“Mōsaia 5:1–5: ʻIkai ha Toe Holi ke Fai Kovi,” Tohi ʻa Molomoná - Tohi Lēsoni ʻa e Tokotaha Akó (2024)
“Mōsaia 5:1–5,” Tohi ʻa Molomoná - Tohi Lēsoni ʻa e Tokotaha Akó
Mōsaia 5:1–5
ʻIkai ha Toe Holi ke Fai Kovi
ʻI he taimi ʻe niʻihi, mahalo te tau ongoʻi ʻoku fiemaʻu ke tau fakahoko ha ngaahi liliu pe fakaleleiʻi ha meʻa kuo tau fai. Naʻe ongoʻi pehē ʻa e kakai ʻo e Tuʻi ko Penisimaní hili ʻenau fanongo kiate ia ʻo kau kia Sīsū Kalaisi mo e meʻa ʻokú Ne fakahaofi kitautolu mei aí. ʻE lava ke tokoniʻi koe ʻe he lēsoni ko ʻení ke fakatupulaki hoʻo holi ke liliú pe hokohoko atu hoʻo liliu ʻi he tokoni ʻa e ʻEikí.
Hoko ʻo hangē ko Sīsū Kalaisí
Vakai ki he ngaahi ʻopuseki ko ʻení pea fakakaukau ki he founga ʻoku liliu ai ha meʻa ki ha tuʻunga kehe.
-
Ko e hā ʻokú ne fakatupu e liliu ʻa e ngaahi meʻa ko ʻení?
-
Ko e hā e ngaahi ʻuhinga ʻoku liliu ai e kakaí?
-
ʻE founga fēfē hano liliu ʻe he ʻEikí hotau lotó ke faitatau pe kehekehe mei he founga ʻoku liliu ai e ngaahi meʻa ko ʻení?
Fakakaukau ki he lahi hoʻo ongoʻi ʻoku fakaʻaongaʻi e fakamatala ko ʻení kiate koé:
-
ʻOku ou fiemaʻu ke tokoniʻi au ʻe he ʻEikí ke u liliu ʻo toe lelei ange.
Fakaʻaongaʻi ha miniti ʻe taha pe ua pea fakakaukau ki he ʻuhinga ʻokú ke ongoʻi pehē aí. ʻE lava ke kau heni ʻa e fakalaulauloto ki he ngaahi founga naʻe lava ke tokoniʻi ai koe ʻe he ʻEikí ʻi he kuohilí.
ʻI hoʻo ako ʻa e Mōsaia 5, kumi ha ngaahi ʻuhinga te ke fie kolea ai e tokoni ʻa e ʻEikí ke ke liliu mo fakalakalaka aí.
Ko hono aʻusia ha liliu ʻo e lotó
Hili e lea ʻa e Tuʻi ko Penisimaní ki hono kakaí, naʻá ne fie ʻilo pe naʻa nau “tui ki he ngaahi lea kuó ne lea ʻaki kiate kinautolú” (Mōsaia 5:1).
Lau ʻa e Mōsaia 5:1–5 ke ʻilo e founga naʻa nau tali aí. Mahalo ʻe tokoni ke ʻiloʻi ʻoku ʻuhinga ʻa e foʻi lea holí ki he aafe pe fakahehema ʻa ha taha, ʻa e meʻa ʻoku nau fakamamafa ki aí. Mahalo te ke fie mamataʻi ʻa e foʻi vitiō “ʻOku Fakahoko ʻe he Kakai ʻo e Tuʻi ko Penisimaní ha Fuakava” mei he taimi 0:00 ki he 1:37, ʻa ia ʻoku maʻu ʻi he ChurchofJesusChrist.org.
Fakakakato ʻa e saati ko ʻení ʻo fakatefito ʻi he meʻa naʻá ke akó.
|
Founga naʻe liliu ai e kakaí |
Ko e hā naʻe tupu ai e liliu ʻa e kakaí |
|---|---|
Founga naʻe liliu ai e kakaí
| Ko e hā naʻe tupu ai e liliu ʻa e kakaí
|
Fakatefito ʻi he Mōsaia 5:1–5, fakakakato e kupuʻi lea ko ʻení.
ʻI he liliu hotau lotó ʻo fakafou ʻi he Laumālie ʻo e ʻEikí, ʻoku …
ʻE ala tokoni ke lekooti ʻa e moʻoni pe ngaahi moʻoni naʻá ke ʻiloʻí ʻi hoʻo folofolá.
ʻOku mahuʻinga ke mahino neongo naʻe “ʻikai ke toe maʻu [ʻe he kakai ʻo e Tuʻi ko Penisimaní] ha holi [pe fakahehema] ke faikovi” (Mōsaia 5:2), ʻoku ʻikai ʻuhinga ʻeni naʻe ʻikai ke nau toe faiangahala. Ka naʻe liliu ʻe he ʻEikí honau lotó ke nau holi fakamātoato ke failelei pea fakaʻehiʻehi mei he angahalá.
-
Tali ha fehuʻi ʻe ua pe lahi ange mei he ngaahi fehuʻi ko ʻení.
-
Ko e fē ha taimi kuó ke maʻu ai ha holi lahi, hangē ko e kakai ʻo e Tuʻi ko Penisimaní, ke “failelei maʻu ai pē”? Ko e hā naʻá ne tokoniʻi koe ke ke ongoʻi peheé?
-
ʻOkú ke pehē ko e hā ʻoku ʻikai ongoʻi pehē ai ha tokolahi ʻo kitautolu he taimi kotoa peé?
-
ʻOkú ke pehē ko e hā ʻe lava ke fai ʻe ha taha ke ne faʻa ongoʻi pehē aí?
-
Ko e mahino ʻa e liliú
Fakakaukau ke fakaʻilongaʻi ʻi he Mōsaia 5:3 ʻa e kupuʻi lea “ʻi he fungani angalelei taʻe-fakangatangata ʻa e ʻOtuá.” Ke mahino moʻoni kiate kitautolu ʻa e liliu naʻe hoko ʻi he kakai ʻo e Tuʻi ko Penisimaní, kuo pau ke mahino kiate kitautolu ʻa e founga ʻe lava ke tokoniʻi ai kitautolu ʻe Sīsū Kalaisi ke tau liliú.
Naʻe fakamatalaʻi ʻe Sisitā Uenitī W. Nalesoni ʻo pehē:
Ko e Fakamoʻuí ʻa e tupuʻanga taupotu taha mo moʻoni mo moʻui pē taha ʻo e liliú. Ko e tupuʻanga Ia ʻo e liliu kotoa pē. … Te Ne ʻomi ʻa e lelei taha ʻiate koé, ʻi hoʻo tafoki kiate Iá. Ko e moʻoni te Ne fakahaofi ʻa e meʻa kotoa pē ʻoku lelei taha ʻiate koé. …
… ʻOkú Ne ʻofa ʻiate koe. ʻOkú Ne tanganeʻia ʻi hoʻo feinga ke liliú.
Ko ʻEne fakaʻamú ke ke liliu, ke ke fakaʻau ʻo siʻaki ʻaupito ʻa e tangata fakakakanó, ke liliu ho lotó, pea liliu ho natulá. Naʻe fai ʻe Sīsū Kalaisi ʻa e meʻa kotoa naʻá Ne faí kae lava ke ke liliu! Ko Ia hoʻo Fakamoʻuí mo hoku Fakamoʻuí!
Pea ʻi heʻetau tautapa maʻu pē ki he mālohi ʻo ʻEne feilaulau fakalelei mo taʻefakangatangatá ke fakaʻaongaʻi ʻi heʻetau moʻuí, ʻe hanga ʻe Heʻene fakamoʻui taupotu tahá ʻo ʻomi ki heʻetau moʻuí takitaha ʻa e liliu taupotu taha ʻoku tau fekumi fakamātoato ki aí. (Wendy W. Nelson, “Change: It’s Always a Possibility!” [Brigham Young University devotional, April 7, 1998], 10, speeches.byu.edu)
-
Tali e ongo fehuʻi ko ‘ení:
-
Fakatatau kia Sisitā Nalesoní, ko e hā ʻe lava ke fai ʻe Sīsū Kalaisi ke tokoniʻi kitautolu ke tau liliú?
-
Ko e hā naʻá ke ako fekauʻaki mo hoʻo fatongia ke liliú?
-
Fakakaukau ki ha taha ʻokú ke ʻilo kuo liliu ʻi he tokoni ʻa Sīsū Kalaisí. Kapau ʻoku ʻikai ke ke lava ʻo fakakaukau ki ha taha, fakakaukau ke mamataʻi ʻa e “Ko ha Liliu ʻo e Lotó” (4:39), ʻa ia ʻoku ʻi he ChurchofJesusChrist.org.
-
Naʻe tokoniʻi fēfē ʻe he ʻEikí ʻa e tokotahá ni?
-
Ko e hā ha ngaahi ngāue fakafoʻituitui naʻe fai ʻe he tokotahá ni ke liliú?
-
ʻOkú ke pehē ko e hā ʻoku iku ai e ngaahi liliu ko ʻení ki ha fiefia lahi angé?
Ko hono fakahoko ʻo e liliú ke tuʻuloá
Ke fakaʻosi hoʻo akó, fakakaukau ki hoʻo moʻuí mo hoʻo fakalakalaka lolotonga ki he hoko ʻo hangē ko e Tamai Hēvaní mo Sīsū Kalaisí. Fakalaulauloto ki he meʻa ʻokú ke ongoʻi ʻe fiemaʻu ʻe he Laumālie Māʻoniʻoní ke ke fai ko ha ola ʻo e meʻa naʻá ke ako mo ongoʻí.