Doktrinal nga Kahanas: Alma 39:9

“Ayaw Na Pagsunod sa mga Tinguha nga Daotan sa Imong mga Mata”

Isabel milabay sa atubangan ni Corianton

Sa imong pagtuon sa Alma 39, imong nakat-onan ang mahitungod sa kamahinungdanon sa pagsunod sa balaod sa kaputli ug unsaon sa pagbatok sa tentasyon pinaagi sa pagsalig kang Jesukristo. Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan alang sa Alma 39:9, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Ipasabot ug isag-ulo

Ang mahinungdanon nga hugpong sa mga pulong sa kasulatan sa doktrinal nga kahanas sa Alma 39:9 mao ang “Ayaw na pagsunod sa mga tinguha nga daotan sa imong mga mata.” Gamita ang mosunod nga pamaagi, o lain nga imong pilion, aron makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan.

pares sa mga mata sulod sa usa ka gi-ekis nga lingin

Diha sa imong journal sa pagtuon o sa usa ka piraso nga papel, pagdrowing og usa ka paresan sa mga mata sulod sa usa ka gi-ekis nga lingin diha sa tunga sa pahina. Ibabaw sa imong drowing, isulat ang Alma 39:9 ug ang mahinungdanon nga hugpong sa mga pulong sa kasulatan nga, “Ayaw na pagsunod sa mga tinguha nga daotan sa imong mga mata.” Isulat pag-usab ang pakisayran ug ang mahinungdanon nga hugpong sa pulong sa ubos sa imong drowing. Isulat kini pag-usab sa makaduha pa, kausa sa wala ug usa sa tuo sa imong drowing. Karon piyonga ang imong mga mata ug isaysay ang pakisayran sa kasulatan ug ang mahinungdanon nga hugpong sa mga pulong sa makusog gikan sa panumdoman. Kon nagkinahanglan ka og dugang nga pagbansay, sublia ang kalihokan hangtod nga mamemorya na nimo ang pakisayran ug ang mahinungdanon nga hugpong sa mga pulong.

icon, rekord

1.  Kompletoha ang mosunod:

   Handurawa nga ikaw usa ka misyonaryo nga nagtudlo og usa ka tawo bahin sa balaod sa kaputli sa unang higayon. Daklit nga ipasabot kon unsa ang balaod sa kaputli, ug gamita ang Alma 39:9 aron sa pagpasabot unsaon sa pagtuman niini.

Pagbansay sa paggamit

Rebyoha sa daklit ang mga baroganan sa pag-angkon og espirituhanong kahibalo sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Sulayi ang pagpili og usa ka mahinungdanon nga pulong gikan sa matag usa sa tulo ka baroganan nga nagpahinumdom kanimo sa baroganan ug makatabang kanimo nga dali kining mahinumdoman. Sama pananglit, mahimo nimong pilion ang una nga pulong sa matag baroganan ingon sa usa ka pahinumdom (lihokon, susihon, tinguhaon). O mahimo nimong pilion ang mga pulong sama sa hugot nga pagtuo, mahangtoron, ug mga tinubdan.

Gamita ang mosunod nga senaryo sa pagtabang kanimo sa paggamit sa mga baroganan sa pag-angkon og espirituhanong kahibalo.

Nalingaw si Ivan sa paggahin og oras sa social media. Mamugnaon siya ug naggamit sa nagkalainlaing mga plataporma sa social media aron ipakigbahin ang positibo nga mga mensahe. Bisan pa, nakakita usab siya og daghang mga sulod nga dili angay ug usahay bisan pornograpiya. Sa sinugdan, nakahasol kini kaniya, apan sa paglabay sa panahon, siya nahimong mas komportable niini. Bag-ohay lang, nagtinguha na gani siya og daghan pa niini nga klase nga sulod [content]. Wala siya nabalaka karon bahin sa mga pagpili nga iyang gihimo.

Pagbinayloay og mga ideya [brainstorm] kon sa unsang paagi ang pagsabot ug paggamit sa mga baroganan sa pag-angkon og espirituhanong kahibalo makatabang ni Ivan nga makita ang mga kabalaka sa iyang mga binuhatan karon. Ang mosunod nga mga pangutana ug mga kapanguhaan mahimong makatabang.

Susihon ang mga konsepto ug mga pangutana inubanan sa mahangtorong panglantaw

• Sa unsang paagi masusi ni Ivan ang iyang sitwasyon uban sa mahangtorong panglantaw?

• Sa unsang paagi nga ang iyang mga paningkamot sa pagpabiling limpyo diha sa iyang mga hunahuna makahimo og kalainan sa tibuok niyang kinabuhi dinhi sa yuta ug ngadto sa sunod nga kinabuhi?

• Sa unsang paagi nga ang iyang mga paningkamot makaapekto sa iyang relasyon sa Langitnong Amahan?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka mga ehemplo sa balaanong gitudlo nga mga tinubdan nga makatabang ni Ivan? Sa unsang paagi makatabang ang Alma 39:9?

Ikonsiderar ang paggahin og pipila ka minuto sa pagtuon sa pipila ka balaanong gitudlo nga mga tinubdan, mangita sa mga hugpong sa mga pulong o mga pagtulun-an nga makatabang kang Ivan. Ang mosunod mao ang pipila ka mga ideya:

• Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022), “Unsa ang buhaton sa pagkakaron”

• Mosiah 4:30; 3 Nephi 12:28–30; Doktrina ug mga Pakigsaad 42:23; 121:45

• Ang kinatibuk-ang komperensiya nga naghisgot bahin sa sekswal nga kaputli, pornograpiya, o social media nga imong makita sa Gospel Library nga app o sa ChurchofJesusChrist.org

Lihokon inubanan sa hugot nga pagtuo 

• Unsa ang mahimo ni Ivan aron molihok inubanan sa hugot nga pagtuo ug “[dili na magsunod] sa mga tinguha nga daotan sa [iyang] mga mata”? (Alma 39:9).

• Sa unsang paagi nga ang pagpaningkamot sa pagdangop kang Kristo makatabang sa iyang mga paningkamot?

2. Tubaga ang mosunod nga mga pangutana:

   • Unsa nga doktrina gikan sa plano sa Langitnong Amahan ang makatabang kang Ivan ug ngano?

   • Sa imong hunahuna sa unsang paagi ang mga baroganan sa pag-angkon og espirituhanong kahibalo makatabang ni Ivan sa pag-ila sa kapeligroso sa iyang mga binuhatan karon?

   • Unsay iyang mahimo aron makahimo og malungtarong mga kabag-ohan?