“3 Nephi 15–16: ‘Usa ka Pundok, ug Usa ka Magbalantay,’” Manwal sa Magtutudlo sa Basahon ni Mormon (2024)
“3 Nephi 15-16,” Manwal sa Magtutudlo sa Basahon ni Mormon
3 Nephi 15–16
“Usa ka Pundok ug Usa ka Magbalantay”
Sa dihang si Jesukristo mitudlo sa mga tawo diha sa yuta sa Bountiful, Iyang gipakita ang Iyang gugma alang sa matag tawo. Ang matag usa gidapit sa pag-duol ug sa pagsinati sa Iyang gugma alang sa ilang kaugalingon (tan-awa sa 3 Nephi 11). Iya dayon silang gitabangan nga makasabot nga Iyang gibati ang samang gugma alang sa tanang anak sa Dios. Siya nagtinguha sa matag tawo sa bisan asa nga maihap uban sa Iyang mga karnero. Kini nga leksiyon gituyo aron matabangan ka nga mabati ang tinguha sa Manluluwas sa pagpundok kanimo ug sa tanan ngadto Kaniya.
Mga ngalan ug mga titulo ni Jesukristo
Isip usa ka tugon ni Jesukristo, ang Basahon ni Mormon adunay nagkalainlaing mga ngalan ug mga titulo alang Kaniya. Ania ang pipila lang ka pananglitan:
-
Agalon sa ubasan (Jacob 5:4)
-
Bato (Helaman 5:12)
-
Kahayag (3 Nephi 11:11)
-
Tubaga ang mosunod nga mga pangutana:
-
Unsa ang usa sa imong paborito nga mga ngalan o mga titulo alang Kaniya? Unsa ang gitudlo niini kanimo mahitungod Kaniya?
Ang mga karnero sa Manluluwas
Diha sa 3 Nephi 15–16, si Jesus nagpadayon sa pagtudlo sa mga tawo duol sa templo diha sa yuta sa Bountiful. Human ipasabot nga ang balaod ni Moises natuman diha Kaniya, Siya mipakigbahin og usa ka titulo alang sa Iyang Kaugalingon nga makatabang kanato nga makasabot sa atong relasyon ngadto Kaniya.
Basaha ang 3 Nephi 15:17 ug ikonsiderar ang pagmarka sa titulo nga gihatag ni Jesus alang sa Iyang Kaugalingon.
Kita sa kasagaran gitandi ngadto sa mga karnero nga sa kanunay nahisalaag gikan ni Jesus ug nawala ug nagkatibulaag. Pamalandong sa makadiyot kon kana nga analohiya tukma ba usahay sa imong kinabuhi. Aduna bay mga higayon nga nahisalaag ka gikan sa imong Magbalantay, si Jesukristo, o aduna ka bay mga minahal nga nahisalaag?
-
Sa unsang paagi nga ang pagsabot sa mga pagbati ni Jesus ngadto sa Iyang nagkatibulaag nga mga karnero makaimpluwensiya sa paglaom sa usa ka tawo sa pagbalik ngadto Kaniya?
“Lain nga Karnero”
Ang mga magbalantay sa mga karnero sa adlaw sa Manluluwas sa kasagaran nagmugna og sirado nga “toril,” sama sa usa niini nga hulagway, aron sa pagbantay sa ilang mga karnero nga luwas gikan sa mga manunukob ug uban pang mga kakuyaw. Ang Simbahan sa Manluluwas usa ka ehemplo sa usa ka toril diin Siya nanalipod kanato gikan sa mga kakuyaw sa kalibotan.
-
Basaha ang mosunod nga tulo ka mga tudling sa kasulatan, ug tubaga ang kauban nga mga pangutana:
Juan 10:14–16 (Si Jesus nagsulti ngadto sa Iyang “mga karnero” sa karaang Israel)
-
Unsa sa imong hunahuna ang gipasabot nga si Jesus nakaila sa Iyang mga karnero ug sila nakaila Kaniya?
3 Nephi 15:13–17, 21 (Si Jesus nagsulti ngadto sa Iyang “mga karnero” sa karaang Amerika)
-
Sa unsang paagi ang Juan 10:16 ug ang 3 Nephi 15:21 may kalabotan sa usag usa?
3 Nephi 16:1–3 (Kini nga “mga karnero” naglakip sa “nawala nga mga tribo sa Israel” [3 Nephi 17:4].)
-
Unsa ang gitudlo kanimo sa sugo sa Langitnong Amahan mahitungod Kaniya niini nga mga bersikulo?
Ang Maayong Magbalantay
Usa ka kamatuoran nga atong makat-onan gikan niini nga mga kapitulo mao nga ang Langitnong Amahan ug si Jesukristo nagtinguha sa pagpundok sa tanan ngadto sa toril sa Manluluwas.
-
Unsa nga modernong mga kapeligrohan nga si Jesus nanalipod kanato diha sa Iyang toril?
Basaha ang 1 Nephi 22:25, 28 ug ang 3 Nephi 16:11–13, mangita og mga paghulagway sa buhat sa pagpundok sa atong Magbalantay sa atong panahon.
-
Unsa nga mga pulong ug hugpong sa mga pulong ang naghulagway kon kinsa ang gusto sa atong Magbalantay nga pagapundokon? Unsa ang gikinahanglan gikan kanato aron madawat ang Iyang mahigugmaong pagdapit?
Panagtigom sa toril sa Manluluwas
Samtang magtuon ka niini nga seksiyon, paghunahuna og usa ka higala nga wala karon makapahimulos sa hingpit nga mga panalangin nga gitanyag sa Manluluwas niadtong anaa sa Iyang toril (ang Simbahan). Mahimong nahisalaag sila gikan sa Iyang Simbahan, o tingale wala pa sila mabunyagan.
Basaha ang mosunod nga mga tudling sa kasulatan ug ang pamahayag ni Elder Dale G. Renlund sa Korum sa Napulog Duha ka Apostoles. O mahimo nimong tan-awon ang bidyo nga “Ang Atong Maayong Magbalantay,” anaa sa ChurchofJesusChrist.org, gikan sa time code 3:13 hangtod sa 4:44. Pangitaa ang mga butang nga gusto nimo nga mahibaloan sa imong higala bahin sa atong Magbalantay.
Isip ang Maayong Magbalantay, gitan-aw ni Jesukristo ang sakit sa Iyang karnero isip usa ka kahimtang nga nagkinahanglang tambalan, atimanon, ug kaluy-on. Kini nga magbalantay, ang atong Maayong Magbalantay, nakakaplag og kalipay sa pagkakita sa Iyang masakiton nga karnero nga milambo ngadto sa pagkaayo. …
Ang mortal nga pangalagad sa Manluluwas sa pagkatinuod gihulagway pinaagi sa gugma, kapuangod, ug kaluoy. Wala niya lakawa nga supak sa buot ang abugon nga kadalanan sa Galilea ug Judea, miatras sa pagkakita sa mga makasasala. Wala Niya sila likayi sa hingpit nga kalisang. Wala, Siya nakigsalo uban nila. Siya mitabang ug mipanalangin, mibayaw ug milig-on, ug gihulipan ang kahadlok ug kawalay kadasig og paglaom ug hingpit nga kalipay. Sama sa tinuod nga magbalantay nga Siya mao, gitinguha ug gipangita Niya kita aron itanyag ang kahupayan ug paglaom. (Dale G. Renlund, “Ang Atong Maayong Magbalantay,”Liahona, Mayo 2017, 30)
-
Tubaga ang mosunod nga mga pangutana:
-
Unsa ang gusto nimo nga mahibaloan sa imong higala mahitungod sa atong Magbalantay gikan niini nga mga tudling ug gikan sa pamahayag ni Elder Renlund? Ngano man?
-
Unsa ang pipila ka ehemplo sa paagi sa Manluluwas sa pagpundok sa mga tawo ngadto Kaniya? (Mahimong naglakip niini sa usa ka tawo nga imong nailhan sa personal, mga tawo gikan sa mga kasulatan, o bisan ikaw.)