« យ៉ាកុប ២:១–២១ ៖ ‹ សូមកុំឲ្យសេចក្តីឆ្មើងឆ្មៃ … បំផ្លាញព្រលឹងទាំងឡាយរបស់អ្នកឡើយ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« យ៉ាកុប ២:១–២១ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
យ៉ាកុប ២:១–២១
យ៉ាកុប ២:១–២១ ៖ « សូមកុំឲ្យសេចក្តីឆ្មើងឆ្មៃ … បំផ្លាញព្រលឹងទាំងឡាយរបស់អ្នកឡើយ »
ព្យាការីយ៉ាកុបបានដឹងតាមរយៈវិវរណៈមកពីព្រះថា ប្រជាជនសាសន៍នីហ្វៃកំពុងពុះពារនឹងអំពើបាបជាច្រើន ។ លោកបានប្រកាសការបង្រៀនមួយនៅព្រះវិហារបរិសុទ្ធដើម្បីដោះស្រាយអំពើបាបទាំងនេះ រួមទាំងអំពើបាបនៃសេចក្តីឆ្មើងឆ្មៃផងដែរ ។ យើងទាំងអស់គ្នាមានការលំបាកជាមួយនឹងសេចក្តីឆ្មើងឆ្មៃនៅពេលខ្លះ ។ មេរៀននេះអាចជួយអ្នកឲ្យប្រែកាន់តែដូចជាព្រះយេស៊ូវគ្រីស្ទដោយការទទួលស្គាល់ ហើយទប់ទល់នឹងអំពើបាបនៃសេចក្តីឆ្មើងឆ្មៃ ។
សេចក្តីឆ្មើងឆ្មៃ
សូមរកមើលភស្តុតាងនៃសេចក្តីឆ្មើងឆ្មៃនៅក្នុងស្ថានភាពដូចខាងក្រោម ៖
-
ខូជីសង្ឃឹមថាមិត្តរួមក្រុមមានកំហុសក្នុងអំឡុងពេលការប្រកួត ដូច្នេះគាត់អាចទទួលបានម៉ោងលេងបន្ថែមទៀត ។
-
ស៊ីលវៀបំផ្លើសស្នាដៃរបស់នាង ដើម្បីមើលទៅថា វាល្អជាង ឬសំខាន់ជាងស្នាដៃរបស់អ្នកដទៃ ។
-
ចិនស៍មិនប្រកាន់យកការដឹងគុណ និងមិនទទួលស្គាល់អំពើល្អដែលអ្នកដទៃធ្វើទេ ។
-
អេមីចំអកអ្នកដទៃ ហើយសើចចំអកពីក្រោយខ្នងពួកគេ ។
-
តើភស្ដុតាងអ្វីខ្លះនៃសេចក្តីឆ្មើងឆ្មៃដែលអ្នកបានរកឃើញ ?
ប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) បានបង្រៀន ៖
សេចក្តីឆ្មើងឆ្មៃជាអំពើបាបដែលអាចមើលឃើញយ៉ាងងាយចំពោះអ្នកដទៃ ប៉ុន្តែកម្រទទួលសារភាពថាខ្លួនយើងមានសេចក្តីឆ្មើងឆ្មៃណាស់ ។ ( Teachings of Presidents of the Church: Ezra Taft Benson [ ឆ្នាំ ២០១៤ ] ទំព័រ ២៣៥ )
ឥឡូវនេះ សូមគិតអំពីព្រះអង្គសង្គ្រោះ ។ ទោះបីជាមានសមិទ្ធិផល និងសមត្ថភាពជាច្រើនរបស់ទ្រង់ក៏ដោយ ទ្រង់តែងតែស្លូតបូត និងបន្ទាបព្រះកាយ ( សូមមើល ម៉ាថាយ ១១:២៩ ) ។ នៅពេលអ្នកសិក្សា សូមគិតអំពីរបៀបនានាដែលសេចក្តីឆ្មើងឆ្មៃអាចបង្ហាញនៅក្នុងជីវិតរបស់អ្នក ។ មេរៀននេះអាចជួយអ្នកឲ្យប្រែកាន់តែដូចជាព្រះយេស៊ូវគ្រីស្ទដោយការទប់ទល់នឹងអំពើបាបនៃសេចក្តីឆ្មើងឆ្មៃ ។
« សូមកុំឲ្យសេចក្តីឆ្មើងឆ្មៃ … បំផ្លាញព្រលឹងទាំងឡាយរបស់អ្នកឡើយ »
ព្រះអម្ចាស់បានជួយព្យាការីយ៉ាកុបដឹងគំនិតរបស់ប្រជាជន ហើយបានត្រាស់បង្គាប់លោកឲ្យទៅព្រះវិហារបរិសុទ្ធ ហើយថ្លែងទីបន្ទាល់ប្រឆាំងនឹងអំពើបាបរបស់ពួកគេ រួមទាំងអំពើបាបនៃសេចក្តីឆ្មើងឆ្មៃ ( សូមមើល យ៉ាកុប ២:១–១៣ ) ។
នៅក្នុងសៀវភៅកំណត់ហេតុការសិក្សារបស់អ្នក សូមគូសបន្ទាត់នៅកណ្តាលទំព័រ ។ នៅខាងឆ្វេងទំព័រខាងលើ សូមសរសេរ « ការបង្ហាញនៃសេចក្តីឆ្មើងឆ្មៃ » ។ នៅខាងលើនៃជ្រុងខាងស្តាំ សូមសរសេរថា « របៀបដែលយើងអាចធ្វើដូចជាព្រះអង្គសង្គ្រោះ ហើយទប់ទល់នឹងសេចក្តីឆ្មើងឆ្មៃ » ។
សូមអាន យ៉ាកុប ២:១២–១៦ ដោយរកមើលការបង្ហាញនៃសេចក្តីឆ្មើងឆ្មៃ ។ សូមបន្ថែមចំណុចទាំងនោះទៅចំហៀងខាងឆ្វេងនៃសៀវភៅកំណត់ហេតុការសិក្សារបស់អ្នក ។ អ្នកក៏អាចមើល « Jacob Teaches about Pride » មាននៅលើ ChurchofJesusChrist.orgពីនាទីទី ០:២៣ ដល់នាទីទី ៤:៣៩ ។
សេចក្តីពិតមួយ ដែលយើងអាចរៀនពីវគ្គបទគម្ពីរនេះគឺថា សេចក្តីឆ្មើងឆ្មៃបំផ្លាញព្រលឹងទាំងឡាយរបស់យើង ( យ៉ាកុប ២:១៦ ) ។
-
សូមឆ្លើយសំណួរខាងក្រោមនេះ ៖
-
តើអ្នកគិតថាសេចក្តីឆ្មើងឆ្មៃអាចបំផ្លាញព្រលឹងរបស់យើងដោយរបៀបណា ?
-
តើអ្នកគិតថាការព្រមានរបស់យ៉ាកុបនៅតែទាក់ទងយ៉ាងណានាពេលសព្វថ្ងៃនេះ ?
-
អែលឌើរ ឌៀថើរ អេហ្វ អុជដូហ្វ កាលនោះជាគណៈប្រធានទីមួយ និងប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) បានចែកចាយរបៀបបន្ថែមទៀត ដែលសេចក្តីឆ្មើងឆ្មៃអាចបង្ហាញនៅក្នុងជីវិតរបស់យើង ។ សូមបន្ថែមការយល់ដឹងជាពាក្យសម្តីរបស់ពួកគេទៅចំហៀងខាងឆ្វេងសៀវភៅកំណត់ហេតុការសិក្សារបស់អ្នក ។
សត្រូវស្លាប់រស់នៃសេចក្ដីសប្បុរសគឺភាពឆ្មើងឆ្មៃ ។ ភាពឆ្មើងឆ្មៃគឺជាមូលហេតុចម្បងដែលធ្វើឲ្យចំណងអាពាហ៍ពិពាហ៍ និងក្រុមគ្រួសារមានបញ្ហា ។ ភាពឆ្មើងឆ្មៃគឺការរហ័សខឹង ចិត្តអាក្រក់ និងការច្រណែន ។ ភាពឆ្មើងឆ្មៃលើកបំប៉ោងខ្លួនឯង ហើយច្រានចោលគុណធម៌ពីមនុស្សដទៃ ។ ភាពឆ្មើងឆ្មៃគឺអាត្មានិយម ហើយងាយបង្កហេតុ ។ ភាពឆ្មើងឆ្មៃបង្កើតឲ្យមានចេតនាអាក្រក់នៅកន្លែងដែលគ្មានចេតនាអាក្រក់ ហើយលាក់ភាពទន់ខ្សោយខ្លួនក្នុងការដោះសារដ៏ឆ្លាតវៃ ។ ភាពឆ្មើងឆ្មៃមើលឃើញតែរឿងអាក្រក់ ទុទិដ្ឋិនិយម ហើយគ្មានការអត់ធ្មត់ ។ ប្រាកដណាស់ បើគ្មានសេចក្ដីសប្បុរសដែលជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទទេ នោះភាពឆ្មើងឆ្មៃជាលក្ខណៈសម្បត្តិរបស់សាតាំង ។ ( ឌៀថើរ អេហ្វ អុជដូហ្វ « In Praise of Those Who Save » Ensign ឬ Liahona ខែ ឧសភា ២០១៦ ទំព័រ ៨០ )
ពួកយើងភាគច្រើនចាត់ទុកថា សេចក្តីឆ្មើងឆ្មៃគឺជាអំពើបាបមួយរបស់មនុស្សដែលមានឋានៈខ្ពស់ ដូចជាពួកអ្នកមាន និងអ្នកចេះដឹងជាដើម ដែលមើលងាយមកលើពួកយើងទាំងអស់គ្នា ។ ( សូមមើល នីហ្វៃទី២ ៩:៤២ ) ។ ប៉ុន្ដែមានជំងឺទូទៅមួយខ្លាំងជាងនេះនៅក្នុងចំណោមពួកយើង—ហើយនោះគឺជាសេចក្តីឆ្មើងឆ្មៃពីអ្នកតូចឡើងទៅ ។ វាបង្ហាញតាមរបៀបជាច្រើនក្រៃលែង ដូចជាការស្វែងរកកំហុស ការនិយាយដើមគេ ការនិយាយអាក្រក់ពីក្រោយខ្នងគេ ការរអ៊ូរទាំ ការរស់នៅហួសសមត្ថភាពដែលយើងរកបាន ការច្រណែនឈ្នានីស ការលោភលន់ ការមិនចេះដឹងគុណ និងការមិនសរសើរដែលអាចលើកស្ទួយមនុស្សដទៃ ព្រមទាំងការមិនអភ័យទោស និងការច្រណែនឈ្នានីស ។ ( Teachings of Presidents of the Church: Ezra Taft Benson [ ឆ្នាំ ២០១៤ ] ទំព័រ ២៣៥ )
-
តើមានរបៀបអ្វីបន្ថែមទៀតដែលអ្នកឃើញសេចក្តីឆ្មើងឆ្មៃដែលបង្ហាញនៅក្នុងពិភពលោករបស់យើងសព្វថ្ងៃនេះ ?
-
តើសេចក្តីឆ្មើងឆ្មៃផ្ទុយពីបុគ្គលិកលក្ខណៈរបស់ព្រះយេស៊ូវគ្រីស្ទយ៉ាងដូចម្ដេច ?
សូមផ្អាក ហើយពិចារណាពីគំនិត និងសកម្មភាពផ្ទាល់របស់អ្នក ។ តើពេលខ្លះអ្នកពុះពារនឹងអំពើបាបនៃសេចក្តីឆ្មើងឆ្មៃដោយរបៀបណា ? តើការបង្ហាញសេចក្តីឆ្មើងឆ្មៃទាំងនេះជះឥទ្ធិពលដល់ទំនាក់ទំនង និងសុភមង្គលរបស់អ្នកយ៉ាងដូចម្តេច ? តើអ្នកចង់ផ្លាស់ប្តូរអ្វី ? ហេតុអ្វី ?
ការយកឈ្នះលើសេចក្តីឆ្មើងឆ្មៃ
យ៉ាកុបបានបង្រៀនពីរបៀបដែលយើងអាចទទួលបានសេចក្ដីសង្ឃឹមក្នុងព្រះគ្រីស្ទ ហើយទប់ទល់នឹងអំពើបាបនៃសេចក្តីឆ្មើងឆ្មៃ ។
សូមអាន យ៉ាកុប ២:១៧–២១ ដោយរកមើលរបៀបនានាដែលអ្នកអាចចៀសវាងអំពើបាបនៃសេចក្តីឆ្មើងឆ្មៃ ។ សូមបន្ថែមរបៀបទាំងនោះទៅផ្នែកខាងឆ្វេងនៃសៀវភៅកំណត់ហេតុការសិក្សារបស់អ្នក ។ អ្នកក៏អាចមើល « Jacob Teaches about Pride » មាននៅលើ ChurchofJesusChrist.orgចាប់ពីនាទីទី ៤:៤០ ដល់នាទីទី ៥:៤៤ ។
-
សូមឆ្លើយសំណួរខាងក្រោមនេះ ៖
-
តើការធ្វើតាមការទូន្មានរបស់យ៉ាកុបអាចជួយយើងទប់ទល់នឹងសេចក្តីឆ្មើងឆ្មៃ ហើយទទួលបានសេចក្ដីសង្ឃឹមក្នុងព្រះគ្រីស្ទយ៉ាងដូចម្ដេច ?
-
តើអ្នកដឹងថានរណាជាគំរូដ៏ល្អនៃការទប់ទល់នឹងសេចក្តីភាពឆ្មើងឆ្មៃតាមរបៀបដែលបានពិពណ៌នានៅក្នុងខគម្ពីរទាំងនេះ ? តើពួកគេធ្វើការងារអ្វី ?
-
តើលក្ខណៈដូចព្រះគ្រីស្ទអ្វីខ្លះដែលយើងអាចផ្ដោតលើ និងអភិវឌ្ឍដែលនឹងជួយយើងឲ្យចៀសវាងពីសេចក្តីឆ្មើងឆ្មៃ ? ហេតុអ្វី ឬដោយរបៀបណា ដែលលក្ខណៈទាំងនោះអាចមានប្រយោជន៍ ?
-
សូមសញ្ជឹងគិតពីតម្រូវការផ្ទាល់ខ្លួនរបស់អ្នក ដើម្បីទទួលស្គាល់ និងទប់ទល់នឹងអំពើបាបនៃសេចក្តីឆ្មើងឆ្មៃនៅក្នុងជីវិតរបស់អ្នក ។ សូមគិតអំពីស្ថានភាព ឬទំនាក់ទំនងជាក់លាក់នានាដែលអ្នកបង្ហាញសេចក្តីឆ្មើងឆ្មៃ ។ សូមព្យាយាមទទួលស្គាល់ពីរបៀបដែលសេចក្តីឆ្មៃងឆ្មៃអាចជះឥទ្ធិពលលើទំនាក់ទំនងរបស់អ្នក ។ សូមស្វែងរកជំនួយពីព្រះវរបិតាសួគ៌ តាមរយៈព្រះវិញ្ញាណបរិសុទ្ធ ដើម្បីប្រែកាន់តែដូចជាព្រះអង្គសង្គ្រោះ ដោយទប់ទល់នឹងសេចក្តីឆ្មើងឆ្មៃ នៅពេលអ្នកធ្វើកិច្ចការខាងក្រោមនេះ ៖
-
សូមជ្រើសរើសការបង្ហាញសេចក្តីឆ្មើងឆ្មៃមួយនៅចំហៀងខាងឆ្វេងសៀវភៅកំណត់ហេតុការសិក្សារបស់អ្នក ដែលអ្នកទទួលអារម្មណ៍បំផុសគំនិតឲ្យផ្តោតលើការយកឈ្នះនៅពេលនេះ ។
-
នៅចំហៀងខាងស្តាំសៀវភៅកំណត់ហេតុការសិក្សារបស់អ្នក សូមជ្រើសរើសរបៀបមួយដែលអ្នកអាចទប់ទល់នឹងការបង្ហាញសេចក្តីឆ្មើងឆ្មៃនោះ ។ សូមគិតអំពីលក្ខណៈដូចព្រះគ្រីស្ទ ហើយសរសេរសកម្មភាពជាក់លាក់ដែលអ្នកអាចធ្វើបាន ។