Abuso
Unsaon sa mga Lider sa Simbahan Pagsuporta ang mga Biktima sa Pang-abuso?

“Unsaon sa mga Lider sa Simbahan Pagsuporta ang mga Biktima sa Pang-abuso?” Unsaon sa Pagtabang (2018)

“Unsaon sa mga Lider sa Simbahan Pagsuporta ang mga Biktima sa Pang-abuso?” Unsaon sa Pagtabang

Unsaon sa mga lider sa Simbahan pagsuporta ang mga biktima sa pang-abuso?

Ang mga bishop, mga presidente sa branch, ug mga presidente sa stake kinahanglang motawag dayon sa eklesyastikal nga help line sa Simbahan matag higayon nga makahibalo sila bahin og pag-abuso alang sa abag sa pagtabang sa mga biktima ug mahimo ang mga gikinahanglan nga mga report. Ang tabang nga gihatag makagiya sa mga paningkamot sa konseho sa ward sa pagsuporta sa mga biktima sa pang-abuso.

Tungod sa truma sa pang-abuso, ang mga biktima tingali maapektohan sa pisikal, espirituwal, mental, ug sa emosyonal nga paagi. Isip usa ka lider, tingali ikaw adunay pangutana mahitungod kon unsaon sa pagtabang.

Ang pagdugang sa imong kahibalo ug pagsabot sa mga epekto sa pang-abuso makatabang kanimo sa pagsuporta, pagpangalagad, ug epektibong paghatag og espirituwal nga giya ug suporta.

Pagsabot sa mga Biktima

Ang mga biktima sa pang-abuso mahimong maghunahuna, mobati ug molihok sa lahi na kay sa kaniadtong ilang naandan sa wala pa sila abusari. Sa imong tinguha sa pagsuporta sa mga biktima, pangita og impormasyon aron makatubag sa sensitibong paagi. (Tan-awa sa “Unsaon nako pagsuporta ang usa ka tawo kinsa giabuso?” alang sa dugang nga impormasyon kon unsaon sa paghatag og suporta).

Mahimong sensitibo sa mosunod samtang ikaw motabang niini nga mga miyembro:

Pag-ugmad og mga pagsalig

Ang abuso makaguba sa pagsalig, bisan niadtong kinsa sagad masaligan, lakip sa mga sakop sa pamilya, mga higala, mga lider sa Simbahan, ug sa Dios. Bisan kon ang mga biktima moduol kanimo alang sa suporta, wala kana nagpasabot nga ikaw gisaligan. Ang mga biktima mahimong mangita og mga tawo nga ilang gilaoman nga masaligan.

Komon alang sa mga biktima sa pang-abuso nga mopakigbahin lamang og porsiyon sa ilang kasinatian (tan-awa sa “Unsa kaha kon ako naglisod sa pagsalig sa uban? [What if I am struggling with trusting others?]”). Magkinahanglan ka nga mogahin og dugang nga panahon sa pag-ugmad og relasyon sa pagsalig ug pagtubag sa kahilwasan ug ubang mga kabalaka.

Unsay imong mahimo:

  • Tinguhaa ang pagtubag inubanan sa gugma.

  • Tuohi ang ilang kasinatian.

  • Pagmatinuoron ug ayaw paglipud-lipod.

  • Pakigsulti sa miyembro kanunay atol sa inyong (mga) panaghisgotan mahitungod kon unsay imong mahimo aron sa pagtabang kaniya nga mobati nga luwas (pananglitan, pangutan-a siya kon gusto ba niya nga adunay mokuyog kaniya, tugoti ang survivor nga mopili kanus-a ug asa kamo magkita ug motino kon komportable ba siya sa mga hilisgotan nga gihisgotan)

  • Klaroha nga ipasabot ang imong mga hunahuna ug mga aksiyon ug awhaga ang mga biktima sa pagpangutana kon wala sila makasabot.

  • Pag-amping sa imong mga pulong. Ang pagsulti og mga butang sama sa “kalimti na lang kini” o “panahon na nga mopadayon,” makapahimo nila nga mobati nga ikaw wala magpakabana o nga ikaw nagtuo nga sila nagpasulabi (tan-awa sa “Mga Emosyon, mga Hunahuna, ug mga Kinaiya nga Nasinati Kanunay sa mga Survivor sa Sekswal nga Pang-abuso”).

  • Pagmakanunayon sa imong mga inter-aksiyon.

  • Sunda ang unsay imong gisulti nga imong buhaton.

Ipanghimatuod ang bili ug ang katakos

Ang abuso kanunay makadaot ngadto sa hugot nga pagtuo sa biktima. Kadaghanan sa mga biktima mobati nga gibiyaan sa Dios ug naghunahuna ngano nga wala Siya manalipod kanila o mopahunong sa pang-abuso. Kasagaran sayop nilang basolon ang ilang mga kaugalingon tungod sa pang-abuso. Kadaghanan sa mga biktima nagduhaduha sa ilang kabililhon. Ang pipila hilabihan nga magatutok sa pagkarelihiyoso aron matabonan ang ilang personal nga mga pagbati sa dili pagkatakos. Ang uban mahimong mawad-an og paglaom ug makigbisog sa ilang hugot nga pagtuo o mahimong mopahilayo gikan sa espirituwal nga mga kalihokan.

Unsaon nimo sa pagtabang:

Klaroha ang kalisdanan

Ang mga biktima mahimong sayop nga magtuo nga ang abuso usa ka pagsulay nga gihatag kanila sa Langitnong Amahan aron sila makat-on og usa ka butang. Tingali gisultihan sila nga ang pagsinati sa pang-abuso gikinahanglan alang sa ilang pagtubo o nga kini kabahin sa plano alang sa ilang kinabuhi. Sayop kini nga doktrina; ang Ginoo dili mao ang naghimo o tinubdan sa mga kabangis diha sa mga kinabuhi sa Iyang mga anak (tan-awa sa Santiago 1:13, 17; 2 Nephi 26:24; Omni 1:25; Alma 5:40; Moroni 7:12). Kining sayop nga ideya makapahimo nila sa pagpangita sa positibo diha sa ilang sitwasyon ug mosulay sa pagbalewala sa ilang kasakit. Makapahimo usab kini kanila sa paghunahuna nga ang Dios gusto nga sila mag-antos.

Unsay imong mahimo:

  • Likayan ang pagsulti sa mga biktima nga ang Dios mihatag kanila niini nga pagsulay aron sila adunay makat-onan o nga kini ilang giuyonan didto sa kinabuhi sa wala pa dinhi sa yuta.

  • Tabangi sila nga makasabot nga ang pang-abuso mao ang direkta nga resulta sa pagpili sa laing tawo sa paggamit sa iyang kabubut-on sa sayop nga paagi.

  • Tudloi ang mga biktima nga ang Dios naghigugma kanila ug nga sila “pagabuligan sa ilang mga pagsulay ug sa ilang mga kasamok, ug sa ilang mga kasakit, ug pagabayawon sa kataposan nga adlaw” (Alma 36:3).

Palig-ona ang kaugalingong tagal sa panahon sa survivor alang sa pagkaayo ug kapasayloan

Ang mga biktima kanunay mobati nga mapugos sa pagpasaylo sa tagsala sa dili pa sila andam. Kon gisultihan sila nga mopasaylo sa dili eksaktong panahon, tingali sila magtuo nga ang gikinahanglan sa tagsala nga pasaylo mas dako pa kay sa ilang panginahanglan sa pagkaayo. Samtang ang mga biktima mamaayo, ang abilidad sa pagpasaylo moabot.

Unsay imong mahimo:

  • Tabangi ang mga biktima nga motutok sa ilang kaugalingong pagkaayo.

  • Tabangi ang survivor nga magmapailobon sa iyang kaugalingong tinguha sa pagpasaylo. Likaye ang pagtakda og tagal sa panahon alang sa pagkaayo ug pagpasaylo. Paminaw sa mga biktima aron makasabot kon kanus-a sila andam sa panabang sa pagpaningkamot sa pagpasaylo. Kining mga lakang sa pagkaayo makapahimo sa pagpasaylo nga posible (tan-awa sa “Mahimo ba akong maayo gikan niini? [Can I heal from this?]” ug “Posible ba nga mopasaylo? [Is it possible to forgive?]”).

  • Tabangi ang survivor sa pagsalig sa kataposang balaod sa hustisya sa Ginoo sa kinabuhi sa tagsala.

Tabangi sila nga mopasaylo sa ilang kaugalingon

Ang mga biktima mahimong mohimo og dili maayo nga mga pagpili isip usa ka paagi sa pagsugakod sa truma o kasakit gikan sa pang-abuso. Pananglitan, ilang sulayan nga ipaminhod ang sakit ug truma pinaagi sa paggamit og alkohol ug mga druga. Tingali sila maglisod sa pagpasaylo sa ilang mga kaugalingon tungod niini nga mga pagpili.

Unsay imong mahimo:

  • Pahinumdomi sila nga sila gimahal.

  • Tugoti sila sa paghisgot sa mga butang nga ilang gituohan nga sila nagkinahanglan og pasaylo o kinahanglan nga hinulsolan.

  • Dili mokonsentir sa iyang mga kinaiya, sa maluluy-ong paagi hisgoti uban sa survivor ang iyang mga aksiyon ug ang mga paagi nga kadtong mga aksiyon gigamit sa pagsugakod sa truma sa pang-abuso.

  • Ipaniguro kanila ang kaluoy ug gugma sa Manluluwas.

  • Ipaniguro kanila ang imong dili mausab nga positibo nga mga pagbati mahitungod kanila.

  • Tabangi sila sa ilang dalan sa pagpasaylo sa kaugalingon.

  • Awhaga sila sa pagsabot nga ang ilang bishop makatabang kanila nga makahibalo unsa ang hinulsolan ug unsa ang dili kinahanglan nga hinulsolan.

Hibaloi ang ilang pagkapribado

Daghang mga biktima sa pang-abuso sensitibo sa ilang pagkapribado. Dili sila kanunay komportable sa pisikal nga pagkontak. Kon sila pangutan-on kon ok ra ba nga gakson sila, kasagaran moingon sila og oo, apan sa tinuod gusto sila nga moingon og dili.

Unsay imong mahimo:

  • Tabangi ang mga biktima pinaagi sa pagtahod sa ilang pagkapribado.

  • Tugoti ang biktima sa paghisgot sa pisikal nga paghikap nga komportable siya (kon kini ba walay paghikap, usa ka paglamano, o usa ka paggakos). Tugoti sila nga mosugod niini nga panagsultihanay o mahimong mobati sila nga wala gikinahanglan nga pugson sila sa pagtubag

  • Hibaloi nga ang mga biktima kasagaran ibaliwala ang ilang kaugalingong pisikal nga kahupayan aron mapahimuot ang uban.

Suportahi ang biktima taliwala sa mga pahinumdom sa truma

Ang truma sa pang-abuso makapahimo sa mga biktima sa kakuyaw sa mga pagkaukyab, nga mao ang mga pagpahinumdom sa unsay nahitabo. Ang mga pagkaukyab mahitabo sa bisan asa sa bisan unsang orasa. Ang survivor mahimong maukyab pinaagi sa butang nga ilang makita, mapanimahoan, madungog, ug uban pa. Kon ang mga biktima “maukyab” kasagaran mabati nila ang mga simtoma nga susama sa unsay ilang nasinati sa panahon nga sila giabusohan. Kini mahimong maglakip sa hilabihan nga pagkaalinggat sa ilang palibot, dugang nga kabalaka, dugang nga gikusgon sa pagpitik sa kasingkasing, pagsingot, pagkurog, kataranta, o ang panginahanglan nga mopahilayo sa uban.

Unsay imong mahimo:

  • Kon ang mga biktima mopakigbahin niini nga mga pagbati diha kanimo:

    • Ipaneguro nga kadtong mga pagbati tinuod ug komon lang.

    • Tugoti ang biktima sa paghisgot sa ilang mga panginahanglan niini nga mga sitwasyon.

    • Suportahi ang mga panginahanglan sa biktima.

  • Kon ang usa ka biktima naukyab dihang nakig-uban nimo

    • Ipaneguro sa biktima nga siya luwas ra.

    • Tugoti ang survivor sa pagbiya kon siya mobati sa panginahanglan nga mobiya.

    • Tugoti ang survivor og dakong lugar; tingali kinahanglan niya nga ikaw mobiya kaniya ug motugot kaniya nga makasugakod sa iyang pagkaukyab.

Pagtabang sa mga Biktima nga Mobati nga Luwas

Ang mga biktima kasagaran adunay malisod nga panahon nga mobati nga luwas sa pisikal ug emosyonal nga paagi. Ang paghimo og luwas nga kahimtang alang sa mga biktima makatabang nila nga makapalig-on sa pagsalig ug pagpangita og pagkaayo.

Kon makigkita sa mga biktima, ikonsiderar ang mosunod:

  • Pangutan-a kon gusto ba nila nga aduna pay laing tawo (sa ilang pagpili) nga mouban.

  • Pangutan-a kon gusto ba nila nga abli ang pultahan.

  • Dapita sila sa paglingkod bisan asa nga labing komportable sila.

Kon ang biktima anaa sa samang kongregasyon sa tagsala, hinumdomi nga ang kaseguroan sa biktima ang labing importante. Ikonsiderar unsay imong mahimo sa pagtabang sa biktima nga mobati nga luwas nga moapil sa mga tulumanon o mga kalihokan sa Simbahan.

Pagkuha og Tabang alang sa mga Biktima

Ang mga biktima mahimong magkinahanglan og daghan nga mga tinubdan sa suporta samtang sila maningkamot sa proseso sa pagkaayo. Ang mga bishop ug ubang mga lider sa Simbahan mahimong mokonsulta sa Pamilya nga Pangserbisyo [Family Services], kon anaa, mahitungod kon unsaon nga labing masuportahan ang mga biktima ug makakita sa anaa nga mga kapanguhaan.

Kon magtabang og mga biktima nga makakuha og suporta, ikonsiderar ang mosunod:

  • Pagtanyag nga motabang sa mga biktima sa pagkuha og propesyonal nga tabang.

  • Likayan ang paghatag og tagal sa panahon kon unsa ka taas molungtad ang pagtambag. Hibaloi nga ang gitas-on sa panahon sa pagtambag magkalahi, depende sa sitwasyon sa indibidwal.

(Mga Bishop lamang)

  • Kon gihatagan og pagtugot, konsultaha pirme ang terapista sa biktima.

  • Ikonsiderar ang pagbayad sa kantidad sa propesyonal nga pagpatambag, bisan pa sa abilidad sa biktima sa pagbayad (kini mahimong bayaran pinaagi sa mga kapanguhaan sa halad sa puasa).

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gihimo, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kining mga materyal gitumong aron magsilbi isip dugang nga mga kapanguhaan, ang Simbahan wala mag-endorso sa bisan unsa nga sulod [content] nga wala mahisubay sa mga doktrina ug mga pagtulon-an niini.)

May Kalabotan nga mga Artikulo