoʻonga ko e Palani ʻa Hotau ʻOtuá!,” Ensign pe Liahona, Nōvema 2016, 21)