3 Nephi 12:17–48

“Ako Manghinaot nga Kamo Mahimo nga Hingpit”

hulagway ni Jesukristo

Si Jesukristo mitudlo nga kita kinahanglan “mahimo nga hingpit” ingon nga Siya ug ang atong Langitnong Amahan hingpit (3 Nephi 12:48). Samtang kini nga sugo mahimong mabati nga hilabihan, kini naghatag og makahuloganon nga mga pagsabot ngadto sa kinaiya sa atong Langitnong Amahan ug ni Jesukristo. Kini nagtudlo usab kanato nga kita mahimong mahisama Kanila. Kini nga leksiyon gituyo aron matabangan ka nga masabtan ang imong potensiyal nga mahimong hingpit sama sa atong Amahan sa Langit ug ni Jesukristo.

Imong potensiyal

binhi sa yuta, tabunon [brown] nga itoy

malipayon nga masuso [baby] sulod sa basket

• Unsa ang mahimo sa matag usa niini kon sila hingpit na nga motubo?

• Unsay gikinahanglan nila aron makab-ot ang ilang potensiyal?

• Unsa ang potensiyal sa matag bata sa plano sa Langitnong Amahan?

• Sa unsang paagi ang pagsabot sa imong balaang potensiyal nakaapekto sa imong mga desisyon? Sa unsang paagi kini nakaapekto sa imong gibati mahitungod sa imong kaugalingon?

Samtang magtuon ka sa leksiyon karon, hunahunaa kon unsa na ka dako ang imong pagtubo ug nakat-onan sa dagan sa imong kinabuhi ug kon unsa pa ang imong mahimo sa tabang sa Dios.

Ang pagdapit sa Manluluwas sa pagkab-ot sa atong potensiyal

Sa 3 Nephi 12:17–47, si Jesus mipakigbahin og pipila ka mga ehemplo gikan sa balaod ni Moises ngadto sa mga katawhan sa Basahon ni Mormon. Iyang gisundan ang matag ehemplo og pagpasabot kabahin sa mas taas nga balaod o usa ka pagdapit sa pagpuyo og mas taas nga ang-ang sa pagkamatarong nga makatabang kanato nga mas makasabot sa unsay gusto Niya ug sa atong Langitnong Amahan nga kita mamahimo.

Aron makakita og mga ehemplo sa mas taas nga balaod, basaha ang 3 Nephi 12:21–22, 27–29, 38–42, mangita sa mga paagi nga gidapit kita sa Manluluwas sa pag-uswag ngadto sa atong potensiyal.

• Sa unsa nga mga paagi kini nga mga pagtulun-an makatabang kanato nga mahimong mas sama sa Langitnong Amahan ug ni Jesukristo?

Basaha ang 3 Nephi 12:48, mangita sa hingpit nga potensiyal nga si Jesukristo nasayod nga anaa sa matag usa kanato.

Ang 3 Nephi 12:48 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Kini nga bersikulo nagtudlo nga si Jesukristo gusto nga kita mahimong hingpit sama Kaniya ug sa atong Amahan sa Langit.

• Unsa nga mga pangutana o mga kabalaka ang tingali anaa sa mga tawo mahitungod niini nga pagtulun-an? Ngano man?

• Unsay naghatag kanimo og paglaom o pagsalig nga posible ang pagkahimong mahisama sa Langitnong Amahan ug ni Jesukristo?

• Sa unsang paagi kaha kini nga kamatuoran may kalabuoan sa mga hulagway gikan sa sinugdanan sa leksiyon?

Ang hingpit nga gugma sa Langitnong Amahan ug ni Jesukristo

Ang pagkahimong hingpit mao ang pagkahimong sama sa Langitnong Amahan ug ni Jesukristo. Ang mas taas nga balaod nga gitudlo ni Jesus niini nga kapitulo makatabang kanato nga makasabot sa kinaiya ug mga hiyas sa Langitnong Amahan ug ni Jesukristo. Samtang mas masabtan nato kon kinsa Sila, kita makapaningkamot nga mahimong sama Kanila ug makabaton og paglaom nga Sila mapailobon nga motabang kanato samtang kita naningkamot sa pag-uswag.

Basaha ang 3 Nephi 12:43–45 ug ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles, mangita sa unsay ilang gitudlo mahitungod sa gugma sa Langitnong Amahan ug ni Jesukristo.

Elder Jeffrey R. Holland

Sa bisan unsang kahimtang, mapasalamaton ko nga masayod nga bisan pa sa akong mga kasaypanan, maayo gani kay hingpit ang Dios—nga maayo gani kay Siya, sama pananglit, makahimo sa paghigugma sa Iyang mga kaaway, tungod kay sa kasagaran, tungod sa “kinaiyanhon nga tawo” sulod kanato, kamo ug ako usahay mao kana nga kaaway. Mapasalamaton kaayo ko nga maayo gani kay ang Dios makapanalangin niadtong nag-amung-among Kaniya tungod kay, bisan dili tuyo nga mobuhat sa ingon, usahay kitang tanan nag-amung-among Kaniya. (Jeffrey R. Holland, “Busa Kamo Kinahanglan Magmahingpit—sa Kataposan,” Liahona, Nob. 2017, 41)

icon, rekord

1. Irekord ang imong mga tubag sa mosunod nga mga pangutana:

• Nganong makahupay ang pagkahibalo nga ang Langitnong Amahan ug si Jesukristo naghigugma sa ilang mga kaaway ug nagpanalangin niadtonh kinsa nag-amung-among Kanila?

• Sa unsang paagi ang ilang gugma, tabang, ug pailob naghatag kanimo og paglaom nga usa ka adlaw makab-ot ang kahingpitan?

Ang kahingpitan usa ka proseso nga posible lamang pinaagi ni Jesukristo

Natural lang nga maghunahuna kon posible ba nga mahimong hingpit. Kon kinahanglan nato nga kab-oton ang kahingpitan sa ato lamang kaugalingon, o kon kini kinahanglan nga makab-ot sa atong mortal nga mga kinabuhi, kini imposible.

Basaha ang Doktrina ug mga Pakigsaad 76:69–70 ug Moroni 10:32–33, mangita unsay nakapahimo niini nga posible alang kanato nga mahimong hingpit. Ikonsiderar ang pag-cross-reference niini nga mga tudling ngadto sa 3 Nephi 12:48.

• Unsa ang nakapahimo niini nga posible alang sa tanan kinsa sa kataposan mahimong hingpit sa pagbuhat sa ingon?

Basaha ang Doktrina ug mga Pakigsaad 93:11–13 ug pangitaa kon unsay madugang niadto nga mga bersikulo sa atong pagsabot sa kahingpitan ni Jesukristo.

• Nganong importante nga masabtan nga bisan ang kahingpitan ni Jesukristo usa ka proseso?

Gitudlo ni Presidente Russell M. Nelson ang mosunod mahitungod sa kahulogan ug proseso sa kahingpitan:

Presidente Russell M. Nelson

Palihog timan-i nga ang pulong nga [hingpit] wala magpasabot og “kagawasan gikan sa sayop.” …

Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon mura og makapaluya [lisod] ug walay kataposan. Ang pagkahingpit naghulat. Moabot kini sa ka hingpit human lamang sa Pagkabanhaw ug pinaagi lamang sa Ginoo. Kini nagpaabot sa tanan kinsa nahigugma kaniya ug nagsunod sa iyang mga sugo. (Russell M. Nelson, “Perfection Pending,” Ensign, Nob. 1995, 86, 88)

• Unsa ang nadugang niini nga pamahayag sa imong pagsabot sa kahingpitan?

2. Kompletoha ang mosunod nga kalihokan:

Hunahunaa nga gihangyo ka sa paghatag og duha ngadto sa tulo ka minuto nga espirituhanong panghunahuna sa sunod nimo nga kalihokan sa kabatan-onan [youth activity]. Ang imong mga lider naghangyo kanimo sa pagpakigbahin sa imong mga hunahuna kon nganong ang pagtulon-an sa 3 Nephi 12:48 kinahanglan maghatag kanato og paglaom. Isulat ang imong mga hunahuna. Paglakip og mga tubag sa mosunod nga mga pangutana:

• Unsay buot ipasabot nga mahimong hingpit? Unsa may wala gipasabot niini?

• Sa unsang paagi ang imong nahibaloan mahitungod sa Langitnong Amahan ug ni Jesukristo nakahatag kanimo og paglaom nga mahisama Kanila?

Opsiyonal: Gustong Makakat-on Pa og Dugang?

Unsa kaha kon bation nako nga dili nako matuman ang mga gilaoman sa Manluluwas?

Si Presidente Dieter F. Uchtdorf, kanhi sa Unang Kapangulohan, mitudlo:

Presidente Dieter F. Uchtdorf

Tingali moingon ang uban, “Tingali dili ko makasunod sa inyong mga sumbanan.”

Mas dako kana nga rason nga moari kamo! Ang Simbahan gihimo sa pag-alima sa dili perpekto, sa naglisod, ug sa nagluya. Puno kini sa mga tawo kinsa nagtinguha sa tibuok nilang kasingkasing sa pagsunod sa mga sugo, bisan dili pa sila hanas niini. (Dieter F. Uchtdorf, “Dali, Pakig-uban Kanamo,” Liahona, Nob. 2013, 23)

Si Elder Jeffrey R. Holland sa Korum sa Napulog Duha ka Apostoles mitambag:

Elder Jeffrey R. Holland

“Duol kon unsa kamo,” nag-agda nato ang mahigugmaong Amahan [sa matag usa kanato], apan midugang Siya, “Ayaw pagplano nga magpabilin nga mao ra gihapon kamo.” Mopahiyom kita ug mohinumdom nga ang Dios determinado sa paghimo kanatong labaw pa kay sa atong mahunahuna. (Jeffrey R. Holland, “Mga Awit nga Naawit ug Wala Maawit,” Liahona, Mayo 2017, 51)

Si Propeta Joseph Smith (1805–1844) mitudlo:

ang Propeta Joseph Smith

Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtod ikaw moabot sa ibabaw, ug ingon usab niini ang mga baroganan sa Ebanghelyo— kinahanglan nga ikaw magsugod sa sinugdanan, ug mopadayon hangtod nga ikaw makakat-on sa tanang mga baroganan sa kahimayaan. Apan mahimo nga madugay-dugay nga ikaw makaaninag sa luyo sa tabil sa dili pa ikaw makakat-on kanila. Dili ang tanan mahimong masabtan dinhi sa kalibotan, may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan. (Mga Pagtulun-an sa mga Presidente sa Simbahan: Joseph Smith [2007], 323)

Unsa ang pagkaperpeksyonista ug unsaon nako kini pagtubag?

Si Elder Gerrit W. Gong sa Korum sa Napulog Duha ka Apostoles mitudlo:

Elder Gerrit W. Gong

Ang pulong kahingpitan … usahay masaypan sa pagsabot nga dili gayud makahimo og sayop. Tingali kamo o inyong kaila naningkamot pag-ayo nga mahingpit niini nga paagi. Tungod kay ang maong pagkahingpit ingon og dili makab-ot, bisan ang atong pinakamaayo nga paningkamot makapabalaka, makawala sa paglaom, o makaluya. Walay kalamposang naningkamot kita sa pagkontrolar sa atong mga kahimtang ug sa mga tawo nga naglibot nato. Nabalaka kita sa mga kahuyang ug mga sayop. Sa pagkatinuod, magkadako ang atong pagpaningkamot, magkalayo ang atong bation gikan sa pagkahingpit nga atong gitinguha. …

Ang sayop nga pagsabot kon unsa ang gipasabot nga mahimong hingpit moresulta sa pagkaperpeksyonista—usa ka kinaiya o pamatasan nga nagkinahanglan og dalayegon nga tinguha nga mahimong maayo ug nahimong usa ka dili angay nga pagdahom nga mahimong hingpit karon. Ang pagkaperpeksyonista usahay moabot gikan sa pagbati nga kadto lamang hingpit ang angay nga higugmaon o nga kita dili angayan nga magmalipayon gawas kon kita hingpit. (Gerrit W. Gong, “Pagkahimong Hingpit diha kang Kristo,” Liahona, Hulyo 2014, 44–45, )

Tan-awa ang bidyo nga “Perfectionism: Will I Ever Be Good Enough?” (4:33).