Abuso
Pagpugong ug Pagtubag sa Pag-abuso: Outline sa Instruksiyon alang sa mga Miting sa Konseho sa Stake ug sa Ward

“Pagpugong ug Pagtubag sa Pag-abuso: Outline sa Instruksiyon alang sa mga Miting sa Konseho sa Stake ug sa Ward,” Unsaon sa Pagtabang (2018).

“Pagpugong ug Pagtubag sa Pag-abuso,” Unsaon sa Pagtabang.

Pagpugong ug Pagtubag sa Pag-abuso

Kini nga dokumento nag-summarize sa kasamtangang mga polisiya ug mga lagda sa Simbahan bahin sa pag-abuso. Ang tanang mga lider sa pagkapari ug sa organisasyon sa Simbahan kinahanglang mapamilyar ug motuman niini aron makatabang sa pagpanalipod sa mga anak sa Dios.

Unsa Ang Pag-abuso?

Ang pag-abuso mao ang pagmaltrato o pagpasagad sa uban (sama sa anak o kapikas, sa mga tigulang, o sa mga baldado) sa paagi nga makahatag og pisikal, emosyonal, o sekswal nga kadaot.

Ang pag-abuso maoy hinungdan sa kalibog, pagduha-duha, kawalay pagsalig, ug kahadlok diha sa mga biktima ug usahay mopahamtang og pisikal nga kadaot. Kasagaran, apan dili tanan, ang mga alegasyon sa pag-abuso tinuod ug kinahanglang seryosohon ug atimanon uban sa tumang pag-amping. Ang pag-abuso mahimong mas mograbe sa ngadto-ngadto.

Ang Ginoo mikondenar sa bisan unsang klase sa pag-abuso—lakip na ang pagpasagad ug pisikal, sekswal, o pinaagi sa pulong nga pag-abuso. Kasagaran sa pag-abuso nakalapas sa sibil nga mga balaod sa katilingban. (Tan-awa sa sulat sa Unang Kapangulohan, “Responding to Abuse,” Hulyo 28, 2008.)

Pagtudlo sa Doktrina

Ang mga kapangulohan sa stake ug mga bishopric kinahanglang mosiguro nga kon unsay ilang isulti mahitungod sa pag-abuso gibase sa doktrina sa Simbahan. Sa piho, kinahanglan nilang itudlo ang mosunod:

Mahinungdanong mga Mensahe

Sa Unsang Paagi nga Mapugngan ang Pag-abuso?

Diha sa Panimalay

Ang mga lider sa Simbahan kinahanglang mobuhat sa mosunod aron sa pagtabang nga mapugngan ang pag-abuso diha sa panimalay:

  • Awhagon ang mga managtiayon ug mga pamilya nga magsunod sa ebanghelyo diha sa panimalay. Kinahanglan silang moestablisar og mga kinaiya sa pagkamabination, pagrespeto, ug bukas nga komunikasyon aron ang tanang mga sakop sa pamilya komportable nga maghisgot sa sensitibo nga mga butang (tan-awa sa “Ang Pamilya: Usa ka Pamahayag ngadto sa Kalibotan,” https://www.churchofjesuschrist.org/study/scriptures/the-family-a-proclamation-to-the-world/the-family-a-proclamation-to-the-world?lang=ceb).

  • Awhagon ang mga ginikanan sa pagtudlo sa mga anak og impormasyon ug mga kahanas nga tukma sa ilang pangedaron ug kahamtong aron mahibalo sila kon unsay buhaton kon makasinati og pag-abuso.

  • Himoa nga nahibalo ang mga miyembro sa mga kapanguhaan sa Simbahan.

Diha sa Simbahan

Ang mga lider sa Simbahan kinahanglang mosunod niining mga lagda aron sa pagtabang nga mapugngan ang pag-abuso diha sa Simbahan:

  • Ang usa ka tawo kinahanglang dili gayod hatagan og calling sa Simbahan o buluhaton nga maglambigit sa pagtrabaho uban sa mga bata o mga batan-on kon ang iyang rekord sa pagkamiyembro wala diha sa ward o kon kini adunay anotasyon tungod sa pag-abuso (tan-awa sa Kinatibuk-ang Tamdanan nga Basahon, 38.6.2, 12.5.1).

  • Kon ang mga hamtong nagtudlo sa mga bata o kabatan-onan diha sa Simbahan, dili mominos duha ka responsable nga mga hamtong ang kinahanglan nga anaa. Ang duha ka mga hamtong mahimong duha ka lalaki, duha ka babaye, o minyo nga managtiayon (tan-awa sa Kinatibuk-ang Tamdanan nga Basahon, 12.5.1).

  • Kon asa dili praktikal nga adunay dili mominos sa duha ka mga hamtong diha sa klasehanan, ang mga lider kinahanglang mokonsiderar nga usahon ang mga klase.

  • Dili mominos sa duha ka mga hamtong ang kinahanglan gayod nga anaa sa tanang mga kalihokan nga pasiugdahan sa Simbahan nga tambongan sa mga batan-on o mga bata.

  • Kon ang usa ka brother moapil sa bisita sa pagpangalagad ngadto sa indibidwal nga babaye, kinahanglan siyang moadto uban sa iyang kompanyon o uban sa iyang asawa.

  • Kon ang usa ka sakop sa kapangulohan sa stake o sa bishopric o laing gisangonan nga lider makighimamat sa usa ka bata, batan-on, o babaye, kinahanglan siyang mohangyo og usa ka ginikanan o laing hamtong nga maanaa sa tupad nga kwarto, foyer, o hawanan. Kon gusto sa tawo nga giinterbiyo, laing hamtong ang mahimong dapiton nga moapil diha sa interbiyo. Ang mga lider kinahanglang maglikay sa tanang kahimtang nga mahimong masaypan pagsabot (tan-awa sa Kinatibuk-ang Tamdanan nga Basahon, 12.5.1).

  • Sa tibuok gabii nga mga kalihokan nga pasiugdahan sa Simbahan, ang usa ka bata o batan-on dili mahimong magpabilin diha sa tolda o kwarto sa usa ka hamtong nga lider gawas kon ang hamtong iyang ginikanan o tigbantay o adunay dili mominos sa duha ka hamtong diha sa tolda o kwarto kinsa kapareha og sekso sa bata o sa batan-on (tan-awa sa Kinatibuk-ang Tamdanan nga Basahon, 12.2.1.3).

  • Kon ang hamtong nga mga lider ug ang mga bata o mga batan-on magdungan og gamit sa ubang mga pasilidad sa tibuok gabii, sama sa usa ka kamaroti [cabin], kinahanglan gayod nga adunay dili mominos sa duha ka hamtong diha sa pasilidad ug kinahanglan gayod nga kapareha sila og sekso sa mga bata o sa mga batan-on (tan-awa sa Kinatibuk-ang Tamdanan nga Basahon, 12.2.1.3).

Pagtubag sa Pag-abuso

(Tan-awa sa Kinatibuk-ang Tamdanan nga Basahon, 38.6.2.1.)

Ang mga lider ug mga miyembro sa Simbahan kinahanglang mosunod niining mga lagda kon motubag sa pag-abuso:

  • Kon mahitabo ang pag-abuso, ang una ug diha-diha nga responsibilidad sa mga lider sa Simbahan mao ang pagtabang niadtong giabuso ug sa pagpanalipod sa mga tawo nga daling mabiktima gikan sa umaabot nga pag-abuso. Ang mga miyembro kinahanglang dili gayod awhagon nga magpabilin diha sa panimalay o sitwasyon nga anaa ang pag-abuso o dili luwas.

  • Ang mga lider ug mga miyembro sa Simbahan kinahanglang magmabination, maloloy-on, ug sensitibo kon makigtambayayong sa mga biktima ug sa mga nakahimo sa pag-abuso ug sa ilang mga pamilya.

  • Ang mga lider sa Simbahan kinahanglang dili gayod mobaliwala sa usa ka report bahin sa pag-abuso o motambag sa miyembro nga dili moreport sa kriminal nga kalihokan ngadto sa mga tinugyanan sa balaod.

  • Ang mga lider ug mga miyembro sa Simbahan kinahanglang motuman sa tanang legal nga mga obligasyon sa pag-report sa pag-abuso ngadto sa sibil nga mga awtoridad.

  • Ang mga lider sa pagkapari kinahanglang motabang niadtong nakahimo sa pag-abuso nga maghinulsol ug mohunong sa ilang abusado nga kinaiya (tan-awa sa Isaias 1:18; Doktrina ug mga Pakigsaad 64:7).

  • Ang propesyonal nga pagtambag mahimong makatabang sa mga biktima ug sa mga nakahimo sa pag-abuso ug sa ilang mga pamilya. Hapit kini kanunayng itambag sa mga kaso sa grabe nga pag-abuso.

Pagtudlo sa mga Konseho sa Stake ug sa Ward

Ang mga kapangulohan sa stake ug mga bishopric kinahanglang mopresentar niining impormasyon diha sa mga miting sa konseho sa stake ug sa ward. Ang mga sakop sa mga konseho sa stake ug sa ward kinahanglan dayong maghisgot niining materyal diha sa ilang tagsa-tagsa ka kapangulohan ug mga miting sa pagpangulo ug ngadto sa uban, kon gikinahanglan:

  • Ang mga sakop sa mga konseho sa stake ug sa ward kinahanglan nga motudlo sa importante nga mga mensahe dinhi niini nga latid (outline) ug modapit og panaghisgotanay gikan sa hamtong nga mga lider sa pagkapari ug organisasyon sa Simbahan. Isip kabahin sa panaghisgotan, mahimo nilang sugdan pinaagi sa pagtan-aw sa bidyo nga “Panalipdi ang Bata: Pagtubag sa Pag-abuso sa Bata [Protect the Child: Responding to Child Abuse],” nga makita ubos sa “Unsaon sa Pagtabang [How to Help]” diha sa Abuso [Abuse] nga pahina sa Librarya sa Ebanghelyo [Gospel Library]. Tungod kay kining impormasyon sensitibo man, kinahanglan silang mangayo og giya sa Espiritu samtang magtudlo sila.

  • Kasagaran ang usa ka report bahin sa pag-abuso moabot ngadto sa kasaligan nga magtutudlo o tigtambag. Ang mga sakop sa mga konseho sa stake ug sa ward kinahanglang motabang sa mga lider, mga magtutudlo, ug mga miyembro nga mohimo og tukmang mga lakang sa pagpugong ug pagtubag sa pag-abuso, lakip na ang pag-report sa pag-abuso ngadto sa tukmang sibil nga mga awtoridad.

Polisiya ug Legal nga mga Isyu Kalabot sa Pag-abuso

Ang mosunod nga mga lagda makatabang sa mga lider sa Simbahan sa pagdumala sa polisiya ug legal nga mga isyu kalabot sa pag-abuso:

  • Tawag dayon sa help line sa 1-800-453-3860, ext. 2-1911, kon motubag og mga sitwasyon nga maglambigit og bisan unsang matang sa pag-abuso.

  • Alang sa mga lagda bahin sa pagdumala sa mga sitwasyon nga maglambigit og pag-abuso, ang mga presidente sa stake ug mga bishop kinahanglang motan-aw sa Kinatibuk-ang Tamdanan nga Basahon, 38.6.2.1.

  • Alang sa mga lagda bahin sa pagdumala og pagkompisal, pagpahiuli [restitution], imbestigasyon, komunikasyon ngadto sa naagrabyado nga mga biktima, ug sa pagkakompidensyal sa mga sitwasyon nga maglambigit og pag-abuso, ang mga presidente sa stake ug mga bishop kinahanglang motan-aw sa Kinatibuk-ang Tamdanan nga Basahon, 38.6.2.2.

  • Alang sa mga lagda bahin sa pagdumala og pagdisiplina diha sa Simbahan sa mga sitwasyon nga maglambigit og pag-abuso, ang mga presidente sa stake ug mga bishop kinahanglang motan-aw sa Kinatibuk-ang Tamdanan nga Basahon, 38.6.2.

  • Ang mga lider sa Simbahan kinahanglang dili motestigo diha sa mga kasong sibil o kriminal nga maglambigit og pag-abuso nga dili una makig-istorya sa Office of General Counsel sa punoang buhatan sa Simbahan (1-800-453-3860, ext. 2-6301). Alang sa piho nga mga lagda, tan-awa sa Kinatibuk-ang Tamdanan nga Basahon, 38.6.2.1.

Ubang mga Kapanguhaan