ខែ មេសា
ព្រះយេស៊ូវគ្រីស្ទបានស្តារសាសនាចក្ររបស់ទ្រង់ឡើងវិញនៅក្នុងថ្ងៃចុងក្រោយ
« យើងបានបញ្ជូនភាពពោរពេញនៃដំណឹងល្អរបស់យើងដោយ ដៃយ៉ូសែប ជាអ្នកបម្រើរបស់យើង » ( គ. និងស. 35:17) ។
សូមបន្ថែមគំនិតទាំងឡាយដែលបានផ្តល់ឲ្យត្រង់ចំណុចនេះទៅនឹងគំនិតរបស់អ្នក ។ នៅរៀងរាល់សប្តាហ៍ សូមដាក់ផែនការដើម្បី (1) ស្វែងរកគោលលទ្ធិ (2) ជួយកុមារយល់ពីគោលការណ៍នោះ ហើយ (3) ជួយឲ្យពួកគេអនុវត្តគោលការណ៍នោះនៅក្នុងជីវិត ។ » សូមសួរខ្លួនអ្នកថា ៖ « តើកុមារត្រូវធ្វើអ្វីដើម្បីរៀន ហើយថាតើខ្ញុំអាចជួយពួកគេឲ្យទទួលអារម្មណ៍នៃព្រះវិញ្ញាណបរិសុទ្ធដោយរបៀបណា ? »
សប្តាហ៍ទី 1 ៖ បន្ទាប់ពីព្រះយេស៊ូវគ្រីស្ទ និងពួកសាវករបស់ទ្រង់បានទទួលមរណភាព ដំណឹងល្អនៃសេចក្តីពិតត្រូវបានបាត់បង់ ។
ស្វែងរកគោលលទ្ធិ( ពិភាក្សា )៖ សុំឲ្យកុមាររៀបរាប់ពីឈ្មោះនៃការណ៍មួយចំនួនដែលព្រះយេស៊ូវគ្រីស្ទបានបង្រៀន កាលដែលទ្រង់គង់នៅលើផែនដី ។ បង្ហាញរូបភាពនៃព្រះគ្រីស្ទធ្វើការតែងតាំងពួកសាវក ។ ពន្យល់ថា បន្ទាប់ពីព្រះគ្រីស្ទបានសុគត ហើយបានមានព្រះជន្មរស់ឡើងវិញ ពួកសាវករបស់ទ្រង់បានបង្រៀនដំណឹងល្អ ប៉ុន្តែមានមនុស្សជាច្រើនមិនបានស្តាប់តាមពួកគាត់នោះឡើយ មិនយូរប៉ុន្មាន ពួកសាវកបានទទួលមរណភាព ហើយសេចក្តីពិតដ៏មានសារៈសំខាន់មួយចំនួនអំពីដំណឹងល្អមិនមានគេបង្រៀនទៀតឡើយ ។ សូមសរសេរនៅលើក្តារខៀនថា ៖ « បន្ទាប់ពីព្រះយេស៊ូវគ្រីស្ទសុគត និងពួកសាវករបស់ទ្រង់បានទទួលមរណភាព នោះសេចក្តីពិតដំណឹងល្អត្រូវបានបាត់បង់ » ហើយសុំឲ្យកុមារថាតាមអ្នក ។
ការគូរគំនូរធ្វើឲ្យកុមារបង្ហាញពីការយល់ដឹងរបស់ពួកគេពីគោលការណ៍ដំណឹងល្អ ។ កុមារចូលចិត្តមើលរូបភាពរបស់ពួកគេ ធ្វើជាជំនួយដល់ចក្ខុ ។
លើកទឹកចិត្តឲ្យមានការយល់ដឹង ( គូរគំនូរ ) ៖ សូមសរសេរនៅលើក្តារខៀនពីគោលការណ៍ដំណឹងល្អមួយចំនួន ដែលត្រូវបានបាត់បង់ ឬផ្លាស់ប្តូរនៅពេលដែលមានការក្បត់សាសនា ( ឧទាហរណ៍ ពិធីបុណ្យជ្រមុជទឹក បព្វជិតភាព ព្រះវិហារបរិសុទ្ធ ព្យាការីដែលនៅរស់ និងពិធីសាក្រាម៉ង់ ) ។ សូមបំបែកកុមារទៅជាក្រុមតូចៗ ។ ឲ្យក្រដាសដល់ក្រុមនីមួយៗព្រមជាមួយនឹងគោលការណ៍ដំណឹងល្អនានានៅលើក្រដាសមួយសន្លឹក ហើយសុំឲ្យកុមារគូររូបភាពដែលតំណាងឲ្យគោលការណ៍នោះ ។ អញ្ជើញកុមារនៅក្នុងក្រុមនីមួយៗយករូបភាពរបស់ពួកគេបិទលើក្តារខៀន ។ សូមពន្យល់ថា នៅពេលដែលព្រះគ្រីស្ទគង់នៅលើផែនដី ទ្រង់បានបង្រៀនពីសេចក្តីពិតនៃដំណឹងល្អដ៏មានសារៈសំខាន់ទាំងនេះ ។ សុំឲ្យកុមារបិទភ្នែករបស់ពួកគេ ។ ដករូបភាពទាំងអស់ចេញ ហើយលាក់រូបទាំងនោះនៅកន្លែងណាមួយ ។ បន្ទាប់មក សុំឲ្យកុមារបើកភ្នែករបស់ពួកគេ ។ សូមពន្យល់ថា សេចក្តីពិតនៃដំណឹងល្អត្រូវបានបាត់បង់បន្ទាប់ពីព្រះយេស៊ូវគ្រីស្ទបានសុគត និងពួកសាវករបស់ទ្រង់បានទទួលមរណភាព ។ សុំប្រាប់កុមារថា ដំណឹងល្អត្រូវបានស្តារឡើងវិញតាមរយៈព្យាការីយ៉ូសែប ស្ម៊ីធ ។ សុំប្តូររូបភាព ហើយថ្លែងទីបន្ទាល់ថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានសេចក្តីពិតទាំងអស់ដែលបានបាត់បង់កាលពីគ្រាមួយនោះ ។ ( សូមរក្សារូបភាពដើម្បីប្រើប្រាស់សម្រាប់សប្តាហ៍ទី 4 ) ។
សប្តាហ៍ទី 2 ៖ ព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយដល់យ៉ូសែប ស្ម៊ីធ ។
ស្វែងរកគោលលទ្ធិ( មើលរូបភាព ) ៖ សូមបិទបំណែកក្រដាសតូចៗនៅលើរូបភាពទស្សននិមិត្តលើកដំបូង ។ អញ្ជើញកុមារឲ្យដកយកបំណែកក្រដាសម្តងមួយៗចេញ ។ ចូរសុំឲ្យកុមារលើកដៃឡើងដោយស្ងៀមស្ងាត់ នៅពេលពួកគេដឹងថារូបភាពនោះជាអ្វី ។ បន្ទាប់ពីបំណែកក្រដាសទាំងអស់ត្រូវបានដោះចេញ សូមឲ្យកុមារប្រាប់អ្នកថា តើមានអ្វីកើតឡើងនៅក្នុងរូបភាពនោះ ។
លើកទឹកចិត្តឲ្យមានការយល់ដឹង( ការអានព្រះគម្ពីរ ) ៖ ចូរបង្ហាញដល់កុមារពីកន្លែងនៅក្នុងព្រះគម្ពីរដែលយើងអាចអានពីការពិពណ៌នារបស់យ៉ូសែប ស្ម៊ីធស្ដីពីបទពិសោធន៍របស់លោកនៅក្នុងព្រៃពិសិដ្ឋ យ៉ូសែប ស្ម៊ីធ–ប្រវត្តិ 1:14–19 ។ ចូរអាន ឬសុំឲ្យកុមារមួយចំនួនអានខគម្ពីរខ្លះៗដែលរៀបរាប់ពីអ្វីដែលបានកើតឡើង ។ អ្នកគប្បីសុំឲ្យកុមារតូចៗឲ្យធ្វើនូវសកម្មភាពសាមញ្ញនានា ដូចជា ការក្រោកឈរ ហើយលើកដៃពួកគេឡើងទៅលើត្រង់ដូចជាដើមឈើ ឬឱបដៃហាក់ដូចជាពួកគេកំពុងតែអធិស្ឋាន ។ សូមសួរដល់កុមារថា តើពួកគេនឹងមានអារម្មណ៍បែបណាដែរ ប្រសិនបើពួកគេបានមើលឃើញព្រះវរបិតាសួគ៌ និងព្រះយេស៊ូវគ្រីស្ទយាងមក ហើយមានបន្ទូលទៅកាន់យ៉ូសែប ស្ម៊ីធនោះ ។ ចូរពិភាក្សាពីសារៈសំខាន់នៃព្រឹត្តិការណ៍នេះ ។
លើកទឹកចិត្តឲ្យមានការអនុវត្ត( ការចែកចាយពីទីបន្ទាល់ទាំងឡាយ ) ៖ សូមឲ្យកុមារច្រៀងបទ « ព្រៃពិសិដ្ឋ » ( ច.ក. 87 ) ។ បន្ទាប់មកថ្លែងទីបន្ទាល់របស់អ្នកថា ព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយដល់យ៉ូសែប ស្ម៊ីធ ។ អញ្ជើញកុមារពីរ ឬបីនាក់ឲ្យឡើងចែកចាយពីទីបន្ទាល់របស់ពួកគេស្ដីពីទស្សននិមិត្តដំបូង ។
សប្តាហ៍ទី 3 ៖ សិទ្ធិអំណាចបព្វជិតភាពត្រូវបានស្តារឡើងវិញតាមរយៈពួកសារទូតស្ថានសួគ៌ ។
ស្វែងរកគោលលទ្ធិ ( ច្រៀងចម្រៀង ) ៖ សួរកុមារពីរបៀបដែលពួកគេអាចប្រកាសពីអ្វីមួយដែលមានសារៈសំខាន់បំផុត ។ សូមពន្យល់ថា កាលពីបុរាណកាលគេផ្លុំត្រែ នៅពេលណាដែលមានសេចក្តីប្រកាសពីអ្វីមួយដែលមានសារៈសំខាន់ ។ សុំឲ្យកុមារបិទភ្នែករបស់ពួកគេ ហើយស្រមៃថា ពួកគេបានឮសម្លេងត្រែ នៅពេលដែលពួកគេឮសម្លេងព្យាណូ « បព្វជិតភាពត្រូវបានស្តារឡើងវិញ » ( ច…ក. 89 ) ។ សុំឲ្យកុមារច្រៀងចម្រៀង ហើយស្វែងរកសារលិខិតដែលមានសារៈសំខាន់ដែលប្រកាសនៅក្នុងចម្រៀងនេះ ។ សូមសួរកុមារពីរបីនាក់ឲ្យពន្យល់ពីអត្ថន័យនៃបទចម្រៀងនេះ ។
លើកទឹកចិត្តឲ្យមានការយល់ដឹង( ស្តាប់ភ្ញៀវឡើងនិយាយ ) ៖ សូមបង្ហាញរូបភាពការស្តារឡើងវិញនៃបព្វជិតភាពអើរ៉ុន និងការស្តារឡើងវិញនៃបព្វជិតភាពម៉ិលគីស្សាដែក ។ សូមអញ្ជើញអ្នកកាន់បព្វជិតភាពអើរ៉ុនម្នាក់ ឲ្យចែកចាយដំណើររឿងនៃការស្តារឡើងវិញនៃបព្វជិតភាពអើរ៉ុនឡើងវិញ ដោយត្រួសៗ ( សូមមើលគ. និង ស. 13; យ៉ូសែប ស្ម៊ីធ—ប្រវត្តិ 1:68–72 ) ។ បន្ទាប់មក អញ្ជើញអ្នកកាន់បព្វជិតភាពម៉ិលគីស្សាដែកម្នាក់ ឲ្យប្រាប់ដល់កុមារអំពីការស្តារឡើងវិញនៃបព្វជិតភាពម៉ិលគីស្សាដែក ( សូមមើល គ. និង ស. 27:12–13; យ៉ូសែប ស្ម៊ីធ —ប្រវត្តិ 1:72 ) ។ សូមបង្ហាញរូបភាពម្តងទៀត ហើយសុំឲ្យកុមារប្រាប់ពីឈ្មោះរបស់មនុស្សដែលមាននៅក្នុងរូបភាព ។
ភ្ញៀវកិត្តិយសអាចបន្ថែមអ្វីៗផ្សេងទៀត និងធ្វើឲ្យថ្នាក់កុមារចាប់អារម្មណ៍ ។
លើកទឹកចិត្តឲ្យមានការអនុវត្តន៍( ចែកចាយទីបន្ទាល់ ) ៖ សុំឲ្យថ្នាក់នីមួយៗសរសេរនៅលើក្រដាសពីការណ៍មួយដែលយើងមានសព្វថ្ងៃដោយសារតែមានបព្វជិតភាពអើរ៉ុន ត្រូវបានស្តារឡើងវិញ ( ឧទាហរណ៍ ពិធីបុណ្យជ្រមុជទឹក និងពិធីសាក្រាម៉ង់ ) ហើយនិងការណ៍មួយដែលយើងមាន ដោយសារបព្វជិតភាពម៉ិលគីស្សាដែកត្រូវបានស្តារឡើងវិញ ( ឧទាហរណ៍ ពិធីបញ្ជាក់ ប្រសិទ្ធពរជ័យដល់អ្នកដែលឈឺ ) ។ សុំឲ្យកុមារមួយចំនួនចែកចាយនូវអ្វីដែលពួកគេបានសរសេរ ។ បង្ហាញពីអំណរគុណរបស់អ្នកចំពោះពរជ័យទាំងឡាយដែលបានមកពីព្រះវរបិតាសួគ៌ដោយសារតែការស្តារឡើងវិញនៃបព្វជិតភាព ។
សប្តាហ៍ទី 4 ៖ ព្យាការីយ៉ូសែប ស្ម៊ីធ បានបកប្រែព្រះគម្ពីរមរមន និងបានសា្តរឡើងវិញនូវសេចក្តីពិតនៃដំណឹងល្អ ។
ស្វែងរកគោលលទ្ធិ និងលើកទឹកចិត្តឲ្យមានការយល់ដឹង( ពិភាក្សា ) ៖ ពីមុនចាប់ផ្តើមថ្នាក់អង្គការបឋមសិក្សា សូមសរសេរថា « យ៉ូសែប ស្ម៊ីធ បានបកប្រែព្រះគម្ពីរមរមន ហើយបានស្តារឡើងវិញនូវសេចក្តីពិតនៃដំណឹងល្អ » នៅលើក្រដាសមួយសន្លឹក ហើយសូមកាត់វាទុកធ្វើជាល្បែងផ្គុំពាក្យ ។ នៅលើខ្នងក្រដាសមួយសន្លឹកៗ សូមសរសេរឈ្មោះរបស់មនុស្សម្នាក់ ឬវត្ថុអ្វីមួយដែលទាក់ទងនឹងការបកប្រែនៃព្រះគម្ពីរមរមន ( ឧទាហរណ៍ យ៉ូសែប ស្ម៊ីធ , យូរ៉ីម និងធូមីម , ទេវតាមរ៉ូណៃ , ផ្ទាំងមាស , អំណាចនៃព្រះ និងអូលីវើ ខៅឌើរី ) ។ សូមឲ្យថ្នាក់នីមួយៗនូវបំណែកនៃល្បែងផ្គុំពាក្យ ហើយសុំឲ្យពួកគេពិភាក្សាអំពីរបៀបដែលវត្ថុ ឬបុគ្គលដែលនៅខាងខ្នងក្រដាសមានទំនាក់ទំនងនឹងព្រះគម្ពីរមរមន ។ សូមអញ្ជើញកុមារម្នាក់ៗឲ្យឡើងមកខាងមុខថ្នាក់ ឲ្យចែកចាយនូវអ្វីដែលពួកគេបានពិភាក្សា រួចដាក់ពាក្យផ្គុំរបស់ពួកគេនៅលើក្តារខៀន ។ នៅពេលដែលល្បែងផ្គុំពាក្យពេញលេញហើយ សូមអានឃ្លាជាមួយគ្នា ។
ល្បែងផ្គុំពាក្យមាននៅsharingtime.lds.org
លើកទឹកចិត្តឲ្យមានការយល់ដឹង( ស្តាប់ភ្ញៀវឡើងនិយាយ ) ៖ អញ្ជើញអ្នកដឹកនាំបព្វជិភាពម្នាក់ឲ្យបង្ហាញរូបយ៉ូសែប ស្ម៊ីធ និងប្រាប់នូវដំណើររឿងពីរបៀបដែលលោកបានបកប្រែព្រះគម្ពីរមរមន ។ សូមឲ្យរូបមួយចំនួនដែលមាននៅក្នុងសប្តាហ៍ទី 1 ឲ្យកុមារ ហើយសុំឲ្យភ្ញៀវកិត្តិយសចែកចាយអំពីរបៀបដែលគោលការណ៍ដំណឹងល្អត្រូវបានស្តារឡើងវិញ តាមរយៈយ៉ូសែប ស្ម៊ីធ ។ ភ្ញៀវកិត្តិយសអាចស្លៀកសម្លៀកបំពាក់ប្រពៃណីដូចជា ក្រវ៉ាតករជាបូរពណ៌ខ្មៅមួយ ។ អញ្ជើញគាត់ឲ្យផ្លាស់សម្លៀកបំពាក់ប្រពៃណីចេញ ហើយថ្លែងទីបន្ទាល់ពីព្យាការីយ៉ូសែប ស្ម៊ីធ ។
លើកទឹកចិត្តឲ្យមានការអនុវត្តន៍( ចែកចាយគំនិត ) ៖ សុំឲ្យកុមារក្រោកឈរ នៅពេលពួកគេអាចរៀបរាប់ពីគោលការណ៍ដំណឹងល្អមួយដែលត្រូវបានបាត់បង់ ហើយត្រូវបានស្តារឡើងវិញតាមរយៈព្យាការី យ៉ូសែប ស្ម៊ីធ ។ សុំឲ្យកុមារពីរបីនាក់ចែកចាយពីគំនិតរបស់ពួកគេ ។ ចែកចាយទីបន្ទាល់របស់អ្នក ពីដំណឹងល្អដែលបានស្តារឡើងវិញ និងពីព្រះគម្ពីរមរមន ។