Seminary
Mosiah 7–8: Ang mga Propeta sa Ginoo isip mga Manalagna

“Mosiah 7–8: Ang mga Propeta sa Ginoo isip mga Manalagna,” Manwal sa Magtutudlo sa Basahon ni Mormon (2024)

“Mosiah 7–8,” Manwal sa Magtutudlo sa Basahon ni Mormon

Mosiah 7–8

Ang mga Propeta sa Ginoo isip mga Manalagna

Imahe
Presidente Russell M. Nelson

Sama nga ang Manluluwas adunay mga titulo nga nagtudlo kanato mahitungod Kaniya, ang mga sulugoon sa Ginoo adunay mga titulo nga makatabang kanato nga makasabot sa ilang mga tahas sa plano sa Langitnong Amahan. Sa dihang si Hari Limhi nangayo og tabang sa usa ka buluhaton nga wala niya mahibaloi kon unsaon sa paghuman, usa ka tawo nga ginganlan og Ammon mitudlo kaniya ngadto sa propeta. Gipasabot usab ni Ammon ngadto sa hari ang importante nga mga kamatuoran mahitungod sa tahas sa mga propeta, mga manalagna, ug mga tigpadayag. Kini nga leksiyon makatabang nimo nga masabtan ang kamahinungdanon sa mga propeta nga mga manalagna usab sa plano sa Langitnong Amahan.

Mga pangutana mahitungod sa mga propeta

Handurawa nga ang usa ka tawo nga imong kaila nakahibalo nga ikaw nagtuo sa modernong mga propeta. Moduol sila kanimo ug mangutana sa mosunod:

  • Nakadungog ko nga ang inyong simbahan adunay propeta. Unsa ang iyang gibuhat?

  • Nganong nagkinahanglan pa man kita og propeta karon?

  • Nakabasa ko sa online nga mihubad si Joseph Smith og karaan nga libro. Aduna bay laing karaan o modernong mga propeta nga nakahimo niana?

  • Unsay imong gituohan mahitungod sa mga propeta?

Ang Basahon ni Mormon naglangkob og daghang mga pagtulun-an mahitungod sa mga propeta, lakip kon giunsa sila sa paggamit sa Langitnong Amahan sa pagtabang kanato. Samtang magtuon ka, pamalandonga ang mga pangutana sa ibabaw ug tinguhaa ang paglig-on sa imong pagpamatuod sa mga propeta. Pangitaa usab ang mga tubag sa dugang nga mga pangutana nga aduna ka bahin sa mga propeta.

Tulo ka mga panaw

Tulo ka mga panaw sa mga Nephite importante nga masabtan alang niini nga leksiyon ug sa umaabot nga mga leksiyon. Tan-awa ang mosunod nga paghulagway, ug basaha ang pagpasabot sa mga panaw nga gihulagway.

Imahe
paghulagway sa mga panaw sa Nephite aron sa pagbawi sa yuta sa Nephi

Sa dihang ang amahan ni Hari Benjamin (Mosiah) mao ang hari, usa ka tawo nga ginganlan og Zeniff ang mibiya sa Zarahemla uban sa usa ka grupo sa mga tawo aron sa pagbawi sa yuta sa Nephi (tan-awa sa Mosiah 9:3–4). Ang grupo ni Zeniff wala na igdungog sulod sa daghang katuigan, mao nga ang sunod nga hari, si Mosiah (anak ni Hari Benjamin), mipadala og grupo nga gipangulohan ni Ammon aron sa pagpangita kanila (tan-awa sa Mosiah 7:1–3). Ilang nakaplagan ang mga katawhan ni Zeniff, kinsa gipangulohan sa apo ni Zeniff, si Hari Limhi. Ang katawhan ni Limhi naulipon sa mga Lamanite “tungod sa [ilang] mga kadautan” (Mosiah 7:20).

Si Hari Limhi misulti kang Ammon nga siya mipadala og usa ka grupo sa tigpangita aron sa pagpangita sa Zarahemla, apan wala sila magmalamposon. Nakadala hinoon sila pagbalik og mga relikyas gikan sa yuta paingon sa amihanan, lakip ang usa ka talaan nga gisulat sa 24 ka bulawan nga mga palid (tan-awa sa Mosiah 8:7–9). Si Hari Limhi naglaom nga si Ammon makahubad sa rekord o nakaila og tawo nga makahimo sa paghubad (tan-awa sa Mosiah 8:6, 11–12).

Basaha ang Mosiah 8:13–14, mangita kon kinsa ang giingon ni Ammon nga makahubad sa rekord ug ngano.

Mahimong makatabang ang pagkahibalo nga sila si Mosiah ug Joseph Smith adunay espesyal nga mga instrumento nga gitawag og Urim ug Thummim nga giandam sa Dios aron sa pagtabang kanila sa paghubad sa karaang mga rekord. (Tan-awa sa Mosiah 28:13–14; Joseph Smith—Kasaysayan 1:35. Kon gusto nimong mahibalo og dugang, pangitaa ang “Urim ug Thummim” sa Giya ngadto sa mga Kasulatan .)

Ang tahas sa usa ka manalagna

Basaha ang Mosiah 8:15–18 aron makat-on unsa ang mga manalagna ug nganong ang usa ka mahigugmaong Langitnong Amahan mihatag og mga manalagna alang kanato.

  • Unsay imong nakat-onan?

Usa ka kamatuoran nga gihulagway niini nga asoy mao nga ang Ginoo naghatag og mga propeta, mga manalagna, ug mga tigpadayag aron makahatag og kaayohan sa katawhan. Sa imong mga kasulatan, mahimo nimong markahan ang mga pulong o hugpong sa mga pulong nga nagtudlo niini nga kamatuoran o isulat kini nga kamatuoran duol sa mga bersikulo nga nagtudlo niini.

Ang Giya ngadto sa mga Kasulatan nagpasabot sa tahas sa usa ka manalagna sama sa mosunod:

Usa ka tawo nga gihatagan og katungod sa Dios sa pagkakita uban sa espirituhanong mga mata sa mga butang nga gitago sa Dios gikan sa kalibotan (Moises 6:35–38). Siya usa ka tigpadayag ug usa ka propeta (Mosiah 8:13–16). Diha sa Basahon ni Mormon, si Ammon mitudlo nga usa lamang ka manalagna ang makagamit og espesyal nga mga tighubad, o usa ka Urim ug Thummim (Mosiah 8:13; 28:16). Ang usa ka manalagna nasayud sa nangagi, karon, ug sa umaabot. Sa karaan, ang usa ka propeta sa kanunay gitawag nga usa ka manalagna (1 Sam. 9:9; 2 Sam. 24:11).

Si Joseph Smith mao ang bantogang manalagna sa ulahing mga adlaw (D&P 21:1; 135:3). Dugang pa, ang Unang Kapangulohan ug ang Konseho sa Napulog Duha gipaluyohan isip mga propeta, mga manalagna, ug mga tigpadayag. (Giya ngadto sa mga Kasulatan, “Manalagna,” scriptures.ChurchofJesusChrist.org)

Imahe
icon, rekord

  1. Tubaga ang mosunod nga mga pangutana:

    • Unsa ang imong nakat-onan mahitungod sa tahas sa propeta isip usa ka manalagna?

    • Ngano sa imong hunahuna nga ang Langitnong Amahan mohatag niini nga mga abilidad ngadto sa Unang Kapangulohan ug sa Korum sa Napulog Duha ka Apostoles?

    • Sa unsang paagi nga ang mga propeta, mga manalagna, ug mga tigpadayag ebidensiya sa gugma sa Dios alang kanimo?

Ang bili sa mga manalagna sa atong panahon

  1. Pagpili ug kompletoha ang bisan usa sa mosunod nga mga kalihokan aron sa pagtabang kanimo nga mas masabtan ang bili sa usa ka manalagna.

    • Paghunahuna og labing menos tulo ka mga sitwasyon diin ang pagkahibalo nga ang mga propeta sa Langitnong Amahan mga manalagna nga makatabang kanimo nga magpabiling matinud-anon sa Ginoo. Irekord kini nga mga sitwasyon.

    • Pagtuon og bag-ohay lang nga pakigpulong sa kinatibuk-ang komperensiya gikan sa usa ka sakop sa Unang Kapangulohan o sa Korum sa Napulog Duha ka Apostoles. Pagrekord og mga ehemplo nga naghulagway nga sila mga manalagna.

    • Dapita ang mga estudyante sa pagbasa sa “Mensahe gikan sa Unang Kapangulohan,” makita sa atubangan sa Alang sa Kalig-on sa mga Kabatan-onan nga booklet (2022, 2). Irekord kon sa unsang paagi sa imong hunahuna kini nga mensahe ug ang mga sumbanan nga gilakip niini nga pamphlet nagpakita nga ang mga miyembro sa Unang Kapangulohan mga manalagna.

    • Irekord ang mga kaayohan nga nasinati nimo o sa imong pamilya gikan sa pagsunod sa mga manalagna.

Mahimong makatabang ang pagkahibalo nga gihubad ni Hari Mosiah ang mga rekord (tan-awa sa Mosiah 28:11–19). Makabasa ka og bahin niadto nga mga rekord kon magtuon ka sa basahon ni Ether.

Bisan sa wala pa mahubad ang mga rekord, si Hari Limhi naimpluwensiyahan sa kahibalo nga si Hari Mosiah makahubad. Basaha ang Mosiah 8:19–20, mangita kon unsay reaksiyon ni Hari Limhi sa dihang iyang nahibaloan nga ang Dios nagtawag og mga propeta, mga manalagna, ug mga tigpadayag.

  • Sa unsang paagi nga ang pagbaton niini nga kahibalo nakaapekto kang Limhi?

Pamalandongi kon unsay imong gibati mahitungod sa Langitnong Amahan nga naghatag og mga propeta, mga manalagna, ug mga tigpadayag sa paggiya kanato karon. Mahimo nimong irekord ang imong mga hunahuna diha sa imong journal sa pagtuon.