Oketopa

O Le Tatalo o se Fesootaiga Migao i le va o le Atua ma Au

“Ae afai ua leai se poto i so outou, ina ole atu ia i le Atua, o Le foai tele mai i tagata uma ma le le toe tautaua; ona foaiina mai ai lea ia te ia” Iakopo 1:5 .

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: E mafai ona ou tatalo i le Tama Faalelagi.

Faailoa atu le aoaoga faavae: Talosaga atu i se matua ma se tamaitiiti e tutu i luma o tamaiti. Valaaulia le tamaititi e fai atu se fesili i sona matua, ma tuu atu i le matua e tali mai. Ona talosaga atu lea i le matua e tuua le potu ma tapuni le faitotoa. Fesili atu i tamaiti pe faapefea ona latou fesootai ma o latou matua pe afai latou te le o faatasi (mo se faataitaiga, tusiina o se tusi po o le talanoa i le telefoni). Faamatala atu o le Atua o lo tatou Tama ma o i tatou o Lana fanau; ona tatou te le o faatasi ma Ia, o lea ua Ia tuu mai ai ia i tatou se ala e talanoa atu ai ia te Ia. Fesili atu i tamaiti pe latou te iloa le auala tatou te talanoa atu ai i le Atua. Fai atu i tamaiti e faataitai mai ia te oe, “E mafai ona ou tatalo i le Tama Faalelagi.”

Uunaia le [agaga] malamalama: Usu le pese “Ou te Tatalo i le Faatuatua” (Liahona (Mati 1991), itulau e 5 (vaega a tamaiti). Fai se kopi o le tusi suesue o loo i le itulau e 19 o le tusi lesona a le vasega pepe, Vaai Ia I O Outou Tamaiti, mo tamaiti taitasi. Valaaulia ia tamaiti e valivali ia ata. (E mafai e tamaiti matutua ona tusi i luga o pepa faasolo ni mea latou te faafetai ai ma ni mea latou te ole atu ai i le Tama Faalelagi. E mafai ona e valaaulia i latou e faasoa mai ni o latou manatu i le Peraimeri atoa.) Tuu atu i tamaiti e toe usu le pese a o toe iloiloina a latou tusi faasolo.

O le fuafuaina o gaoioiga lea e faaaofia ai ia tamaiti i auala eseese e faaleleia ai le malamalama ma le faaaogaaga. Mo se faataitaiga, o lenei gaoioiga o le a pepese ai tamaiti, valivali, tusi, faalogo, ma fefaasoaai.

Vaiaso 2: E aoao mai e tusitusiga paia ia te au le auala ma le taimi e tatalo ai.

Faailoa atu le aoaoga faavae: Fesoasoani atu i tamaiti e tauloto le fuaiupu lenei mai le Alema 13:28: “A ia outou faamaulalo outou lava i luma o le Atua, ma ia valaau atu i lona suafa paia, ma ia mataala ma tatalo e le aunoa.” Ia talanoaina se mea o loo aoao mai e le mau e uiga i le auala ma le taimi e tatalo ai.

Uunaia le [agaga] malamalama: Fesoasoani i tamaiti ia malamalama e mafai ona tatou tatalo le leoa i o tatou loto i le Tama Faalelagi i soo se taimi, soo se nofoaga ma e tatau ona tatou faafetai ia te Ia mo o tatou faamanuiaga ma ole atu ia te Ia mo se fesoasoani. Tusi ia mau faasino ia i luga o le laupapa: 3 Nifae 18:19; 3 Nifae 19:6–8; 3 Nifae 18:15. Ma tusi foi ia upu auala ma le taimi i luga o le laupapa. Valaaulia ia tamaiti e sue ia mau taitasi ma talanoa le mea o loo aoao mai ia i tatou e uiga i le auala po o le taimi tatou te tatalo ai. Faamatala atu e uiga i le aoaoina e Alema ma Amuleka o sa Sorama i le auala e tatalo ai (tagai i le Alema 31; 34:17–27; tagai foi i le Peraimeri 4, lesona 21). Atonu e te manao e fai atu i ni nai tamaiti e faatino mai le tala a o e faamatalaina.

Uunaia le faaaogaaga: Valaaulia ni nai tamaiti e faasoa mai o latou lagona pe a latou tatalo. Fai atu i tamaiti e ta’u mai ni isi o pese o le Peraimeri o loo aoao ai le tatalo. Usu ni nai pese, ma valaaulia ia tamaiti e ta’u mai ni taga faigofie e sui ai se upu se tasi pe lua i pese taitasi. Mo se faataitaiga, na i lo le usuina o upu “tatalo” po o le “talosaga,” e mafai ona latou piilima.

Vaiaso 3: E faafofoga ma tali mai le Tama Faalelagi i au tatalo.

Faailoa atu le aoaoga faavae: Tuu atu i tamaiti e sue le 3 Nifae 14:7 ma le Iakopo 1:5. Valaaulia i latou e sue po o le a se mea o loo aoao mai e mau e uiga i le tatalo. Faitau leotele faatasi ia mau, ma tuu atu i tamaiti e faasoa mai mea na latou aoaoina. Valaaulia ia tamaiti tou te fai faatasi mai “E faafofoga ma tali mai e le Tama Faalelagi au tatalo”.

Uunaia le [agaga] malamalama ma le faaaogaina: Vaevae ia tamaiti i ni vaega, ma tuu atu ia i latou e auauai e asiasi atu i tulaga nei (tagai i le AALVSA, 179). I tulaga taitasi, fai atu i se faiaoga e faamalamalama se auala se tasi e tali mai ai e le Tama Faalelagi a tatou tatalo ma tuu atu i tamaiti le avanoa e faasoa mai ai se auala na tali mai ai a latou tatalo. Atonu e te manao e fuafua ni tulaga se lua e faia mo le vaiaso e tasi ma le isi lua tulaga mo le vaiaso e sosoo ai.

Tulaga 1: O ni isi taimi o a tatou tatalo e tali mai e ala mai manatu po o ni aitia lea e oo mai i o tatou mafaufau ma loto (tagai i le MFF 8:2). Faasoa atu se aafiaga i le taimi na tupu ai lenei mea i lou olaga, pe faamatala le tala ia Enosa (tagai i le Enosa 1:4–5, 10; tagai foi i le Vaai Ia I O Outou Tamaiti, 17).
Tulaga 2: E mafai ona faaaogaina e le Tama Faalelagi isi e tali mai ai ni tatalo. Faasoa atu se aafiaga i se taimi na taliina ai e se isi tagata au tatalo, pe faamatala atu le tala ia Peresitene Thomas S. Monson i le taliina o le tatalo a Ben ma Emily Fullmer (tagai i le Conference Report, Oke. 2003, 63; po o le Ensign, Nov. 2003, 58–59).
Tulaga 3: O tali o tatalo e mafai ona oo mai i afioga a Keriso, lea o loo maua i tusitusiga paia (tagai i le 2 Nifae 32:3). Faasoa atu se aafiaga i se taimi na e maua ai se tali o se tatalo a o e faitauina au tusitusiga paia.
Tulaga 4: O tali o tatalo e mafai ona oo mai mai aoaoga a perofeta o aso e gata ai (tagai i le MFF 1:38). Faaali atu i tamaiti se lomiga o le Ensign po o le Liahona, ma ta’u atu ia i latou e mafai ona latou mauaina aoaoga a perofeta i mekasini a le Ekalesia. Faasoa atu se aafiaga i le taimi na e maua ai se tali o se tatalo a o e faalogologo i le konafesi aoao pe faitau i saunoaga a perofeta o aso e gata ai.