Ալմա 40

Հոգիների աշխարհը և Հարությունը

Քրիստոսը հոգիների աշխարհում

Երբ Կորիանթոնի հայրը հորդորեց նրան ապաշխարել, Կորիանթոնը որոշ հարցեր ուներ Աստծո ծրագրի և այն մասին, թե ինչ է տեղի ունենում մեզ հետ մահից հետո։ Նրա հայրը՝ Ալման, պատասխանեց նրա հարցերին և վկայեց Երկնային Հոր ծրագրում Հիսուս Քրիստոսի կենտրոնական դերի մասին։ Այս դասը կօգնի ձեզ ավելի խորությամբ գնահատել այն, ինչ Փրկիչն արել է ձեզ համար և հնարավորություն կտա բացատրել, թե ինչ է տեղի ունենում, երբ մենք մահանում ենք։

Հարցեր

Սփոփող միության գերագույն նախագահության խորհրդական քույր Ռեյնա Ի․ Ըբարթոն կիսվել է անձնական փորձով՝ խոսելով մեզ հետաքրքրող այն հարցերի մասին, թե ինչ է տեղի ունենում, երբ մենք մահանում ենք։ Դիտեք «Գերեզմանը հաղթանակ չունի» տեսանյութի 4:21-5:13 հատվածը, որը հասանելի է ChurchofJesusChrist.org կայքում կամ կարդացեք ստորև բերված խոսքերը․

Քույր Ռեյնա Ի. Ըբարթո

Երբ ես ինը տարեկան էի, կորցրեցի իմ ավագ եղբորը ավերիչ երկրաշարժի ժամանակ։ Քանի որ դա տեղի ունեցավ անսպասելի, որոշ ժամանակ պահանջվեց, որպեսզի ես կարողանայի ընկալել կատարվածը։ Վիշտը համակել էր ինձ, և ես ինքս ինձ հարցնում էի. «Ի՞նչ պատահեց եղբորս հետ։ Ո՞րտեղ է նա: Ո՞ւր գնաց նա: Ես երբևէ նորից կտեսնե՞մ նրան»։

Այդ ժամանակ ես չգիտեի Աստծո փրկության ծրագրի մասին և ցանկանում էի իմանալ, թե որտեղից ենք մենք գալիս, որն է կյանքի նպատակը, և ինչ է տեղի ունենում մեզ հետ մահից հետո։ Չէ՞ որ բոլորս էլ նույն հարցերն ենք ունենում, երբ կորցնում ենք սիրելիին կամ կյանքում դժվարություններ ենք ունենում։ (Ռեյնա Ի. Ըբարթո, «Գերեզմանը հաղթանակ չունի», Լիահոնա, մայիս 2021 թ․, 86)։

Ալմայի որդի Կորիանթոնը նույնպես մտահոգություններ ուներ մահից հետո կյանքի մասին։

Կարդացեք Ալմա 40.1 հատվածը և փնտրեք, թե ինչ մտահոգություն ուներ Կորիանթոնը։

• Ըստ ձեզ՝ նա ինչո՞ւ կարող էր մտահոգվել այդ հարցի վերաբերյալ։

Հիշեք, որ Կորիանթոնը խախտել էր Աստծո պատվիրաններն ու մաքրաբարոյության օրենքը։ Գուցե նա իր ընտրությունների պատճառով էր մտահոգվում, թե ինչ վիճակում է հայտնվելու այս կյանքից հետո։ Ալման Կորիանթոնին ուսուցանեց վարդապետությունը, որպեսզի օգնի նրան հաղթահարել մտահոգությունները և ապաշխարել։ Պատասխանը, որ Ալման տվել էր Կորիանթոնի մտահոգություններին, կարող է օգնել նաև նրանց, ովքեր ունեն քույր Ըբարթոյի հարցերի նման հարցեր։

Ավելի ուշ քույր Ըբարթոյին ուսուցանեցին միսիոներները, որոնք օգնեցին նրան գտնել իր հարցերի պատասխանները։ Պատկերացրեք, որ դուք այդ միսիոներներից մեկն եք և պատրաստվում եք ուսուցանել նրան։ Ստորև ներկայացված նյութերի օգնությամբ պատրաստեք կարճ բացատրություն, որը կօգնի պատասխանել քույր Ըբարթոյի հարցերին։

Հոգիների աշխարհը

Մորմոնի Գիրք. Ուսուցչի ձեռնարկ (2024). «Ալմա 40․ Հոգիների աշխարհը և Հարությունը»

Կարդացեք Ալմա 40.6–7, 11–14 հատվածները և գտեք, թե Ալման ինչ ուսուցանեց Կորիանթոնին։ Ապա օգտագործեք հետևյալ նյութերը, որոնք կօգնեն ձեզ պատրաստվել ուսուցմանը։

• Վարդապետություն և Ուխտեր 138.11–13, 18–22, 57

• Սուրբ գրքերի ուղեցույց, «Դրախտ», scriptures.ChurchofJesusChrist.org

Առաջին Նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ․ Օուքս

Սուրբ գրություններից սովորում ենք, որ մեր մարմնական մահից հետո, մենք, որպես հոգիներ, շարունակում ենք ապրել հոգիների աշխարհում: Սուրբ գրությունները նաև սովորեցնում են, որ հոգիների աշխարհը բաժանված է՝ այս կյանքում արդար ապրած կամ արդարակյաց մարդկանց և ամբարիշտ մարդկանց միջև: Սուրբ գրությունները նաև նկարագրում են, թե ինչպես են հավատավոր հոգիներից ոմանք ավետարանը ուսուցանում նրանց, ովքեր ամբարիշտ կամ ըմբոստ կյանքով են ապրել (տես Ա Պետրոս 3.19, Վարդապետություն և Ուխտեր 138.19–20, 29, 32, 37)։ (Դալլին Հ. Օուքս, «Ապավինիր Տիրոջը», Ensign կամ Լիահոնա, նոյեմբեր 2019 թ․, 26)

Պատրաստվեք բացատրելու հետևյալ հարցերի պատասխանները․

• Ի՞նչ է տեղի ունենում մեր հոգիների հետ, երբ մահանում ենք։

• Ի՞նչ է տեղի ունենում մեր հոգիների հետ դրախտում։ Ի՞նչ է տեղի ունենում մեր հոգիների հետ այն վայրում, որը Ալման անվանում է «արտաքին խավար», որը սակայն նաև հոգիների բանտ (Ա Պետրոս 3.19) կամ դժոխք են (2 Նեփի 9.12) անվանում։

• Դրախտի և բանտի մասին իմանալն ինչպե՞ս կարող է օգնել մեզ ավելի մեծ երախտագիտություն ունենալ Փրկչի հանդեպ։

• Հոգիների աշխարհի մասին մեր գիտելիքն ինչպե՞ս կարող է օրհնել մեզ մեր մահկանացու կյանքում։

Ուսուցանելիս անպայման հստակեցրեք, որ մահվան և հարության միջև արդարների հոգիները բնակվում են դրախտում, իսկ ամբարիշտների հոգիները՝ հոգիների բանտում։ Կիսվեք, թե այս ճշմարտության ըմբռնումն ինչպես է ազդում այս կյանքում ձեր կատարած ընտրությունների վրա։

© 2023 by Intellectual Reserve, Inc. All rights reserved.

Հարություն

Մորմոնի Գիրք. Ուսուցչի ձեռնարկ (2024). «Ալմա 40․ Հոգիների աշխարհը և Հարությունը»

Կարդացեք Ալմա 40.2–5, 23–24 հատվածները և գտեք, թե ինչ էր ուսուցանել Ալման Կորիանթոնին։ Ապա օգտագործեք հետևյալ նյութերը, որոնք կօգնեն ձեզ պատրաստվել ուսուցմանը։

• Ալմա 11.42–45

• Սուրբ գրքերի ուղեցույց, «Հարություն», scriptures.ChurchofJesusChrist.org

Առաջին Նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ. Օուքս

Զատիկի այս օրերին մենք տոնում ենք Հարության իրողությունը։ Այն մեզ ուժ և հեռանկար է տալիս դիմակայելու մահկանացու կյանքի մարտահրավերներին, որոնց բախվում ենք մենք և մեր հարազատները, օրինակ՝ ֆիզիկական, մտավոր և էմոցիոնալ տկարություններին, որ մեզ հետ են ի ծնե կամ ձեռք ենք բերում մահկանացու կյանքի ընթացքում: Հարության շնորհիվ մենք գիտենք, որ այդ մահկանացու տկարությունները ժամանակավոր են: (Դալլին Հ․ Օուքս, «Մեծ ծրագիրը», Ensign կամ Լիահոնա, մայիս 2020 թ., 94–95)։

Պատրաստվեք բացատրելու հետևյալ հարցերի պատասխանները․

• Ի՞նչ է հարությունը: Ո՞վ է հարություն առնելու:

• Ըստ Ալմա 40.2–3 հատվածի՝ ի՞նչն է հնարավոր դարձնում Հարությունը։

• Հարության մասին մեր գիտելիքն ինչպե՞ս կարող է օրհնել մեզ մեր մահկանացու կյանքում։

Ուսուցանելիս անպայման հստակեցրեք, որ Հիսուս Քրիստոսի հարության շնորհիվ մենք նույնպես հարություն ենք առնելու։ Նշեք մեկ պատճառ, որով երախտապարտ եք հարության խոստման համար։

© 2023 by Intellectual Reserve, Inc. All rights reserved.

Կարող եք դիտել «Ի՞նչ է տեղի ունենում մեր մարմինների և հոգիների հետ, երբ մենք մահանում ենք» տեսանյութը (4:19), որը հասանելի է ChurchofJesusChrist.org կայքում, և փնտրեք այլ ճշմարտություններ, որոնք կարող եք բացատրել ուսուցանելիս։

Պատասխաններ

պատկերակ, գրառում

1. Գրեք համառոտ բացատրություն, թե ինչ կուսուցանեիք քույր Ըբարթոյին։ Ներառեք ձեր գտած ճշմարտությունները և աշխատեք կիսվել ձեր վկայությամբ այն մասին, թե որն է Հիսուս Քրիստոսի դերը հոգիների աշխարհում և հարության մեջ։ Կարող եք նաև որևէ մեկի հետ կիսվել ձեր գրածով։

2. Պատասխանեք հետևյալ հարցերից առնվազն երկուսին.

   • Ինչո՞ւ է ձեզ համար կարևոր այն, ինչ սովորեցիք հոգիների աշխարհի և հարության մասին։

   • Ինչպե՞ս է այդ գիտելիքն ազդում Երկնային Հոր և Հիսուս Քրիստոսի հանդեպ ունեցած ձեր զգացմունքների վրա:

   • Ի՞նչ հարցեր ունեիք, որոնց պատասխանները այսօր ստացաք։

   • Ո՞ր հարցերի պատասխաններն եք ցանկանում շարունակել փնտրել:

Ընտրովի. ցանկանո՞ւմ եք ավելին իմանալ

Ալմա 40.16–20 Ի՞նչ է Առաջին հարությունը։

Տասներկու Առաքյալների Քվորումից երեց Բրյուս Ռ. Մակքոնկին (1915–85) ուսուցանել է.

Երեց Բրյուս Ռ. Մակքոնկի

Այս հարության առավոտ հարություն առնողները երկնային մարմիններով են հարություն առնում և պետք է երկնային փառք ժառանգեն․ նրանք Քրիստոսի առաջնապտուղներն են։ Այս հարության երեկո հարություն առնողները երկրային մարմիններով են հարություն առնում և հետևաբար պետք է ժառանգեն այդ արքայությունը․ նրանք նկարագրվում են որպես Քրիստոսինը այդ հարության ժամանակ։ Մինչ այժմ հարություն առածները երկնային մարմիններ են ստացել, երկրային էակների ի հայտ գալը չի սկսվի մինչև Երկրորդ Գալուստը (Վարդապետություն և Ուխտեր 76.50–80, 88.95–99) (Բրյուս Ռ. Մակքոնկի, Նոր Կտակարանի վարդապետական մեկնաբանությունը [1965], 1:196)։

Ալմա 40.21–22 Ի՞նչ է նշանակում «բերվել կանգնելու Աստծո առաջ»։

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Երեց Դ. Թոդ Քրիստոֆերսոն

Իր Քավության ու Հարության միջոցով Հիսուս Քրիստոսը հաղթեց Անկման բոլոր գործոնները: Ֆիզիկական մահը կլինի ժամանակավոր, և նույնիսկ հոգևոր մահը կունենա ավարտ, քանի որ մենք բոլորս հետ կբերվենք Աստծո ներկայության մեջ, առնվազն ժամանակավորապես, որպեսզի դատվենք: Մենք կարող ենք ամբողջապես ապավինել ու վստահել Նրա զորությանը, որը կհաղթահարի ամեն բան ու մեզ կշնորհի հավերժական կյանք: (Դ. Թոդ Քրիստոֆերսոն, «Հիսուս Քրիստոսի Հարությունը», Ensign կամ Լիահոնա, մայիս 2014 թ․, 112)

Ալմա 40.23 Ի՞նչպիսին կլինի հարություն առած մարմինը։

Յոթանասունից Երեց Փոլ Վ. Ջոնսոնը ուսուցանել է.

Երեց Փոլ Վ. Ջոնսոն

Հարությունը հնարավորություն է տալիս, որ մարդու հոգին ու մարմինը նորից միավորվեն, միայն թե այդ ժամանակ մարդու մարմինը կլինի անմահ ու կատարյալ և ենթակա չի լինի ցավի, հիվանդության կամ այլ խնդիրների [տես Ալմա 11.43]։ …

Մեզանից յուրաքանչյուրն ունի ֆիզիկական, մտավոր և զգացմունքային սահմանափակումներ ու թուլություններ։ Այդ խնդիրները, որոնց մի մասը թվում է անհաղթահարելի, ի վերջո կլուծվեն։ Այդ խնդիրներից և ոչ մեկը մեզ չի անհանգստացնի մեր հարությունից հետո։ (Փոլ Վ. Ջոնսոն, «Եւ մահն այլեւս չի լինիլ», Ensign կամ Լիահոնա, մայիս 2016 թ․, 121–22)