Alma 37–38

“Pagkat-on diha sa Imong Kabatan-on”

amahan ug anak nga lalaki nga nagbasa

Unsa ang pipila ka mga leksiyon nga imong nakat-onan gikan sa imong mga ginikanan o mga lider sa Simbahan? Unsa ang pipila ka mga butang nga imong gilaoman nga itudlo sa imong mga anak sa umaabot? Si Alma nakasabot nga ang mga ginikanan adunay sagrado nga responsibilidad sa pagtudlo sa ilang mga anak. Human sa iyang misyon ngadto sa mga Zoramite, gipundok ni Alma ang iyang mga anak nga lalaki aron sa pagtudlo ug pagdasig kanila. Siya mitambag kanila sa pagtuman sa mga sugo sa Dios. Kini nga leksiyon makatabang kanimo nga makat-on nga ang pagpuyo sa mga sugo karon makapanalangin kanimo sa tibuok nimong kinabuhi.

Tambag gikan sa usa ka ginikanan

Si Presidente Thomas S. Monson (1927–2018) mipakigbahin sa mosunod nga istorya:

Presidente Thomas S. Monson

Sa usa ka interbyo nga gimantala sa usa ka nasyonal nga magasin, ang inila nga Amerikano nga NCAA basketball player nga si Jabari Parker, usa ka miyembro sa Simbahan, gihangyo sa pagpakigbahin sa labing nindot nga tambag nga iyang nadawat gikan sa iyang amahan. Mitubag si Jabari, “[Ang akong amahan] miingon, Kinahanglang mao ra ka nga tawo kon anaa sa tago o kon anaa sa publiko.” Importante nga tambag … alang natong tanan. (Thomas S. Monson, “Magmakusganon Ka ug Magmaisog,” Liahona, Mayo 2014, 68)

Handurawa nga ikaw giinterbyo ug ang tig-interbyo nangutana kanimo sa mosunod nga mga pangutana:

• Unsa ang labing nindot nga tambag nga imong nadawat gikan sa usa ka ginikanan o lider sa Simbahan?

• Sa unsang paagi kini nga tambag nakapanalangin kanimo?

Ang Alma 36–42 nagrekord sa tambag nga gihatag ni Alma ngadto sa iyang mga anak nga lalaki human sa pagkompleto sa usa ka misyon ngadto sa mga Zoramite. Imoha nang natun-an ang kadaghanan sa unsay iyang gitudlo sa iyang anak nga lalaki nga si Helaman (Alma 36–37). Niini nga leksiyon imong tun-an ang nahibilin sa iyang tambag ngadto kang Helaman, lakip na sa mga baroganan nga iyang gitudlo sa iyang anak nga lalaki nga si Shiblon (Alma 38). Samtang magtuon ka sa Alma 37–38, pangitaa ang tambag gikan ni Alma nga imong magamit diha sa imong kinabuhi o mapaigbahin sa ubang mga batan-on.

“Pagkat-on og kaalam diha sa imong kabatan-on”

Basaha ang Alma 37:35, mangita sa unsay gusto ni Alma nga makat-onan ni Helaman isip usa ka batan-on. Ikonsiderar ang pagmarka sa unsay imong mapalgan.

• Unsa ang gusto ni Alma nga mahibaloan ug buhaton ni Helaman?

• Ngano sa imong hunahuna nga mas maayo ang “pagkat-on sa [imong] kabatan-on sa pagtuman sa mga sugo sa Dios” imbes nga maghulat hangtod nga ikaw motigulang?

batan-on nga kahoy nga nakaangkla sa mga ugsok [stake]

Si Presidente Gordon B. Hinckley (1910–2008) mipakigbahin sa mosunod nga kasinatian mahitungod sa pagtanom og kahoy:

Presidente Gordon B. Hinckley

Akong gibutangan [og kahoy] ang usa ka dapit diha sa eskina diin ang hangin gikan sa bukid [canyon] ngadto sa silangan mohuyop sa labing kusog. Naglungag ako, gibutang ang gamot, giliyokan kini og yuta, gibu-buan og tubig, ug kasagaran gikalimtan kini. Gamay ra kini nga kahoy, tingali 2 ka sentimetro ang gilapdon. Kini humok kaayo nga sayon nakong bawgon sa bisan asa nga direksiyon. Gamay nga pagtagad ang gihatag ko niini samtang nanglabay ang mga katuigan.

Dayon usa ka tingtugnaw nga adlaw … Akong nakita nga kini nagharag ngadto sa kasadpan, nadaot ang hitsura ug nagtakilid. … Migawas ako ug giandam ang akong kaugalingon atubang niini ingon og iduot kini nga matarong og barog. Apan ang punoan sa karon hapit usa ka pye ang gilapdon. Ang akong kusog walay epekto batok niini. Mikuha ako gikan sa akong butanganan sa mga himan og muton ug pisi. Gihigot ang usa ka tumoy ngadto sa kahoy ug ang usa ngadto sa lig-on nga pagkahimutang nga poste, gibitad nako ang pisi. Ang mga muton nairog lamang og gamay, ug ang punoan sa kahoy nauyog og hinay. Apan mao ra kadto ang tanan. …

Sa kataposan ingon nga nawad-an og paglaom akong gikuha ang akong gabas ug giputol ang dako kaayong bug-at nga sanga sa kasadpang bahin. Ang gabas nagbilin og dako kaayong uwat, nga mga walo ka pulgada nga mitadlas. Misibog ako ug gisuta unsay akong nahimo. Akong naputol ang kinadak-ang bahin sa kahoy, nagbilin og usa lamang ka gamay nga sanga mitubo paingon sa langit. …

Sa dihang ang kahoy gitanom pa, usa ka buok nga gamayng pisi makapugong unta niini batok sa mga kusog nga hangin. Unta akong nahimo ug naabagan kana nga higot uban sa gamay lang kaayo nga kahago. Apan wala nako buhata, ug kini minunot sa mga kusog nga miabot batok niini. (Gordon B. Hinckley, “Bring Up a Child in the Way He Should Go,” Ensign, Nob. 1993, 59)

• Sa unsang paagi nga ang pagsunod sa mga sugo sama sa pagsuporta sa usa ka batan-on nga kahoy aron kini motubo nga tul-id ug lig-on bisan pa sa hangin?

• Sa unsang paagi nga ang dili pagtagad sa mga sugo hangtod sa ulahing bahin sa kinabuhi makaapekto kanato?

Ikonsiderar ang pagtan-aw sa bidyo nga “Barogan ang Atong mga Saad ug mga Pagkigsaad,” gikan sa time code 7:29 hangtod sa 8:35, anaa sa ChurchofJesusChrist.org. Si Elder Ronald A. Rasband sa Korum sa Napulog Duha ka Apostoles mipakigbahin kon sa unsang paagi siya nakahukom sa pagsunod sa mga sugo sa Dios sa iyang pagkabatan-on.

Paggahin og pipila ka minuto sa pagsulat diha sa imong journal kon unsay imong nakat-onan mahitungod sa pagsunod sa mga sugo sa Dios. Mainampoong magtinguha nga mahibalo kon giunsa ka pagpanalanginan tungod sa mga paagi nga ikaw nagsunod sa mga sugo.

Ikonsiderar ang paghimo og tumong sa usa ka paagi nga gusto nimong mapalambo ang imong pagkamasulondon sa mga sugo sa Ginoo karon samtang batan-on ka pa. Tinguhaa ang giya gikan sa Espiritu Santo samtang imong himoon kini nga tumong.

Tambag alang sa kabatan-onan

Si Alma mihatag og dugang nga tambag ngadto sa iyang mga anak nga lalaki nga makatabang kanato.

Tun-i ang mosunod nga mga tudling sa kasulatan. Ikonsiderar ang pagmarka sa tambag nga imong gibati nga makatabang sa kabatan-onan karon, lakip sa imong kaugalingon. Andama ang imong mga tubag sa mga pangutana sa ubos.

1. Alma 37:33–37 (“pagkamaaghop ug pagkamapainubsanon” = daling matudloan, matarong)

2. Alma 38:1–5 (“ipahimulag gikan sa iyang atubangan” = pisikal o espiritwal nga nahimulag sa Dios)

3. Alma 38:6–9 (“matawo sa Dios”= ang Espiritu sa Ginoo naghinungdan og dakong kabag-ohan sa kasingkasing sa usa ka tawo)

4. Alma 38:10–15 (“magmapugnganon” = pagpakita og pagkamakasaranganon o pagpugong sa kaugalingon; “pagpalabi-labi” = dominante nga kinaiya)

1. Pagpili og usa ka pagtulun-an gikan sa mga bersikulo nga imong gitun-an ug tubaga ang mosunod nga mga pangutana:

   • Unsa ang usa ka butang nga gusto ni Alma nga buhaton o mahibaloan sa iyang mga anak nga lalaki? Sa unsang bersikulo nimo kini nakaplagan?

   • Sa unsang paagi nga ang pagkahibalo o pagsunod niini nga baroganan makatabang sa usa ka batan-on nga mas makasunod ni Jesukristo?

   • Sa unsang paagi kini nga pagtulon-an magamit sa kinabuhi sa usa ka batan-on? Makahunahuna ka ba og bisan unsang mga ehemplo sa dihang nakita nimo kini nga gigamit diha sa imong kinabuhi? (Palihog ayaw ipakigbahin ang bisan unsa nga personal kaayo.)

   Paggahin og kadiyot sa pagpamalandong, ug irekord ang bisan unsang mga hunahuna o mga impresyon mahitungod sa dugang nga mga paagi nga imong magamit ang tambag nga imong nakat-onan karon. Sama pananglit, mahimo kang maghunahuna og usa ka butang nga bag-o lang gidasig sa imong ginikanan o lider sa Simbahan nga sugdan o hunongon sa pagbuhat. O mahimo kang makigtambag sa Ginoo ug magtinguha sa Iyang direksiyon.

Opsiyonal: Gustong Makakat-on Pa og Dugang?

Alma 38:10. Unsay buot ipasabot sa pagkamapugnganon?

Si Elder Kent D. Watson, kanhi sa Seventy, mipakigbahin sa mosunod:

Elder Kent D. Watson

Ang maayong pagkasubo nga bildo, sama sa maayong pagkasubo nga puthaw, gipaubos sa gikontrolar og maayo nga proseso sa pagtunaw nga makadugang sa kalig-on. Sa ingon, kon ang maayong pagkasubo nga bildo madakdakan, dili kini sayon nga mabuak ngadto sa gansangong tipak nga makasamad.

Sa samang paagi, ang usa ka mapugnganon nga kalag—ang tawo kinsa mapainubsanon ug puno sa gugma—usa usab ka tawo nga may nagkadugang nga espirituhanong kalig-on. Uban sa nagkadugang nga espirituhanong kalig-on, atong mapalambo ang pagpugong sa kaugalingon ug magpuyo nga walay pagpalabi. Kita makakat-on sa pagkontrolar, o pagpugong, sa atong kasuko, panghambog, ug pasigarbo. Uban sa nagkadugang nga espirituhanong kalig-on, kita makapanalipod sa atong mga kaugalingon gikan sa makuyaw nga mga pagpasulabi ug makapalaglag nga mga pagkaadik sa kalibotan karon. (Kent D. Watson, “Mapugnganon sa Tanan nga mga Butang,” Liahona, Nob. 2009, 39)

Alma 38:12. Sa unsa nga paagi nga ang pagpugong sa akong mga mainit nga pagbati makapuno kanako sa gugma?

Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Si Alma mitambag sa iyang anak nga si Shiblon sa “pagpugong sa tanan [niyang] mainit nga pagbati, nga [siya] mapuno uban sa paghigugma” (Alma 38:12). Mahinungdanon, ang pagpugong sa atong pagkakinaiyanhon makapahimo nga kita adunay mas dako, mas lawom, ug mas malungtaron nga gugma para sa Dios ug sa Iyang mga anak. Ang gugma molambo pinaagi sa matarong nga pagpugong ug mokunhod pinaagi sa walay pugong nga pagpakasala. (David A. Bednar, “Kita Nagtuo sa Pagkaputli,” Liahona, Mayo 2013, 43)