“Mosiah 5:6–15: ‘Modala diha Kaninyo sa Ngalan ni Kristo,’” Manwal sa Magtutudlo sa Basahon ni Mormon (2024)
“Mosiah 5:6–15,” Manwal sa Magtutudlo sa Basahon ni Mormon
Mosiah 5:6–15
“Modala diha Kaninyo sa Ngalan ni Kristo”
Ang mga ngalan mahimong adunay dakong kahulogan. Unsa ang gipasabot sa pagdala diha sa imong kaugalingon sa ngalan ni Kristo? Ang Mosiah 5 naglangkob sa panapos sa pakigpulong ni Hari Benjamin ngadto sa iyang mga katawhan sa dihang iyang gipundok ang mga katawhan aron sa paghatag kanila og ngalan (tan-awa sa Mosiah 1:11). Kini nga leksiyon makatabang nimo nga makasabot sa kamahinungdanon sa pagdala diha kanimo sa ngalan ni Jesukristo.
Usa ka bag-ong ngalan
Handurawa ang usa ka ilo nga walay bisan usa nga motabang o moamuma kaniya kinsa sa kataposan makaila og usa ka mahigugmaon, lig-on nga pamilya nga nagtanyag sa pagsagop kaniya.
-
Unsa ang pipila ka mga rason nga ang ilo mahimong gusto nga sagopon ug mogamit sa ngalan sa ilang bag-ong pamilya?
-
Unsa nga mga panalangin ang ikatanyag sa iyang bag-ong inahan ug amahan nga dili mahatag sa ilo sa iyang kaugalingon?
-
Unsa kaha ang bation sa ilo bahin sa ilang bag-ong pamilya?
Sa iyang mahinungdanong pakigpulong ngadto sa iyang mga katawhan, si Hari Benjamin miingon, “Ako manghinaot nga kamo kinahanglan modala diha kaninyo sa ngalan ni Kristo” (Mosiah 5:8) ug pagatawgon nga “mga anak ni Kristo” (Mosiah 5:7). Pipila sa mga katawhan ni Hari Benjamin mga Nephite, ug ang uban mga kaliwat ni Mulek. Gusto ni Hari Benjamin nga ang tanang mga katawhan magkahiusa ubos sa usa ka ngalan sama sa usa ka pamilya.
Samtang magtuon ka sa mga kasulatan karon, pamalandongi ang mga paagi nga posibleng mamahimong mahisama ka sa ilo sa sitwasyon sa ibabaw ug ang Ginoo sama sa bag-ong ginikanan.
Aron matabangan ka nga makasabot unsay gitudlo ni Hari Benjamin, kopyaha ang mosunod nga tsart sa imong journal sa pagtuon.
|
Mga panalangin sa pagdala ngari kanato sa ngalan sa Manluluwas |
Giunsa nako pagdala ang ngalan sa Manluluwas ngari kanako |
|---|---|
Hinumdomi nga sa Mosiah 5:1–5, ang mga tawo mipamatuod nga ang Espiritu sa Ginoo mihimo og “usa ka dako nga kausaban” diha kanila ug nga sila “mauyunon sa pagsulod ngadto sa usa ka pakigsaad uban sa … Dios sa pagbuhat sa iyang kabubut-on” (Mosiah 5:2, 5).
Basaha ang Mosiah 5:6–10, mangita sa mga pulong ug hugpong sa mga pulong nga imong masulat ubos sa duha ka kolum sa imong tsart. Mahimong makatabang ang pagkahibalo nga ang tuo nga kamot sa Dios nagsugyot og simbolikong pagpabor ug nga ang wala nga kamot nagsimbolo sa dili pag-uyon.
-
Tubaga ang mosunod nga mga pangutana:
-
Unsa nga mga panalangin ang imong gusto sa imong kinabuhi nga ang Manluluwas lamang ang makahatag? (Ikonsiderar ang paggamit sa mga hugpong sa mga pulong nga imong naila gikan sa pakigpulong ni Hari Benjamin aron sa pagtubag niini nga pangutana.) Ngano nga gusto nimo kini nga mga panalangin?
-
Sa unsang paagi nga ang Manluluwas mahimong sama sa usa ka mahigugmaong ginikanan ngari kanato?
-
Sumala ni Hari Benjamin, sa unsang paagi ang mga tawo nahimong mga anak ni Kristo, o midala diha sa ilang mga kaugalingon sa ngalan ni Jesukristo?
-
Giunsa nato pagdala ang ngalan ni Kristo
Usa ka kamatuoran nga atong makat-onan gikan ni Hari Benjamin mao nga samtang kita mohimo ug motuman sa sagradong mga pakigsaad, kita mahimong mga anak ni Kristo ug modala diha sa atong kaugalingon sa Iyang ngalan.
Basaha ang mosunod nga pamahayag ni Presidente Dallin H. Oaks sa Unang Kapangulohan aron sa pagklaro kon giunsa nato pagdala ngari kanato ang ngalan sa Manluluwas.
Nagsunod sa sumbanan sa kasulatan, ang mga tawo nga nabunyagan nagsaksi sa atubangan sa Simbahan “nga sila tinuod nga naghinulsol sa tanan nilang mga sala, ug andam nga modala diha kanila sa ngalan ni Jesukristo, nga adunay determinasyon sa pag-alagad kaniya hangtod sa kataposan.” (D&P 20:37; tan-awa usab ang 2 Ne. 31:13; Moroni 6:3.) Kon kita moambit sa sakramento, atong gibag-o kini nga pakigsaad ug ang tanang ubang mga pakigsaad nga atong gihimo diha sa tubig sa bunyag. (Dallin H. Oaks, “Taking upon Us the Name of Jesus Christ,” Ensign, Mayo 1985, 80)
-
Sa unsang paagi nga ang paghimo ug pagtuman sa mga pakigsaad nakapaduol nimo sa Manluluwas?
Aron matabangan ka nga magpadayon sa pagpalawom sa imong pagsabot mahitungod sa pagdala sa ngalan ni Jesukristo, basaha ang Mosiah 5:11–13, 15, mangita og dugang tambag gikan ni Hari Benjamin mahitungod sa pagdala sa ngalan ni Jesukristo diha sa imong kaugalingon.
ChurchofJesusChrist.org
Paghunahuna og mga ehemplo nga imong nakita sa imong kinabuhi sa mga tawo nga nagdala diha sa ilang mga kaugalingon sa ngalan ni Kristo.
-
Unsa ang ilang gibuhat nga nagpakita nga ilang gidala diha sa ilang kaugalingon ang Iyang ngalan?
-
Unsa nga tahas ang mahimo sa sakramento sa pagtabang kanato sa pagbuhat niini nga mas maayo?
Ang ngalan ni Jesukristo
-
Aron matabangan ka sa pagtimbang-timbang kon unsa ka maayo ang imong pagdala sa ngalan sa Ginoo sa imong kaugalingon nga kasingkasing, tubaga ang bisan usa sa mosunod nga mga pangutana:
-
Unsa ang pipila ka mga paagi nga imong mapakita nga imong gidala diha sa imong kaugalingon ang ngalan ni Kristo?
-
Unsa nga mga panalangin ang miabot pinaagi sa pagdala diha sa imong kaugalingon sa ngalan ni Kristo?
-
Ikonsiderar ang mga hunahuna ug mga impresyon nga imong nadawat gikan sa Espiritu Santo samtang nagtuon ka karon. Hunahunaa kon unsay imong mahimo aron mas hingpit nga madala diha sa imong kaugalingon ang ngalan ni Kristo.