Mōsaia 19–20

“Kuo Fakahoko ʻa e Ngaahi Lea ʻa ʻApinetaí”

Tuʻi ko Noá

ʻOku finangalo e Tamai Hēvaní ke ke fiefia mo malu. Ko e founga ʻe taha ʻe lava ke ke aʻusia ai ʻa e fiefiá mo e maluʻi fakalaumālié ko e muimui ki he ngaahi akonaki mo e fakatokanga ʻa ʻEne kau palōfitá. ʻI hono fakafisingaʻi ʻe he tuʻi ko Noá ʻa ʻApinetaí, naʻe mole ai meiate ia mo hono kakaí ʻa e ngaahi tāpuaki ʻo e malú pea nau aʻusia ha mamahi lahi. ʻE lava ke tokoniʻi koe ʻe he lēsoni ko ʻení ke ke ongoʻi ha holi lahi ange ke tokanga ki he ngaahi fakatokanga mo e ngaahi akonaki ʻa e kau palōfita ʻa e ʻEikí.

Malu mei he fakatuʻutāmakí

Sio ki he ngaahi ʻīmisi ko ʻení pea talamai ʻa e fakatuʻutāmaki pe lavelavea ʻe lava ke taʻofi ʻe he ngaahi meʻa ʻoku ʻasi he fakatātaá.

sāketi fakahaofi moʻui, tatā pasikala, leta ki he kaka māʻolungá

• Ko e hā ʻa e ngaahi fakatuʻutāmaki ʻoku maluʻi kitautolu ʻe he ngaahi meʻa ko ʻení mei aí?

• ʻOkú ke pehē ko e hā ʻoku fili ai ha kakai ʻe niʻihi ke tukunoaʻi e ʻū meʻangāue pe fakahinohino ki he tuʻunga malú?

ʻOku ʻikai ngata pē ʻi he ngaahi fakatuʻutāmaki fakatuʻasinó, ka ʻoku kau foki mo e ngaahi fakatuʻutāmaki fakalaumālié ko ha konga ʻo ʻetau aʻusia fakamatelié. Koeʻuhí ʻoku ʻofa ʻa e ʻEikí ʻiate kitautolú, ʻokú Ne ui ha kau palōfita ke nau ʻomi kiate kitautolu ha ngaahi fakahinohino mo ha ngaahi meʻangāue ʻe lava ʻo tokoni ke tau aʻusia ai ha malu fakatuʻasino, fakalaumālie, mo fakaeloto ʻi he kotoa ʻo ʻetau moʻuí.

Fakaʻaongaʻi ha kiʻi taimi ke ke fakakaukau ai ki he malu ʻoku foaki atu ʻe he ʻEikí ʻo fakafou ʻi Heʻene kau palōfitá mo e kau ʻaposetoló. ʻE lava ke tokoni atu e ongo fehuʻi ko ʻení:

• Ko e hā hono tuʻo lahi hoʻo vakai ki he kau palōfita mo e kau ʻaposetolo ʻa e ʻEikí ko ha founga ke maʻu ai ʻEne maluʻi fakalaumālié?

• Ko e hā ha ngaahi sīpinga ʻo e founga ʻe lava ke tāpuekina ai koe ʻi hoʻo muimui ki he kau palōfita ʻa e ʻEikí?

ʻI hoʻo akó, kumi ki he ngaahi akonaki ʻe lava ʻo tokoni atu ke ke ongoʻi ai ha holi lahi ange ke fekumi ki he malu mo e fiefia ʻoku maʻu ʻi he muimui ki he palōfita ʻa e ʻEikí.

Ko e aʻusia ʻe he kakai ʻo e Tuʻi ko Noá ʻa e ngaahi nunuʻa ʻo ʻenau ngaahi angahalá

Ko ʻApinetai ʻi he ʻao ʻo e Tuʻi ko Noá

Manatuʻi naʻe fekauʻi ʻa ʻApinetai ke fakatokanga ki he kakai ʻo e Tuʻi ko Noá fekauʻaki mo ʻenau faiangahalá koeʻuhí ke nau lava ai ʻo fakaʻehiʻehi mei he fakamaau ʻa e ʻEikí ʻe hoko maí. (Mahalo naʻa ʻaonga ke fakamanatu ha niʻihi ʻo e ngaahi fakatokanga ʻa ʻApinetai ʻi he Mōsaia 11:20–25; 12:1–8.)

Toe vakaiʻi e tali ʻa Noa mo hono kakaí ki he ngaahi fakatokanga ʻa ʻApinetaí ʻaki hono lau e Mōsaia 12:13–15; 17:11–20.

• ʻOkú ke pehē ko e hā e ʻuhinga naʻe fili ai ʻe Noa mo ʻene kau taulaʻeikí ke tukunoaʻi e ngaahi fakatokanga ʻa ʻApinetaí?

• Ko e hā ha ngaahi sīpinga ʻo e founga ʻe lava ke tukunoaʻi pe fakasītuʻaʻi ai ʻe he kakaí ʻa e ngaahi akonaki ʻa e kau palōfitá ʻi hotau kuongá? ʻOkú ke pehē ko e hā e ʻuhinga ʻoku nau fai ai ʻení?

Hangē pē ko e kikite ʻa ʻApinetaí (vakai ki he Mōsaia 17:15–19), naʻe foua ʻe he kakai ʻo Noá ha ngaahi ʻahiʻahi faingataʻa hili ʻenau fakafisingaʻi e ngaahi folofola ʻa e ʻEikí mo e fakaafe ke fakatomalá. Mahalo te ke manatuʻi mei hoʻo ako ʻa e Mōsaia 7 naʻe ʻikai fuoloa mei he mālōlō ʻa ʻApinetaí, naʻe ʻilo ʻa e kakai ko ʻení ʻe ha kulupu fekumi mei Seilahemala naʻe taki ʻe ha tangata ko hono hingoá ko ʻĀmoni (vakai ki he fakatātā ʻi laló). ʻI he taimi ne nau ʻilo aí, naʻe hoko ʻa e kau Nīfai ʻi he fonua ko Nīfaí ko ha kau pōpula ʻo e kau Leimaná.

tā fakatātā ʻo e fononga ʻa e kau Nīfaí ke toe maʻu ʻa e fonua ko Nīfaí

Ko honau takí ko Limihai, ko e foha ʻo e Tuʻi ko Noá. Lau e ngaahi lea ʻa Limihai ʻi he Mōsaia 7:24–29, ʻo kumi e ngaahi ʻuhinga naʻá ne fakamatalaʻi ki he nofo pōpula ne nau aʻusiá.

• Ko e hā naʻá ke vakai ki ai ʻi he ngaahi veesi ko ʻení ʻe lava ʻo tokoni ki ha taha ʻoku ʻikai ke ne ongoʻi ʻoku mahuʻinga ke muimui ki he kau palōfita ʻa e ʻEikí?

• ʻI hono fakaʻaongaʻi e meʻa kuó ke laú, ko e hā ha ngaahi founga te ke lava ai ʻo fakaʻosi e sētesi ko ʻení ʻa ia ʻe ʻaonga ki he kakai ʻi hotau kuongá?

Ko e taʻetokanga pe fakasītuʻaʻi e folofola ʻa e ʻEikí ʻo fakafou ʻi Heʻene kau palōfitá, ʻoku iku ia ki he …

Lau ʻa e Mōsaia 19:3–21; 20:3, 21, ʻo kumi e ngaahi fakaikiiki ʻokú ne fakatātaaʻi ʻa e foʻi moʻoni ko e taʻetokanga pe fakasītuʻaʻi e folofola ʻa e ʻEikí ʻo fakafou ʻi Heʻene kau palōfitá, ʻoku iku ia ki he faingataʻaʻia mo e mamahi.

fakaʻilonga, lekooti

1. Tali e ongo fehuʻi ko ‘ení:

   • Ko e hā ha fakamoʻoni naʻá ke vakai ki ai ʻo ha faingataʻaʻia pe mamahi naʻe aʻusia ʻe he niʻihi fakafoʻituitui ʻi he ngaahi veesi ko ʻení?

   • Hili hoʻo vakai ki he faingataʻaʻia naʻe kātekina ʻe he kakaí ni mo ʻiloʻi naʻe fekauʻi mai ʻe he ʻEikí ha palōfita ke fakatokanga kiate kinautolú, ko e hā e meʻa ʻokú ke ako fekauʻaki mo e ʻEikí?

Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi tāpuaki te tau lava ʻo maʻu ʻi heʻetau tokanga ki he faleʻi ʻa e ʻEikí ʻoku fakafou mai ʻi Heʻene kau palōfitá:

Palesiteni M. Russell Ballard

Kuo fakahaaʻi ʻe he hisitōliá ʻoku ʻi ai ʻa e malu, nonga, tuʻumālie, mo e fiefia ʻi hono tali e faleʻi fakaepalōfitá. (M. Russell Ballard, “His Word Ye Shall Receive,” Ensign, May 2001, 65)

• Ko e hā ha ngaahi sīpinga mei hoʻo moʻuí pe folofolá ʻokú ne poupouʻi e lea ʻa Palesiteni Pālatí?

Ko e faleʻi ʻa e ʻEikí maʻaú

Hangē ko e kau palōfita ʻi he kuonga muʻá, ʻoku ʻomi ʻe he kau palōfita ʻo e ʻaho ní ʻa e faleʻi, ngaahi fakatokanga, mo e ngaahi tāpuaki ʻa e ʻEikí kuo talaʻofa maí. Ko e feituʻu ʻe taha te tau lava ʻo maʻu ai ha niʻihi ʻo e faleʻi ko ʻení ko e Ki Hono Fakamālohia ʻo e Toʻu Tupú (kiʻi tohi, 2022).

Tuku ha kiʻi taimi ke ke ako ai ha tefito ʻe taha pe lahi ange mei he kiʻi tohí. ʻI hoʻo akó, kumi e ngaahi meʻa ko ʻení:

1. Ngaahi tuʻunga moʻui ʻoku fakaafeʻi koe ʻe he ʻEikí ke ke moʻui ʻakí

2. Ngaahi fakatuʻutāmaki fakalaumālie ʻe ala hoko ʻi hono tukunoaʻi e faleʻi ʻa e ʻEikí

3. Ngaahi tāpuaki kuo talaʻofa mai tuʻunga ʻi he talangofua ki he ngaahi fakahinohino mo e ngaahi fakatokanga ʻa e ʻEikí

2. Hiki e (ngaahi) tefito naʻá ke akó pea tali e ngaahi fehuʻi ko ʻení:

   • Ko e hā ha niʻihi ʻo e ngaahi fakatuʻutāmaki ʻe ala hoko ʻi hono tukunoaʻi e faleʻi naʻá ke akó?

   • Ko e hā ha niʻihi ʻo e ngaahi tāpuaki ne talaʻofa maí?

   • ʻE tokoniʻi fēfē koe ʻe he muimui ki he ngaahi akonaki ko ʻení ke ke muimui lelei ange ai kia Sīsū Kalaisí?

Fakakaukau ki he meʻa kuó ke ako he ʻahó ni fekauʻaki mo e mahuʻinga ʻo e muimui ki he palōfita ʻa e ʻEikí. Fakaʻaongaʻi ha kiʻi taimi ke ke fakakaukau ai ki he founga ʻe lava ke ke muimui lelei ange ai ki he palōfitá pea mo e ʻuhinga ʻe mahuʻinga ai ke ke fai iá. Hiki hoʻo ngaahi fakakaukaú mo e ongo fakalaumālié ʻi hoʻo tohinoa akó.

Fili Pē: Fie Ako Lahi Ange?

Ko e hā ʻoku akoʻi mai ʻe he ngaahi fakatokanga fakaepalofitá fekauʻaki mo e ʻOtuá?

Naʻe akonaki mai ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā D. Todd Christofferson

Kuó u mālieʻia, pea kuó u ongoʻi, ʻa e ʻofa mamahi ʻa e kau palōfita ʻa e ʻOtuá ʻi heʻenau ngaahi fakatokanga ki he faiangahalá. ʻOku ʻikai ke fakaʻaiʻai kinautolu ʻe ha loto-holi ke fakahalaiaʻi [ha taha]. ʻOku tatau ʻenau loto-holi moʻoní mo e ʻofa ʻa e ʻOtuá; ko hono moʻoní, ko e ʻofa ia ʻa e ʻOtuá. ʻOku nau ʻofa ʻi he kakai ʻoku fekauʻi kinautolu ki aí, ʻo tatau ai pē pe ko hai kinautolu pea ko e hā honau ʻulungāngá. Hangē tofu pē ko e ʻEikí, ʻoku ʻikai loto ʻEne kau tamaioʻeikí ke faingataʻaʻia ha taha ʻi he ngaahi mamahi ʻo e angahalá mo e ngaahi fili halá. (D. Todd Christofferson, “Ko e ʻOfa ʻa e ʻOtuá,” Liahona, Nōvema 2021, 17)

Ko e hā ʻoku ʻikai ongoʻi ai ʻe he kakai ʻe niʻihi he taimi pē ko iá ʻa e ngaahi nunuʻa kovi ʻo hono tukunoaʻi ʻo e palōfitá?

Naʻe akoʻi mai ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Palesiteni Henry B. Eyring

Kuo fekauʻi mai ʻe he ʻOtuá ha kau tamaioʻeiki fakamatelie ʻa ia te nau lava, ʻi he Laumālie Māʻoniʻoní, ke tokoni ke tau fakatokangaʻi ʻa e meʻa ʻoku finangalo ke tau faí mo ia ʻokú Ne taʻofí. ʻOku ʻai ʻe he ʻOtuá ke matamatalelei e fili ʻo e totonú ʻaki ʻene tuku ke tau ongoʻi ʻa e ngaahi ola ʻo ʻetau ngaahi filí. Kapau te tau fili tonu, te tau maʻu e fiefiá—he moʻuí ni. Kapau te tau fili ʻa e koví, ʻoku hoko mai leva ʻa e mamahí mo e fakaʻiseʻisá—ʻi he moʻuí ni. Ko e ngaahi ola ko iá ʻoku pau. Ka ʻoku faʻa toloi kinautolu koeʻuhí ko ha taumuʻa. Kapau naʻe hoko mai e ngaahi taimí he taimi pē ko iá, he ʻikai fakatupulaki ʻe he fili ʻo e totonú ʻa e tuí. Pea koeʻuhí ʻoku faʻa fakatoloi maʻu pē ʻa e loto-mamahí he taimi ʻe niʻihi, ʻe fiemaʻu ha tui ke ongoʻi ʻa e fiemaʻu ke kole fakamolemole kei taimi koeʻuhí ko e angahalá kae ʻikai toki fai ʻi he hili ʻetau toki ongoʻi ʻa e mamahí mo hono ngaahi nunuʻa fakamamahí. (Henry B. Eyring, “Ko Ha Tukufakaholo Mahuʻinga ʻo e ʻAmanaki Leleí,” Ensign pe Liahona, Mē 2014, 24–25)