Alma 39

“Wad-a diha sa Imong Kaugalingon Kini nga mga Butang”

Alma nakigsulti kang Corianton

Sa tibuok panahon, si Satanas nagpatuo sa daghang tawo nga ang sekswal nga relasyon sa gawas sa kaminyoon dalawaton. Ang Langitnong Amahan ug si Jesukristo mihatag kanato sa balaod sa kaputli alang sa atong panalipod, kalinaw, ug kalipay. Si propeta Alma mahigugmaong mitambag sa iyang anak nga lalaki nga si Corianton sa pagbiya ug paghinulsol sa iyang mga sala, lakip ang usa ka paglapas sa balaod sa kaputli. Kini nga leksiyon makatabang kanimo nga makasabot sa kabug-at sa sekswal nga sala ug kon unsaon sa pagbatok sa tentasyon sa paglapas sa balaod sa kaputli.

Ang balaod sa kaputli

Basaha ang mosunod nga mga pamahayag ug tinoa kon hain sa mosunod ang labing maayo nga nagrepresentar sa imong mga pagbati:

• Dili ako mouyon - Kasagaran dili ako mouyon - Kasagaran mouyon ako - Ako mouyon

1. Ang mga kabatan-onan sa Ang Simbahan ni Jesukristo sa mga Santos sa Ulahing mga Adlaw klaro nga nakasabot sa balaod sa kaputli, o sa balaod sa Ginoo sa sekswal nga kaputli.

2. Sila nakasabot nganong mahinungdanon kini ug nganong gusto sa Ginoo nga ato kini nga puy-an.

3. Mahimong lisod ang pagsunod sa balaod sa kaputli sa kalibotan karon.

4. Ang mga kabatan-onan sa Simbahan nasayod unsaon pagbatok sa tentasyon ug pagpabilin sa ilang mga kaugalingon nga putli sa sekswal nga paagi.

Ang balaod sa kaputli mao ang balaod sa Ginoo sa sekswal nga kaputli. Ang pagsunod sa balaod sa kaputli nagpasabot sa pagpabilin sa imong kaugalingon nga limpyo sa hunahuna, pulong, ug binuhatan, lakip ang pagpalayo sa bisan unsa nga pornograpiya. Nagpasabot usab kini sa paglikay sa bisan unsang sekswal nga relasyon sa wala pa ang kaminyoon ug hingpit nga pagkamatinud-anon sa imong asawa o bana sa panahon sa kaminyoon. “Sama sa ubang mga kalapasan sa balaod sa kaputli, ang homosekswal nga kalihokan usa ka bug-at nga sala. Sukwahi kini sa mga katuyoan sa tawhanong sekswalidad” (Gospel Topics, “Chastity,” topics.ChurchofJesusChrist.org).

Paggahin og kadiyot sa pagpamalandong sa imong pagsabot ug mga pagbati mahitungod sa balaod sa kaputli. Unsay imong mga pangutana? Nganong mahinungdanon man kini kanimo? Unsa nga mga tentasyon mahitungod sa kaputli ang imong giatubang? Samtang magtuon ka niini nga leksiyon, pangitaa ang mga tubag sa imong mga pangutana ug ang tabang sa pagbuntog sa imong mga tentasyon.

Gitambagan ni Alma ang iyang anak nga lalaki nga si Corianton

Ang Alma 39 mao ang una sa upat ka kapitulo nga naglangkob sa tambag, mga sugo, ug mga pagtulun-an gikan ni Alma ngadto sa iyang anak nga lalaki nga si Corianton. Si Corianton miuban sa iyang amahan ug igsoon nga lalaki nga si Shiblon sa pagsangyaw sa ebanghelyo taliwala sa mga Zoramite. Atol niini nga misyon, bisan pa niana, si Corianton nakahimo og pipila ka bug-at nga mga sala.

Basaha ang Alma 39:1–5, mangita sa mga sayop nga nahimo ni Corianton ug unsay gibati ni Alma ug sa Ginoo mahitungod niini. (Ang pulong nga babaye nga nagbaligya sa iyang dungog diha sa bersikulo 3 nagpasabot sa usa ka imoral nga babaye o pampam.)

Aron matabangan ka sa pagpamalandong ngano nga ang paglapas sa balaod sa kaputli “makapayugot” sa usa ka amahan ug sa usa ka propeta (Alma 39:3) ug usa ka “salawayon diha sa panan-aw sa Ginoo” (Alma 39:5), mahimong makatabang ang pagsabot sa mga panalangin sa paghupot niini. Basaha ang mahitungod sa mga panalangin ug gahom sa “Ang pagsunod sa balaod sa kaputli” diha sa pahina 26 sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022).

• Sa unsang paagi nga ang pagsunod sa balaod sa kaputli nag-andam kanato sa pagdawat og dagkong mga panalangin gikan sa Ginoo niini nga kinabuhi ug sa sunod?

Alang sa dugang nga panabot, basaha ang mosunod nga mga pangutana ug pangitaa ang mga tubag niini diha sa mga kasulatan nga gilista sa parentesis:

• Unsa ang mahitabo kon ang usa ka tawo dili maghinulsol sa sekswal nga sala? (Alma 39:7–9)

• Unsa ang kasagarang mataligam-an nga sangpotanan sa paglapas sa balaod sa kaputli? (Alma 39:11–13)

icon, rekord

1. Tubaga ang mosunod nga mga pangutana:

   • Base sa unsay imong nakat-onan, nganong ang usa ka ginikanan, propeta, ug ang Ginoo adunay ingon ka lig-on nga mga pagbati mahitungod sa kaputli?

   • Sa unsang paagi nga ang balaod sa kaputli nagpakita sa gugma sa Dios alang sa Iyang mga anak?

“Ayaw na pagsunod sa mga tinguha nga daotan sa imong mga mata”

Agi og dugang sa pagtudlo sa iyang anak nga lalaki mahitungod sa kabug-at sa sekswal nga sala, gitudloan usab ni Alma si Corianton unsaon paglikay sa paghimo sa samang mga sayop sa umaabot.

Irebyo ang Alma 39:9 ug Alma 39:13, mangita sa mga pulong o mga hugpong sa mga pulong nga makatabang kanimo sa pagbatok sa tentasyon ug sa pagsunod sa balaod sa kaputli. (Ang hugpong sa mga pulong nga “wad-a diha sa imong kaugalingon” sa bersikulo 9 nagpasabot sa pagpugong sa kaugalingon o kahanas sa pagdumala sa kaugalingon.)

Ang Alma 39:9 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa nga baroganan ang gitudlo ni Alma kang Corianton niini nga mga bersikulo?

Usa ka posibleng baroganan gikan niini nga mga bersikulo mao ang samtang kita mogamit sa pagpugong sa kaugalingon ug modangop sa Ginoo, atong mabuntog ang tentasyon sa paglapas sa balaod sa Dios sa kaputli.

Ang pagpugong sa kaugalingon ug pagdangop sa Ginoo aron mabuntog ang tentasyon usahay lisod. Makatabang ang paghunahuna og nagkalainlaing mga paagi sa pagbuhat niini ug dayon pagsunod sa mga pag-aghat gikan sa Espiritu kon unsa ang labing makatabang diha kanimo.

2. Buhata ang duha sa mosunod aron sa pagtabang kanimo sa pag-ila sa mga paagi nga ang kabatan-onan karon makagamit sa pagpugong sa kaugalingon ug “mobalik sa Ginoo uban sa tibuok [natong] hunahuna, gahom ug kusog” (Alma 39:13) aron sa pagbuntog sa tentasyon sa paglapas sa balaod sa kaputli. Paghimo og lista sa unsay imong napalgan. Mahimo usab nimong idugang ang imong kaugalingon nga mga ideya.

   1. Basaha ang nahabilin nga tambag bahin sa sekswal nga kaputli diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (tan-awa sa “sekswal nga kaputli” diha sa seksiyon sa “Unsa man kaha ang gitudlo mahitungod sa … ?”). Alang sa dugang nga tambag gikan sa mga sakop sa Korum sa Napulog Duha ka Apostoles, ikonsiderar ang pagbasa sa “Kita Nagtuo sa Pagkaputli” (David A Bednar, Liahona, Mayo 2013, 41–44).

   2. Pangita og mga kasulatan nga imong gibati nga makapalig-on kanimo batok sa mga tentasyon sa paglapas sa balaod sa kaputli. Mahimo ka usab nga maglista og mga himno, o mga kanta sa Primary nga mahimo nimong dangpan alang sa kalig-on kon matintal.

   3. Paglista og mga paagi nga mahimo nimong paningkamotan nga “mobalik sa Ginoo” uban sa imong “hunahuna, gahom, ug kusog” (Alma 39:13). Ilakip ang unsay imong nahimo kaniadto nga imong gibati nga nakapalig-on kanimo.

   4. Isulat ang tambag nga imong nadawat gikan sa mga ginikanan ug mga lider sa Simbahan nga makatabang nimo batok sa tentasyon.

Personal nga pagpamalandong

Paggahin og kadiyot sa pagpamalandong nganong gusto nimo nga magpabiling putli sa sekswal nga paagi. Dayon irekord ang mga lakang nga imong buhaton aron padayong mosunod sa balaod sa Ginoo sa kaputli. Ikonsiderar kon unsa kaha ang gidasig sa Espiritu Santo nga imong buhaton, ug irekord ang bisan unsang dugang nga mga hunahuna diha sa imong journal sa pagtuon. Kon ikaw o imong kaila nakalapas sa balaod sa kaputli, hinumdomi nga si Jesukristo “[mianhi] aron sa pagkuha sa mga sala sa kalibotan” (Alma 39:15) ug mopasaylo sa tanan kinsa sinsero nga maghinulsol ug mobiya sa ilang mga sala (tan-awa sa Mosiah 26:30, Alma 39:9).

Opsiyonal: Gustong Makakat-on Pa og Dugang?

Alma 39:5. Ngano nga ang mga sekswal nga sala sunod sa pagpatay sa kabug-aton?

Samtang nag-alagad isip sakop sa Seventy, si Elder Bruce C. Hafen mitudlo:

Elder Bruce C. Hafen

Tingali adunay komon nga elemento nianang duha ka butang—pagkadili-putli ug pagpatay. Ang duha adunay kalabotan sa kinabuhi, nga nagtandog sa labing taas nga gahom sa Dios. Ang pagpatay naglakip sa sayop nga pagkutlo sa kinabuhi; ang sekswal nga kalapasan mahimong maglakip sa sayop nga paghatag sa kinabuhi, o ang sayop nga pag-usik-usik sa gahom sa sagradong mga tuburan nga naghatag og kinabuhi. (Bruce C. Hafen, “The Gospel and Romantic Love,” New Era, Peb. 2002, 10)

Alma 39:6. Unsa ang gipasabot sa ilimod ang Espiritu Santo?

Si Propeta Joseph Smith (1805–44) mitudlo:

si Propeta Joseph Smith

Unsa gayod ang mabuhat sa usa ka tawo nga dili na mapasaylo sa sala? Kinahanglan nga nadawat niya ang Espiritu Santo, ang kalangitan naabli alang kaniya, ug nakaila sa Dios, ug dayon nakasala batok kaniya. Human ang tawo makasala batok sa Espiritu Santo, walay paghinulsol alang kaniya. Siya kinahanglan nga mosulti nga ang adlaw wala mosidlak samtang nakita niya kini, siya kinahanglan nga molimod ni Jesukristo bisan og ang kalangitan naablihan ngadto kaniya, ug ilimod ang plano sa kaluwasan nga ang iyang mga mata nagtan-aw sa kamatuoran niini. (Joseph Smith, sa History, 1838–1856 [Manuscript History of the Church], volume E-1, 1976, josephsmithpapers.org, ang panulbok ug kapang-ulohanang titik gimoderno; tan-awa usab “Mga Asoy sa ‘King Follett Sermon,’” josephsmithpapers.org).

Alma 39:13. Sa unsang paagi nako mas mapugngan ang akong mga hunahuna ug makalikay sa daotan nga mga tinguha?

Si Elder Ulisses Soares sa Korum sa Napulog Duha ka Apostoles mitudlo:

Elder Ulisses Soares

Ako mopamatuod nga kon kita mosalig sa lig-on nga sukaranan sa kaluwasan, ang Manunubos sa atong mga kalag, … ang atong abilidad sa pagkontrol sa atong mga hunahuna madugangan pag-ayo. … Dayon ang mga tintasyon sa kaaway, sa hinayhinay, mawad-an og gahom ibabaw kanato, moresulta sa usa ka mas malipayon ug mas putli ug mapahinungoron nga kinabuhi. (Ulisses Soares, “Pagtinguha kang Kristo sa Matag Hunahuna,” Liahona, Nob. 2020, 84)