Mōsaia 18

Ko e Fuakava ʻo e Papitaisó

ko ha toʻu tupu ʻoku papitaiso

ʻOku ʻi ai ha ngaahi fili ʻe niʻihi ʻoku mātuʻaki mahuʻinga te ne lava ʻo liliu e meʻa kotoa pē ʻi heʻetau moʻuí. Ko e taha ʻo e ngaahi fili ko iá ko hono fakahoko ha fuakava mo e ʻOtuá ʻo fakafou ʻi he ouau ʻo e papitaisó. Naʻe akoʻi ʻe ʻAlamā hono kakaí ʻi he vai ʻo Molomoná fekauʻaki mo e fuakava ʻoku tau fai mo e ʻOtuá ʻi he taimi ʻoku tau papitaiso aí. ʻE lava ke tokoni e lēsoni ko ʻení ke mahino lelei ange kiate koe ʻa e fuakava ʻo e papitaisó mo e founga te ne lava ai ʻo tākiekina ho vā fetuʻutaki mo e ʻOtuá pea mo e niʻihi kehé.

Ko hoʻo papitaisó

Ke kamata hoʻo ako he ʻaho ní, fakakaukau ki hoʻo papitaisó pea feinga ke manatuʻi e ngaahi fakaikiiki mei he ʻaho ko iá. Kapau ʻoku teʻeki ai ke papitaiso koe, fakakaukau ki he meʻa ʻokú ke ʻilo fekauʻaki mo e papitaisó pe ko e meʻa ʻokú ke manatuʻi mei hoʻo ʻalu ki ha papitaiso.

• Ko e hā hoʻo ngaahi manatu melie lelei taha mei he ʻaho ko iá? Naʻá ke ongoʻi fēfē?

• Kuo tākiekina fēfē ʻe hoʻo fili ke papitaisó ho vā fetuʻutaki mo e ʻOtuá pea mo e kakai kehé?

Ko e akoʻi ʻe ʻAlamā e ngaahi lea ʻa ʻApinetaí

Ko e fakamoʻoni ʻa ʻApinetai ʻi he ʻao ʻo Noá

ʻOku ʻi he Mōsaia 18 ʻa e fakamatala ki hono ʻakoʻi ʻe ʻAlamā, ʻa ia naʻe hoko ko ha taha ʻo e kau taulaʻeiki ʻa e Tuʻi ko Noá, ʻa e ngaahi lea ʻa ʻApinetaí ki ha niʻihi kehe. Naʻe pau ke faiako fakapulipuli holo pē ʻa ʻAlamā koeʻuhí naʻe loto e Tuʻi ko Noá ke tāmateʻi ia ʻi heʻene tui ki he fakamoʻoni ʻa ʻApinetai fekauʻaki mo Sīsū Kalaisí.

Lau ʻa e Mōsaia 18:1–7, ʻo kumi e meʻa naʻe akoʻi ʻe ʻAlamā ki he kakaí.

• Ko e hā naʻe akoʻi ʻe ʻAlamā fekauʻaki mo e Fakamoʻuí hili ʻene fanongo ki he fakamoʻoni ʻa ʻApinetaí?

• ʻOkú ke pehē ko e hā naʻe fili ai ʻe ʻAlamā ke akoʻi ʻa e meʻa naʻá ne akoʻí ʻi he ngaahi veesi ko ʻení?

Ko e fuakava ʻo e papitaisó

Hili hono akoʻi ʻe ʻAlamā ʻa e kakaí fekauʻaki mo e huhuʻí ʻo fakafou ʻia Sīsū Kalaisí, naʻá ne akonaki fekauʻaki mo e mahuʻinga ʻo e papitaisó. ʻOku lava ke tau ako mei heʻene ngaahi akonakí, ko e taimi ʻoku tau papitaiso aí, ʻoku tau fai ha fuakava mo e ʻOtuá. ʻI he hokohoko atu hoʻo ako e ngaahi akonaki ʻa ʻAlamaá, fakalaulauloto ki he meʻa ʻokú ke ʻilo fekauʻaki mo e fuakava ʻoku tau fakahoko ʻi he papitaisó pea fakafoʻou ʻi he taimi kotoa pē ʻoku tau maʻu ai e sākalamēnití, pea pehē ki ha faʻahinga fehuʻi pē ʻokú ke ala maʻu. Fekumi ʻi he faʻa lotu ke mahino lelei ange ʻa e founga ʻe lava ke tākiekina ai ʻe he fuakavá ni ho vā fetuʻutaki mo e ʻOtuá pea mo e niʻihi kehé.

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻo e fuakavá ʻo pehē:

ʻEletā D. Todd Christofferson

“Ko e fuakavá ko ha aleapau ʻi he vahaʻa ʻo e ʻOtuá mo e tangatá, ko ha felotoi ko hono ngaahi fiemaʻú ʻoku fokotuʻutuʻu ʻe he ʻOtuá (vakai, Bible Dictionary, “Covenant,” 651). ʻI he ngaahi aleapau fakalangi ko ʻení, ʻoku haʻisia mai e ʻOtuá ke ne poupouʻi, fakamāʻoniʻoniʻi, mo hākeakiʻi kitautolu ʻi haʻatau tukupā ke tauhi kiate Ia mo tauhi ʻEne ngaahi fekaú. (D. Todd Christofferson, “Ko e Mālohi ʻo e Ngaahi Fuakavá,” Ensign pe Liahona, Mē 2009, 20)

ʻI he Mōsaia 18:8–10, naʻe fakamatalaʻi ai ʻe ʻAlamā e fuakava ʻo e papitaisó. Lau ʻa e Mōsaia 18:8–10 pea fakakaukau ke fakaʻilongaʻi ʻa e meʻa ʻoku tau tukupā ke fai ʻi he taimi ʻoku tau papitaiso aí, pea fakaʻilongaʻi ʻi ha lanu pe founga kehe, ʻa e ngaahi tāpuaki ʻoku foaki mai ʻe he Tamai Hēvaní maʻatautolú.

Ko e Mōsaia 18:8–10 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

• ʻOkú ke pehē ʻoku ʻuhinga ki he hā ʻa e “tangi fakataha mo kinautolu ʻoku tangí” mo e “fakafiemālieʻi ʻa kinautolu ʻoku ʻaonga ki ai ʻa e fakafiemālié”? (veesi 9).

• Ko e hā ha ngaahi founga te tau lava ai ʻo “tuʻu ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē, pea ʻi he feituʻu kotoa pēé”? (veesi 9). Ko hai ʻokú ke ʻilo ko ha sīpinga lelei ia ʻo hono fai e meʻa ko ʻení?

• Ko e hā ha founga kuó ke mamata ai ki hono tāpuekina koe pe niʻihi kehé ʻe he ʻOtuá ʻaki e ngaahi talaʻofa ʻokú Ne fai mo kitautolu ʻo fakafou ʻi he papitaisó?

Ko hono tauhi hoʻo ngaahi fuakava ʻi he papitaisó

Ke tokoni atu ke ke ʻilo e founga ke tauhi lelei ange ai hoʻo fuakava ʻi he papitaisó, mahalo te ke fie mamata ʻi he ngaahi vitiō ko ʻení, ʻo kumi ha ngaahi sīpinga ʻo hono tauhi e ngaahi palōmesi naʻe fakamatalaʻi ʻe ʻAlamā ʻi he Mōsaia 18:8–10. ʻOku maʻu e ngaahi vitioó ʻi he ChurchofJesusChrist.org.

• “Kalapu Tapu Kapekapé” (4:56)

• “Mata ke Mamata” (mei he taimi 4:55 ki he 6:53)

• “[Ongo Vaʻe ʻo Teitoní]” (3:02)

• Ko e ngaahi foʻi lea mo e kupuʻi lea fē mei he veesi 8–10 naʻá ke sio naʻe fakatātaaʻí?

Fili ha taha ʻo e ngaahi palōmesi ʻoku tau fai ʻi he papitaisó naʻe vahevahe ʻe ʻAlamā ʻi he Mōsaia 18:8–10. Hangē ko ʻení, te ke lava ʻo fili ke “fefuaʻaki ʻa hoʻomou ngaahi kavengá” (veesi 8) pe “tauhi ʻene ngaahi fekaú” (veesi 10).

1. Lekooti e (ngaahi) talaʻofa naʻá ke fili ke tokanga taha ki aí pea tali ha fehuʻi ʻe tolu pe lahi ange mei he ngaahi fehuʻi ko ʻení:

   • Ko e hā ha ngaahi founga ʻe lava ke tauhi ai ʻe ha taha taʻu hongofulu tupu ʻa e palōmesi ko iá?

   • ʻOkú ke pehē ko e hā naʻe fakakau ai ia ʻe he Tamai Hēvaní ko ha konga ʻo ʻetau fuakava ʻi he papitaisó?

   • Kuo fakahaaʻi fēfē ʻe he Fakamoʻuí ʻa e sīpinga ʻo e founga ke tauhi ai e palōmesi ko iá?

   • Ko e fē ha taimi kuó ke tauhi ai, pe ko ha taha ʻokú ke ʻilo, ʻa e palōmesi ko iá? Ko e hā ha meʻa kuó ke ako mei he ngaahi aʻusia ko iá?

Fakaʻaongaʻi ha taimi ke hiki ʻi hoʻo tohinoá ʻa e ongo ʻokú ke maʻu ʻi hoʻo tauhi e ngaahi palōmesi ʻo e papitaisó naʻe vahevahe ʻe ʻAlamā ʻi he Mōsaia 18:8–10. Kuo founga fēfē haʻo tauhi lelei ha niʻihi ʻo e ngaahi palōmesi ko ʻení? Ko e hā ha ngaahi tūkunga te ke lava ai ʻo tauhi ha taha ʻo e ngaahi palōmesí? ʻOkú ke pehē ʻe liliu fēfē nai ho vā fetuʻutaki mo e ʻEikí pea mo e kakai kehé kapau te ke fai ia?

Fili Pē: Fie Ako Lahi Ange?

Ko e hā ʻoku mahuʻinga ai ke mahino ʻeku fuakava ʻi he papitaisó?

Naʻe akoʻi ʻe ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Joseph B. Wirthlin

Kuó u fakatokangaʻi ʻi heʻeku moʻuí kotoa ko e taimi ʻoku aʻu ʻo mahino kakato ai ki he kakaí ʻa e ngaahi tāpuaki mo e mālohi ʻo ʻenau fuakava ʻo e papitaisó, tatau ai pē pe ko ha kau ului foʻou pe kāingalotu fouloa ʻo e Siasí, ʻoku hoko ha fiefia lahi ki heʻenau moʻuí pea ʻoku nau fakahoko honau ngaahi fatongia ʻi he puleʻangá ʻi he loto-vēkeveke moʻoni. (“Alma the Elder: A Role Model for Today,” ʻi he Heroes from the Book of Mormon [1995], 84)

Mōsaia 18:14. Naʻe papitaiso nai ʻe ʻAlamā ʻa ia pē?

Naʻe fakamatala ʻa Palesiteni Siosefa Filitingi Sāmita (1876–1972) ʻo pehē:

Palesiteni Joseph Fielding Smith

Te tau lava ke pehē naʻe maʻu ʻe ʻAlamā ʻa e lakanga fakataulaʻeikí kimuʻa pea hohaʻasi ia mo e niʻihi kehé ʻe he Tuʻi ko Noá. Pe naʻe pehē pe ʻikai ka ʻoku ʻikai hano kehekehe koeʻuhí naʻe fakamatalaʻi mahino ʻi he Tohi ʻa Mōsaiá naʻá ne maʻu ʻa e mafaí [vakai, Mōsaia 18:13]. Kapau naʻá ne maʻu ʻa e mafai ke fai papitaisó, ko e fakamoʻoni ia naʻe ʻosi papitaiso ia.

Ko ia ai, ʻi he taimi naʻe papitaiso ai ʻe ʻAlamā ʻa ia mo Heilamí, naʻe ʻikai ko ha papitaiso ia ʻe ʻAlamā ia, ka ko e fakahaaʻi pē ki he ʻEikí ʻene loto-fakatōkilaló mo e fakatomala kakató. (Answers to Gospel Questions, comp. Joseph Fielding Smith Jr., 5 vols. [1957–66], 3:203)

Te u lava fēfē ʻo tauhi ʻeku fuakava ke tokangaʻi e niʻihi kehé?

Naʻe pehē ‘e Sisitā Seiloni ʻIupangikē ʻo e Kau Palesitenisī Lahi ʻo e Fineʻofá:

Sisitā Sharon Eubank

ʻI heʻetau hoko ko e kau mēmipa ʻo e Siasí kuo papitaisó, ʻoku tau fuakava ke tokangaekina ʻa kinautolu ʻoku faingataʻaʻiá. ʻOku ʻikai fiemaʻu ha paʻanga ia pe ko ha ngaahi feituʻu mamaʻo ki heʻetau ngāue fakafoʻituituí ka ʻoku fiemaʻu e tataki ʻa e Laumālie Māʻoniʻoní mo ha loto-hangamālie ke pehē ki he ʻEikí: “Ko au ʻeni; fekauʻi au.” (Sharon Eubank, “ʻOku ou Lotua Te Ne Ngāue ʻAki Kitautolu,” Liahona, Nōvema 2021, 55)