Siviʻi Hono 10 Hoʻo Akó

Ko e Tohi ʻa Molomoná; 1 Nīfai–Molonai

tokotaha ʻokú ne lau ʻa e Tohi ʻa Molomoná

ʻE lava ke tokoni hoʻo fakakaukauloto mo vakaiʻi hoʻo ako fakalaumālié ke ke ofi ange ai ki he Fakamoʻuí pea mo fakamālohia hoʻo uluí. ʻOku fakataumuʻa ʻa e lēsoni ko ʻení ke tokoniʻi koe ke vakaiʻi ʻa e tuʻunga fakalakalaka kuó ke aʻusia lolotonga hoʻo ako ʻa e Tohi ʻa Molomoná ʻi he taʻu ní.

Ko hoʻo ako ʻa e Tohi ʻa Molomoná

ʻI he taʻu kuo ʻosí ʻi he seminelí, kuó ke ako ai ʻa e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi.

Te ke maʻu ha faingamālie ʻi he lēsoni ko ʻení ke fakamatalaʻi ha niʻihi ʻo e ngaahi meʻa naʻá ke ako mo ongoʻí pea mo vakai ki he founga kuo tokoniʻi ai koe ʻe he Tohi ʻa Molomoná ke ke ului lahi ange kia Sīsū Kalaisí.

Ko e hā hoʻo ongo ki he Tohi ʻa Molomoná?

Naʻe fakaafeʻi kitautolu ʻe Palesiteni Lāsolo M. Nalesoni ke tau fakakaukau ki ha fehuʻi ʻe tolu ʻoku fekauʻaki mo e Tohi ʻa Molomoná:

Palesiteni Russell M. Nelson

ʻUluakí, naʻe mei fēfē nai hoʻo moʻuí, kapau naʻe ʻikai e Tohi ʻa Molomoná? Uá, ko e hā naʻe ʻikai ke ke mei ʻiló? Pea tolú, ko e hā naʻe ʻikai ke ke mei maʻú? (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Ensign pe Liahona, Nōvema 2017, 61)

fakaʻilonga, lekooti

1. Tali ʻa e ngaahi fehuʻi ko ‘ení:

   • Te ke tali fēfē nai ʻa e fehuʻi takitaha ʻa Palesiteni Nalesoní?

   • Naʻe liliu fēfē nai hoʻo ngaahi ongo ki he Tohi ʻa Molomoná ʻi hoʻo ako ia he taʻu ní?

Ko e hā ʻoku mahino kiate koe fekauʻaki mo e Tamai Hēvaní mo Sīsū Kalaisí?

Naʻe fakamatalaʻi ʻe Palesiteni Lāsolo M. Nalesoni ha taha ʻo e ngaahi fatongia mahuʻinga ʻo e Tohi ʻa Molomoná:

Palesiteni Russell M. Nelson

ʻOku hoko ha meʻa mālohi ʻi he taimi ʻoku fekumi ai ha kiʻi tamasiʻi ke ʻilo lahi ange kiate Ia mo Hono ʻAlo ʻOfaʻangá. ʻOku ʻikai ha feituʻu ʻe toe mālohi mo mahino ange ai ʻa e ngaahi moʻoni ko iá ka ko e Tohi ʻa Molomoná. (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Ensign pe Liahona, Nōvema 2017, 61)

Fakaʻaongaʻi ha kiʻi taimi ke fakakaukau ai ki he meʻa kuó ke ako fekauʻaki mo e Tamai Hēvaní mo Sīsū Kalaisi ʻi hoʻo ako ʻa e Tohi ʻa Molomoná ʻi he taʻu ní. Te ke lava ʻo toe vakaiʻi hoʻo folofolá mo hoʻo tohinoa akó ki ha ngaahi moʻoni fekauʻaki mo e Tamai Hēvaní mo Sīsū Kalaisi naʻá ke fakaʻilongaʻi pe hiki ha kiʻi fakamatala fekauʻaki mo ia ʻi he taʻú kotoa. Hiki ʻi hoʻo tohinoa akó ha foʻi moʻoni ʻe tolu pe fā naʻe fuʻu mahuʻingamālie kiate koe.

Kumi ha potufolofola ʻe taha pe lahi ange ʻokú ne poupouʻi ʻa e foʻi moʻoni takitaha naʻá ke lisi ʻi hoʻo tohinoa akó. Hiki ʻa e fakamoʻoni fakafolofolá ʻi he tafaʻaki ʻo e foʻi moʻoni takitaha, pea fakamatalaʻi ʻa e founga te ke lava ai ʻo fakaʻaongaʻi ʻa e potufolofolá ke akoʻi ʻa e foʻi moʻoni ko iá.

Kapau ʻe fiemaʻu, te ke lava ʻo toe vakaiʻi ha niʻihi ʻo e ngaahi potufolofola ko ʻení:

• 2 Nīfai 9:19–23

• ʻAlamā 5:33–34

• ʻAlamā 12:32–34

• ‘Alamā 34:8–10

• 3 Nīfai 11:9–15

• Molomona 9:9–13

fakaʻilonga, lekooti

2. Tali ʻa e ngaahi fehuʻi ko ‘ení:

   • Ko e hā ha foʻi moʻoni ʻe ua pe lahi ange kuó ke ako fekauʻaki mo e Tamai Hēvaní pe ko Sīsū Kalaisi mei hoʻo ako ʻa e Tohi ʻa Molomoná?

   • ʻOkú ke pehē ko e hā ʻoku mahuʻinga ai ke mahino kiate koe ʻa e ngaahi moʻoni ko ʻení?

Kuo tākiekina fēfē ʻe he Tohi ʻa Molomoná ʻa e anga hoʻo moʻuí?

Lau ʻa e lea ko ʻeni ʻa e Palōfita ko Siosefa Sāmitá (1805–44), ʻo kumi ʻa e meʻa naʻá ne akoʻi fekauʻaki mo e mālohi ʻo e Tohi ʻa Molomoná:

ko e Palōfita ko Siosefa Sāmitá

© 1998 David Lindsley

Naʻá ku fakahā ki he kau takí ko e Tohi ʻa Molomoná ko e tohi totonu taha ia ʻi he ngaahi tohi kotoa pē ʻi he māmaní, pea ko e maka-tuʻu-loto ia ʻo ʻetau tui fakalotú, pea ʻe ofi ange ha tangata ki he ʻOtuá ʻi haʻane tauhi ki hono ngaahi akonakí, ʻi ha toe tohi kehe. (Talateu ʻo e Tohi ʻa Molomoná; vakai foki ki he History of the Church, 4:461)

ʻOku ʻuhinga ʻa e “tauhi ki hono ngaahi akonakí” ke moʻui ʻaki ʻa e ngaahi tefitoʻi moʻoni mo e ngaahi akonaki ʻoku ʻi he Tohi ʻa Molomoná. Fakakaukau ʻi ha ngaahi miniti siʻi ki he founga kuo liliu ai hoʻo fakakaukaú, tōʻongá, pe ngāué koeʻuhí ko e meʻa kuó ke ako mei he Tohi ʻa Molomoná.

fakaʻilonga, lekooti

3. Tali ha fehuʻi ʻe taha pe lahi ange mei he ngaahi fehuʻi ko ʻení:

   • Kuo tokoniʻi fēfē nai koe ʻi hoʻo ako ʻa e Tohi ʻa Molomoná ke ke ongoʻi ofi ange ai ki he Tamai Hēvaní mo Sīsū Kalaisí?

   • Ko e hā ha ngaahi akonaki pau kuó ke lava ʻo fakaʻaongaʻi mei hoʻo ako ʻa e Tohi ʻa Molomoná?

   • Ko e hā ʻa e ngaahi tāpuaki kuó ke aʻusia ʻi hoʻo toutou ako ʻa e Tohi ʻa Molomoná?