ខែ ធ្នូ
ខ្ញុំដឹងថាព្រះយេស៊ូវគ្រីស្ទនឹងយាងមកម្តងទៀត
« ខ្ញុំដឹងថា អ្នកដែលលោះខ្ញុំ ទ្រង់មានព្រះជន្មរស់នៅ ហើយដល់ជាន់ក្រោយ ទ្រង់នឹងមកឈរនៅលើផែនដី » ( យ៉ូប 19:25 ) ។
សូមបន្ថែមគំនិតទាំងឡាយដែលបានផ្តល់ឲ្យត្រង់ចំណុចនេះទៅនឹងគំនិតរបស់អ្នក ។ នៅរៀងរាល់សប្តាហ៍ សូមដាក់ផែនការដើម្បី (1) ស្វែងរកគោលលទ្ធិ (2) ជួយកុមារយល់ពីគោលការណ៍នោះ ហើយ (3) ជួយឲ្យពួកគេអនុវត្តគោលការណ៍នោះនៅក្នុងជីវិត ។ សូមសួរខ្លួនអ្នកថា ៖ « តើកុមារត្រូវធ្វើអ្វីដើម្បីរៀន ហើយថាតើខ្ញុំអាចជួយពួកគេឲ្យទទួលអារម្មណ៍នៃព្រះវិញ្ញាណបរិសុទ្ធដោយរបៀបណា ? »
សប្តាហ៍ទី 1 ៖ ពួកព្យាការីបានទស្សន៍ទាយទុកជាមុនថា ព្រះយេស៊ូវគ្រីស្ទនឹងយាងមកកាន់ផែនដី ។
លើកទឹកចិត្តឲ្យមានការយល់ដឹង( ការអានព្រះគម្ពីរ ) ៖សូមដាក់តាំងរូបភាពរបស់អេសាយ នីហ្វៃ ស្តេចបេនយ៉ាមីន អ័ប៊ីណាដៃ អាលម៉ា និងសាំយ៉ូអែល សាសន៍លេមិន ពីសៀវភៅរូបភាពដំណឹងល្អ និងកញ្ចប់រូបភាពអង្គការបឋមសិក្សា 4 ។ សូមបំបែកកុមារទៅជាក្រុម ហើយឲ្យក្រុមនីមួយៗនូវបទគម្ពីរដូចខាងក្រោម ដើម្បីមើល ៖ (1) អេសាយ 7:14; 9:6; (2) នីហ្វៃទី 1 11:14–15, 20–21; (3) ម៉ូសាយ 3:5–8; (4) ម៉ូសាយ 15:1; (5) អាលម៉ា 7:10–12; និង (6) ហេលេមិន 14:1–3 ។ ប្រាប់ឲ្យពួកគេមើលថាតើព្យាការីមួយណាដែលកំពុងនិយាយ ហើយថាតើព្យាការីនោះទស្សន៍ទាយអំពីនរណា ។ សួរក្រុមនីមួយៗឲ្យបង្ហាញរូបភាពព្យាការី ហើយប្រាប់កុមារផ្សេងទៀតថាតើព្យាការីរូបនោះមានឈ្មោះអ្វី ហើយតើលោកមានប្រសាសន៍ដូចម្តេច ។ ( សម្រាប់កុមារតូចៗ ជួយស្លៀកពាក់ឲ្យកុមារប្រាំមួយនាក់នូវសម្លៀកបំពាក់បុរាណធម្មតា ដើម្បីធ្វើជាតំណាងធ្វើព្យាការីប្រាំមួយនាក់ ។ សូមប្រាប់ដោយសង្ខេបៗដល់ក្រុមនីមួយៗ នូវអ្វីដែលព្យាការីបានមានប្រសាសន៍ទាក់ទងនឹងកំណើត ហើយបេសកកម្មរបស់ព្រះយេស៊ូវគ្រីស្ទ ) ។ សូមពន្យល់ថា ព្យាការីទាំងនេះបានទស្សន៍ទាយជាមុនថា ព្រះយេស៊ូវគ្រីស្ទនឹងយាងមកផែនដី ។ ច្រៀង « Samuel Tells of the Baby Jesus » ( ច.ក. 36 ) ។ សូមថ្លែងទីបន្ទាល់ថា ព្រះយេស៊ូវគ្រីស្ទបានយាងមកផែនដីតាមដែលព្យាការីបានទស្សន៍ទាយ ។
សប្តាហ៍ទី 2 ៖ ព្រះយេស៊ូវគ្រីស្ទនឹងយាងមកផែនដីម្តងទៀត ។
ស្វែងរកគោលលទ្ធិ ៖សូមដាក់តាំងរូបភាពមួយនៃការយាងមកជាលើកទីពីរ ( ក. រ. ដ.ទំព័រ 66 ) ។ សូមរំលឹកកុមារថា ដំបូងឡើយ ព្រះយេស៊ូវគ្រីស្ទយាងមកផែនដីជាទារកនៅក្រុងបេថ្លេហិម ។ សូមពន្យល់ថា យើងរៀនពីព្រះគម្ពីរថា ទ្រង់នឹងយាងមកផែនដីម្តងទៀត ។
លើកទឹកចិត្តឲ្យមានការយល់ដឹង( លេងល្បែងផ្គូផ្គង ) ៖ សូមរៀបចំល្បែងផ្គូផ្គងពីរគូចេញពីសេចក្តីយោងបទគម្ពីរដូចខាងក្រោម ដោយដាក់សេចក្តីយោងបទគម្ពីរនីមួយៗនៅលើក្រដាសខុសៗគ្នា ៖ ម៉ាថាយ 16:27; ម៉ាថាយ 24:30, 36, 42; កិច្ចការ 1:9–11; គ. និង ស. 36:8; គ. និង ស. 45:57–59; គ. និង ស. 88:95–98 ។ សូមក្រឡាប់ ឬ ផ្កាប់មុខក្រដាសនៅលើក្តារខៀន ។ ឲ្យកុមារផ្លាស់ប្តូរវេនគ្នាដើម្បីរើសក្រដាស ។ បើកមុខក្រដាស ដើម្បីមើលថាតើវាត្រូវគូគ្នាឬអត់ ។ ប្រសិនបើវាមិនត្រូវគូគ្នាទេ បិទមុខវិញ ។ ប្រសិនវាត្រូវគូគ្នា សូមបង្ហាញខគម្ពីរ ហើយឲ្យកុមាររកមើលសេចក្តីយោងដើម្បីទទួលបាននូវអ្វីដែលវាបង្រៀនអំពីការយាងមករបស់ព្រះគ្រីស្ទម្តងទៀត ។ សូមបន្តធ្វើរហូតដល់គូទាំងអស់ត្រូវគ្នា ។
សប្តាហ៍ទី 3 ៖ ខ្ញុំនឹងរៀបចំខ្លួនដើម្បីរស់នៅជាមួយនឹងព្រះវរបិតាសួគ៌ និងព្រះយេស៊ូវគ្រីស្ទម្តងទៀត ។
ស្វែងរកគោលលទ្ធិ( លេងល្បែងទស្សន៍ទាយ ) ៖សុំឲ្យកុមារពីរបីនាក់សម្តែងជារៀបចំចូលដំណេក ទៅព្រះវិហារ ឬទៅដើរលេងឆ្ងាយ ។ សុំឲ្យកុមារផ្សេងទៀតទស្សន៍ទាយនូវអ្វីដែលកុមាររូបនោះកំពុងធ្វើ ។ សូមពិភាក្សាជាមួយកុមារថា នឹងមានអ្វីកើតឡើង បើសិនជាពួកយើងពុំបានរៀបចំសម្រាប់កិច្ចការទាំងនេះ ។ សូមពន្យល់ថា កិច្ចការដ៏សំខាន់មួយដែលយើងគួរតែធ្វើ គឺការរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទម្តងទៀត ។
សកម្មភាពទាក់ទាញអារម្មណ៍ទាំងឡាយដូចជា ការសម្តែងអាចប្រើប្រាស់ដើម្បីបង្កើតចំណាប់អារម្មណ៍ និងដើម្បីជួយកុមារឲ្យយកចិត្តទុកដាក់ទៅលើគោលបំណងនៃមេរៀន ។ កុមារទាំងឡាយណាដែលមិនចូលរួម នឹងត្រូវបានចូលរួមនៅពេលដែលពួកគេមើលកុមារផ្សេងទៀត ។
លើកទឹកចិត្តឲ្យមានការយល់ដឹង( ច្រៀងចម្រៀង ) ៖ សូមច្រៀងឃ្លាទីបីនៃបទ « ខ្ញុំជាកូនរបស់ព្រះ » ( ទំនុកដំកើង និងចម្រៀងកុមារាកុមារី ទំព័រ 58 ) ហើយអញ្ជើញកុមារឲ្យស្តាប់រកអ្វីដែលពួកគេអាចរៀបចំខ្លួន ដើម្បីរស់នៅជាមួយព្រះវរបិតាសួគ៌ម្តងទៀត ។ សូមអញ្ជើញកុមារឲ្យក្រោកឈរ ហើយច្រៀងឃ្លា « If I but learn to do his will » ម្តងទៀត ។ សូមពន្យល់ថា ចម្រៀងកុមារមួយចំនួន រំលឹកយើងពីអ្វីដែលយើងអាចធ្វើ ដើម្បីរៀបចំខ្លួនរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទម្តងទៀត ( ឧទាហរណ៍ បទ « ខ្ញុំនឹងធ្វើតាមផែនការរបស់ព្រះ » [ច.ក. ទំព័រ 164–65 ] « គោរពបទបញ្ញត្តិ » [ច.ក. ទំព័រ 146–47] « ចិត្តល្អចាប់ផ្តើមនឹងខ្ញុំ » [ច.ក. ទំព័រ 145] និង « ពេលខ្ញុំជ្រមុជទឹក » [ច.ក. ទំព័រ 103] ) ។ សូមឲ្យអ្នកលេងព្យាណូលេងពីរ បី ណោតភ្លេងក្នុងបទចម្រៀង ហើយឲ្យកុមារទស្សន៍ទាយថា តើបទនោះជាបទអ្វី ។ អញ្ជើញកុមារឲ្យច្រៀងបទនោះ ហើយក្រោកឈរនៅពេលដែលពួកគេច្រៀងអំពីអ្វីដែលពួកគេអាចរៀបចំខ្លួន ដើម្បីរស់នៅជាមួយព្រះវរបិតាសួគ៌ ។ សូមធ្វើដូចគ្នាដដែលនឹងបទផ្សេងទៀត ។
លើកទឹកចិត្តឲ្យមានការអនុវត្តន៍ ( គូរគំនូរ ) ៖ សូមឲ្យកុមារគិតពីវិធីទាំងឡាយដែលពួកគេអាចរៀបចំខ្លួន ដើម្បីរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទ ។ សូមឲ្យកុមារម្នាក់ៗ នូវក្រដាសមួយសន្លឹក ហើយអញ្ជើញពួកគេឲ្យគូររូបដៃរបស់ពួកគេ ។ បន្ទាប់មក សុំឲ្យពួកគេសរសេរ ឬគូរលើម្រាមដៃនីមួយៗនូវអ្វីមួយដែលពួកគេអាចធ្វើដើម្បីរៀបចំខ្លួន ។ សុំឲ្យកុមារជ្រើសរើសរឿងមួយដែលពួកគេអាចធ្វើនៅក្នុងសប្តាហ៍នេះ ។ សូមប្រាប់ពួកគេថា អ្នកនឹងសួរពួកគេនូវអ្វីដែលពួកគេបានធ្វើនៅថ្ងៃអាទិត្យក្រោយ ។
សប្តាហ៍ទី 4 ៖ ខ្ញុំមានទីបន្ទាល់ថា ខ្ញុំជាកូនរបស់ព្រះ ។
ស្វែងរកគោលលទ្ធិ( លេងល្បែងទស្សន៍ទាយ ) ៖ នៅលើក្តារខៀនសូមសរសេរថា « ខ្ញុំមាន ______________ » ។ សូមប្រាប់កុមារឲ្យស្តាប់ពីតម្រុយដូចខាងក្រោម ហើយឱបដៃ និងក្រោកឈរ នៅពេលដែលពួកគេគិតថាពួកគេអាចបំពេញក្នុងចន្លោះបាន ៖
-
ការធ្វើបែបនេះជួយឲ្យយើងមានអារម្មណ៍ល្អ សប្បាយ ឬកក់ក្តៅក្នុងចិត្ត ។
-
ព្រះវិញ្ញាណបរិសុទ្ធ ប្រទានការណ៍នេះដល់យើង ។
-
ការណ៍នេះ ជួយយើងឲ្យចង់ជ្រើសរើសត្រឹមត្រូវ ។
-
យើងអាចចែកចាយការណ៍នេះជាមួយនឹងអ្នកដទៃ នៅពេលយើងឡើងនិយាយនៅក្នុងថ្នាក់កុមារ ក្នុងរាត្រីជួបជុំក្រុមគ្រួសារ និងក្នុងការប្រជុំថ្លែងទីបន្ទាល់នៅថ្ងៃតមអាហារ ។
សួរថា ៖ « តើការណ៍ដ៏អស្ចារ្យនេះជាអ្វី ? » សូមបំពេញនៅក្នុងចន្លោះនូវពាក្យទីបន្ទាល់ហើយប្រាប់កុមារថា ពួកគេអាចមានទីបន្ទាល់មួយថា ពួកគេជាកូនរបស់ព្រះ ។
ការសរសេរគោលការណ៍ដំណឹងល្អ នឹងជួយកុមារចងចាំវា ។
លើកទឹកចិត្តឲ្យមានការយល់ដឹង ( ច្រៀងចម្រៀង ) ៖ អញ្ជើញកុមារឲ្យច្រៀងបទ « ខ្ញុំជាកូនរបស់ព្រះ » ( ទំនុកដំកើង និងចម្រៀងកុមារាកុមារី ទំព័រ 58 ) ហើយសុំឲ្យកុមារគិតអំពីរបៀបដែលពួកគេមានអារម្មណ៍នៅក្នុងចិត្តពេលពួកគេច្រៀង ។ សុំឲ្យកុមារពីរបីនាក់ចែកចាយថា តើពួកគេមានអារម្មណ៍យ៉ាងណា ។ សូមពន្យល់ថា អារម្មណ៍ល្អដែលពួកគេអាចទទួលបានគឺមកពីព្រះវិញ្ញាណបរិសុទ្ធ ដោយប្រាប់ថា ពួកគេពិតជាកូនរបស់ព្រះ ។ សូមពន្យល់ថា ការដឹងថារឿងនេះគឺពិត នោះវាមានន័យថា វាមានន័យយ៉ាងណាពេលមានទីបន្ទាល់ ។ សូមពន្យល់ថា មានវិធីជាច្រើនដើម្បីដឹងថា យើងជាកូនរបស់ព្រះ ។ សួរថា ៖ « តើអ្នកដឹងថាអ្នកជាកូនរបស់ព្រះបានយ៉ាងដូចម្តេច ? »
លើកទឹកចិត្តឲ្យមានការអនុវត្តន៍( ចែកចាយទីបន្ទាល់ ) ៖សួរកុមារថា ៖ « ហេតុអ្វីបានជាវាសំខាន់ដើម្បីមានទីបន្ទាល់ថា យើងជាកូនរបស់ព្រះ ? តើការមានទីបន្ទាល ជួយយើងធ្វើការជ្រើសរើសត្រឹមត្រូវយ៉ាងដូចម្តេច ? » សូមចែកចាយទីបន្ទាល់របស់អ្នក ហើយអញ្ជើញកុមារពីរបីនាក់ និងមជ្ឈឹមវ័យមួយចំនួនឲ្យចែកចាយទីបន្ទាល់របស់ពួកគេ ថាយើងជាកូនរបស់ព្រះ ។