Seminelí
Mōsaia 21–24, Konga 2: Ko e Tafoki ki he ʻEikí ke Fakahaofi mei he Ngaahi Faingataʻá

“Mōsaia 21–24, Konga 2: Ko e Tafoki ki he ʻEikí ke Fakahaofi mei he Ngaahi Faingataʻá,” Tohi ʻa Molomoná - Tohi Lēsoni ʻa e Tokotaha Akó (2024)

“Mōsaia 21–24, Konga 2,” Tohi ʻa Molomoná - Tohi Lēsoni ʻa e Tokotaha Akó

Mōsaia 21–24, Konga 2

Ko e Tafoki ki he ʻEikí ke Fakahaofi mei he Ngaahi Faingataʻá

ʻĪmisi
ko ha toʻu tupu ʻoku tafoki ki he folofolá

ʻOkú ke faʻa tali fēfē e taimi ʻokú ke aʻusia ai e ngaahi ʻahiʻahí mo e ngaahi faingataʻá? ʻOkú ke pehē ko e hā ʻoku ʻunu ai ha kakai ʻe niʻihi ke ofi ange ki he ʻEikí kae holomui ha niʻihi meiate Iá? ʻOku tau ako ʻi he Mōsaia 21–24, naʻe tafoki ʻa e kakai ʻo Limihaí mo e kakai ʻo ʻAlamaá ki he ʻEikí ke maʻu ha mālohi mo ha fakatauʻatāina mei he nofo pōpulá. ʻOku fakataumuʻa e lēsoni ko ʻení ke tokoniʻi koe ke ke falala ki he Tamai Hēvaní mo Sīsū Kalaisi ke tokoniʻi koe ke ke ikunaʻi hoʻo ngaahi faingataʻá.

Fehangahangai mo e ngaahi ʻahiʻahi

ʻI he lēsoni kuo ʻosí, naʻe fakaafeʻi koe ke ke fakakaukau ki ha ʻahiʻahi ʻokú ke lolotonga aʻusia pe kuó ke aʻusia. Mahalo kuó ke ako ha niʻihi ʻo e ngaahi moʻoni ʻi hoʻo ako ʻa e Mōsaia 21–24 naʻe tokoni ke mahino kiate koe ʻa e ʻuhinga ʻoku fakaʻatā ai ʻe he ʻEikí ke ke aʻusia ʻa e ngaahi ʻahiʻahí. ʻI he ʻaho ní, toe fakakaukau ki ho ngaahi ʻahiʻahí, ka ʻi he taimi ko ʻení fakakaukau ki he founga kuó ke fehangahangai ai mo kinautolú. Mahalo te ke fie hiki ha ngaahi faingataʻa pe lavameʻa naʻá ke aʻusia mo ha ngaahi founga kuó ke ongoʻi ai e ivi tākiekina pe ngaahi tāpuaki ʻa e ʻEikí.

Ko e mālohi fai fakahaofi ʻo e ʻEikí

Mahalo te ke manatuʻi haʻo ako ki he kakai ʻo Limihaí (ʻi he fonua ko Nīfaí) mo e kakai ʻo ʻAlamaá (ʻi he fonua ko Heilamí). Naʻá na fakatou aʻusia ha ngaahi ʻahiʻahi faingataʻa lolotonga hono fakapōpulaʻi kinautolu ʻe he kau Leimaná. ʻOku ʻasi ʻi he fakatātā ko ʻení ʻenau ngaahi fononga ʻi he Mōsaia 21–24.

ʻĪmisi
fakatātā ʻo e ngaahi feituʻu ʻi he Mōsaia 21–24

Te ke ako he ʻahó ni ki he founga naʻe fakahaofi ai ʻe he ʻEikí ʻa e ongo kulupú fakatouʻosi mei he nofo pōpulá pea tataki ki he fonua ko Seilahemalá. ʻI hoʻo akó, manatuʻi hoʻo ngaahi ʻahiʻahí pea fekumi ki he ngaahi moʻoni ʻe tokoni ke ke ʻiloʻi ai e ngaahi founga ʻoku fakaʻaongaʻi ai ʻe he ʻEikí ʻa Hono mālohi faifakahaofí ʻi hoʻo moʻuí.

Faʻu ‘a e saati ko ení ‘i hoʻo tohinoa akó. Fakapapauʻi ʻokú ke fakaʻatā ha konga lahi ke lekooti ai ha ngaahi tali ʻi he puha takitaha.

Lau e folofola fekauʻaki mo ha falukunga kakai ʻe taha pe lahi ange, ʻo hiki ha fakamatala ʻi he sātí fekauʻaki mo e founga naʻe fakahaofi ai kinautolu mei honau ngaahi ʻahiʻahí. ʻE lava ke ke fakaʻilongaʻi ʻi hoʻo folofolá ʻa e ngaahi foʻi lea pe kupuʻi lea ʻoku mahuʻingamālie kiate koé.

Mōsaia 21–24: Mālohí mo e Fakahaofí

Tohi ʻa Molomoná – Tohi Lēsoni ʻa e Faiakó (2024)—“Mōsaia 21–24, Konga 2: Ko e Tafoki ki he ʻEikí ke Fakahaofi mei he Ngaahi Faingataʻá”

Kakai ʻo Limihaí
Mōsaia 21:13–16, 36; 22:1–13; 29:18–20

Kakai ʻo ʻAlamaá
Mōsaia 23:25–29; 24:8–25

Ko e hā ha ngaahi ngāue naʻe fai ʻe he kakaí ke nau maʻu ai e tokoni ʻa e ʻEikí?

Naʻe kau fēfē ʻa e ʻEikí ʻi honau fakahaofí?

Ko e hā ha ngaahi kupuʻi lea manako ʻe niʻihi ke manatuʻi mei he ngaahi veesi ko ʻení?

© 2023 by Intellectual Reserve, Inc. All rights reserved.

ʻĪmisi
fakaʻilonga, lekooti

  1. Tali e ngaahi fehuʻi ko ‘ení:

    • Ko e hā ha niʻihi ʻo e ngaahi ngāue naʻe fai ʻe he kakaí ke maʻu ai e tokoni ʻa e ʻEikí?

    • Ko e hā naʻá ke ako fekauʻaki mo e ʻEikí mo Hono mālohí ʻi hoʻo ako e ongo talanoa ko ʻení?

    • Ko e hā ha kupuʻi lea naʻá ke saiʻia taha ai naʻá ke maʻu mei ha taha ʻo e ngaahi veesi naʻá ke akó?

Ko hono ʻiloʻi mo fiefia ʻi he mālohi ʻo e ʻEikí

ʻI he ngaahi moʻoni lahi ʻoku lava ke tau ako mei he ngaahi veesi ko ʻení, mahalo kuó ke fakatokangaʻi mei hoʻo akó ko e taimi ʻoku tau tafoki ai ki he Tamai Hēvaní, te Ne poupouʻi kitautolu lolotonga hotau ngaahi ʻahiʻahí pea fakahaofi kitautolu ʻi he taimi pē ʻAʻana (vakai ki he Mōsaia 21:14–16). ʻOku tau toe ako foki ko e taimi ʻoku tau kātekina fiefia mo faʻa kātaki ai hotau ngaahi ʻahiʻahí, ʻe lava ʻe he ʻEikí ʻo fakamālohia kitautolu ke tau lava ʻo fuesia lelei ʻetau ngaahi kavengá (vakai ki he Mōsaia 24:15).

  • ʻOku tākiekina fēfē ʻe hono ʻiloʻi e ngaahi meʻa ko ʻeni fekauʻaki mo e ʻEikí ʻa e founga ʻokú ke fehangahangai ai mo ho ngaahi ʻahiʻahí?

  • Kuo tokoniʻi mo fakamālohia fēfē koe ʻe he ʻEikí, pe ko ha taha ʻokú ke ʻilo, ke ke kātekina ha ʻahiʻahi pe fuesia ha kavenga? Naʻe tākiekina fēfē ʻe he aʻusia ko ʻení hoʻo ngaahi ongo kiate Iá?

  ChurchofJesusChrist.org.  

Ko hoʻo ngaahi sitepu hokó

Fakakaukau ki he meʻa kuó ke ako he ʻahó ni ʻe lava ʻo tokoni atu ʻi he ngaahi ʻahiʻahi ʻokú ke fehangahangai mo iá.

  1. Fakakakato e ngaahi fakahinohino ko ʻení:

    Tānaki atu ha kōlomu foʻou ki he saati naʻá ke faʻu kimuʻa ange ʻi he lēsoní pea fakahingoa ʻa e ʻotu ki ʻolunga ʻo e kōlomu ko ʻení “Ko Au.” Fakakakato leva hoʻo kōlomu foʻoú ʻaki hono tali e ngaahi fehuʻi ko ʻení. (Kapau ʻoku ʻikai ha feituʻu ke fokotuʻu ai ha kōlomu foʻou, tali e ngaahi fehuʻí ʻi ha feituʻu kehe ʻi hoʻo tohinoa akó.)

    • Ko e hā ha ngaahi ngāue te ke lava ʻo fai ke maʻu lahi ange ai e tokoni ʻa e ʻEikí ʻi ho ngaahi ʻahiʻahi?

    • Ko e hā ha meʻa kuó ke ako he ʻahó ni fekauʻaki mo e ʻEikí ʻe lava ʻo tokoni ke mahino kiate koe ʻa e faʻahinga tokoni pe mālohi te Ne lava ʻo ʻoatu kiate koé?

    • Ko e hā ha ngaahi foʻi lea pe kupuʻi lea mei he ngaahi veesi naʻá ke akó ʻokú ke pehē ʻe lava ke felāveʻi mo ho ngaahi tūkungá? Ko e hā hono ʻuhingá?