Alma 36

“Ako Wala Na Mahinumdom Sa Akong Mga Kasakit”

malipayon nga batan-ong babaye

Ang pagpakigbahin og malumo nga espirituhanong mga kasinatian uban niadtong atong minahal mahimong tinubdan sa kalig-on alang kanila ug kanato. Namulong ngadto sa iyang anak nga lalaki nga si Helaman, si Alma miasoy sa iyang kasinatian sa pagkakita og usa ka anghel, pagbati sa kasakit sa iyang mga sala, ug pagkaplag og kaluwasan pinaagi ni Jesukristo. Kini nga leksiyon gituyo aron pagtabang kanimo nga modangop ngadto ni Jesukristo diha sa hugot nga pagtuo ug mobati sa hingpit nga kalipay sa Iyang kaluwasan.

Mga Katugbang

Kopyaha ang mosunod diha sa imong journal sa pagtuon. Sunod sa arrow, isulat kon unsa sa imong hunahuna ang katugbang sa matag usa.

• Kasakit →

• Pagbasol →

• Kaguol →

Pamalandong sa higayon nga ikaw tingali nakasala ug nakasinati sa pagbati diha sa wala. Kana ba nga pagbati nahimo na sa unsay imong gilista sa tuo? Unsa ang nahitabo aron mahimong posible ang maong kausaban?

Kon ang negatibo nga mga pagbati gumikan sa sala, ang Ginoo lamang ang makatabang kanato sa pagbag-o niadto nga mga pagbati ngadto sa ilang positibo nga mga katugbang.

Pamalandongi kon unsa ka tinuod ang mosunod nga mga pamahayag alang kanimo:

• Kon ako nakasala, nakahibalo ako kon unsaon pagdangop sa Ginoo aron makadawat og kapasayloan, kalinaw, ug paglaom.

• Aduna akoy pagsalig nga uban sa tabang sa Ginoo ako makahimo nga magbag-o.

• Kanunay ko nga modangop sa Ginoo alang niini nga tabang.

Karong adlawa imong tun-an kon sa unsang paagi ang mga pagbati ni Alma nga Batan-on sa hilabihang kasakit tungod sa iyang mga sala nahimong mga pagbati sa kalipay ug kalinaw samtang siya nangamuyo ngadto sa Manluluwas. Samtang magtuon ka, pangitaa kon unsaon nimo pagtinguha ang tabang sa Ginoo sa pagbuntog sa sala ug sa mga epekto niini ug makasinati og kalipay pinaagi ni Jesukristo.

Dakong kausaban ni Alma

Human sa pagsalikway sa ebanghelyo nga gitudlo ngadto kanila, ang mga Zoramite nakigkonsabo sa mga Lamanite aron sa pagkutaw kanila sa kasuko batok sa mga Nephite. Dayon ang mga Zoramite ug mga Lamanite misulong sa mga Nephite, nga misangpot sa usa ka dakong gubat. Daghan usab sa mga kasingkasing sa mga Nephite “misugod sa pagkatig-a” batok sa pulong sa Dios (Alma 35:15). Agig pagsanong sa espirituhanon nga pagkunhod sa mga Nephite, si Alma mitawag sa iyang mga anak nga lalaki aron “makahatag ngadto kanila matag usa sa iyang katungdanan sa tinagsa-tagsa, mahitungod sa mga butang kabahin ngadto sa pagkamatarong” (Alma 35:16). Una siyang nakigsulti sa iyang anak nga lalaki nga si Helaman ug miasoy sa iyang kasinatian sa pagkakabig.

ang pagkakabig ni Alma nga Batan-on

• Unsa ang imong nahinumdoman mahitungod ni Alma nga Batan-on ug unsa ang gipakita niini nga hulagway?

Basaha ang Alma 36:6–11 ug pangitaa ang mga detalye nga mahimo nga imong nalaktawan.

icon, rekord

1. Tubaga ang mosunod nga mga pangutana:

   • Ngano sa imong hunahuna nga ang mga pulong sa anghel adunay kusog kaayo nga epekto ngadto kang Alma?

   • Gawas sa pagkakita og usa ka anghel, unsa kaha ang makadala sa usa ka tawo nga makaamgo nga kinahanglan siyang magbag-o?

Ang pagmarka sa mga tudling sa kasulatan makatabang nimo nga mas makasabot ug makahinumdom unsa ang gitudlo sa mga kasulatan. Makatabang kini kanimo nga mas sayon mahanduraw ang mga sundanan o mga pagtandi diha sa mga kasulatan. Makahimo usab kini nga mas dali unyang makit-an ang mahinungdanon nga mga tudling. Ang pagmarka mahimong maglakip sa paglinya, pagsirkolo, ug pagtugbaw [highlight] sa mga pulong ug mga hugpong sa mga pulong.

Basaha ang paghulagway ni Alma sa unsay iyang nasinati ug gibati sulod sa tulo ka adlaw nga dili siya makalihok diha sa mosunod nga mga hugpong sa mga bersikulo. Ikonsiderar ang pagmarka kon unsay gisugyot.

• Alma 36:12–16: mga pulong o mga hugpong sa mga pulong nga naghulagway sa gibati ni Alma mahitungod sa iyang mga sala

• Alma 36:17–18: mga pulong o mga hugpong sa mga pulong nga nagpakita kon unsay nahinumdoman ug gibuhat ni Alma nga misangpot sa iyang kausaban

• Alma 36:19–21: mga pulong o mga hugpong sa mga pulong nga naghulagway ni Alma nga mibati og butang nga sukwahi o lahi sa unsay una niyang nasinati

• Unsa ang nakapadani kanimo mahitungod sa unsay nagdala sa kabag-ohan ni Alma?

• Unsa nga mga kamatuoran ang atong makat-onan gikan sa iyang kasinatian?

Usa ka kamatuoran nga atong makat-onan mao nga si Jesukristo adunay gahom sa pagluwas kanato gikan sa kasakit sa atong mga sala ug pagpuno kanato sa hingpit nga kalipay.

• Giunsa pagdapit ni Alma ang gahom sa Manluluwas sa pagluwas?

Basaha ang mosunod nga mga pamahayag, ug hunahunaa kon sa unsang paagi kini makatabang nimo nga mas masabtan ang mga kamatuoran nga atong nakat-onan gikan sa kasinatian ni Alma. Mahimo nimong kopyahon ang hugpong sa mga pulong nga gusto nimong mahinumdoman ngadto sa mubo nga sulat o sa mga kilid [margins] sa imong mga kasulatan.

Si Presidente Boyd K. Packer (1924–2015) sa Korum sa Napulog Duha ka Apostoles mipasabot:

Presidente Boyd K. Packer

Wala gikinahanglan nga mahibaloan ninyo ang tanang butang sa dili pa moepekto diha kaninyo ang gahom sa Pag-ula. Pagbaton og hugot nga pagtuo kang Kristo; magsugod kini sa pag-epekto sa adlaw nga inyo kining pangayoon! (Boyd K. Packer, “Washed Clean,” Ensign, Mayo 1997, 10)

Si Elder Neil L. Andersen sa Korum sa Napulog Duha ka Apostoles mitudlo:

Elder Neil L. Andersen

Samtang kita matinuoron nga mokompisal sa atong mga sala, mopahiuli kutob sa atong mahimo ngadto sa nasakitan, ug mosalikway sa atong mga sala pinaagi sa pagsunod sa mga sugo, kita anaa sa proseso sa pagdawat sa kapasayloan. Uban sa panahon, kita mobati sa kasakit sa atong kasubo nga nag-anam og kawala, motangtang “sa mga kasaypanan gikan sa atong mga kasingkasing” ug magbaton og “kalinaw sa tanlag.” (Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 42)

• Unsa nga dugang nga mga panabot ang imong nakuha gikan sa mga pamahayag?

2. Pagpili og usa sa mosunod nga mga sitwasyon ug pagsulat og tubag base sa imong kaugalingong mga hunahuna ug unsay imong nakat-onan karon. Siguroha ang paggamit og usa o daghan pa nga mga bersikulo gikan sa Alma 36 sa imong tubag.

   Unsa ang imong isulti sa usa ka tin-edyer kinsa:

   • Mibati og tumang pagmahay ug kasakit tungod sa iyang mga sala.

   • Mibati nga ang iyang mga sala dili makalilisang ug mosulbad ra sa ilang mga kaugalingon sa paglabay sa panahon nga walay paghinulsol.

Paggahin og kadiyot sa pagpamalandong sa imong kaugalingong sitwasyon ug sa unsang paagi ang leksiyon karong adlawa magamit sa imong kinabuhi. Ikonsiderar ang usa ka butang nga mahimo nimong buhaton karon aron sa pagdangop ngadto sa Manluluwas ug pagdapit sa Iyang gahom sa pagluwas sa imong kinabuhi.

Opsiyonal: Gustong Makakat-on Pa og Dugang?

Alma 36:12–16. Unsa ang gipasabot sa pipila ka mga pulong nga gigamit ni Alma?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Presidente Boyd K. Packer

Gisakit [racked] nagpasabot nga “gitortyur.” Sa karaang panahon ang usa ka rack mao ang usa ka bayanan diin ipahigda ang biktima nga ang matag buol-buol ug pulsohan gigapos ngadto sa usa ka buburan [spindle] diin kon tuyukon makahimo og tumang kasakit.

Ang pangsamok [harrow] mao ang usa ka bayanan nga may mga tusok nga misiwil niini. Kon guyuron diha sa yuta, makalkal ang yuta. Ang mga kasulatan kanunayng naghisgot sa mga kalag ug mga hunahuna nga “gisamok” tungod sa kahasol sa konsensiya.

Ang gihasol [torment] nagpasabot sa “paglubag,”usa ka paagi sa pagpaantos nga hilabihan kasakit nga bisan ang inosente mokumpisal. (Boyd K. Packer, “The Touch of the Master’s Hand,” Ensign, Mayo 2001, 23)

Alma 36:19. Kon ako maghinulsol, malimot ba ako sa akong mga sala?

Naghisgot bahin sa panumdoman sa atong mga sala, si Elder Dieter F. Uchtdorf sa Korum sa Napulog Duha ka Apostoles mipasabot:

Presidente Dieter F. Uchtdorf

Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumdoman. Si Satanas bakakon; mosulay siya sa pagpahanap sa atong panan-aw ug mogiya kanato palayo sa dalan sa paghinulsol ug pagpasaylo. Ang Dios wala mosaad nga dili nato mahinumdoman ang atong mga sala. Ang paghinumdom motabang kanato nga malikayan ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo. Si Alma nagpamatuod nga human siya mituaw ngadto kang Jesus alang sa kaluoy, makahinumdom pa gihapon siya sa iyang mga sala, apan ang paghinumdom sa iyang mga sala wala na mohasol ug mosakit pa kaniya, tungod kay nasayod siya nga siya gipasaylo na (tan-awa sa Alma 36:17–19). (Dieter F. Uchtdorf, “Punto sa Luwas nga Pagbalik,” Liahona, Mayo 2007, 101)

Sa unsang paagi nga ang pag-antos nga nalambigit sa paghinulsol itandi sa pag-antos nga atong masinati kon kita dili maghinulsol?

Si Elder D. Todd Christofferson sa Korum sa Napulog Duha ka Apostoles mitudlo:

Elder D. Todd Christofferson

Bisan unsa nga kasakit nga gikinahanglan sa paghinulsol layo ra kay sa pag-antos nga gikinahanglan sa pagtagbaw sa kaangayan alang sa mga sala nga wala mahinulsoli. Ang Manluluwas namulong og gamay kabahin sa unsay Iyang giantos aron pagtagbaw sa gipangayo sa kaangayan ug pag-ula alang sa atong mga sala, apan Siya mihimo niining mapadayagon nga pamahayag:

“Kay tan-awa, Ako, ang Dios, nag-antos niini nga mga butang alang sa tanan, nga sila unta dili mag-antos kon sila maghinulsol;

“Apan kon dili sila maghinulsol sila kinahanglan gayod nga mag-antos sama kanako;

“Kansang pag-antos nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug buot nga Ako unta dili moinom sa mapait nga kopa” (D&C 19:16–18). (D. Todd Christofferson, “Ang Balaanong Gasa sa Paghinulsol,” Liahona, Nob. 2011, 40)